Íderagua wamaña gürigia aganbei Bungiu
1. Ka burí garüdia áfuriduboun lidan adamurini distritu “Nǘbuinla barúeihan”, ani ka uagu buidu tubéi lun larufudahóun tau?
1 Lidan adamurini distritu “Nǘbuinla barúeihan”, furitu bián garüdia: Aganba huméi Bungiu ábame hawinwandun lun súnwandan tuma to sensiyutimaboun, Aganba huméi Bungiu. Kei murusunrügüñein lubéi abürühani tidan, ménrengunti tásügürawagüdün lidoun amu iñeñein. Guentó ruali üma lun tásügürawagüdün garüdia Aganba huméi Bungiu ábame hawinwandun lun súnwandan lidoun 431 iñeñein.
2. Kaba gayara hasagarun buiti tídangiñe garüdia burí to?
2 Kaba gayara hasagarun buiti tídangiñe garüdia burí to? Ariha wamá fiú sügǘ le burí asuseredubei lidan sun ubóu:
• Aba lidin aban apurichihati ayanuha luma aban gürigia –gayarati furumiñeti lan lani bisida o bisidañaha laali lan– aba líchugun fe luagu maliiradi lan gürigia ligía o hénrengu lan lun laliihan.
• Aba lapurichihan aban íbiri houn gürigia ha ayanuhatiña aban iñeñein le ídanbei ua tan agumeiraguagüdüni o murusunrügüñoun lan. Gayarati giñe lasuseredun maliihadi hamá hibe-agei gürigia ha únbaña lapurichiha lun iñeñein le hayanuhabei.
• Lapurichihaña aban íbiri lau seini houn gürigia maganbuntiña ha lídanbaña fulasu le ñein lubéi lapurichiha.
• Busenti aban úguchili larufudahani inarüni lun lisaani le maliiradigili.
3. Ka burí katei wadarirubei tidan garüdia Aganba huméi Bungiu?
3 Ida tiña garüdia burí to. Úati saragu abürühani tidan garüdia Aganba huméi Bungiu. Libe-agei dan, dariwati aban liraüraü párafu sensiyuti lidan lagumuchun kada páhina luma giñe aban bérusu tídangiñeti Bíbülia le afuranguagüdübalin puntu burí le súdinitimabei lidan leksióun. Ka uagu? Samina humá lun hamuga ledewehan aban gürigia aban agumeiraguagüdüni hun lidan amu iñeñein, buin lau saragu létüra le ibidiñeti hun. Teseriwiduña hamuga san hun íbini anihein lan saragu dibuhu buíduburiti tidan? Uá. Ítarameme, aban agumeiraguagüdüni to gíbeti létüra tidan meseriwidunboun saragu lun aban gürigia le maliiraditi. Ligíati gibe lubéi dibuhu tidan garüdia to ani adügǘwati lau duari. Ani lun ménrengun lan wakutihani puntu burí le tídanbei, anihein fiú seini tidan le anügübaliwa lídangiñe aban dibuhu lidoun amu.
4. Írida huméi ka lan wadarirubei tidan garüdia Aganba huméi Bungiu ábame hawinwandun lun súnwandan.
4 Ligiaméme burí dibuhu tídanbei garüdia Aganba huméi Bungiu ábame hawinwandun lun súnwandan luma le tídanbei Aganba huméi Bungiu. Adügǘwatu garüdia to lun tíderaguniña gürigia ha maliiradibaña buidu o ha afurendeirubaña aliiha. Anhein warufudahaña lubéi tau Aganba huméi Bungiu, gayarati wayusurunu Aganba huméi Bungiu ábame hawinwandun lun súnwandan keisi aban adundehani. Biámañein páhina lidan kada leksióun. Lidan kada leksióun iñu luéigiñe wabaünan anihein aban álügüdahani le ounabúbei lidan páhina burí ligía. Yarafa lun kada dibuhu anihein abürühani luma burí bérusu tídangiñeti Bíbülia. Ǘnabugiñe lun kada páhina anihein rekuaduru lau lanwoun ariñahani luma bérusu tídangiñeti Bíbülia le gayarabei lakutihóun hama aturiahatiña según hemegeirun.
5. Ídaba gayara lan wígirunu garüdia to houn gürigia, ani ida luba wadügüni?
5 Ida luba wayusurunu. Según hemegeirun gürigia, gayarati wayusurun furumiñeguarügü tídangiñe bián garüdia to lidan apurichihani muna tuagu muna, íbini mama lan tuguya lunboun wapurichihan tau lidan hati (ariha huméi rekuaduru “Ida luba wederegerunu”). Dan le wagiribudun bisidaña gürigia, gayarati ariñagarügü wamá houn wígira lan aban garüdia houn.
6. Ida luba wayusurunu garüdia burí to lun wíchugun aturiahani tídangiñeti Bíbülia?
6 Kei le ua lubéi álügüdahani tidan garüdia Aganba huméi Bungiu, mámaba lau álügüdahani luma óunabagülei waturiahoun kei wadügüni tau líburu Kátima san. Hínsiñeti houn gürigia lídangiñetiña sun néchani haganbahan abahüdaguni. Ligíati, yusu huméi dibuhu burí le tídanbei garüdia lun habahüdaguni sügǘ burí le tídanbei Lererun Bungiu. Afuranguagüda huméi ka lan mini lubéi kada dibuhu. Adüga huméi lau ubebeni ani adüga humá lun lariñaguni le lasaminarubei. Aliiha huméi bérusu burí le lídanbei lagumuchun kada páhina ani akutiha huméi úara. Adüga humá álügüdahani houn gürigia lun hóunabun ani chouru huméi anhein gunfuranda habalin katei buidu. Anhein tau lubéi garüdia Aganba huméi Bungiu ábame hawinwandun lun súnwandan laturiahan, aliiha huméi luma abürühani le lábugiñebei kada dibuhu luma bérusu burí le ñeinbei.
7. Ida luba wíderaguniña gürigia ha aturiahabarun Bíbülia wama lun hawanserun lidan hasubudin luagu Bungiu?
7 Íderagua wamaña aturiahatiña lun hawanserun. Gayarati ladügün taturiahóun Bíbülia lun labusenrun aturiahati lafurendeirun aliiha lun laganwoundun lisubudin luagu Heowá (Mat. 5:3; Huan 17:3). Ligíati, anhein laturiahaña lubéi gürigia ligía garüdia Aganba huméi Bungiu, lau lásügürün dan gayarati híderaguni lun lafurendeirun aliiha, luma lun lagumeserun ayusuroun garüdia Aganba huméi Bungiu ábame hawinwandun lun súnwandan. Meberesenga ka lan garüdia laturiahaboun, maranserungilime aturiahati lun labadiseirún danme le lagumuchunu. Mosu laturiahanu líburu Kátima san o amu agumeiraguagüdüni to luntu tíderaguni lun gunfuranda lanu Bíbülia buidu.
8. Ka uagu mosu lubéi warufuduni weteingiradi tuagu biama iseri garüdia to?
8 Anhein busén habéi gürigia hawinwandun lun súnwandan, mosu haganbuni Bungiu le Labureme sun katei (Isa. 55:3). Busenti Heowá lun hafurendeirun “sun gürigia” aganbei, íbini ha maliiradibaña (1 Tim. 2:3, 4). Wéiriti wagundan lau anuhein lan iseri garüdia burí to wama lun warufudahan houn gürigia aganbei Bungiu!
[Rekuáduru le lídanbei páhina 3]
Ida luba wederegerunu
Arufuda huméi páhina 2 luma 3 houn gürigia ábame hálügüdüniña: “Hínsiñeti hamuga san hun hawinwandun lidan aban ubóu ítarati? [Ígira humá lun hóunabun gürigia.] Füramasetu Bíbülia [o líburu sagüráutu to] luagu málühali lan Bungiu adügei Ubóu ábanme fulasu buiti ani darangilati le lunbei ua lan gudemei ñein ni sandi. Ariha huméi le lunbei wadügüni lun wawinwandun lidan ubóu ligía. [Aliiha huméi le bürüwañubei iñu lidan páhina 3, le ñein lubéi lafuranguagüdawa Isaíasi 55:3.] Ariñagati ya mosu lan waganbuni Bungiu. Gama lumoun, ida liña waganbuni Bungiu?”. Áluaha huméi páhina 4 luma 5 ani akutiha huméi óunabagülei úara. Anhein madaani lubéi gürigia ligía, ígira humóun garüdia lun ani ariñaga humá lun hagiribuduba lan lun hakutihani ariñahani.