Wayanuha luma wapaaná
1. Ida luba wáyeihani apostolu Pábulu dan le wáfuridun apurichiha hama wíbirigu?
1 Sagü meha hámañein lan amu íbirigu apostolu Pábulu, áfaaguati meha lun híchugun “gurasu [h]óuniwagua” (Rom. 1:12). Angia wagía, yusu wamuti san dan le wásügürübei hama wíbirigu lidan apurichihani lun wídehan wámagua luma lun wíchugun dǘgüdaguaü wóuniwagua? Lubaragiñe ñéinrügü wamá luma wapaaná, ka uagu mayanuhan wabéi luma luagu burí katei le íderagubaliwa abuiduragüdei ligaburi wapurichihan?
2. Ka katei gayarabei wadügüni lun hasandirun wapanaagu ichouruni, ani ka uagu wariñaga súdini lan katei le?
2 Sandigüda wamaña ichouruni. Añahein íbirigu machourunti hasandiragun houngua lidan apurichihani ani arihúati lira luagu hagibu o lidan ligaburi laganbún hamalali. Anhein wariñaga buiti le hadügübei houn tídangiñe sun wanigi, gayarabei wadügün lun hasandirun ichouruni hawougua. Ka amu katei gayarabei lídehan lun chouru lan hasandiragun houngua? Gúfeseti aban óunigiruti sirkuitu houn ha úmatiña lapurichiha íbini lan giñe ligía sanditi nérübiu ani mosu lan lafurieidun estodi lun líchugun Heowá darangilaü lun. Ariñagati aban íbiri: “Lun darangilu lan lasandiragun gürigia lungua mosu láhayachun. Anihein dan mosu lan nafurieidun amuriaha ídemuei lun gayara lan náhayachun”. Aniheinhali san somu katei le íderagutiwa asandira ichouruni lidan wapurichihan? Abahüdagua wameigia lun wapaaná!
3. Ka burí katei huuti gayarabei wabahüdaguni houn wapanaagu lidan apurichihani?
3 Abahüdagua waméi wámagua ka lan burí katei rúhalibei buiti resultóu woun. Anihein san somu dimurei o álügüdahani le rúhalibei buiti resultóu woun lun wayanuhan hama gürigia, háfuga luagu somu sügǘ le subudiwati? Adügaali san wabuiduragüdün somu adundehani lídangiñe le furihalibei tidan burí wani agumeiraguagüdüni libügürü ida luba lan wapurichihan tau lun wibihin buiti resultóu? Abahüdagua waméi houn amu (Ari. 27:17). Danme le wagiribuduña lan bisida somu gürigia, gayarati wariñaguni lun wapaaná ka lan wabusenrubei wibihin ani kaba lan wadüga lun wibihini. Lárigiñe wíchugun aban aturiahani tídangiñe Bíbülia, gayarati wafuranguagüdüni lun wapaaná ka lan lébunabei wariñagun somu katei o waliirun somu bérusu o ka lan uagu desidírü wabéi wayusurun aban ligaburi arufudahani luma aturiahati ligía.
4. Ka uagu lunti lubéi wíderaguniña wapanaagu lidan apurichihani?
4 Mámarügüñein meha luagu ida luba lan hiderawagún gürigia lidan apurichihani heberesera kristiánugu ha awinwandubaña lidan furumiñeti sígulu, áfaaguatiña meha giñe lun híchugun dǘgüdaguaü hóuniwagua (Adü. 11:23; 15:32). Ligíati larufudahanbei apostolu Pábulu lun Timotéu ínchahalei lun larufudahani le lafurendeirubei houn amu (2 Tim. 2:2). Anhein giñe warufudaha le furendei wamaalibei houn wíbirigu, wéiritimabei ubebeni harufudun lidan hani ministeriu ani buídutimabei hagunfulirun lau. Ani lóugiñe sun katei, wagundaaragüdübei Wáguchi Bungiu le siélubei (Ebü. 13:15, 16).