Arütíkulu burí huuti lun wafurendeirun arufudaha buidu
1. Ka biama katei lisuunibei arütíkulu burí le gíribei “Conversaciones con un testigo de Jehová”?
1 Sagü átiri dan furiti arütíkulu burí le gíribei “Conversaciones con un testigo de Jehová” tidan Garüdia Atalaya to hountu sun gürigia lidan chumagü, biámañein lisuuni arütíkulu burí le: larufuduni arufudahani tídangiñeti Bíbülia lidan aban igaburi le adügati lun línsiñedun houn gürigia luma líderaguniwa lun wasubudiruni ida luba lan wadimurehan lau inebesei luagu somu burí tema (1 Fe. 3:15). Ariha wamá ida luba lan wayusuruni arütíkulu burí le buidu.
2. Ida luba gayara lan wayusuruni arütíkulu burí le lidan wani ministeriu?
2 Huuti lidan apurichihani. Buídubei hamuga wareidun fiú Garüdia Atalaya to ídantu ladarirúa arütíkulu burí le. Ítarati, anhein adüga aban gürigia le unti wapurichiha, aban gürigia le busenti lasigirun afurendeira o aban gürigia le aturiahabarun Bíbülia wama aban álügüdahani libe le uágubei adimurehaali lan aban lídangiñe arütíkulu le o anhein ariñaga aban katei lúnrügü lararamuni yanu, gayarabei wanügüni arütíkulu ligía lun, ani anhein busén lubéi gürigia ligía, gayarabei wakutihani úara. Ánheinti ua garüdia tuguya wama, gayarabei warariragüdünu lídangiñe jw.org.
3. Ka ligaburi lakutihóun arütíkulu burí le barühalibei resultóu buiti?
3 Ida lubati lakutihóun aban lídangiñe arütíkulu burí le? Añahein íbirigu aba haliihani lau umalali héreti le lariñagubei gefenti luagu Heowá ani aba hamisurahani gürigia le unbei harufudaha lun laliihani le lariñagubei le aban gürigia. Arihúaali luagu barǘ lan ligaburi lafuranguagüdǘniwa wafiñen le resultóu buiti, lugundun maweirinbei lasandirun gürigia ligía luagu lan wadimureha (2 Lur. 32:2).
4. Ka gayarabei wafurendeirun lídangiñe arütíkulu burí le?
4 Huuti lun wafurendeirun luma lun warufudahan. Danme waliihani burí arütíkulu le, teni wamá lun burí bérusu le layusurubei íbiri le apurichihabei, hénpulu burí le layusurubei luma ka lan lariñagubei lun líderaguni gürigia le úmabei layanuha asaminara, teni wamá giñe lun ligaburi hayanuhan. Lárigiñe, áfaagua wamá lun wáyeihani katei burí le danme wapurichihan (Ari. 1:5; 9:9). Ariñagatu aban íbiri: “Ítara liña laliihóun arütíkulu burí le kéigubeirügü hamuga barihin aban prekursoru ‘machararaditi’ adügei luadigimari, prekursoru le subudibalin súnwandan ka lan lunbei lariñaguni”.
5. Ka gayarabei wadügüni danme le waranseruñanu lan gürigia ha aturiahabaña wama lubá hapurichihan?
5 Huuti giñe arütíkulu burí le lun waranseruniña gürigia ha aturiahabaña wama lubá hapurichihan. Gayarati waliihani úara hama, hagía lun hadügün kei apurichihatiña. Harihubei lau hénpulu huuti le ida luba lan hafuranguagüdüni hafiñen lau inebesei luma lau duari (Kol. 4:6). Chóuruti anihán lan aban lídangiñe saragu katei le líchugubei Heowá woun lun wagunfulirun buidu lau wani ministeriu (2 Tim. 4:5).