¿Xksaj komä Dios ri evolución rchë xeruʼän ri jalajöj kiwäch kʼaslemal kʼo?

Ri nuʼij le Biblia

Manä, ma ke riʼ ta. Le Biblia chöj nuʼij chë Dios xeruʼän ri winäq chqä ri «jalajöj kiwäch» kʼaslemal ye kʼo, achiʼel ri chköp chqä ri cheʼ (Génesis 1:12, 21, 25, 27; Apocalipsis 4:11). Le Biblia nuʼij chë ri naʼäy qateʼ qatataʼ röj, ri winäq, ya riʼ Adán y Eva (Génesis 3:20; 4:1). Ye kʼa ma nuʼij ta chë Dios xksaj ri evolución rchë xeruʼän ri jalajöj kiwäch kʼaslemal ye kʼo. Ri ciencia nukʼüt chë ye kʼo jojun rubʼanik kʼaslemal yepotäj jbʼaʼ,a ye kʼa majun ta jun peraj chpan le Biblia ntzjon chrij riʼ o nuʼij ta chë ya riʼ ma nbʼanatäj ta.

• ¿Achkë nkinmaj jojun winäq?

• ¿Rukʼwan komä riʼ ri evolución rkʼë ri nuʼij le Biblia?

• Ri cheʼ chqä ri chköp nkitamaj yekʼaseʼ xa bʼa akuchï ye kʼo wä, ¿nukʼüt komä riʼ chë ya riʼ jun rubʼanik evolución?

¿Achkë nkinmaj jojun winäq?

Ri winäq nkinmaj chë Dios xksaj ri evolución rchë xeruʼän ri jalajöj kiwäch kʼaslemal ye kʼo. Ye kʼa kʼo kʼïy ri nkiquʼ chrij riʼ. Ri Encyclopædia Britannica nuʼij chë «Dios rubʼanon chë jontir ri kʼo kikʼaslemal yekowin yekʼiyär chqä chë ya riʼ najin nuksaj ryä rchë yejeʼ jalajöj kiwäch chköp chqä cheʼ».

Ri naʼoj riʼ ntok chqä re naʼoj reʼ chpan:

• Ojer xejeʼ jojun kiwäch kʼaslemal ri xepotäj y ke riʼ xejeʼ ri jalajöj kiwäch kʼaslemal ri ye kʼo komä.

• Jun rubʼanik kʼaslemal nkowin npotäj y nbʼeʼok jun chik rubʼanik kʼaslemal. Che rä ya reʼ nbʼix macroevolución.

• Yë Dios nsmajin jontir reʼ.

¿Rukʼwan komä riʼ ri evolución rkʼë ri nuʼij le Biblia?

We Dios xksaj ri evolución rchë xeruʼän ri jalajöj kiwäch kʼaslemal ye kʼo, reʼ ntel chë tzij chë ma kantzij ta jontir ri nuʼij chpan ri wuj Génesis chrij ri rubʼanik xbʼan che rä ronojel (Génesis 1:26, 27; 2:18-24; Mateo 19:4-6). Le Biblia nuʼij chë Jesús chkaj kʼo wä qa taq majanä wä tpë chwäch le Ruwachʼulew chqä chë yë ryä xtoʼö rchë Dios rchë xuʼän jontir ri kʼo (Juan 1:3). Rma riʼ ri nkinmaj ri winäq chrij Dios, chë ryä xksaj ri evolución rchë xuʼän ri jalajöj kiwäch kʼaslemal ye kʼo, ma rukʼwan ta riʼ rkʼë ri nukʼüt le Biblia.

Ri cheʼ chqä ri chköp nkitamaj yekʼaseʼ xa bʼa akuchï ye kʼo wä, ¿nukʼüt komä riʼ chë ya riʼ jun rubʼanik evolución?

Le Biblia ma nuʼij ta jaruʼ nkowin njalatäj jun rubʼanik kʼaslemal o jaruʼ mul nkowin nuʼän riʼ. Chqä majun ta nuʼij chrij taq ri chköp chqä ri cheʼ yejalatäj jbʼaʼ taq yekʼiyär o nkitamaj yekʼaseʼ akuchï yeyaʼöx wä. Ye kʼo jojun winäq nkiʼij chë ya riʼ jun rubʼanik evolución, ye kʼa taq nbʼanatäj riʼ, ma yepotäj ta chë jun chik rubʼanik kʼaslemal.