Ñunsu gafiñerúaditi luagu le ederebudagüdübalin afiñeni

Wagía gefentiña luagu Heowá nidiheritiwa saragu hawagu wíbirigu (1 Féduru 2:17). Saragu wádangiñe, sandiguatiwa woungua kei Tannis, aban íbiri to awinwanduboun Kenia. Ariñagatu: “Hínsiñeti nun nasubudiruni ida liña lan lidin houn níbirigu ha lídanbaña sun ubóu”. Ida liña wasubudiruni le asuseredubei wagía le gefentiña luagu Heowá? Seremei lun fánreinti le gíribei “Prensa” lidan páhina jw.org, le agumeserubei lúmagiñe irumu 2013.

Lidan fánreinti le, anihein ñunsu gafiñerúaditi luagu luáguti katei kéiburi ida liña lan lawanserun somu bunaguaü, somu dasi le hadügübei íbirigu ha ídehabaña dan le ñein lan hárabaganali, herigini o katei líbeina lira, lúmati luáguti somu sügǘ súdiniti kéiburi dan le táfuridun aban iseri Bíbülia. Daritiwa giñe ariñahani ñein hawagu íbirigu ha adaürǘbaña ladüga hafiñen. Abahüdawagúati giñe ñein luagu sügǘ buíduburiti luáguti apurichihani le adügǘbei burí lidan sun ubóu luma luagu Aritaguagülei. Ka ídehabaña lun ladügǘniwa sun le? Kátaña akutihabalin ani ida liña haranserun?

Wadagimanu le adügǘbei lubá lasagarún somu ñunsu

Áfisi lánina Ñunsu hounti sun Gürigia arihuboun lau fánreinti le gíribei “Prensa” lidan páhina jw.org. Nadagimeinti departamentu le lábugiñe laríaahan Sétanu le Arihibei lau Híderawagun Íbirigu ani ídehatiña hóugiñe 100 íbirigu dandu wügüriña kei würiña lidan, saragu hádangiñe íbirigu ha hawadigimariduña hábiñegiñe. Hagía abürühabaña, akutihabalin ariñahani, ásügüragüdübalin ani adüga hagía dibuhu luma amu burí katei. Ayahuahatiña giñe hama gumadimatiña, hama burí ha arihibaña tau radiu, bigibigitu o katei líbeina lira luma hama máisturugu ha arufudahabaña tidan burí luban furendei íñuti. Anihein giñe lóugiñe 80 sétanu íbirigu ha arihibaña lau Ñunsu hounti sun Gürigia ídeha tuma Áfisi to tidan ámuñegueinarügü sukursáli to lídanboun sun ubóu.

Nadagimeintu Áfisi lánina Ñunsu hounti sun Gürigia úara luma Sétanu le Arihibei lau Ñunsu le hounti sun Gürigia lun haranseruni ñunsu le lunbei láfuridun. Dan le híchugun íbirigu ha fe luagu somu sügǘ, aba burí hakutihani anhein inarüni lubéi. Lun lira, anihein burí dan aba hayanuhan hama sásaamu. Dan le aniheinhali sun ariñahani hama, aba habürüdüni ani aba haranseruni. Lárigiñe, aba hafidihan iyawaü lidan, ñéingiñe, aba hóunahani lun Sétanu le Arihibei lau Híderawagun Íbirigu lun harihini anhein gunda habéi lau.

Rútiña eteingiruni

Ka hasaminarubei wábirigu luagu fánreinti “Prensa”? Ariñagatu aban íbiri gíritu Cheryl to awinwanduboun Filipína: “Hínsiñeti nun nagumeseruni nuéyuri lau naliihani ñunsu hawaguti níbirigu luma tuagu lóundarun Heowá”.

Wéirigüda lumutu hanigi saragu gürigia mítaran lan ñunsu le lídanbei wani páhina jw.org kei le lídanbei ubóu le. Ariñagatu Tatiana, to awinwanduboun ageiraü Kasahistán: “Hínsiñeti nun gayara lan lafiñerúniwa luagu ñunsu burí le áfuachubei lidan jw.org ladüga inarünirügüñein habahüdagua”. Ariñagatu aban íbiri gíritu Alma to awinwanduboun ageiraü Méhiku: “Buin liña ubóu le lau luriban ñunsu, ánheinti ñunsu le lídanbei wani páhina, ruti dǘgüdaguaü”.

Amu luéi ñunsu chóuruti le wadarirubei lidan fánreinti le gíribei “Prensa”, ruti giñe iderebugu lun wafiñen. Ariñagati Bernard, le awinwandubei Kenia: “Seremei lun ñunsu burí le, guentó ariha numutiña íbirigu kei niduheñu, meberesenga halíañanu lan. Gayaraati níriduniña lun Heowá dan le nafurieidun luma nayanuhan lun luagu le gádanbaliña”. Ariñagatu aban íbiri gíritu Bybron, to giñe awinwanduboun Kenia: “Wéiriti nugundan dan narihin somu ariñahani luáguti furiharu lan Bíbülia lidan amu iñeñein! Haritaguagüda lumutina luagu hínsiñe wamá súngubei wagía lun Heowá”.

Íbini ñunsu hawaguti íbirigu ha éibaahoubaña, gayaraati líchugun gurasu woun. Ariha huméi le tariñagubei Jackline, ábaya íbiri to awinwanduboun Kenia: “Lau nararamagun asaminara luagun ganigi le harufudubei íbirigu ha, adügati lira lúntima here lan nafiñen. Súnwandan náfaagun lun narihini ka lan íderagubaliña lun hawandun. Ani furendeihadina katei lan le ménrengunti kéiburi hafurieidun, haliihanu Bíbülia luma heremuhan, ligíatima lan íchugubei erei houn wábirigu”.

Ariñagatu aban íbiri gíritu Beatriz, to awinwanduboun Kosu Rísiti, ru tan seremei luagu ñunsu luáguti hárabaganali, herigini o katei líbeina lira ani ariñagatu: “Wéirigüda lumutu anigi loufun tetenirun lóundarun Heowá lun sun le hemegeirubei íbirigu. Adüga tumuti buidu ani lau ínsiñeni. Adügati le lun nachoururuni inarüni lan luagu lóundarun lan Heowá to”.

Rútiwa seremei luagu anihein lan fánreinti lánina ñunsu lidan wani páhina jw.org! Seremei lun ñunsu burí le wasubudira hawagu wíbirigu ha lídanbaña sun ubóu. Úabei hamuga fánreinti le wama lun hamuga míchugun humani hani budagia le híchugubei liibe-agei dan luéigiñe donate.jw.org. Seremei luagu gíchigadi humá.