12 achiʼaʼ ri xetaq chutzʼetik Canaán

Ri israelitas xeʼel äl pa jyuʼ Sinaí. Ryeʼ xeqʼax chpan ri desierto rchë Parán rchë xeʼapon chpan ri jyuʼ Cadés. Chriʼ, Jehová xuʼij reʼ che rä Moisés: «Keʼataqaʼ äl 12 achiʼaʼ rchë nkibʼetzʼetaʼ Canaán, ri jyuʼ ri xtinyaʼ chkë ri israelitas. Nkʼatzin nachaʼ jun achï chkipan jojun ijatzul». Rma riʼ Moisés xerchaʼ 12 achiʼaʼ y xuʼij reʼ chkë: «Jäx Canaán y titzʼetaʼ si ri jyuʼ kʼo rwäch nuyaʼ. Titzʼetaʼ chqä si ri winäq kʼo kichqʼaʼ o manä, chqä si chkipan tinamït ye kʼo wä o xa chkipan jay ri bʼanon rkʼë tzyäq». Ri 12 achiʼaʼ xebʼä äl Canaán. Kikʼë ryeʼ ye kʼo wä Josué chqä Caleb.

40 qʼij chrij riʼ, ri achiʼaʼ xetzolin pä. Kikʼamom pä higos, granadas chqä uvas, y xkiʼij reʼ: «Canaán kan ütz, pero ri winäq kowan kichqʼaʼ y ri tinamït mamaʼ taq muros kʼo chkij». Rma riʼ Caleb xuʼij: «¡Nqkowin yeqachʼäk! Joʼ chkij». ¿Achkë rma naʼij rït chë Caleb xuʼij ya riʼ? Rma ryä chqä Josué kikʼuqbʼan kikʼuʼx chrij Jehová. Pero ri 10 achiʼaʼ xkiʼij: «Ma qbʼä ta. Ri winäq riʼ mamaʼ taq kaqän, kan ye achiʼel gigantes. Röj xa yoj achiʼel xiʼl chkiwäch».

Taq xkikʼoxaj riʼ, ri israelitas xuʼän kaʼiʼ kikʼuʼx. Rma riʼ xechʼojin chqä xkiʼij: «Tqachaʼ chik jun ri nekʼwan bʼey chqawäch y qtzolin Egipto. ¿Achkë rma nqbʼä Canaán xa xuʼ rchë nqkamsäx?». Josué y Caleb xkiʼij: «Más ütz tqanmaj rtzij Jehová. Ryä xtqrchajij, ma tixiʼij ta iwiʼ». Pero ri israelitas ma xkiyaʼ ta kixkïn chkë, xa xkajoʼ xekikamsaj.

¿Y achkë xuʼän Jehová? Ryä xuʼij reʼ che rä Moisés: «Kan kʼïy nbʼanon pä pa kiwiʼ ri israelitas. Tapeʼ ke riʼ, ryeʼ ma nkinmaj ta ntzij. Rma riʼ xkenyaʼ qa pa desierto 40 jnaʼ kʼa taq xkekäm. Xa xuʼ kalkʼwal, Josué chqä Caleb xkejeʼ chwäch ri jyuʼ ri ntzjun chkë».