Ma takanuj ta rkʼexel akʼlaj

Jehová nrajoʼ chë ma nqakanuj ta rkʼexel qakʼlaj (Malaquías 2:16). Ya reʼ kan kʼo rqʼij, rma we jun kʼlaj winäq nkiʼän riʼ, ma xkekowin ta xtkikʼuqbʼaʼ kikʼuʼx chkij. Ye kʼa ri nakʼuqbʼaʼ akʼuʼx chrij akʼlaj kan nkʼatzin, rma ya riʼ xtuʼän chë más xtiwajoʼ iwiʼ.

Pa qaqʼij komä, kan ye kʼïy nkikanuj rkʼexel kikʼlaj. Rchë ma nbʼanatäj ta ya reʼ awkʼë nkʼatzin nasmajij re kaʼiʼ naʼoj reʼ.

1 TJEʼ RQʼIJ AKʼLAJ CHAWÄCH

RI NUʼIJ LE BIBLIA: «[Tibʼanaʼ] ri achkë kʼo más kiqʼij» (Filipenses 1:10). Ri akʼlaj ya riʼ jun chkë ri más rqʼij pan akʼaslemal.

Jehová ma nrajoʼ ta chë narayij apü chik rwäch jun winäq, xa kan nrajoʼ chë kiʼ akʼuʼx naʼän rkʼë akʼlaj (Eclesiastés 9:9). Jehová kan chöj nuʼij chë kʼo chë natzʼët achkë nkʼatzin che rä akʼlaj chqä chë nkʼatzin nakanuj rbʼanik rchë kiʼ rkʼuʼx nuʼän (1 Corintios 10:24). Kan tqʼalajin chwäch akʼlaj chë kʼo rqʼij chawäch.

RI ÜTZ NAʼÄN:

• Tajamaʼ más awäch rchë yajeʼ rkʼë akʼlaj

• Taquʼ rij akʼlaj, ma xa xuʼ ta rït taquʼ qa awiʼ

2 TACHAJIJ AWAN

RI NUʼIJ LE BIBLIA: «Xa bʼa achkë achï ri nbʼä rwäch chrij jun ixöq y nurayij apü rwäch, ya xmakun yän rkʼë ri ixöq riʼ pa ran» (Mateo 5:28). Rma riʼ, we jun winäq nuquʼ rij tzʼil taq bʼanobʼäl, achiʼel ta najin chik nukanuj rkʼexel rkʼlaj.

Jehová nuʼij chë kan nkʼatzin nqachajij qan (Proverbios 4:23; Jeremías 17:9). Rchë yakowin naʼän riʼ tachajij awiʼ rkʼë ri achkë yeʼatzʼët (Mateo 5:29, 30). Tabʼanaʼ ri xuʼän Job, ryä xyaʼ chwäch ran ma nurayij ta apü chik rwäch jun ixöq (Job 31:1). Tayaʼ chwäch awan ma natzuʼ ta pornografía. Y kan ma tqʼax ta pan ajolon narayij apü rwäch jun winäq ri ma akʼlaj ta.

RI ÜTZ NAʼÄN:

• Kan tqʼalajin chkiwäch ri nkʼaj chik chë ri akʼlaj ya riʼ kʼo más rqʼij chawäch rït

• Tatzʼetaʼ achkë nunaʼ akʼlaj. Rma riʼ ma katzjon ta chik rkʼë jun winäq ri xa nuʼän chë ri akʼlaj ma ütz ta xtnaʼ