Jacob y Esaú nkiküy kiʼ

Jehová xuʼij che rä Jacob chë xtchajij, achiʼel xuʼän rkʼë Abrahán chqä Isaac. Jacob xbʼejeʼ pa tinamït Harán. Chriʼ xkʼleʼ wä, xejeʼ kʼïy ralkʼwal chqä kowan xbʼeyomär.

Taq xeqʼax ri jnaʼ, Jehová xuʼij che rä Jacob: «Katzolin pa kitinamit ateʼ atataʼ». Rma riʼ Jacob chqä rfamilia xkichäp äl bʼey rchë yetzolin. Taq ye bʼenäq, jojun rmos xkibʼeʼij reʼ che rä: «Esaú ri anmal petenäq pa bʼey, y yerkʼamon pä 400 achiʼaʼ». Taq Jacob xkʼoxaj riʼ, kowan xxiʼij riʼ rma xquʼ chë Esaú petenäq rchë nbʼerbʼanaʼ chʼaʼoj rkʼë. Rma riʼ xuʼij reʼ taq xuʼän orar che rä Jehová: «Tabʼanaʼ utzil, kinatoʼ chwäch nnmal». Chkaʼn qʼij, Jacob xtäq äl kʼïy karneʼl, kʼsïkʼ, wakx, camellos chqä burros che rä Esaú.

Ri aqʼaʼ riʼ, taq Jacob ryonïl xkanaj, xtzʼët jun ángel. Ri ángel xrajoʼ xqasaj pan ilew Jacob. Ke riʼ xkiʼän kʼa taq najin chik nsaqirsan qʼanäj. Tapeʼ Jacob xsokotäj, ma xsqʼopij ta ri ángel. Rma riʼ ri ángel xuʼij: «Tayaʼ qʼij chwä rchë yibʼä äl». Pero Jacob xuʼij: «Manä, xa xuʼ xkatinsqʼopij si kʼo ütz nakʼutuj pa nwiʼ».

Pa rkʼisbʼäl, ri ángel kʼo ütz xkʼutuj pa rwiʼ Jacob. Ya riʼ xkʼüt chwäch Jacob chë Jehová xttoʼ chwäch Esaú.

Ri nmaqʼaʼ riʼ Jacob xtzʼët apü Esaú chqä ri 400 achiʼaʼ. Rma riʼ xnabʼiyäj äl chwäch rfamilia rchë nbʼerkʼuluʼ Esaú. Taq xapon rkʼë, siete mul xqasaj riʼ kʼa pan ilew chwäch. Taq Esaú xtzʼët Jacob, kan chanin xbʼä apü rkʼë chqä xqʼetej. Che kaʼiʼ xkichäp oqʼej chqä xkiküy kiʼ. ¿Naʼij rït chë Jehová xqä chwäch ri xuʼän Jacob?

Chrij riʼ Esaú xtzolin chrachoch, y Jacob xchäp chik jmul bʼey. Jacob 12 rkʼajol xjeʼ: Rubén, Simeón, Leví, Judá, Dan, Neftalí, Gad, Aser, Isacar, Zabulón, José chqä Benjamín. Kʼïy jnaʼ chrij riʼ, Jehová xksaj José, jun chkë rkʼajol Jacob, rchë xköl rtinamit. ¿Nawajoʼ natamaj achkë rbʼanik xuʼän riʼ? Tqatzʼetaʼ.