Buidutimalá wadügüni katei: arufuda huméi ida liña lan taturiahóun Bíbülia tau líburu Kátima san

Ka uagu súdini lubéi? Gíbetiña gürigia úati gunfuranda hamani ka lan uagu wayanuha dan le wariñagun houn ru wamá aturiahani tídangiñeti Bíbülia maguburahanga. Háfuga saminatiña mosu lan haturiahan saragu dan o mosu lanme hadügagun houngua gefentiñame luagu Heowá. Ligíati, lubaragiñe wariñagun houn ru wamá aturiahani, arufuda wameigia houn ida liña lan ladügǘn! Buídurügübei fiu minutu lun harufuduni lun gürigia, íbini tubenari luban, ménrengun lan taturiahóun Bíbülia luma ida liña lan tasagaruniwa lídangiñe luburiga.

Le lunbei wadügüni:

Lárigiñe hariñaguni lun gürigia ka lan híribei, álügüda huméi anhein nidiheri lubéi luagu le gayaraabei lasuseredun ámuñegü.
Ariñaga huméi lun gibe hamá gürigia nidiheritiña luagu ligiaméme. Ábameti harufuduni tila líburu Kátima san lun. Ariñaga huméi lun dariwa lan ariñahani le ménrengunti gunfurandawa lan tidan líburu to le afuranguagüdübalin ka lan tarufudahabei Bíbülia libügürü le lunbei lasuseredun ámuñegü luma libügürü amu burí katei. Lárigiñe, álügüda huméi ka lan kapítulu hínsiñetimabei lun.
Derege humá aban líburu lun ani dará humóun lidan kapítulu le lanúadirubei. Afuranguagüda huméi lun dariwa lan lóunabagüle álügüdahani le íñugiñebei lun furumiñeti párafu lídanmeme kapítulu ligía.
Álügüda huméi gürigia anhein busén lubéi laliihani furumiñeti párafu. Ábameti hadügüni álügüdahani lun párafu, ayanuha huguyame úara luagu óunabagülei. Aliiha ani akutiha huméi bérusu tídangiñeti Bíbülia le íchugubei iderebugu lun óunabagülei. Arufuda huméi lun ida liña lan hamakürüni óunabagülei tidan hiliburun.
Akutiha huméi le aban párafu. Gama lumoun, guentó, ariñaga humá lun gürigia lun lóunabuni álügüdahani según ligaburi ladimurehan mama kei bürüwañu lan tidan líburu.
Ariñaga humá lun gürigia buidu lan ladüga, ani adüga humá aransehani lun hagiribudun agumuchei hakutihani kapítulu luma amu weyu.
Anhein gayara lubéi, arufuda huméi bidéu Ida liña wíchugun külase tídangiñeti Bíbülia? lun lídangiñe wani páhina jw.org/cab.

Houcha humá hadügüni le lidan sun hati:

Furíei humá amuriaha luma Heowá lun labiniruni áfaaguni le hadügün lun hagumeserun aturiahani tídangiñeti Bíbülia hama gürigia (Fili. 2:13).
Danme le háfuridun apurichiha, houcha humá íbinirügü aban wéiyaasu lun harufuduni ida liña lan wíchugun aturiahani tídangiñeti Bíbülia tau líburu Kátima san o harufuduni bidéu Ida liña wíchugun külase tídangiñeti Bíbülia?