Gayarati san hásügürün Masedónion?

1. Ka adügübei lun lásügürün Pábulu hama lánigu paaná Masedónion?

¹ Kéiburi lidan irumu 49 lárigiñe lidaani Hesusu, ñǘdünti apostolu Pábulu Antiokíagiñe le lóubawagubei Siria, lun lagumeseruni libiaman luéiyasun kei misioneru. Saminati meha labisidahani Éfesu luma amu burí uburugu Asia. Gama lumoun, yusuwati sífiri sandu lun lamisurahóun lun lásügürün Masedónion. Ánhati Pábulu hama lánigu paaná lau sun hagundan lun hásügürün Masedónion, ábati hagumeseruni furumiñeti burí damuriguaü lidan fulasu ligía (Adü. 16:9, 10; 17:1, 2, 4). Uguñe weyu, lidan saragu fulasu lidan sun Ubóu, wéiriti mégeiwa hamá nadagimeintiña lun wadagimanu lánina alubahóuni (Mat. 9:37, 38). Gayarati hamuga san hídehan?

2. Ka uagu masaminarun habéi somu gürigia háguyun lidoun amu ageiraü?

² Háfuga hínsiñeti hamuga giñe hun lun misioneru humá kei Pábulu, gama lumoun, masaminarungidün buidu lun háguyun lidoun amu ageiraü. Háfuga siñati hidin Leskuela Galaadü, ladüga hirumudiri o ladüga aban tan íbiri mamarieidungiru hugía, o ladüga ñǘbürigiña lan hisaanigu. Háfuga masaminaruntün háguyun lidoun amu ageiraü, ladüga samina humá siñabei lan hafurendeirun amu iñeñein. Odi ladüga lan turóbuli lánina seinsu, háguyunbei lidoun ageiraü le ñein hubéi guentó, ligíati hénrengu haali lubéi hun, lunya háguyun. Gama lumoun, lárigiñe hafurieidun ani samina hugíame luagun, háfuga gayara lan háguyun lidoun aban ageiraü le ñein lumuti mégeiwa lan ídemuei.

3. Ka uagu mama lubéi mosu leresibirúniwa arufudahani kei misioneru lun leseriwidúniwa buidu lidan amu ageiraü?

³ Mosu san larufudahóun woun kei houn misioneru? Ladüga meha afiñe lan Pábulu hama lánigu paaná luagu Heowá luma luagu lani sífiri sandu, ligía meha buidu lubéi lidin houn lidan hawadigimari (2 Ko. 3:1-5). Íbini siñá lan larufudahóun hun kei misioneru, gayarati hídehan lidan amu ageiraü. Haritagua huméi giñe, luagu resibi humá arufudahani gabügürüguati tidan Leskuela Kristiánu lánina Apurichihani luma Adamuridaguni lani Eseriwiduni. Anhein samina hubéi hidin Galaadü o tidoun aban Leskuela tibe tura, líderagubadün háguyun lidoun amu ageiraü lun hóuchuni, ida liña lan eseriwiduni kei misioneru, lun haranserun lubá heresibiruni arufudahani le.

4. Ka uagu moun lubéi hasaminarun íbirigu ha wéiyaaña luagu siñá lan houdin eseriwida lidan amu ageiraü?

⁴ Íbirigu ha wéiyaaña. Íbirigu ha wéiyaaña ha derebugutiña lidan afiñeni ani buiti hátuadi, gayarati híchugun saragu ídemuei lidan ageiraü le ñein lumuti mégeiwa hamá apurichihatiña. Gumuhali san hawadigimaridun ladüga hirumudiri? Añahein íbirigu buídurügüti seinsu le heresibirubei houn íbini mibe lan, lun hagañeihani le hemegeirubei, lidan añaha lan eseriwida lidan aban ageiraü gudemeti, le ñein lumuti maserun hamá ni surusiagu ha buítiña ni amu katei le sérubei lidan hageira.

5. Abahüdaha humá aban sügǘ luagu aban íbiri le águyubei lidoun amu ageiraü.

⁵ Aban íbiri le wéiyaali lidan afiñeni, prekursoru, le ñǘbuinbei lídangiñe aban ageiraü le ñein lubéi ladimurehóua inglesi ani mawadigimaridunhali, aba láguyun lidoun aban fulasu le ñein lumuti hasaríñaha gürigia, luagu suedi le lani Asia, lun líderagun nefu íbirigu ha adimurehabaña inglesi, ani mosu hapurichihan houn 30.000 gürigia terenchana. Lidan bián irumu dimí-sánhaña gürigia achülürütiña lidoun adamuridaguni. Ariñagati íbiri: “Lau náguyun lidoun fulasu le, resibi naali abinirúni burí létima wéiritimabei. Lóuguabei hamuga dan lun nadimurehan luagu sun abinirúni ligía”.

6. Abahüdaha humá aban sügǘ tuagu aban íbiri mamarieidungiru to águyuboun lidoun amu ageiraü.

⁶ Íbirigu würiña ha mamarieidungiña. Yusu laaña Heowá íbirigu würiña, lidan aban manera buiti lun hapurichihan lidan burí ageiraü le ñein lubéi mégeiwa hamá (Sal. 68:11). Saminaaru meha aban íbiri nibureintu lun tidin lidoun amu ageiraü lun taganwoundagüdüni tani ministeriu, gama lumoun nidiheritiña tagübürigu tuagu. Ligíati, tanúadirunbei aban ageiraü le derebuguti dandu lidan polítika kei lidan seinsu, aba tabürühan Betelirugun, aba hóunahan ariñahani buiti tun. Lidan sisi irumu le taubei lidan ageiraü ligía, resibitu saragu abinirúni. Aba tabahüdahan: “Lóuguati meha nichansin lun níchugun aturiahani tídangiñeti Bíbülia, nageira. Gama lumoun dan le náguyunbei ñeinhin lubéi mégeiwa hamá saragu apurichihatiña, aturiahatina hama saragu gürigia, ábati buídutima lan narufudahan”.

7. Abahüdaha humá aban sügǘ hawagu familia ha águyubaña lidoun amu ageiraü.

⁷ Iduheñu. Saminatün san luagu siñá lan háguyun lidoun amu ageiraü ladüga gasaanigu humá? Houcha hamuti aban familia hau bián hasaanigu —aban widü irumu lau, le aban diisi— lun hadügüni. Aba tariñagun úguchuru: “Teinki wamuti ya lan haweinamuda wasaanigu, ladüga ruti chansi houn lun hanaagun houngua hama prekursorugu espechalitiña luma hama misioneru. Weseriwidun ñein lubéi mégeiwa hamá apurichihatiña, buíngüda lumuti wabagari lau katei buiti”.

8. Gayarati san weseriwidun lidan amu ageiraü sin wafurendeirun amu iñeñein? Afuranguagüda huméi.

⁸ Lafurendeirúniwa amu iñeñein. Darasa lumutün san hasaminarun luagu hafurendeirun amu iñeñein? Háfuga adimurehóuati hererun lidan ageiraü le ñein lumuti mégeiwa hamá apurichihatiña. Águyati aban íbiri le gariñagaditi inglesi tuma lani weiriou lidoun aban ageiraü le ñein lubéi ladimurehóua chumagü, lidan ageiraü ligía añahein saragu terenchana ha adimurehabaña inglesi. Óunahatu meha Beteli ariñahani luagu burí damuriguaü inglesi houn, ani mégeiwatiña saragu apurichihatiña ñein. Aba hanúadirun aban lídangiñe, ani abisidaha hamuti bián wéiyaasu. Ábati hagiribudun hageiroun, aba halouguadagüdüni hani gastu lidan hati, ani areidahatiña seinsu luagu aban irumu. Dan le aranseeña lun háguyun aba híderaguniña íbirigu ha lídanbaña fulasu ligía, lun hadarirun aban muna to meseruntu.

9, 10. Ka gayarabei hadügün gürigia ha áfuridubaña hageiragiñe, ani ka uagu?

⁹ Gürigia ha áfuridubaña hageiragiñe. Aban san gürigia le meha áfuridubei lageiragiñe huguya lubaragiñe hafurendeiruni inarüni? Háfuga mégeiwatiña apurichihatiña lidan ageiraü le ñein lubéi nasirua humá. Saminatün san hagiribudun lun hídehan lidan apurichihani? Ménrenguntimabei hun hadarirun wadagimanu tuma muna sügǘ luéi aban terencha. Háfuga subudi hamaali iñeñein. Gayarati giñe himei hamá gürigia haganbuni uganu le hanügübei sügǘ luéi haganbun aban terencha.

¹⁰ Aban wügüri le águyubei Albaniagiñe lun Italiaoun, dariti aban buiti wadagimanu lun lóunahan seinsu houn liduheñu. Lárigiñe lafurendeiruni inarüni, aba larufudahani lererun houn fiú prekursorugu espechalitiña Italiana ha lúnbaña háguyun lun hapurichihan Albania. Abürühati íbiri le: “Héibuga meha gürigia ha lidoun fulasu le meha nígirubei. Ani gúndaatiña lau héibuga lan, íbini ibidiñe lan meha iñeñein houn. Keiti Albaniagiñeti lan nererun luma nani manasi, aba nálügüdagun nungua, ka san nadaagubei ya Italia?” Aba desidírü lan lagiribudun lageiroun lun lídehan lidan apurichihani. Ariñagati giñe: “Masakürihan numuti nígiruni nuadigimari ni seinsu le nagañeirubei Italia. Darí numuti wadagimanu létima buídubei Albania. Ladüga neseriwidun lun Heowá lau sun le númati, ligía wadagimanu súdinitimabei le íchigubei ugundani le durati”.

11, 12. Ka lunbei hadügüni ha asaminarubaña háguyun lidoun amu ageiraü?

¹¹ Ida luba ladügǘn. Lubaragiñe meha houdin Pábulu hama lupaanágu Masedónion houchatiña hasigiruni haweiyasun luagun oubaü le ñeinhin lubéi lálüda Weyu. Gama lumoun kei maha lubéi sífiri sandu, aba hasigirun luagun nórute (Adü. 16:6). Dan le meha yarafaaña lan lun Bitinia mígirun lumutiña Hesusu hebelurun (Adü. 16:7). Uguñe weyu, anihagua Heowá ayusurei Hesusu lun lalidihani wadagimanu lánina apurichihani (Mat. 28:20). Ligíati, anhein hasaminaruña lubéi háguyun lidoun amu ageiraü ayumuragua humá lun Heowá lun ladundehanün (Luk. 14:28-30; Sant. 1:5; ariha huméi “Mégeiti san ageiraü le ñeinhin lubéi nasaminara nidin, ídemuei?”).

¹² Álügüda humaña wéiyaaña lidan afiñeni, o amu íbirigu ha derebuguhaña, luagu le hisaminabei (Ari. 11:14; 15:22). Aliiha huméi ariñahani burí le asalirubei tidan agumeiraguagüdüni luagu eseriwiduni lidan amu ageiraü, ani akutiha humá luagu ageiraü le ñeinhin lubéi habusenra hidin. Gayarati hamuga san hidin abisidahei ageiraü ligía ani redei huguyame fiú dan ñein? Anhein desidírühadün lubéi háguyun, mosu habürühan tidoun Beteli to lídanboun ageiraü ligía lun hamuriahan adundehani, ariha huméi fulasu tidan Anuario to lánina irumu le. Derege humoun gárada houn wéiyaaña lidan damuriguaü, lun hagía lan óunahoun lárigiñe habürühan tidan (ariha humoun líburu Organizados para hacer la voluntad de Jehová, páhina 111 luma 112).

13. Ka idan gayara lan tíderagunün Beteli, ani ka burí katei lunbei hetenirun hugía guánarügü lun?

¹³ Tóunahaba Beteli ariñahani hun luagu ageiraü ligía, lun desidírü humá buidu. Gama lumoun míchugunboun gárada, ni bisa o furumiñeguarügü dugumedu ani míderagun tubadün giñe áluaha muna. Mosu hugía guánarügü lan adügei katei burí le lubaragiñe háguyun. Ani mosu giñe hagúarun tidoun embahada to lánina ageiraü ligía, lun hariñaguni hun ka lan hemegeirubei lun hibihin bisa o gárada lun gayara lan hawadigimaridun. Ha busenbaña háguyun lidoun amu ageiraü, mosu gayara lan haransehanu hagaradan teni hagíame lun le hemegeirubei (Gal. 6:5).

14. Ka lunbei hadügüni anhein habisidahaba lubéi o háguyuba lan lidoun aban ageiraü le ñein lubéi maha lan lúrudu lun lapurichihóun?

¹⁴ Ageiraü le ñein lubéi maha lan lúrudu lun lapurichihóun. Lidan burí fiú ageiraü, mosu duari hamá íbirigu lidan hani ministeriu (Mat. 10:16). Íbirigu ha abisidahabaña o ha águyubaña ñeinhin gayarati híchuguniña íbirigu ha awinwandubaña ñein lidoun denchaü, íbini mama lan ligía habusenrunbei. Anhein hasaminaruña lubéi háguyun lidan aban ageiraü ítarati, abürüha humá aban gárada híchigounme houn wéiyaaña lun hagía lan óunahoun tidoun Beteli to hageiraboun lubaragiñe háguyun.

15. Ida luba haganwoundagüdüni íbirigu ha siñabei háguyun hani ministeriu?

¹⁵ Anhein siñá lubéi háguyun. Anhein siñá lubéi háguyun lidoun amu ageiraü, meferidira huméi huguraasun. Háfuga ladaaruba aban ‘bena hubá lun heseriwidun’ (1 Ko. 16:8, 9). Gayarati subudi lan lun óunigiruti sirkuitu luagu somu damuriguaü le mégeiti ídemuei ani madiseti luéi le ñein lubéi hawinwanda. Háfuga gayarati hídehan lidan amu damuriguaü o sétanu le ñein lumuti hadimureha amu iñeñein. Gayarati giñe haganwoundagüdüni hani ministeriu lidan damuriguaü le ñein hubéi. Haritagua huméi háhuduragun lan lun Heowá tau sun hanigi, meberesenga ka lan gádanbalün, ligía súdinitimabei (Kol. 3:23).

16. Ida luba wóunabun anhein ariñaga somu íbiri woun busén lan leseriwidun lidan amu ageiraü?

¹⁶ Subuditi san aban kristiánu le derebugu haali lidan afiñeni le busenbei leseriwidun lidan amu ageiraü hun? Anhein ítara liña lubéi, ru humá dǘgüdaguaü luma ídemuei lun. Dan le lidinbei Pábulu Antiokíagiñe le lóubawagubei Siria, le meha lǘrüwan uburugu le lábugiñebei larúeihan Roma le wéiritimabei (lárigiñe Roma luma Alehandría). Lau saragu fulasu lun hapurichihan, chóuruti meha lalugúba lan meha lárigi Pábulu lidan damuriguaü anhein ñüdün hawéi. Gama lumoun, mariñaguntu Bíbülia adüga hamá íbirigu lun leferidiruni Pábulu luguraasun lun gayara lan lerederun hama. Mámarügüñein meha luagu fulasu le ñein lubéi haganawa hasaminara, haritagua hamuti meha luagu ‘múa lan ligía uboubei’ (Mat. 13:38).

17. Ka uagu buidu lubéi lun hasaminarun anhein gayara lubéi hásügürün Masedónion?

¹⁷ Resibiti meha Pábulu hama lánigu paaná saragu abiniruni ladüga hánharun lun amisurahouni lun hídehan Masedónia. Lidan uburugu le gíribei Filipu, aba hasubudirunu Lidia “aba ladaarunu Bungiu tanigi lun tadügün gasu lau le lariñagubei Pábulu” (Adü. 16:14). Samina humá luagu ugundani le lasandirubei Pábulu hama ha híbiri misioneru dan le tabadiseirunbei Lidia hama sun tiduheñu! Lidan saragu ageiraü wínwantiña gürigia ha ítaratiña kei Lidia ha maganbunhamagili uganu buiti. Anhadün ánhara lun amisurahani lun hásügürün ‘Masedónion’, hagundaaruba lau hadariruniña gürigia ha ani íderagua humañame.

[Rekuáduru le lídanbei páhina 5]

Mégeiti san ageiraü le ñeinhin lubéi nasaminara nidin, ídemuei?

• Áluaha humá adundehani tidan Anuario lánina irumu le. Ariha huméi átiriñanu lan íbirigu houn kada gürigia lidan ageiraü ligía.

• Yusu huméi Índice lun háluahan arütíkulu luma burí sügǘ le lídangiñeti ageiraü ligía.

• Adimureha humá hama íbirigu ha abisidaha hamaali ageiraü ligía o wínwanhaña ñein.

• Anhein hasaminaruña lubéi hidin lidoun aban ageiraü le ñein lumuti layanuhóua hererun, áluaha humá ariñahani tidan Internet o lidan amu fulasu, lun hasubudiruni átiriñanu lan gürigia ha ayanuhabalin hererun lidan ageiraü ligía.