David chqä Saúl

Taq David xkamsaj Goliat, ri rey Saúl xyaʼ pa kiwiʼ rsoldados. David kʼïy chʼaʼoj xchʼäk, rma riʼ xjeʼ rqʼij chkiwäch ri winäq. Ronojel mul taq David ntzolin wä pä pa jun chʼaʼoj, ri ixoqiʼ yexajö chqä yebʼixan, y nkiʼij wä reʼ: «Saúl pa mil rkʼulel yerkamsan, pero David kan pa diez mil yerkamsan». Saúl itzel xnaʼ che rä David, rma riʼ xrajoʼ xkamsaj.

Kʼo jun qʼij, taq David najin wä nuʼän tocar ri arpa chwäch Saúl, Saúl xkʼäq jun lanza chrij. Pero, rma David chanin xwkeʼ qa, ri lanza xa chwäch xan xbʼä wä. Chrij riʼ, Saúl kʼïy mul xrajoʼ xkamsaj. Pa rkʼisbʼäl, David xanmaj äl chqä xrewaj riʼ pa desierto.

Rma riʼ, Saúl xerkʼwaj äl 3,000 soldados rchë xbʼä chrij. David chqä ri ye bʼenäq rkʼë xkewaj kiʼ chpan jun jül. Saúl xok apü chpan ri jül riʼ pero ma rtaman ta wä chë ryeʼ ye kʼo chriʼ. Ri rchiʼil David eqal xkiʼij reʼ che rä: «Komä yakowin nakamsaj Saúl». David xjelun rkʼë Saúl y xqpij jun peraj rtzyaq. Saúl ma xnaʼej ta taq xbʼanatäj riʼ. Pero David kowan xtiʼon ran rma xqasaj rqʼij ri rey rchaʼon Jehová. Rma riʼ, ma xyaʼ ta qʼij chkë rchiʼil nkikamsaj Saúl. Taq Saúl xel äl chpan ri jül, David kan kuw xuʼij reʼ che rä: «Rïn xikowin ta xatinkamsaj, pero ma xinbʼän ta». ¿Naquʼ rït chë chrij riʼ Saúl más ütz rnaʼoj xuʼän rkʼë David?

Manä. Saúl kʼa xrajoʼ na xkamsaj. Kʼo jun aqʼaʼ, David chqä Abisái, ri rsobrino, eqal xeʼok apü kʼa akuchï warnäq wä Saúl. Yajün Abner, ri nchajin Saúl, warnäq. Rma riʼ Abisái xuʼij reʼ che rä David: «¡Komä si nqkowin nqakamsaj Saúl! Tayaʼ qʼij chwä nkamsaj». Pero David xuʼij: «Jehová ttzʼetö achkë nuʼän rkʼë. Más ütz takʼwaj äl rlanza chqä rxar chë yaʼ y joʼ äl».

Chrij riʼ, David xjoteʼ pa rwiʼ jun jyuʼ ri akuchï nkowin nutzʼët Saúl chqä rsoldados. David kan kuw xuʼij: «¡Abner! ¿Achkë rma ma xachajij ta ri rey? ¿Akuchï kʼo wä rxar chqä rlanza?». Saúl xkʼoxaj chë yë David najin ntzjon, rma riʼ xuʼij: «Rït xakowin ta xinakamsaj, pero ma xaʼän ta. Nqʼax chi nwäch achkë rma rït xkatok rey pa rwiʼ Israel». Chrij riʼ, Saúl xtzolin pa rpalacio. Pero ma jontir ta rfamilia Saúl itzel xkinaʼ che rä David.