¿Xa bʼa akuchï komä kʼo wä Dios?
Ri nuʼij le Biblia
Dios jontir nkowin nutzʼët chqä nuksaj ruchqʼaʼ xa bʼa akuchï nrajoʼ wä ryä (Proverbios 15:3; Hebreos 4:13). Ye kʼa, le Biblia ma nuʼij ta chë Dios xa bʼa akuchï kʼo wä, pa rukʼexel riʼ, nukʼüt chë ryä jun espíritu chqä chë kʼo jun ru-lugar akuchï kʼo wä.
¿Achkë rubʼanik Dios? Dios jun espíritu (Juan 4:24). Rma riʼ majun ta jun winäq nkowin ntzʼetö rchë (Juan 1:18). Chkipan ri visiones chrij Dios ri ye tzʼibʼatäl qa chpan le Biblia, ronojel mul ntzʼetetäj chpan ru-lugar. Le Biblia majun bʼëy nuʼij ta chë Dios xa bʼa akuchï kʼo wä (Isaías 6:1, 2; Apocalipsis 4:2, 3, 8).
¿Akuchï kʼo wä? Dios kʼo chpan jun lugar ri ma nqkowin ta nqatzʼët; ryä chlaʼ chkaj kʼo wä (1 Reyes 8:30). Ri Ruchʼaʼäl Dios nutzjoj chë kʼo jmul ri ángeles «xeʼok apü chwäch Jehová».a Reʼ tzij reʼ nkikʼüt chë Dios achiʼel ta kʼo jun ru-lugar akuchï kʼo wä (Job 1:6).
We Dios ma xa bʼa akuchï ta kʼo wä, ¿nkowin komä yiruchajij pä?
Jaʼ. Tapeʼ Dios kʼo chpan jun lugar ri ma nqkowin ta nqatzʼët, ryä kan nrajoʼ yerutoʼ ri winäq. Ryä nqrtzʼët pä taq nqatäj qaqʼij rchë nqanmaj rutzij chqä nuyaʼ pä qatoʼik (1 Reyes 8:39; 2 Crónicas 16:9). ¿Achkë rubʼanik nukʼüt Dios chë nqrajoʼ chqä nqrchajij?
Taq nqchʼö rkʼë: Jehová kan nuyaʼ ruxkïn chqë taq nqchʼö rkʼë (2 Crónicas 18:31).
Taq najin nqbʼison: «Jehová naqaj kʼo wä chkë ri sokotajnäq kany yeruköl ri ye kʼo pa jun nimaläj bʼis» (Salmo 34:18).
Taq nkʼatzin jun qanaʼoj: Jehová nuksaj le Biblia, ri Ruchʼaʼäl, rchë nuyaʼ qanaʼoj chqä rchë nukʼüt chqawäch achkë bʼey kʼo chë nqakʼwaj (Salmo 32:8).
Ri nkinmaj jojun winäq chrij ri akuchï kʼo wä Dios
Ye kʼo jojun winäq nkinmaj reʼ: Xa bʼa akuchï yoj kʼo wä y nqatzʼët ri rubʼanon qa Dios, kan chriʼ kʼo wä ryä chqä.
Ri kantzij chrij riʼ: Dios ma chwäch ta le Ruwachʼulew kʼo wä nixta chkikojöl ri chʼumilaʼ ri ye kʼo chkaj (1 Reyes 8:27). Kantzij na wä chë le Biblia nuʼij chë ri chʼumilaʼ chqä jontir ri rubʼanon qa Dios nkikʼüt ri nimaläj ruchqʼaʼ ryä (Salmo 19:1). Ye kʼa, ya reʼ ma ntel chë tzij chë Dios kʼo chukojöl jontir ri rubʼanon qa, achiʼel jun dibujante ma nkowin ta njeʼ chkipan ri ru-dibujos. Ye kʼa, ri ru-dibujos nkikʼüt achkë runaʼoj ryä. Ke riʼ chqä jontir ri rubʼanon qa Dios, jontir riʼ nkikʼüt ri utziläj taq «naʼoj ye kʼo rkʼë», achiʼel ri ruchqʼaʼ, ri runaʼoj chqä ri kowan najowan (Romanos 1:20).
Ye kʼo jojun winäq nkinmaj reʼ: We Dios ma xa bʼa akuchï ta kʼo wä, reʼ ntel chë tzij chë majun ta ronojel uchqʼaʼ pa ruqʼaʼ chqä chë ma retaman ta ri najin nkiqʼaxaj jontir.
Ri kantzij chrij riʼ: Ri espíritu santo ya riʼ ri loqʼoläj ruchqʼaʼ Dios. Ryä nuksaj re uchqʼaʼ reʼ rchë nutamaj ri najin nbʼanatäj kikʼë jontir winäq chqä rchë nuʼän xa bʼa achkë ri nrajoʼ ryä y xa bʼa akuchï nrajoʼ wä nuʼän riʼ, y ma nkʼatzin ta na njeʼ chriʼ (Salmo 139:7).
Ye kʼo jojun winäq nkinmaj reʼ: Salmo 139:8 nukʼüt chë Dios xa bʼa akuchï kʼo wä, rma ke reʼ nuʼij: «Xa ta rïn xkibʼä chkaj, chriʼ xkajeʼ wä rït, y, xa ta xkibʼä chpan ri Jül, kan chriʼ chqä xkajeʼ wä».
Ri kantzij chrij riʼ: Ri nuʼij re texto reʼ ma ntel ta chë tzij chë Dios xa bʼa akuchï kʼo wä. Ri nrajoʼ nuʼij ya riʼ chë Dios nkowin nqrtoʼ pä tapeʼ xa bʼa akuchï na yoj kʼo wä.
a Le Biblia nuʼij chë rubʼiʼ Dios ya riʼ Jehová.