17 lidan ǘrüwa-hati lagumeserun tederegehóun amisuragülei lubá Aritaguagülei
1. Kaba wadagimanu agumesera 17 lidan ǘrüwa-hati?
1 Lau Aritaguagülei le, wasigiruña arufudei “luáguti lounwen Hesusu” irumu luagu irumu (1 Ko. 11:26). Ligía busén wabéi lun houdin besafu gürigia wama lun haganbun luagu lubuidun idewesei lánina lebegi asalbaruni le líchugubei Bungiu woun lidan línsiñehabu (Huan 3:16). Irumu le, wagumeseruba afanreinhóun amisuragülei lánina Aritaguagülei samudi 17 lidan ǘrüwa-hati. Wadügüña san aransehani lun wadügüni sun wayaraati lidan wadagimanu le?
2. Ida luba wederegerunu amisuragülei?
2 Ida luba wederegerunu amisuragülei? Buiti lun murusunrügü lan wayanuhan. Gayarati wariñagun: “Buiti binaafin. Busentina nederegerunu amisuragülei to hun luma houn hiduheñu lun hachülürün lidoun aban adamuridaguni súdiniti le lunbei ladügǘn lidan sun ubóu 5 lidan gádürü-hati. Lichugúba aban yanu tídangiñe Bíbülia le lunbei lafuranguagüdüni buiti le lanügübei lounwen Hesusu luma ka lan ladaagubei uguñe weyu. Mafayeihanbadün lun hebelurun, ani iridúati oura luma fulasu tidan amisuragülei to”. Samudi luma dimaasu, gayarabei giñe wapurichihan tau garüdia La Atalaya tuma Despertad! danme gayara lan.
3. Ida luba wídehan lun hibihin sun gürigia aban amisuragülei?
3 Amisuraha humaña sun gürigia. Busentiwa lun hóundarun saragu gürigia wama weyu ligía. Amisuraha wamaña lubeiti gürigia ha wabisidahabaña, ha aturiahabarun Bíbülia wama, waduheñu, wabesinanigu, wánigu paaná lidan wadagimanu o leskuelarugu, ítara kei amu gürigia ha wasubudiragun. Hariñagubei giñe wéiyaaña lidan afiñeni ida luba lan tafanreinhóun amisuragülei lidan sun fulasu. Buiti resultóu le wibihibei lidan irumu burí le sügühalibei. Lidan Aritaguagülei lidan irumu le ásügürübei, aba larihin aban ídehati tebelurun aban würi, aba lariñagun tun líderaguaru lan áluahei gürigia le amisurahabarun. Gama lumoun, ibidiñeti ni aban gürigia tun ñein, amisuharügü lumutu somu íbiri lidan lapurichihan muna tuagu muna weyuméme ligía.
4. Ka uagu lunti lubéi wawadigimaridun lau ubebeni lidan tederegehóun amisuragülei?
4 Hadan gürigia ha lúnbaña houdin lidan Aritaguagülei, gayarati lachülürün aban hádangiñe gürigia ha unbaña hígira aban amisuragülei. Ani íbini masuseredun lan ítara, áfaaguni le lunbei hadügüni leseriwiduba keisi ariñahani houn sun gürigia. Amisuragülei to lunboun hederegerunu, tawisahaba luagu aban lan urúei gabafuti Hesusu guentó. Ani lau hapurichihan lau ubebeni harufuduñein houn sun gürigia, dandu ha lídanbaña fulasu le wapurichihabei, íbirigu lidan damuriguaü, luma lun Heowá luagu weiri lan lebegi idewesei lánina lebegi asalbaruni hun (Kol. 3:15).