¿Achkë xkixtoʼö rchë yeʼisöl ri kʼayewal?

Taq jun achï chqä jun ixöq yekʼleʼ, kʼo kʼayewal xtpë chkiwäch, rkʼë jbʼaʼ rma jun wä nkiquʼ, jun wä nkinaʼ o rma ri rbʼanik xekʼiytisäx pä. Chqä rkʼë jbʼaʼ yë ri nkʼaj chik yeyaʼö kʼayewal chkiwäch o rkʼë jbʼaʼ chaq kʼateʼ yepë ri kʼayewal.

Rkʼë jbʼaʼ nanaʼ rït chë más ütz majun naʼän ta we kʼo jun kʼayewal najin nbʼanatäj chikojöl, ye kʼa le Biblia nuʼij chë nkʼatzin yeʼasöl (Mateo 5:23, 24). Xkakowin xkeʼasöl ri kʼayewal riʼ we xtasmajij ri naʼoj kʼo chpan le Biblia.

1 TITZJÖJ CHIWÄCH RI KʼAYEWAL NAJIN NIQʼAXAJ

RI NUʼIJ LE BIBLIA: «Kʼo [...] jun tiempo rchë nqtzjon» (Eclesiastés 3:1, 7). Tajamaʼ awäch rchë yatzjon rkʼë akʼlaj chrij ri kʼayewal; taʼij che rä achkë qäs anaʼon y achkë naquʼ rït chrij ri kʼayewal riʼ. Ronojel mul kantzij katzjon (Efesios 4:25). Tapeʼ kʼo ayowal, tatjaʼ aqʼij rchë ma naʼän ta chʼaʼoj. Taq ütz rbʼanik yatzjon apü, rkʼë jbʼaʼ ya riʼ xtuʼän chë jun koʼöl kʼayewal ma xtbʼä ta pa nüm (Proverbios 15:4; 26:20).

Tapeʼ ma jnan ta naquʼ rkʼë akʼlaj, ronojel mul ütz anaʼoj tabʼanaʼ rkʼë, takʼutuʼ chwäch chë nawajoʼ chqä ma taqasaj ta rqʼij (Colosenses 4:6). Tatjaʼ aqʼij rchë nasöl yän jun kʼayewal, y ma tiyaʼ ta qʼij chë rma iyowal ma yixtzjon ta chik chiwäch (Efesios 4:26).

RI ÜTZ NAʼÄN:

• Tatzʼetaʼ na ajän ütz yixtzjon chrij jun kʼayewal

• Taq akʼlaj najin ntzjon, ma taqʼät ta rtzij. Tayoʼej na kʼa taq rït ütz xkatzjon apü

2 TAYAʼ AXKÏN Y TQʼAX CHAWÄCH RI NUNAʼ AKʼLAJ

RI NUʼIJ LE BIBLIA: «Tikʼutuʼ ri ajowabʼäl chiwäch kan achiʼel nkikʼüt chkiwäch ye kaʼiʼ ri kichʼalal kiʼ. Ma tiyoʼej ta chë ri nkʼaj chik nkiyaʼ iqʼij rïx, xa rïx naʼäy kixbʼanö riʼ» (Romanos 12:10). Kan kʼo rejqalen nayaʼ axkïn che rä akʼlaj chqä natäj aqʼij rchë nqʼax chawäch ri nuquʼ, y ronojel mul taqasaj awiʼ (1 Pedro 3:8; Santiago 1:19). Ma taʼän ta chë achiʼel ta najin nayaʼ axkïn ye kʼa ma najin ta naʼän riʼ. Ronojel mul taq ütz nuʼän chawäch, tayaʼ qa ri achkë najin naʼän y tayaʼ axkïn che rä ri akʼlaj, o takʼutuj che rä we ütz kʼa xkixtzjon na. We awachiʼil natzʼët ri akʼlaj pa rkʼexel akʼulel natzʼët, ma chanin ta xtpë ayowal che rä (Eclesiastés 7:9).

RI ÜTZ NAʼÄN:

• Tayaʼ axkïn che rä akʼlaj tapeʼ ma nqä ta chawäch ri nuʼij

• Rchë natamaj achkë qäs nunaʼ akʼlaj, tatzuʼ achkë rachbʼäl nuʼän taq najin ntzjon chqä achkë rbʼanik najin nuʼij chawä

3 RONOJEL MUL TATJAʼ AQʼIJ

RI NUʼIJ LE BIBLIA: «Jontir rwäch samaj kʼo utzil nukʼäm pä pan awiʼ, ye kʼa we xa xuʼ yatzjon y majun ta naʼän, ma kan ta achkë xtjeʼ awkʼë» (Proverbios 14:23). Ma xa xuʼ ta nkʼatzin nitzjoj chiwäch achkë rbʼanik xtisöl jun kʼayewal, xa kan nkʼatzin niʼän ri xitzjoj. Rkʼë jbʼaʼ xtkʼatzin xtitäj iqʼij rchë xtiʼän riʼ, ye kʼa kan kʼo xtkʼatzin wä ri xtiʼän (Proverbios 10:4). We jnan xtuʼän iwäch, kʼo utzil xtikʼül chixkaʼiʼ (Eclesiastés 4:9).

RI ÜTZ NAʼÄN:

• Tiquʼ achkë ütz niʼän chijujnal rchë nisöl jun kʼayewal

• Chaq taqïl titzuʼ we najin niʼän ri xiʼij