Rut chqä Noemí

Pa tinamït Israel kʼo jun tiempo xjeʼ wayjal. Rma riʼ Noemí xbʼä äl rkʼë rchjil chqä kikʼë kaʼiʼ ral pa tinamït Moab. Jun tiempo chrij riʼ, ri rchjil Noemí xkäm. Ri ral xekʼleʼ kikʼë Rut chqä Orpá, kaʼiʼ moabitas. Taq xqʼax ri tiempo, Noemí xekäm chqä ri kaʼiʼ ral. Ryä kowan xbʼison.

Taq Noemí xkʼoxaj chë xkʼis wayjal Israel, xrajoʼ xtzolin pa rtinamit. Rut chqä Orpá xebʼä äl rkʼë. Pero taq ye bʼenäq pa bʼey, Noemí xuʼij reʼ chkë: «Rïx kan ütz inaʼoj xiʼän kikʼë wal chqä wkʼë rïn. Rïn nwajoʼ chë yixkʼleʼ chik jmul, rma riʼ kixtzolin chiwachoch». Ryeʼ xkiʼij: «Röj kowan yatqajoʼ, ma nqajoʼ ta yatqayaʼ qa ayonïl». Pero Noemí xtäj rqʼij chkij chë ketzolin. Pa rkʼisbʼäl, Orpá xbʼä äl, pero Rut xkanaj qa rkʼë. Noemí xuʼij: «Orpá xtzolin pa rtinamit chqä kikʼë rdioses, jät äl rkʼë y katzolin rkʼë ateʼ». Pero Rut xuʼij: «Rïn ma xkatinyaʼ ta qa. Ri atinamit rït xtbʼeʼok ntinamit rïn, y aDios xtbʼeʼok nDios». ¿Achkë komä xnaʼ Noemí naquʼ rït taq Rut xuʼij ya riʼ che rä?

Rut chqä Noemí xeʼapon Israel taq najin wä nesäx cebada. Kʼo jun qʼij, Rut xbʼermoloʼ cebada ri kanajnäq qa pa rjyuʼ Boaz, ri ral Rahab. Boaz rkʼoxan wä chë Rut ma xyaʼ ta qa Noemí. Rma riʼ xuʼij chkë rmos chë tkiyaʼ qa más cebada rchë Rut numöl äl.

Ri aqʼaʼ riʼ, Noemí xkʼutuj reʼ che rä Rut: «¿Achoq pa rjyuʼ xabʼä wä komä?». Rut xuʼij: «Pa rjyuʼ Boaz». Noemí xuʼij: «Boaz jun rfamiliar wachjil. Chriʼ kasamäj wä kikʼë ri nkʼaj chik qʼopojiʼ. Chriʼ majun xkanaqö».

Rut chriʼ xsamäj wä kʼa taq xkʼis rmolik ri cebada. Boaz xtzʼët chë Rut ütz rnaʼoj chqä kowan nsamäj. Chkipan qa ri qʼij riʼ, taq jun achï nkäm y ma yejeʼ ta qa ralkʼwal, jun rfamiliar ütz wä nkʼleʼ rkʼë ri ixöq riʼ. Rma riʼ Boaz xkʼleʼ rkʼë Rut. Xjeʼ jun kalkʼwal y Obed rbʼiʼ xkiyaʼ. Kʼïy jnaʼ chrij riʼ, Obed xbʼeʼok rmamaʼ ri rey David. Ri ramigas Noemí kan xel kikʼuʼx y xkiʼij reʼ che rä: «Naʼäy, Jehová xyaʼ Rut chawä, ri ütz rnaʼoj rbʼanon awkʼë. Y komä kʼo jun ti amam. ¡Tqayaʼ rqʼij Jehová rma riʼ!».