Ri xkiʼij che rä Jehová chë xtkiʼän

Taq jun kaʼiʼ ikʼ keʼel pä Egipto, ri israelitas xeʼapon pa jyuʼ Sinaí. Jehová xuʼij che rä Moisés chë tjoteʼ pa rwiʼ ri jyuʼ riʼ, y xuʼij reʼ che rä: «Rïn xikolö kichë ri israelitas. Si ryeʼ xtkinmaj ntzij chqä xtkismajij ri leyes xtinyaʼ chkë, xkeʼok ri tinamït ri más xtinwajoʼ». Taq Moisés xxleʼ pä, xtzjoj chkë ri israelitas ri xuʼij Jehová. ¿Achkë xkiʼij ryeʼ? Ryeʼ xkiʼij: «Xtqaʼän jontir ri xtuʼij Jehová chqë».

Chrij riʼ, Moisés xjoteʼ chik jmul pa rwiʼ ri jyuʼ. Chriʼ, Jehová xuʼij: «Pan oxiʼ qʼij xkitzjon rkʼë ri tinamït. Taʼij chkë chë ma kejoteʼ ta pa rwiʼ ri jyuʼ Sinaí». Moisés xxleʼ pä y xuʼij chkë ri israelitas chë tkichʼajchʼobʼej kiʼ rma Jehová xttzjon pä kikʼë.

Pa rox qʼij, ri israelitas xkitzʼët chë pa rwiʼ ri jyuʼ xepë kyopaʼ chqä jun qʼäq sutzʼ. Chqä xkikʼoxaj jun mamaʼ qlojay, y xqʼajan qʼanäj jun ukʼaʼ o cuerno. Chrij riʼ, Jehová xqä pä pa rwiʼ ri jyuʼ chpan qʼaqʼ. Ri israelitas kowan xkixiʼij kiʼ. Jontir ri jyuʼ xnuj chë sübʼ y kowan slonel xuʼän. Ri ukʼaʼ kan más na chik xqʼajan. Ya riʼ taq Jehová xuʼij: «Rïn yïn Jehová. Kʼo chë ma niyaʼ ta rqʼij jun chik dios».

Moisés xjoteʼ chik jmul pa rwiʼ ri jyuʼ. Jehová xeryaʼ ri leyes che rä ri nkʼatzin wä nkismajij rtinamit. Chriʼ xuʼij achkë rbʼanik kʼo chë nkiyaʼ rqʼij chqä achkë rbʼanik kʼaslemal nkʼatzin nkikʼwaj. Moisés xertzʼibʼaj ri leyes riʼ y chrij riʼ xskʼij chkiwäch ri israelitas. Ryeʼ xkiʼij: «Xtqaʼän jontir ri nukʼutuj Jehová chqë». Pero, ¿kan xkiʼän komä?