Yusu wamóun garüdia Uganu buiti lun warufudahan
1. Ka un tadügǘwa garüdia Uganu buiti?
1 Kei warihini lidan arütíkulu le áfuachubei tidan Wani Ministeriu to lánina sedü-hati, garüdia Uganu buiti lúmagiñeti Bungiu ábanboun tídangiñe ídemuei súdinitu to wámaboun lun warufudahani inarüni houn gürigia. Tidan garüdia to, mabürüdǘnwati le lariñagubei bérusu lidan burí párafu, gayara láamuga haliihani gürigia houngua tídangiñe Bíbülia. Adügǘwatu tiibe-agei wani agumeiraguagüdüni lun hafurendeiruni gürigia inarüni hagía houngua, gama lumoun adügǘwatu garüdia to lun taturiahóun lau lídehan aban máisturu. Ligíati, danme le wíchugunu garüdia to lun somu gürigia áfaagua wamá lun wagumeserun aban aturiahani luma, ítara luba lasandiruni ugundani le ibihúbei lídangiñe lafurendeirúniwa uganu buiti (Mat. 13:44).
2. Ida luba wayusurunu garüdia Uganu buiti lidan furumiñeti bisida?
2 Lidan furumiñeti bisida. Gayaraati wariñagun: “Nidiheritiña saragu gürigia luagu le gayaraabei lasuseredun ámuñegü ladüga katei burí le waganbahabei lidan ñunsu. Afiñetün san laranseraguba lan léibugun katei? [Ígira humá lun lóunabun gürigia.] Subudi humaali san ru tan Bíbülia emenigini woun? Arufudatu garüdia to fiu lídangiñe álügüdahani le ounabúbei tidan Bíbülia”. Ru humóun garüdia lun ani amuriaha humá luma lun lanúadirun aban lídangiñe álügüdahani le adarirúbei lidan lagumuhóun páhina tidan garüdia. Yusu huméi furumiñeti párafu le ídanbei lounabúa álügüdahani le lanúadirubei lun harufuduni lun ida liña lan lichugún aban aturiahani tídangiñeti Bíbülia. Gayaraati giñe harufuduni lun ida liña lan ladarirúniwa óunabagülei le tíchugubei Bíbülia lun aban álügüdahani le anúadira humaalibei. Anhein anihein lubéi aban bidéu lidan jw.org le ayanuhati luaguméme leksióun ligía, gayaraati giñe harufuduni lun.
3. Afuranguagüda huméi ida luba lan wayusurunu garüdia Uganu buiti lun wíchugun aturiahani.
3 Ida luba wayusurunu lun wíchugun aturiahani. 1) Aliiha huméi álügüdahani ganumerunti le laubei létüra wuritimati subudi láamugei gürigia ka lan puntu méinitimabei. 2) Ábameti haliihani párafu. 3) Aliiha huméi bérusu le bürüwañubei lidan létüra róunñumati lun ani adüga humá amu burí álügüdahani le samina humaali buidu íderagua humaamugei íchigei lóunabagüle álügüdahani le laubei létüra wuritimati tídangiñe guánarügü Bíbülia. 4) Anhein anihein lubéi lóugiñe aban párafu lábugiñe ligiaméme álügüdahani, falá huméi adundehani 2 luma 3. Anhein anihein lubéi aban bidéu le íchuguti óunabagülei lun álügüdahani ligía ani marufudun humagili lun, gayaraati harufuduni lun lidan haturiahan. 5) Lagumuhóun, amuriaha humá luma gürigia lun lóunabuni álügüdahani, ítara luba hachoururuni anhein gunfuranda lubalin ariñahani.
4. Kaba íderaguawa lun buídutima lan wayusurunu garüdia Uganu buiti?
4 Subudi huméi kátima lan tariñagubei garüdia to ani yusu humóun ságüme gayara lan. Lubaragiñe kada aturiahani, samina humá luagu hani aturiahati luma ida luba lan hayusuruni bérusu tídangiñeti Bíbülia lun híderaguni asaminara (Ari. 15:28; Adü. 17:2, 3). Éibume buídutima lan hayusurunu garüdia to, wéiritimabei habusenrun hayusurunu lun harufudahani inarüni houn amu.