Adügüwalá bugundan
1. Kaba tema lani adamurini lani weyu espechaliti, lánina irumu lani eseriwiduni 2012, ani ka uagu súdini lubéi wakutihani tema le?
1 Adügǘwatiwa ladüga ligía lan lugundanbei Heowá (Aruf. 4:11). Ligíati, lun gasuuni lan wabagari, mosu wafurendeiruni lugundan Bungiu ani adüga wameime. Íbini ménrengun lan larihín, mítaranti, ladüga mosu wageindagun luma échuni lánina “[wafalaruni] lugundan wagaburi luma lugundan wasaminan” o “adaaguei meha luriban burí katei le hínsiñebei houn ha ibidiñehabúbaña lun Bungiu” (Efe. 2:3; 1 Fe. 4:3; 2 Fe. 2:10). Sin lídehan Bungiu, wéiguaduña hamuga tidoun “lisadaran Mafia, [...] lun ladügüni labusenrun [w]au” (2 Tim. 2:26). Lagumeseruba programa lani adamurini lani weyu espechaliti, lánina irumu lani eseriwiduni 2012, líderagubadiwa lun wóuserun úara luma lǘrüwan ebegiruni le lídanbei furíei le gíribei Wáguchi Bungiu, “Adügüwalá lugundan Bungiu” (Mat. 6:9, 10).
2. Kaba burí álügüdahani ounabúa lidan programa le lani adamurini lánina weyu espechaliti?
2 Álügüdahani le lunbei lounabúniwa: Eibume haganbuni programa, áluaha huméi óunabagülei lun burí álügüdahani le: Ka amu katei súdiniti lunbei wadügüni, lárigiñe waganbuni Lererun Bungiu? Ida liña wasigirun asubudirei ka lan lugundanbei Bungiu woun? Ka uagu mosu lubéi wíderagun sun hawuyeri gürigia? Ida luba wanügün aban ibagari buiti lau ugundani? Nibureintiña, ka lunbei harufuduni lun Heowá? Ka afayeiruahaü ibihúbei lídangiñe ladügǘniwa lugundan Bungiu? Ka uagu mosu lubéi wíchugun iderebugu luma dǘgüdaguaü houn wíbirigu lau lóufudagun?
3. Ida luba wasagaruni sun buiti le wayaraati, lídangiñe adamurini lánina weyu espechaliti?
3 Adüga huméi sun hiyaraati lun ñein humá lidan adamurini le, ani teni hugíame lun programa. Íchuguti yanu le abisidahabei, gayarati ábanbei lan tóunahan Beteli o aban óunigiruti sirkuitu. Amisuraha wamutün lun hadimurehan, luma lubaragiñe o lárigiñe programa, adimureha hugíame tuma lani weiriou, anhein maríei lubéi. Luéi ‘habulieiduni’ le haganbubei, águyuguagüda huméi programa hama hiduheñu, danme le hachülürün húbiñe. Akutiha huméi úara ida luba lan hadügüni lugundan Bungiu sunsuinagubei (Sant. 1:25).
4. Ka uagu súdini lubéi wíchuguni lugundan Bungiu lidan furumiñeti lúgaaru lidan wabagari?
4 Málühali Heowá agumucha hau ha máhabaña hadügüni lugundan (1 Huan 2:17). Ligíati, ma lueirin weteingiruni Heowá luagu lubuidun programa le! Chóuruti, líderagubadiwa lan lun wíchuguni lugundan Bungiu lidan furumiñeti lúgaaru lidan wabagari.