Gébunati adamuridaguni le adügǘbei lubá apurichihani
1. Ka lébunabei ladügǘn adamuridaguni lubaragiñe wáfuridun apurichiha?
1 Aban weyu, lubaragiñe lóunahaniña Hesusu lani disipulugu apurichiha, aba ladamuridagun hama (Luk. 10:1-11). Lidan adamuridaguni ligía, ruti dǘgüdaguaü houn lau laritaguagüdüni houn mama lan hábuguarügüñanu, ladundehabaña lan Heowá, le labureme nadü. Ruti giñe adundehani houn libügürü ida luba lan hagunfulirun lau hawadigimari, ñéingiñe, aba lóunahaniña “bián bián”. Ligiaméme giñe lébunabei adamuridaguni le adügǘbei lubá apurichihani uguñe weyu: lichugún dǘgüdaguaü luma adundehani woun luma lun lariñawagún woun halíaba lan wapurichiha luma kaba lan wapaaná.
2. Lúmagiñe gádürü-hati lun lubaruaguóun, átiribei dan ladurarun adamuridaguni le adügǘbei lubá apurichihani?
2 Sun dan le, labadinagua 10 luma 15 minutu lidura adamuridaguni le adügǘbei lubá apurichihani. Lidan sun dan ligía, ariñawagúati houn íbirigu kaba lan uma ani halíaba lan hapurichiha, adügǘwa ligía aban furíei. Gama lumoun, lúmagiñe gádürü-hati lun lubaruaguóun, labadinaguahaalime 5 luma 7 minutu lidura adamuridaguni le. Ani chátitimabei lidura anhein lárigiñe lubéi amu adamuridaguni ladügǘwa, lugundun sun líñame heresibirun íbirigu ha ñéinbaña adundehani tídangiñeti Bíbülia. Lídehaba lachatirun lidura adamuridaguni le lun gíbetima lan dan hásügürün íbirigu lidan apurichihani. Murusunrügaalime giñe dan hadüraaguni íbirigu ha agumeserubaña apurichiha lubaragiñe ladügǘniwa adamuridaguni le hapurichihan.
3. Ka lunbei gabarounwa lan dan le lanuadirún halíaba lan ani átiribei lan adamuridaguni lubaragiñe apurichihani adügǘwa?
3 Mosu lasaminarúniwa luagu kaba lan ídeha lun ménrenguntima lan katei houn íbirigu danme le lanuadirún halíaba lan ani átiribei lan adamuridaguni lubaragiñe apurichihani adügǘwa. Ariha hamaali lílana saragu damuriguaü buidu lan hadamuridagun lílana kada sétanu ha lúnbaña háfuridun apurichiha lidan ámuñegueinarügü fulasu, ítarati, másiñati ménrenguntimabei lan houn íbirigu hachülürün lidoun fulasu le ñeinba lubéi hadamuridagua luma le ñeinba lubéi hapurichiha. Anhein hadüga ítara, furesetimabei ladügǘn aransehani libügürü halíaba lan hapurichiha luma kaba lan lupaaná kada aban, ménrenguntimabei giñe houn íbirigu ha arihibaña lau kada sétanu hetenirun houn íbirigu ha lábugiñebaña haríaahan. Wéiyaañaba lidan afiñeni ha lídanbaña kada damuriguaü akutihei kábatima lan ligaburi lahandilihóun adamuridaguni le buídutima houn lílana damuriguaü le ñein habéi. Lubaragiñe lagumuchun adamuridaguni lau furíei, mosu subudi hamaali lanme súngubei halíaba lan hapurichiha luma kaba lan uma.
4. Ka uagu súdini lubéi adamuridaguni le adügǘbei lubá apurichihani kei le líbiri adamuridaguni?
4 Súdiniti kei le líbiri adamuridaguni. Kei hóunrügüñein lan íbirigu ha lúnbaña háfuridun apurichiha ladügǘwa adamuridaguni le, mama mosu ñein hamá sun lílana damuriguaü. Gama lumoun, úati mini lan lira, gayara lan wanügüni adamuridaguni le kei ni kata o wasaminarun maweirin lan lisudinin kei le líbiri adamuridaguni. Aban idewesei lúmagiñeti Heowá adamuridaguni le, ani ítara kei le líbiri, ínchaha lumutiwa lun hínsiñehabu wamá luma lun wadügüni le buídubei (Ebü. 10:24, 25). Ligíati mosu lubéi haranserun íbirigu ha lúnbaña harihin lau buidu, ru láamuga uériguni lun Heowá, sagá hagíame íbirigu ha lídanbaña buiti. Lunti hadügüni íbirigu ha lúnbaña háfuridun apurichiha sun hayaraati lun hachülürün lidoun adamuridaguni le, sagü gayara lan.
Moun lumuti wasaminarun maweirin lan lisudinin adamuridaguni le adügǘei lubá apurichihani kei le líbiri adamuridaguni
5. a) Ka luadigimaribei íbiri le arihibei lau apurichihani lidan ladügǘn aransehani lubá adamuridaguni le adügǘbei lubá apurichihani? b) Ka lunbei hadügüni íbirigu würiña danme le hagía lan ariha lau adamuridaguni le?
5 Ida luba haranserun íbirigu ha lúnbaña harihin lau adamuridaguni le? Lun gayara lan laranserun gürigia lubá ladügün aban katei, mosu lariñawagúniwa lun lau dan. Ligiaméme giñe asuseredubei lidan luáguti adamuridaguni le adügǘbei lubá apurichihani. Danme le lidan lan ámuñegueinarügü fulasu hadamuridagua lílana sétanu ha lúnbaña háfuridun apurichiha, íbiriguba ha arihibaña hau ariha lau adamuridaguni le adügǘbei lubá apurichihani o ha ídehabaña hama. Dánmeti háfuridun sun lílana damuriguaü lídangiñe ligiaméme fulasu, íbiriba le arihibei lau apurichihani anúadirei le lunbei larihin lau adamuridaguni le. Añahein hádangiñe íbirigu ha arihibaña lau apurichihani adügütiña aban programa, ábati híchugunu houn sun íbirigu ha lúnbaña harihin lau adamuridaguni le, ru hagía aban luagu touba muna le ídanbei lichugúa awisahani tidan Luban Adamuridaguni. Kei ánheingubeirügü lubéi garufudahadi habéi ani gadundehadi hagía íbirigu ha arihibaña lau adamuridaguni le ligíarügübei lan ladügǘn buidu, mosu lanúadiruniña íbiri le arihibei lau apurichihani íbirigu ha lau lichú aau. Anhein anihein lubéi weyu le ídanti ua lan ni aban wéiyaali lidan afiñeni, ídehati lidan damuriguaü o íbiri le badiseihali lun larihin lau adamuridaguni le, mosu lanúadirun íbiri le arihibei lau apurichihani aban íbiri to barüharu dan lúmagiñe tabadiseirun lun tuguya lan ariha lau. (Ariha huméi fánreinti “Danme le ábanba lan íbiri würi ariha lau adamuridaguni le”.)
6. Ka uagu lunti lubéi laranserun íbiri le lunbei larihin lau adamuridaguni le buidu?
6 Dan le gafanranbadiwa lan tidan Leskuela Kristiánu lánina Apurichihani o lidan Adamuridaguni lánina Eseriwiduni aransetiwa buidu lubaragiñe, ladüga gunfuranda wamani súdini lan. Güreweibei hamuga ñein lan aban íbiri le asaminaruti luagun kaba lan lariñaga darí dan le aningiraali lidoun adamuridaguni. Lunti ítarameme lan warihini, dan le lariñawagún woun lun warihin lau adamuridaguni le adügǘbei lubá apurichihani. Guentó, kei dürüwaali lubéi lídangiñe lidura adamuridaguni le, súdiniti waranserun buidu lubá, gayara láamuga hafurendeirun íbirigu lídangiñe, gumú ligíame lidan dan. Mosu giñe lasubudiruni íbiri le lunbei larihin lau adamuridaguni le halíaba lan hapurichiha lubaragiñe adamuridaguni.
7. Ka gayaraabei lakutihóun lidan adamuridaguni le adügǘbei lubá apurichihani?
7 Kaba uagu layanuhóua lidan adamuridaguni le? Kei ámuñegueinarügüti lubéi gádantiña íbirigu lidan kada fulasu, ligía míchugun lubéi musu úaraguati aban yanu lubá kada aban lídangiñe adamuridaguni le. Rúati fiu adundehani libügürü le gayaraabei lakutihóun lidan adamuridaguni le lidan rekuáduru “Le gayaraabei lakutihóun lidan adamuridaguni le adügǘbei lubá apurichihani”. Liibe-agei dan, lamuriahóuba hama íbirigu ha lídanbaña adamuridaguni le lun hóunabun álügüdahani o haliihan somu bérusu. Ñeinbei giñe dan larufudún somu sügǘ o larihíniwa aban bidéu lídangiñeti páhina jw.org le huuti lun apurichihani. Danme le laranserun íbiri le lunbei larihin lau adamuridaguni le, mosu lasaminaruni kaba lan íchiga dǘgüdaguaü houn íbirigu ha lúnbaña háfuridun apurichiha weyu ligía luma ka lan gayaraabei hafurendeirun lídangiñe.
Danme le laranserun íbiri le lunbei larihin lau adamuridaguni le, mosu lasaminaruni kaba lan íchiga dǘgüdaguaü houn íbirigu ha áfuridutiña apurichiha weyu ligía luma ka lan gayaraabei hafurendeirun lídangiñe
8. Ka gayaraabei wakutihani lidan adamuridaguni le adügǘbei lubá apurichihani samudi luma dimaasu?
8 Apurichihatiña hiibe-agei íbirigu tau Garüdia Atalaya samudi. Saragu hádangiñe íbirigu ha áfuridubaña apurichiha samudi máfuriduntiña amu weyu lidan dimaasu, ligíati, másiñati maritagun hamaali lan dimurei burí le hasayahabei lidan Guñoun lánina Háhuduragun Iduheñu lun Bungiu. Ligía buidu lubéi láguyuguagüdüni íbiri le arihibei lau adamuridaguni le adundehani le áfuachubei lidan lagumuhóun páhina tidan Wani Ministeriu. Gayaraati giñe hakutihani ida luba lan hayanuhan luagu somu ñunsu, sügǘ o efeduhani le adügǘbei fulasurugu úara luma adundehani le ichugúbei tidan Wani Ministeriu. Gayaraati giñe layanuhóun luagu le gayaraabei lariñawagún lun ligirún bena hunren lun hagiribudun bisidei gürigia le erederuti tau garüdia. Ani anhein anihein lubéi somu íbiri le apurichihañahaali tau garüdia lidan hati haganagua íbirigu ha ñéinbaña, gayaraati lamuriahóun luma lun lariñagun somu katei le gayaraabei lahuudun houn íbirigu o lun labahüdagun somu sügǘ le ruti dǘgüdaguaü. Gayaraati giñe ladügǘn aban katei ítarati weyu dimaasu tau agumeiraguagüdüni to lunboun lapurichihóun tau lidan hati. Lidan adamuridaguni le adügǘbei lubá apurichihani gayaraati giñe ladimurehóun libügürü le gayaraabei lariñawagún lun lapurichihóun tau agumeiraguagüdüni, kéiburi garüdia Uganu buiti, Aganba huméi Bungiu o líburu Kátima san, to auboun gayara lan wapurichihan furumiñeguarügü weyu lidan hati, yusu wamóun lun waturiahanu Bíbülia hama gürigia.
9. Ka gayaraabei lakutihóun lidan adamuridaguni le adügǘbei lubá apurichihani samudi luma dimaasu danme le hafanreinhaña lan lílana damuriguaü somu amisuragülei o tratadu?
9 Danme le hafanreinhaña lan lílana damuriguaü somu amisuragülei o tratadu samudi luma dimaasu, gayaraati lakutihóun lidan adamuridaguni le ka lan gayaraabei lariñawagún lun tigirúniwa Garüdia Atalaya úara tuma amisuragülei o tratadu tuguya, o ka lan gayaraabei ladügǘn anhein arufuda gürigia busén lan lasigirun afurendeira. Buídubei giñe labahüdawagún burí sügǘ le arufuduti lisudinin tafanreinhóun amisuragülei o tratadu.
10, 11. Ka uagu súdini lubéi lun haranserun íbirigu buidu lubá adamuridaguni le adügǘbei lubá apurichihani?
10 Ida luba haranserun íbirigu lubá adamuridaguni le? Súdiniti giñe lun haranserun íbirigu lubá adamuridaguni le lun buidu lan lasalirun sun katei lidan. Ánhaña aransera buidu lubá háfuridun apurichiha —háfuga lidan Guñoun lánina Háhuduragun Iduheñu lun Bungiu—, hadariruba somu katei huuti lun hariñaguni lidan. Lun waranserun buidu, mosu wibihinu agumeiraguagüdüni to wemegeiruboun lubaragiñe adamuridaguni. Anhein wadüga ítara, madarasahánbadiwa lun wachülürün lidoun fulasu le ñeinba lubéi wapurichiha.
11 Súdiniti giñe lun wachülürün lidoun fulasu le ñeinba lubéi ladügǘwa adamuridaguni fiu minutu lubaragiñe lagumeserun, ítara kei wadügüni dan le woudin lidan le líbiri adamuridaguni. Ánhawa achülüra tarü, lanagangiñeme wadüraaguni íbiri le ayanuhabei oura ligía, gayaraabei giñe wañoundaguni aransehani le adügǘwaalibei. Ida? Furumiñe, gíbeti katei gabaroun lan íbiri le arihibei lau adamuridaguni lubaragiñe lariñaguni halíaba lan ani kaba lan uma lapurichiha kada aban hádangiñe íbirigu ha lídanbaña sétanu le aubei lariha. Aban hénpulu, anhein mibe habéi íbirigu lidan adamuridaguni, másiñati lanügüniña súngubei apurichiha lidan aban fulasu le magumugili lapurichihóun. Anhein dise lubéi fulasu le ñeinba lubéi hapurichiha, háfuga líchuguniña íbirigu ha makarünbaña apurichiha hama ha gakarünbaña. Ani anhein lídanba lubéi aban fulasu denchati hapurichiha, másiñati lamuriahan hama fiu íbirigu lun hapurichihan yarafa houn íbirigu würiña o úara hama. Anhein sándiñein lubéi somu íbiri, háfuga lóunahani apurichiha lidan aban üma mawübüriti o tidan burí muna to uágutu ua lan saragu esütépu. O gayaraati lóunahaniña íbirigu ha iseri apurichiha hama ha barühañabaña dan apurichiha. Gama lumoun, ánhawa achülüra tarü, másiñati mósuya lanme lasansiruni íbiri le aransehani le adüga láalibei. Le linarün katei, súngubei wagía, chülüti dan lun wadarasaragun ladüga lasuseredun somu turobuli wéiriti woun. Gama lumoun, anhein wechun lubéi, háfuga mosu wararamagun asaminara anhein ladüga lubéi funa lougua lan lisudinin adamuridaguni le woun o anhein ladüga lubéi mosu lan wafurendeirun ayusurei dan buidu.
12. Ka áfaaguni lunbei wadügüni anhein hádangiñetiwa lubéi íbirigu ha áfuridubaña apurichiha súnwandan hama hagiaméme íbirigu?
12 Gayaraati adügaaña lan bián íbirigu aransehani hámagua lun háfuridun apurichiha úara o gayaraati hagurabahan lun lariñaguni íbiri le arihibei lau adamuridaguni houn kaba lan uma hapurichiha. Gama lumoun, anhein hádangiñetiwa lubéi íbirigu ha áfuridubaña súnwandan hama hagiaméme íbirigu, ka uagu mapurichihan wabéi hama amu gíbetima hamaamuga íbirigu úmatiña wadüga umadaguaü? (2 Ko. 6:11-13.) Gayaraati hamuga san wáfuridun, dan luagun dan, luma somu iseri apurichihati lun wíderaguni lun buídutima lan larufudahan? (1 Ko. 10:24; 1 Tim. 4:13, 15.) Danme lidan wamá adamuridaguni le, ru wamá arigei lun furumiñeguarügü adundehani le ichugúti woun, luma libügürü halíaba lan wagumesera apurichiha. Danme gumuhali adamuridaguni, adüga waméi sun wayaraati lun masansirun wamani aransehani le adügǘwaalibei, ani keimoun lau lóufudagun lidoun fulasu le ñeinba lubéi wapurichiha.
13. Anhein ladüga kada aban wádangiñe le yuubei lun, kaba buiti asagarúa lídangiñe adamuridaguni le adügǘbei lubá apurichihani?
13 Giributiña meha disipulugu ha lóunahabaña Hesusu apurichiha “[buin] lau ugundani” (Luk. 10:17). Chóuruti ídeha lan meha adamuridaguni le ladügübei Hesusu hama, lubaragiñe háfuridun apurichiha, lun buidu lan lidin houn. Ídehati giñe adamuridaguni le wadügübei lubá apurichihani lun lasuseredun aban katei ítarati woun. Anhein ladüga kada aban wádangiñe le yuubei lun, lídehaba adamuridaguni le lun wibihin dǘgüdaguaü, wafurendeirun lídangiñe luma lun aranseñu wamá lun wagunfulirun lau wadagimanu le ídehabei lun “lasubudirúniwa [uganu buiti] lidan sun fulasu” (Mat. 24:14).