Luéigiñe bidéu wadamuridagua

Lidan saragu ageiraü, rúhaña gumadimatiña lúrudu lun hadisedagun gürigia hawariuagua luma lun madamuridagun hamá. Wagía kei gefentiña luagu Heowá, busentiwa wídehan lidan kesi le mígirunga waméi wadamuridagun lau ichouruni. Ligíati layusuruña lubéi burí damuriguaü Zoom lun gayara lan wadamuridagun luéigiñe bidéu.

Lun gayara lan wasigirun adamuridagua kei súnwandan, ruti Musu Úaraguati üma lun layusurún lídangiñe budagia le resibiwaalibei lun lagañeihóuniwa Zoom lun burí damuriguaü. Wéiriti lubuidun ídemuei le lun burí damuriguaü le mabafubei lun lafayeirun 15 dólarü, 20 o lóugiñe luagu Zoom. Layusuruña meha damuriguaü burí le lídangiñe Zoom le mafayeihóunbei luagu, le ídanbei mibe hamá gürigia ebelurutiña o le maweirinti lichourun. Sun damuriguaü le ayusurubalin Zoom le tafayeihabei lóundarun Heowá, ménrengunti houn lun hahandilihani lun chouru lan ani gayaraati hebelurun saragu gürigia. Dagá guentó, anihein lóugiñe 65,000 damuriguaü lidan lóugiñe 170 ageiraü asagara buiti lídangiñe Zoom.

Gumeseti damuriguaü Kairagi, le lídanbei uburugu Manado (Indonesia), ayusurei Zoom le tafayeihabei lóundarun Heowá lárigiñe hayusuruni Zoom le uágubei mafayeihóun lan. Abahüdahati íbiri Hadi Santoso: “Íbini íbirigu ha lóuguabaña luma teknolohía, sagatiña buiti lídangiñe adamuridaguni, ladügatima mámaali lan mosu hebelurun lidoun adamuridaguni saragu wéiyaasu.

Ariñagati Léster Jijón, aban wéiyaali lidan afiñeni le lídanbei damuriguaü Guayacanes Oeste, uburugu Guayakili (ageiraü Ekuadóru): “Kei gudeme habéi íbirigu, ñeinbei yebe saragu damuriguaü le siñati lafayeihan aban Zoom le ídounti gayara lan lun hebelurun sun lílana damuriguaü lidan aban. Guentó, seremei tun wóundarun, aniheinhali aban Zoom wama le ídehabei lun gayara lan hebelurun saragu gürigia lidan aban lidoun adamuridaguni. Ligía gayara lubéi wagunbirahan saragu gürigia manufudeuga luéi labuinchun”.

Abürühati aban íbiri gíriti Johnson Mwanza, lílana damuriguaü Norte Ngwerere le uburugubei Lusaka (ageiraü Sambia): “Saraguhali wéiyaasu hariñagun íbirigu woun: ‘Adügaali Zoom le tafayeihabei lóundarun Heowá, mámarügü lun yarafa lan wasandiragun woungua houn wíbirigu, adügaali giñe lun wasandiruni línsiñehabu Heowá’”.

Lídangiñe seinsu le areidahóubei lun híderawagun íbirigu ha ásügürübaña lídangiñe lénrengunga lasagarúa seinsu lun lafayeihóun Zoom. Ani lídangiñe budagia burí le ichugúbei lun lamainirún wadagimanu lánina apurichihani lidan sun ubóu liabin seinsu le. Liibe-agei budagia le, resibiwati lídangiñe donate.jw.org. Óunwenbu seremei luagu híchigadi. Yúsuati giñe budagia burí le lidan burí amu dasi lánina ídemuei lidan sun ubóu (2 Korintuna 8:14).