¿Achkë riʼ Job?

Chpan ri tinamït Uz, kʼo wä Job, jun achï ri nuyaʼ rqʼij Jehová. Ryä kowan bʼeyon, nüm rfamilia chqä kan ütz rnaʼoj: yertoʼ wä ri pobres, ri malkaʼn taq ixoqiʼ chqä ri akʼalaʼ ri majun ta kiteʼ kitataʼ. Job kan yë ri ütz xuʼän. ¿Naquʼ rït chë xa rma riʼ majun poqonal ta xqʼaxaj?

Job ma rtaman ta wä, pero Satanás najin wä nutzuʼ pä. Jehová xuʼij reʼ che rä Satanás: «¿Atzʼeton rït Job, ri nsamajel? Majun ta jun achiʼel ryä chwäch le Rwachʼlew. Ryä nunmaj tzij chqä ma wiʼx ta». Satanás xuʼij: «Nunmaj na kʼa atzij, si achajin chqä kʼo ütz ayaʼon pa rwiʼ; ayaʼon rjyuʼ chqä rchkop. Tawesaj jontir che rä, y tatzʼetaʼ na peʼ chë ma xtyaʼ ta chik aqʼij». Jehová xuʼij: «Tabʼanaʼ ri nawajoʼ rkʼë. Xa xuʼ ma takamsaj ta». ¿Achkë rma naquʼ rït chë Jehová xuʼij ya riʼ? Rma rtaman chë Job ronojel mul xtnmaj rtzij.

Rchë Job nuqʼäj rtzij Jehová, Satanás kʼïy poqonal xyaʼ pä pa rwiʼ. Naʼäy, ryä xuʼän chë ri sabeos, jun molaj winäq, xkileqʼaj äl rwakx, ri achij taq rwakx chqä rburros. Chrij riʼ, jun kʼatïk xerkamsaj jontir rkarneʼl. Ri caldeos, jun chik molaj winäq, xkileqʼaj rcamellos. Ri rmos ri najin yechajin ri chköp xekäm chqä. Chrij riʼ, xpë jun ri kan más itzel: jontir ralkʼwal Job xekäm taq ri jay ri akuchï najin yewaʼ wä xtzaq pä chkij. Job kowan xbʼison, pero ma xyaʼ ta qa Jehová.

Satanás xrajoʼ chë Job xtäj más poqän, rma riʼ xuʼän chë xeʼel chʼaʼk chrij rchʼakul. Ya riʼ xuʼän chë Job kowan xtäj poqän. Ryä ma rtaman ta wä achkë rma najin nbʼanatäj jontir ya riʼ rkʼë. Tapeʼ ke riʼ, ryä majun bʼëy xyaʼ ta qa Jehová. Taq Dios xtzʼët ri xuʼän Job, kan jaʼäl xnaʼ ran.

Chrij riʼ, Satanás xertäq oxiʼ achiʼaʼ rchë xkitzʼük tzij chrij Job. Ryeʼ xkiʼij reʼ che rä: «Xa awewan laʼ jun amak y ma nawajoʼ ta naʼij. Rma riʼ Dios najin nuyaʼ pä poqonal chawij». Job xuʼij: «Rïn majun ta mak nbʼanon». Pero taq xqʼax ri tiempo, xquʼ chë yë Jehová najin nyaʼö pä ri poqonal riʼ chrij, y xuʼij chë Dios ma ütz ta rnaʼoj najin nuʼän rkʼë.

Elihú, jun kʼajol ri najin wä nuyaʼ rxkïn chkë, xuʼij: «Rïx xa yïx sachnäq. Jehová kan nüm rqʼij, más chwäch ri nqaquʼ röj. Ryä majun bʼëy xtuʼän ta jun itzelal. Ryä nutzʼët jontir, y yertoʼ pä ri nkʼatzin kitoʼik».

Jehová chqä xtzjon pä rkʼë Job. Ryä xuʼij: «¿Akuchï yït kʼo wä rït taq rïn xinbʼän le kaj chqä le Rwachʼlew? ¿Achkë rma naquʼ chë rïn ma ütz ta nnaʼoj? Chaq tzij yatzjon tapeʼ ma ataman ta achkë rma kʼo yebʼanatäj». Job xqʼax chwäch chë ma ütz ta ri xuʼän. Rma riʼ xuʼij: «Rïn xisach. Kinakyuʼ rma ri xinbʼij. Xa xuʼ wä nkʼoxan chawij rït, pero komä kan xintamaj awäch, y ntzʼët chë rït jontir yakowin naʼän».

Pa rkʼisbʼäl, Jehová xuʼän chë Job xel ri yabʼil chrij y xyaʼ más che rä chwäch ri kʼo wä rkʼë rbʼanon qa. Job kʼïy jnaʼ xkʼaseʼ chqä kiʼ rkʼuʼx xuʼän chkipan ri jnaʼ riʼ. Jehová kʼïy ütz xyaʼ pä pa rwiʼ Job rma ronojel mul xnmaj rtzij, tapeʼ kʼo mul kwest xuʼän chwäch. ¿Y rït? ¿Xtaʼän achiʼel Job y xtayaʼ rqʼij Jehová ronojel mul tapeʼ kwest xtuʼän chawäch?