¿Achike xtubʼän apo ri kʼaslem?

RI LOQʼOLÄJ WUJ NUBʼIJ:

«Dios kan xtusuʼ kʼa el ri ruyaʼal runaqʼ kiwäch, [...] xtubʼän chi xtkʼis el ri qʼaxoʼn y ri jiloj. Kan xtkʼis el chuqaʼ ri kamïk y ri oqʼej. Kan xkekʼis kʼa ronojel ri xekʼojeʼ pa nabʼey» (Apocalipsis 21:3, 4, La Biblia en Kaqchikel Central, chojmirisan kitzʼibʼaxik).

RI UTZIL NUKʼÄM PE RI NAWETAMAJ

Xtkʼojeʼ jun utziläj qasamaj chuqaʼ xkojkikot rikʼin (Isaías 65:21-23).

Majun chik xtkʼojeʼ ta tijoj poqonal chuqaʼ yabʼil (Isaías 25:8; 33:24).

Xkojkikot xkojkʼojeʼ jantapeʼ kikʼin ri qachʼalal chuqaʼ qachibʼil (Salmo 37:11, 29).

¿ACHIKE RUMA ÜTZ NQANIMAJ RI NUBʼIJ RI LOQʼOLÄJ WUJ?

Kʼo kaʼiʼ ruma:

• Ri Dios ntikïr nuyaʼ ri nusüj. Chupam ri Loqʼoläj Wuj xa xe chi re ri Dios nbʼïx ri kʼo ronojel uchuqʼaʼ pa ruqʼaʼ ruma man kʼisel ta ri ruchuqʼaʼ (Apocalipsis 15:3). Ruma kʼa riʼ toq nubʼij chi xtubʼän utzil ronojel, ütz nqanimaj ruma kan ntikïr wi nubʼän. Achiʼel nubʼij ri Loqʼoläj Wuj, «chuwäch ri Dios xa majun [achike ta] kʼayew» (Mateo 19:26).

• Ri Dios nrajoʼ nubʼän ri rusujun. Jun tzʼetbʼäl chi rij reʼ ja ri nubʼij ri Loqʼoläj Wuj chi kij ri kaminaqiʼ, nubʼij chi ri Jehová janila nrajoʼ nuyaʼ chik ri kikʼaslem (Job 14:14, 15).

  Chuqaʼ nubʼij chi ri Jesús, ri Rukʼajol ri Dios, xerukʼachojrisaj ri yawaʼiʼ. ¿Achike ruma? Ruma ja riʼ wi ri rurayibʼal (Marcos 1:40, 41). Ri xubʼän rijaʼ xuqʼalajrisaj ri rurayibʼal ri Rutataʼ: nrajoʼ yerutoʼ ri winäq nkajoʼ kitoʼik (Juan 14:9).

  Rikʼin ronojel reʼ nqʼalajin chi ri Jehová chuqaʼ ri Jesús nkajoʼ jun utziläj kʼaslem pa qawiʼ chi qawäch apo (Salmo 72:12-14; 145:16; 2 Pedro 3:9).