Tikanuj itoʼik rkʼë Dios rchë kiʼ ikʼuʼx niʼän pan ikʼlajil

Jehováa Dios xerkʼulbʼaʼ ri naʼäy taq winäq. Le Biblia nuʼij chë Dios xuʼän ri naʼäy ixöq y «xkʼwaj äl che rä ri achï». Adán kan kowan kiʼ rkʼuʼx xuʼän, rma riʼ xuʼij: «Kʼa riʼ xintzʼët rwäch jun ri rkʼwan nbʼaqil chqä ri rkʼwan nchʼakul» (Génesis 2:22, 23). Jehová kʼa nrajoʼ na chë ri kʼlan taq winäq kiʼ kikʼuʼx nkiʼän.

Taq kaʼiʼ winäq yekʼleʼ, rkʼë jbʼaʼ nkiquʼ chë majun ta kʼayewal xtkïl. Ye kʼa ma ke riʼ ta, rma tapeʼ jun kʼlaj winäq kan kowan nkajoʼ kiʼ, xtpë chqä kʼayewal chkiwäch (1 Corintios 7:28). Chpan re wuj reʼ, xtawïl kʼïy naʼoj ri lenäq chpan le Biblia. We rït xtasmajij, xkaturtoʼ rchë kiʼ akʼuʼx xtaʼän chpan akʼlajil chqä chpan afamilia (Salmo 19:8-11).

1 TABʼANAʼ RI SAMAJ RI RYAʼON QA JEHOVÁ PAN AQʼAʼ

RI NUʼIJ LE BIBLIA: Ri achï ya riʼ ri nukʼwan bʼey chpan jun familia (Efesios 5:23).

We rït kʼo awixjayil, Jehová nrajoʼ chë kan rkʼë ronojel awan nachajij (1 Pedro 3:7). Jehová xuʼän awixjayil rchë yaturtoʼ, y nrajoʼ chë ma naqasaj ta rqʼij chqä nawajoʼ (Génesis 2:18). Y xtqʼalajin chawij chë kowan nawajoʼ, we xtayaʼ pa naʼäy ri nrajoʼ ryä chwäch ri nawajoʼ rït (Efesios 5:25-29).

We rït kʼo awachjil, Jehová nrajoʼ chë rït ma naqasaj ta rqʼij chqä nrajoʼ chë natoʼ rchë kan ütz nukʼwaj bʼey chpan iwachoch (1 Corintios 11:3; Efesios 5:33). Kan rkʼë ronojel awan tatoʼ rkʼë ri nrajoʼ nuʼän (Colosenses 3:18). We rït ke riʼ xtaʼän, kowan aqʼij xtjeʼ chwäch ryä chqä chwäch Jehová (1 Pedro 3:1-6).

RI ÜTZ NAʼÄN:

• Takʼutuj che rä akʼlaj achkë nkʼatzin naʼän rchë más ütz naʼän che rä asamaj pan akʼlajil. Tayaʼ axkïn che rä taq ntzjon awkʼë y tatjaʼ aqʼij rchë nasmajij ri nuʼij chawä

• Ma tikʼo ta akʼuʼx naʼän riʼ, rma naʼän ri nrajoʼ akʼlaj nukʼwaj tiempo

2 TAYAʼ AXKÏN CHE RÄ AKʼLAJ TAQ NUʼIJ ACHKË NUNAʼ

RI NUʼIJ LE BIBLIA: Takʼutuʼ chë kan kowan rqʼij chawäch ri achkë nrajoʼ ri akʼlaj (Filipenses 2:3, 4). Ütz anaʼoj tabʼanaʼ rkʼë. Ma tamestaj ta chë Jehová nrajoʼ chë rsamajelaʼ ronojel mul ütz kinaʼoj nkiʼän (2 Timoteo 2:24). Taquʼ na achkë naʼij, rma le Biblia nuʼij reʼ: «Ri winäq ri ma nuquʼ ta na ri achkë yeruʼij kan nsokon achiʼel nsokon jun espada, ye kʼa ri rtzij jun ajnaʼoj winäq kan yaturknaj» (Proverbios 12:18). Jehová xkaturtoʼ rchë kan jaʼäl rbʼanik xkatzjon rkʼë ri akʼlaj (Gálatas 5:22, 23; Colosenses 4:6).

RI ÜTZ NAʼÄN:

• Takʼutuj atoʼik che rä Dios rchë ma chanin ta npë ayowal chqä rchë nayaʼ axkïn taq ri akʼlaj ntzjon awkʼë chrij jun ri kan kʼo rejqalen

• Taquʼ na ri achkë xtaʼij y achkë rbʼanik xtaʼij apü

3 MA TAMESTAJ TA CHË KʼO CHË CHIXKAʼIʼ NITOʼ IWIʼ

RI NUʼIJ LE BIBLIA: Taq xixkʼleʼ, xixok xa «jun chʼakulaj» (Mateo 19:5). Ye kʼa jojun mul ma jnan ta ri niquʼ. Rma riʼ, nkʼatzin nitamaj achkë rbʼanik jnan nuʼän iwäch chrij ri niquʼ chqä ri ninaʼ (Filipenses 2:2). Kan kowan nkʼatzin jnan nuʼän iwäch taq kʼo jun niwajoʼ niʼän. ¿Achkë rbʼanik yixkowin niʼän riʼ? Le Biblia nuʼij: «Taq ri winäq nkikʼulbʼej kiʼ, kan ütz xttel apü jontir chkiwäch» (Proverbios 20:18). Tiyaʼ qʼij chë ri naʼoj ye kʼo chpan le Biblia nukʼwaj ibʼey taq kʼo jun ri kowan rejqalen xtiwajoʼ xtiʼän (Proverbios 8:32, 33).

RI ÜTZ NAʼÄN:

• Ma xa xuʼ ta tatzjoj che rä akʼlaj ri ataman chrij jun xa bʼa achkë, xa kan tatzjoj che rä ri achkë nanaʼ chrij riʼ

• We kʼo jun nawajoʼ naʼän, naʼäy takʼulbʼej na akʼlaj