Aban lidan ǘrüwa-hati lagumeserun tederegehóun amisuragülei lubá Aritaguagülei
1. Ídaba wagumesera amisurahaña gürigia lidoun Aritaguagülei, ani ka uagu gíbetimaraübei lubéi dan ladurarun wadagimanu le lau irumu le?
1 Weyu wandaradi 1 lidan ǘrüwa-hati wagumeserun ederegehóun amisuragülei lun Aritaguagülei, le lunbei ladügǘn 26 lidan ǘrüwa-hati. Gíbetimaaraübei dan ladurarun wadagimanu le lau irumu le. Agurabatiwa gíbetimabaña lan gürigia wagunbirahan, ánheintima gibe lubéi fulasu le ídanbei lapurichiha damuriguaü le ñein wabéi.
2. Kaba adundehani wafalara danme le tederegeirúniwa amisuragülei lidan fulasu le atokarubei lun damuriguaü ani ida luba wibihinu amisuragülei?
2 Aransehani le lunbei ladügǘniwa. Híchuba wéiyaaña lidan afiñeni adundehani le luáguti tederegeruniwa amisuragülei lidan sun fulasu le atokarubei lun damuriguaü luma anhein tigirúba lubéi tidan burí muna to málaboun. Anhoun ígiragua amisuragülei lárigiñe woudin tidan sun numa, gayarabei tederegerúniwa lidan fulasu le ñein lubéi houdin sun gürigia. Le arihubei lau apurichihani ligía lunbei lachoururuni lun ñein tan amisuragülei to uáguboun bürüwañu lan fulasu luma oura le ídanba lubéi ladügǘwa Aritaguagülei lidan fulasu le ñein lubéi tarufudúa agumeiraguagüdüni, lun harügüdünu íbirigu ha emegeirubarun. Mosu murusun murusunba lan híchugunu amisuragülei lidan fulasu ligía. Lunti hanügünü íbirigu tórügü hemegeiruboun lubá aban dimaasu.
3. Ka lunbei gabaroun wamani lidan wederegerunu amisuragülei?
3 Ida luba wederegerunu amisuragülei. Buídutimabei lun furese wamá, lugundun ítara gíbetimabaña gürigia ha úntiña wíchigoun amisuragülei. Lidan páhina 4 wadarirubei ka lan gayarabei wariñagun según hagaburi gürigia le ñein lubéi wapurichiha. Gama lumoun, anhein buidu lubéi leresibiruniwa somu gürigia ani adüga ligía álügüdahani woun, gayarati gíbetima lan dan wadimurehan luma. Ani weyu burí samudi luma dimaasu gayarabei wíchugunu Garüdia Atalaya tuma garüdia !Despertad! houn gürigia dan le gayara lan ladügǘniwa. Weyu 2 lidan ǘrüwa-hati, wawadigimaridatimaba ederegehóun amisuragülei, lubaragiñe hamuga wagumeserun aturiahani hama gürigia.
4. Ka uagu lunti lubéi wídehan lau ubebeni lidan wadagimanu le?
4 Agurabatiwa lun hachülürün saragu gürigia lidoun Aritaguagülei. Lidan yanu le lunbei lichugúniwa lafuranguagüdüwaba kátima lan ligaradanboun Hesukrístu (1 Ko. 11:26). Warihubei ida liña lan lanügün lounwen buiti woun (Rom. 6:23). Ani lariñawagúba woun saragu wéiyaasu súdiniti lan waritaguni súnwandan (Huan 17:3). Ídeha wamá súngubei lau ubebeni luma ugundani lidan wadagimanu le.