¿Achkë ütz naʼän rchë nkʼuluj chawä yajeʼ chpan jun chik congregación?

Ye kʼa Nicolas chqä ya Céline jun wä chik xbʼanatäj kikʼë, rma ryeʼ kan yë ri sucursal ri kʼo Francia xbʼin chkë chë keqʼax pa jun chik congregación. Ri jun kʼlaj qachʼalal riʼ nkitzjoj chqë achkë xkinaʼ taq xeqʼax pa jun chik congregación. Ryeʼ nkiʼij: «Pa naʼäy, kan kowan xel qakʼuʼx, ye kʼa chrij riʼ kʼayewal chik xuʼän chqawäch rma xeqabʼisoj ri qamigos xeqayaʼ qa. Tapeʼ nqtzjon wä kikʼë qachʼalal ri ye kʼo chpan ri kʼakʼakʼ qacongregación, majanä wä kan ta jnan rbʼanon qawäch kikʼë».a ¿Achkë kʼa xkatoʼö rït rchë xtkʼuluj chawä xkajeʼ chpan ri kʼakʼakʼ acongregación? ¿Achkë rbʼanik ütz yetoʼon ri nkʼaj chik qachʼalal? ¿Y achkë toʼïk xtawïl o xkakowin xtayaʼ rït chpan ri kʼakʼakʼ acongregación?

KAJIʼ NAʼOJ RI XKATKITOʼ

1. Takʼuqbʼaʼ akʼuʼx chrij Jehová (Sal. 37:5). Ya Kazumi, ri aj Japón, rkʼwan wä 20 jnaʼ chpan rcongregación, ye kʼa xkʼatzin xbʼä jukʼan chik tinamït rma rchjil xtaq äl chpan ri tinamït riʼ rchë nbʼesamäj. ¿Achkë xuʼän ryä rchë xyaʼ qʼij chë yë Jehová xkʼwan rbʼey? Ryä nuʼij: «Rïn xinbʼij che rä Jehová jontir ri kʼo pa wan. Xinbʼij che rä chë rïn nnaʼ chë xa nyonïl yïn kʼo, chë nxiʼij wiʼ chqä nchʼpü nkʼuʼx. Ryä ronojel mul xyaʼ pä wchqʼaʼ».

¿Achkë xkatoʼö rït rchë xtakʼuqbʼaʼ más akʼuʼx chrij Jehová? Ri qakʼuqbʼäl kʼuʼx chrij Jehová achiʼel jun ti cheʼ ri nkʼatzin ryaʼ chqä rchqʼaʼ ilew che rä rchë nkʼïy chqä rchë rkʼamal kuw nkichäp ri ilew. Nicolas, ri kʼa xqatzjoj qa, xquʼ rij ri xkiʼän Abrahán, Jesús chqä Pablo —ri kʼo kʼïy xkijäl pa kikʼaslemal rchë xkiʼän ri nrajoʼ Dios—, y ya riʼ xtoʼ ryä rchë xyaʼ chwäch ran chë Jehová xttoʼ pä ryä chqä. We rït rkʼulun chawä natjoj awiʼ chrij le Biblia, ma xa xuʼ ta xkakowin xkaqʼax chkiwäch ri kʼayewal yeʼawïl rma kʼo yejalatäj pan akʼaslemal, xa xtatamaj chqä kʼïy naʼoj ri xkakowin xtakʼüt chkiwäch qachʼalal chpan ri kʼakʼakʼ acongregación.

2. Ma keʼajnamaj ta ri congregaciones (Ecl. 7:10). Jules, ri aj Benín, nuʼij chë taq ryä xbʼä Estados Unidos rchë xbʼejeʼ chlaʼ, xtzʼët chë ri winäq kan jun wä chik rbʼanik kikʼaslemal. Ryä nuʼij: «Xinnaʼ chë achiʼel ta kan nkʼatzin ntzjoj jontir ri nqʼaxan pä pa nkʼaslemal chkë jontir winäq ri ntamaj kiwäch». Rma ryä ma rkʼulun ta che rä nuʼän riʼ, xyonij qa jbʼaʼ riʼ chkë qachʼalal. Ye kʼa ryä nuʼij chë taq xtamaj más kiwäch, xjalatäj ri rquʼun chkij. Jules nuʼij: «Rïn ntzʼeton chë jontir röj, ri winäq, xa yoj jnan tapeʼ xa bʼa achkë na qatinamit. Xa xuʼ ma jnan ta rbʼanik nqaʼij ri nqaquʼ. Kʼo chë ma itzel ta nqtzjon chrij jun winäq xa rma rnaʼoj o rma rtinamit». Rma riʼ ma tajnamaj ta ri kʼakʼakʼ acongregación rkʼë ri jun qa. Ya Anne-Lise, jun qachʼalal precursora, xuʼij: «Ma xiqʼax ta pa jun chik congregación rchë nbʼewlaʼ ri xinyaʼ qa chpan ri jun qa ncongregación; rïn xiqʼax rchë kʼo chik nkʼaj ntamaj».

Ri ukʼwäy taq bʼey chqä kʼo chë ma nkijnamaj ta ri kʼakʼakʼ kicongregación rkʼë ri jun qa. Rkʼë jbʼaʼ ryeʼ nkitzʼët chë kicongregación komä kʼo jojun yekiʼän ri ma jnan ta rbʼanik nbʼan che rä chpan ri jun qa kicongregación, ye kʼa reʼ ma ntel ta chë tzij chë ma ütz ta ri najin nbʼan. Ri más ütz nkiʼän ryeʼ taq nkajoʼ nkiyaʼ jun naʼoj o nkiʼij chë kʼo jun nkʼatzin njal, naʼäy nkʼatzin nkitzʼët na achkë rma qachʼalal ke riʼ najin nkiʼän che rä (Ecl. 3:1, 7b). Chqä, más ütz chë ryeʼ nkiyaʼ qa jun ütz tzʼetbʼäl chkiwäch qachʼalal chwäch ri nkitäj kiqʼij chkij rchë nkiʼän ri nqä chkiwäch ryeʼ (2 Cor. 1:24).

3. Tatjaʼ aqʼij rchë yajeʼ rkʼë acongregación (Filip. 1:27). Kantzij na wä chë nkʼatzin tiempo chqä awchqʼaʼ rchë yaqʼax jukʼan chik tinamït, ye kʼa nkʼatzin yabʼä pa moloj rkʼë ri kʼakʼakʼ acongregación, we ütz nuʼän, kan katapon pa Salón del Reino. We ma xtaʼän ta riʼ, ¿achkë rbʼanik xkatkitoʼ qachʼalal we ma yatkitzʼët ta más? Ya Lucinda nuʼij achkë xuʼän ryä chqä ri kaʼiʼ ral taq xeqʼax chpan jun nüm tinamït ri kʼo Sudáfrica. Ryä nuʼij: «Xintäj nqʼij rchë xinbʼän jontir ri nuʼän ri congregación, xinel kikʼë jalajöj qachʼalal chutzjoxik le Biblia chqä xenyaʼ ncomentarios pa qamoloj. Chqä xqaʼij chkë qachʼalal chë ütz nkiksaj qachoch taq nqamöl qiʼ rchë nqabʼetzjoj le Biblia».

We rït xtatäj aqʼij rchë jnan xkixsamäj kikʼë qachʼalal rchë xtiʼän ri nkʼatzin nuʼän ri congregación, más jnan xtuʼän iwäch. Ri ukʼwäy taq bʼey xkiʼij che rä ya Anne-Lise, ri xqatzjoj qa chpan ri nkʼaj chik peraj, chë ttjaʼ rqʼij rchë ntel kikʼë jontir qachʼalal chutzjoxik le Biblia. Ryä nuʼij: «Kan chanin xqʼalajin chi nwäch chë ya reʼ jun rbʼanik rchë más jnan nuʼän awäch kikʼë qachʼalal». We rït chqä naʼij chkë qachʼalal chë nawajoʼ yatoʼon rkʼë rjosqʼixik ri Salón del Reino chqä naʼän rbʼanik jojun ri yekʼatzin che rä, ri nkʼaj chik xtkitzʼët chë rït nanaʼ chë ya reʼ chik acongregación komä. Taq más xtatäj aqʼij rchë yatoʼon, más chanin xtanaʼ chë yajowäx kimä qachʼalal chqä xtkʼän riʼ awäch chpan ri kʼakʼakʼ acongregación.

4. Keʼakanuj nkʼaj chik awamigos (2 Cor. 6:11-13). Ri nbʼanö chë yatok kamigo ri nkʼaj chik ya riʼ nakʼüt chkiwäch chë naquʼ kij. Rma riʼ katapon yän pa Salón rchë yatzjon kikʼë qachʼalal, rchë ke riʼ xtatamaj más kiwäch; ke riʼ chqä tabʼanaʼ taq nkʼis ri moloj. Tatjaʼ aqʼij rchë nkʼaseʼ qa kibʼiʼ pan ajolon. We rït kan jaʼäl anaʼoj naʼän kikʼë qachʼalal y nnatäj chawä achkë kibʼiʼ, ryeʼ kan jaʼäl xtkinaʼ xkejeʼ awkʼë chqä xtkajoʼ xkeʼok awamigos.

Pa rkʼexel natäj aqʼij rchë naʼän ri nkiʼän ri nkʼaj chik xa xuʼ rchë ütz yatkitzʼët, más ütz takʼutuʼ achkë anaʼoj rït. Tabʼanaʼ ri xuʼän ya Lucinda. Ryä nuʼij: «Röj xeqaskʼij qachʼalal chqachoch, y rma xqaʼän riʼ, komä ye kʼo ütz qamigos».

«KAN ÜTZ IKʼULIK TIBʼANAʼ»

Ye kʼo jojun qachʼalal kʼayewal nuʼän chkiwäch yeʼok pa jun Salón del Reino ri akuchï majun ta jun qachʼalal kitaman rwäch. Rma riʼ, we jun qachʼalal nqʼax chpan acongregación rït, ¿achkë ütz naʼän rchë natoʼ? Ri apóstol Pablo xuʼij: «Kan ütz ikʼulik tibʼanaʼ apü, kan achiʼel xuʼän Cristo taq kan ütz ikʼulik xuʼän» (Rom. 15:7). Ri ukʼwäy taq bʼey ütz nkikʼän kinaʼoj chrij Cristo y yekitoʼ ri kʼa xeʼapon pa congregación rchë nkinaʼ chë yejowäx (tatzʼetaʼ ri recuadro «Ri nkʼatzin nbʼan taq rït najäl acongregación»). Ye kʼa jontir qachʼalal, yajün ri akʼalaʼ, yekowin yetoʼon rchë ri qachʼalal ri kʼa xeʼapon pa congregación jaʼäl nkinaʼ yejeʼ qkʼë.

Rchë ütz kikʼulik nqaʼän chkë qachʼalal ri yeʼapon pa qacongregación, ütz yeqaskʼij chqachoch chqä nqakanuj rbʼanik rchë yeqatoʼ. Jun tzʼetbʼäl. Jun qachʼalal ixöq xjäm rwäch rchë xkʼüt ri tinamït chwäch jun chik qachʼalal ixöq ri kʼa xapon chpan rtinamit. Chqä xkʼüt chwäch akuchï yepaʼeʼ wä chʼichʼ y achkë chʼichʼ ütz yerqʼät. Ri qachʼalal ri xyaʼöx rtoʼik nuʼij chë kan jaʼäl xnaʼ ri xuʼän ri qachʼalal riʼ rkʼë chqä chë ya riʼ xtoʼö rchë xkʼluj che rä xjeʼ chriʼ.

RI ÜTZ NAʼÄN RCHË MÁS JNAN XTUʼÄN AWÄCH RKʼË JEHOVÁ

We rït najin yaqʼax chpan jun chik congregación, rkʼë jbʼaʼ kʼo nbʼanö chawä chë naxiʼij awiʼ o nchʼpü akʼuʼx. Ye kʼa taquʼ rij ya reʼ: ye kʼo jojun taq nikʼ chköp nkʼatzin nslotan kij rchë yekowin yebʼä chkaj. Ke riʼ chqä rït, nkʼatzin achiʼel ta nawesaj äl chawij jontir ri nbʼanö chawä chë nchʼpü akʼuʼx rchë xkakowin xtaʼän más chpan rsamaj Jehová. Nicolas chqä ya Céline nkiʼij: «Kʼo kʼïy natamaj qa taq yabʼä jukʼan chik tinamït. Jun tzʼetbʼäl, ri xqakʼwaj qiʼ kikʼë nkʼaj chik qachʼalal chqä ri xqjeʼ chpan jalajöj tinamït, xqrtoʼ rchë xejeʼ naʼoj qkʼë ri ma ye jun ta wä qkʼë». Jean-Charles, ri xqatzjoj qa pa naʼäy, nuʼij achkë ütz xrïl rfamilia: «Ri xqajäl qacongregación xertoʼ qalkʼwal rchë xkiyaʼ más rqʼij Jehová, rma xa pa jun kayoxiʼ ikʼ, ri ti qʼopoj xchäp ryaʼik rasignaciones chpan ri qamoloj ri nbʼan chukojöl qʼij y ri ti kʼajol xok publicador».

¿Y si rït ma ütz ta nuʼän chawäch yaqʼax chpan jun chik congregación, rkʼë jbʼaʼ akuchï nkʼatzin wä más toʼïk? We ke riʼ, ütz nasmajij jojun chkë ri naʼoj ri ye kʼo chpan re artículo reʼ, rchë ke riʼ xtanaʼ chë achiʼel ta kʼa riʼ xatapon chpan ri congregación akuchï yït kʼo wä. Takʼuqbʼaʼ akʼuʼx chrij Jehová, tatjaʼ aqʼij rchë yajeʼ rkʼë acongregación, achiʼel taq nayaʼ chawäch yatel kikʼë nkʼaj chik qachʼalal chutzjoxik le Biblia y keʼakanuj nkʼaj chik awamigos o más jnan tbʼanaʼ awäch kikʼë awamigos ye kʼo komä. ¿Kʼo komä jun ri yakowin naʼän rït rchë yeʼatoʼ qachʼalal ri kʼa xeʼapon chpan acongregación o yeʼatoʼ ri nkʼatzin kitoʼik? Kantzij na wä chë, we rït xtaʼän riʼ, más jnan xtuʼän awäch rkʼë Jehová, rma ri nqjowan ya riʼ nkʼutü qchë röj, ri kantzij taq cristianos (Juan 13:35). Tayaʼ chwäch awan chë «ronojel ri bʼanobʼäl riʼ kan yeqä chwäch Dios» (Heb. 13:16).

Tapeʼ kʼo kʼayewal xuʼän chkiwäch, ye kʼïy cristianos kan ütz kinaʼon ye kʼo chpan jun chik congregación. ¡Y rït chqä xkakowin xtanaʼ ya riʼ! Anne-Lise nuʼij: «Ri xinjäl ncongregación yirtoʼon rchë ntamaj kiwäch más qachʼalal». Ya Kazumi nuʼij chë komä ryaʼon chwäch ran chë «taq yaqʼax chpan jun chik congregación yakowin natzʼët rtoʼik Jehová ri majun bʼëy atzʼeton ta». ¿Y achkë nuʼij Jules? Ryä nuʼij: «Komä ye kʼo ye kʼïy wamigos chqä nnaʼ chë ma nyonïl ta chik yïn kʼo. Komä kan jaʼäl nnaʼon yïn kʼo chpan ncongregación, rma riʼ kʼayewal xtuʼän chi nwäch we xtkʼatzin xtinyaʼ qa».