Ri naʼäy rey xjeʼ Israel

Rchë nkʼwäx kibʼey ri israelitas, Jehová xeryaʼ jueces. Pero ryeʼ nkajoʼ wä jun rey. Rma riʼ, xkiʼij reʼ che rä Samuel: «Jontir tinamït kʼo kirey. Röj chqä nqajoʼ jun». Samuel ma ütz ta xkʼoxaj riʼ. Rma riʼ xuʼän orar, y Jehová xuʼij pä reʼ che rä: «Ri israelitas ma yït ta rït ri ma yatkajoʼ taʼ, xa yïn rïn ri ma yïn nkajoʼ ta. Taʼij chkë chë xtinyaʼ jun kirey, pero ri rey riʼ kan kʼïy xtkʼutuj chkë». Taq ri israelitas xkikʼoxaj riʼ, xkiʼij: «¡Tapeʼ ke riʼ, röj nqajoʼ jun qarey!».

Rma riʼ, Jehová xuʼij che rä Samuel chë jun achï ri Saúl rbʼiʼ ya riʼ xttok rey. Taq Samuel xbʼä Ramá rchë xbʼertzʼetaʼ Saúl, xqʼäj aceite pa rjolon rchë xkʼüt chë yë ryä xttok rey.

Chrij riʼ, Samuel xermöl jontir israelitas rchë nukʼüt chkiwäch achkë xttok kirey. Pero ma nkïl ta wä Saúl. ¿Ataman achkë rma? Rma rewan wä riʼ chukojöl kʼïy maletas. Taq xkibʼewlaʼ pä, xkipabʼaʼ chkiwäch jontir israelitas. Yë wä Saúl ri más nüm raqän chqä kan jaʼäl ntzuʼun. Samuel xuʼij: «¡Titzʼetaʼ! Ya reʼ ri achï xchaʼöx rma Jehová». Ri israelitas kan kuw xkiʼij: «¡Yalöj tkʼaseʼ ri rey!».

Pa naʼäy, Saúl xnmaj rtzij Samuel chqä Jehová. Pero taq xqʼax ri tiempo, xjäl rnaʼoj. Kʼo jun qʼij, Samuel xuʼij che rä Saúl chë tyoʼej na rchë nkitzüj ri sacrificios. Ri rey ma yaʼon ta wä qʼij che rä rchë yertzüj sacrificios. Pero Samuel kʼa rnaj xapon, rma riʼ yë Saúl xtzjü apü ri sacrificios. ¿Achkë xuʼän Samuel taq xtzʼët riʼ? Xuʼij reʼ che rä Saúl: «Rït kʼo chë xanmaj ta rtzij Jehová, pero ma xanmaj ta». Rkʼë ri xbʼix che rä Saúl, ¿xtamaj komä chë ronojel mul nkʼatzin nunmaj rtzij Jehová?

Chrij riʼ, Saúl xbʼerbʼanaʼ chʼaʼoj kikʼë ri amalequitas, y Samuel xuʼij che rä chë jontir kerkamsaj. Pero Saúl ma xkamsaj ta ri rey Agag. Ya riʼ taq Jehová xuʼij che rä Samuel: «Saúl ma najin ta chik nunmaj ntzij». Taq Samuel xkʼoxaj riʼ, kowan xbʼison y xuʼij reʼ che rä Saúl: «Jehová xtchaʼ chik jun rey rma rït ma najin ta chik nanmaj rtzij». Taq Samuel ya nbʼä äl, Saúl xjïkʼ rchiʼ rtzyaq Samuel y xrïchʼ. Samuel xuʼij: «Ke laʼ xtuʼän Jehová awkʼë rït, xtresaj ri qʼatbʼäl tzij pan aqʼaʼ». Riʼ ntel chë tzij chë Dios xtchaʼ chik jun rey. Ri rey riʼ xtrajoʼ Jehová chqä xtnmaj rtzij.