¿La qitzij xkekʼastäj ri kaminaqiʼ?

RI LOQʼOLÄJ WUJ NUBʼIJ:

«Ri kaminaqiʼ [...] xkekʼastäj» (Hechos 24:15, La Biblia en Kaqchikel Central, chojmirisan kitzʼibʼaxik).

RI UTZIL NUKʼÄM PE RI NAWETAMAJ

Nukuqubʼaʼ akʼuʼx toq nkäm jun awachʼalal (2 Corintios 1:3, 4).

Man kan ta xtaxibʼij awiʼ chuwäch ri kamïk (Hebreos 2:15).

Kan qitzij xtabʼän chi re chi xkeʼatzʼët chik ri awachʼalal e kaminäq el (Juan 5:28, 29).

¿ACHIKE RUMA ÜTZ NQANIMAJ RI NUBʼIJ RI LOQʼOLÄJ WUJ?

Kʼo oxiʼ ruma:

• Ja ri Dios nyaʼon ri kʼaslem. Ri Loqʼoläj Wuj nubʼij chi rikʼin ri Jehová kʼo ri «tzʼukubʼäl [...] kʼaslem» (Salmo 36:9; Hechos 17:24, 25). We rijaʼ xtikïr xuyaʼ kikʼaslem konojel ri winäq chuqaʼ ri chikopiʼ, ¿manäq kami xtitikïr xtuyaʼ chik kikʼaslem ri winäq e kaminäq el?

• Ri ojer kan, ri Dios kʼo winäq xerukʼasoj. Ri Loqʼoläj Wuj yerutzijoj waqxaqiʼ winäq ri xekʼasöx. Chi ke ri winäq riʼ e kʼo ixoqiʼ chuqaʼ achiʼaʼ ri jalajöj kijunaʼ. Rijeʼ xekʼojeʼ chik jun bʼey chi ruwachʼulew. Jujun chi ke rijeʼ xekʼasöx toq xa kʼa riʼ kekäm qa, chuqaʼ kʼo kʼa jun achin ri kajiʼ yan qʼij tkäm toq xkʼasöx (Juan 11:39-44).

• Ri Dios nurayibʼej nuyaʼ chik kikʼaslem ri e kaminäq el. Chuwäch ri Jehová ri kamïk jun itzelanel, ruma riʼ kan itzel nutzʼët (1 Corintios 15:26, Traducción del Nuevo Mundo). Janila nurayibʼej nukʼïs ruwäch ri itzelanel riʼ, ruma riʼ rikʼin ri kʼasojinïk xtukʼïs ruwäch. Nurayibʼej nuyaʼ chik kikʼaslem chi ruwachʼulew ri winäq e yakäl pa ranima (Job 14:14, 15).