Ida luba wasagarun buiti tídangiñe líburu-agei to tídanboun Luban Wadamuridagun?

Hínsiñeti hamuga san hun haganwoundagüdüni hisubudin tuagu Bíbülia? Busentün san haganwoundagüdüni hisubudin luagu somu bérusu, somu gürigia, fulasu o sügǘ lídangiñe le uágubei tayanuha Bíbülia? Álügüdaguadün san hungua anhein gayara lubéi tíderagunün Lererun Bungiu lun haranserun somu turóbuli? Anhein ítara liña lubéi, buiti lun hidin tidan líburu-agei to tídanboun Luban Wadamuridagun.

Hadariruba saragu katei ñein le huuti lun hakutihan. Háfuga úatu sun agumeiraguagüdüni tídangiñetu Bíbülia to adüga hamaaruboun gefentiña luagu Heowá huma lidan hiñeñe; ánheinti tidan líburu-agei to tídanboun Luban Wadamuridagun anuhein tibe-agei agumeiraguagüdüni to iseritimagiruboun. Háfuga anuhein lan giñe ámuñegueinarügü Bíbülia, aban dimurei-agei to buitu tuma amu burí líburu lun hakutihan. Gayarati hayusurunu lubaragiñe o lárigiñe adamuridaguni. Anhein anuhein lubéi aban konputadora ñein, háfuga anihein aban programa tidan le gíribei Watchtower Library, lidan programa le anuhein tibe-agei wani agumeiraguagüdüni, ménrengunti layusurún programa le lun hakutihan luagu somu tema, dimurei o bérusu.

Huutu houn íbirigu ha bürüwaañabaña tidan Leskuela Kristiánu lánina Apurichihani. Anhein bürüwaadün lubéi tidan leskuela to, gayarati hayusurunu líburu-agei lun hadügüni hiyanun. Íbiri le arihibei tau leskuela, ligía lunbei letenirun tun líburu-agei to, lunti lachoururuni anuhein lan agumeiraguagüdüni to iseritimagiruboun ñein ani lun aranseñu tan. Líderagubadün íbiri ligía o le lan úmabei haturiahoun Bíbülia lun hadariruni ariñahani le hemegeirubei. Mabulieida huméi siñati lan háfuridagüdünu líburu burí to tídangiñe Luban Wadamuridagun; mosu giñe hóunigirunu ani moun lumuti háfiuhanu.

Ariñagatu Bíbülia lun lan ladarirúniwa “lanichigu lasubudirúniwa Bungiu”, mosu wáluahani kamá hamuga wáluahaña aban “irisini le aramudaguati” (Ariñawagúni 2:1-5). Líburu-agei to tídanboun Luban Wadamuridagun ligía fulasu le buídutimabei lun hagumeserun áluaha.

• Ka burí katei huuti lun wakutihan wadarirubei tidan líburu-agei to tídanboun Luban Wadamuridagun?

• Ka gayarabei líderagunün lun buídutima lan hayusurunu líburu-agei to?