¿La kʼo jun qʼij xtkʼis ri tijoj poqonal?

RI LOQʼOLÄJ WUJ NUBʼIJ:

«Ri Dios kan xtusuʼ kʼa el ri ruyaʼal runaqʼ kiwäch, [...] xtubʼän chi xtkʼis el ri qʼaxoʼn y ri jiloj. Kan xtkʼis el chuqaʼ ri kamïk y ri oqʼej» (Apocalipsis 21:3, 4, La Biblia en Kaqchikel Central, chojmirisan kitzʼibʼaxik).

RI UTZIL NUKʼÄM PE RI NAWETAMAJ

Nqetamaj chi man ja ta ri Dios nyaʼon pe ri kʼayewal pa qawiʼ (Job 34:12).

Nukuqubʼaʼ qakʼuʼx nqetamaj chi ri Dios nqʼax chuwäch ri qaqʼaxomal (Zacarías 2:8).

Xtqayaʼ rikʼin qanima chi ri chi qawäch apo majun achike ta xtyaʼon qʼaxomal pa qawiʼ (Salmo 37:9-11).

¿ACHIKE RUMA ÜTZ NQANIMAJ RI NUBʼIJ RI LOQʼOLÄJ WUJ?

Kʼo kaʼiʼ ruma:

• Ri Dios itzel nutzʼët ri itzelal. ¿Achike xunaʼ ri Jehová toq ri ojer kan xeyaʼöx pa tijoj poqonal ri ruwinaq? Ri Loqʼoläj Wuj nubʼij chi nqʼaxon wi ranima toq nutzʼët yechokomiläx kuma ri winäq aj jukʼan chik tinamït (Jueces 2:18).

  Ri Jehová itzel yerutzʼët ri winäq nkiyaʼ tijoj poqonal pa kiwiʼ ri chʼaqa chik winäq. Ri Loqʼoläj Wuj nubʼij chi itzel yerutzʼët ri yebʼanon kamïk (Proverbios 6:16, 17).

• Ri Dios yojrajoʼ chi qajujunal. Stapeʼ rat nanaʼ chi xa xe rat at etamayon ri aqʼaxomal chuqaʼ ri akʼayewal, ri Jehová retaman chuqaʼ ri nanaʼ rat (2 Crónicas 6:29, 30).

  Xa bʼaʼ chik, ri Dios xtukusaj ri ru-Reino richin xtukʼäm el kiqʼaxomal chi kijujunal ri winäq (Mateo 6:9, 10). Rokik napon ri qʼij riʼ, rijaʼ nukuqubʼaʼ kikʼuʼx konojel ri qitzij kanima yekanon richin (Hechos 17:27; 2 Corintios 1:3, 4).