Ri xyaʼöx qa che rä Jacob

Isaac xkʼleʼ rkʼë Rebeca taq 40 rjnaʼ. Ryä kowan xrajoʼ rxjayil. Taq xqʼax ri tiempo, xebʼejeʼ kwaʼch kalkʼwal.

Esaú rbʼiʼ ri naʼäy akʼal, y ri rkaʼn, Jacob. Esaú kan nqä wä chwäch nbʼä pa taq jyuʼ chqä yerchäp wä chköp. Pero Jacob más wä nqä chwäch njeʼ chrachoch.

Chkipan ri qʼij riʼ, taq jun tataʼaj nkäm, ri naʼäy akʼal nyaʼöx qa más rjyuʼ chqä más rrajil chkiwäch rchaqʼ. Y chpan rfamilia Isaac, ri naʼäy akʼal nrïl chqä ri xtzüj Jehová che rä Abrahán. Chwäch Esaú majun ta wä rqʼij ri rtzjun Jehová, pero chwäch Jacob kan kowan wä rqʼij.

Kʼo jun qʼij, taq Esaú xapon chrachoch, kowan wä kosnäq rma jun qʼij xbʼerkanuj chköp. Jacob najin wä nuʼän jun rkïl wäy. Taq Esaú xsäq rxlaʼ ri rkïl wäy riʼ xuʼij reʼ che rä: «¡Yikäm chë nmïk! ¡Tayaʼ pä jbʼaʼ rkïl nway!». Jacob xuʼij: «Ütz kʼa, xtinyaʼ chawä xa xuʼ si nawajoʼ chwä rïn nyaʼöx wä qa ri rchʼobʼon nuyaʼ qa qatataʼ chawä». Esaú xuʼij reʼ: «¡Ütz riʼ tyaʼöx qa chawä! Rïn ma nwajoʼ ta ya riʼ. Rïn xa xuʼ nwajoʼ yiwaʼ». ¿Naquʼ rït chë Esaú kan kʼo rnaʼoj xkʼüt taq xuʼän riʼ? Manä, kan majun rnaʼoj ta xuʼän. Xa rma jun läq rkïl wäy, xxtuj qa jun ri kowan rqʼij.

Kʼo jun qʼij, taq Isaac xrjïx, xrajoʼ kʼo ütz nukʼutuj qa pa rwiʼ ri naʼäy rkʼajol. Pero Rebeca xtoʼ Jacob, ri rkaʼn ral, rchë yë ryä kʼo ütz nkʼutüx qa pa rwiʼ. Taq Esaú xtamaj riʼ, kowan xkatäj rkʼë. Rma riʼ xkanuj rbʼanik rchë nukamsaj rchaqʼ. Rma Isaac chqä Rebeca ma nkajoʼ ta chë nkamsäx Jacob, xkiʼij reʼ che rä: «Jät y katejeʼ rkʼë atío Labán, ri rxbʼal ateʼ. Y kakanaj chriʼ kʼa taq xtqʼax ryowal Esaú». Jacob xnmaj tzij, y xanmäj äl rchë ma nkamsäx ta.