Jesús nuchaʼ Saulo

Saulo ya riʼ jun fariseo ri xaläx Tarso, jun tinamït ri kʼo pa rqʼaʼ Roma. Ryä rtaman wä chrij kileyes ri judíos chqä yertzelaj wä ri cristianos. Rma riʼ, yebʼeresaj wä pä chkachoch y yerjuʼ wä pa cárcel, chë achiʼaʼ chë ixoqiʼ. Hasta ütz xtzʼët taq xkamsäx ri cristiano Esteban chë abʼäj.

Pero Saulo ma xa xuʼ ta chriʼ Jerusalén xrajoʼ xuʼän wä ya riʼ. Rma riʼ, xuʼij che rä ri sumo sacerdote chë ttaqaʼ äl Damasco rchë nuyaʼ chqä poqonal pa kiwiʼ ri cristianos ri ye kʼo chriʼ. Taq ya napon Damasco, xtzʼët jun saqïl ri kowan rchqʼaʼ. Ya riʼ xuʼän chë xtzaq. Chrij riʼ, xkʼoxaj jun chʼaʼäl ri xuʼij: «Saulo, ¿achkë rma najin nayaʼ poqonal pa nwiʼ?». Saulo xuʼij: «¿Yït achkë riʼ rït?». Ri chʼaʼäl xuʼij: «Rïn yïn Jesús. Jät Damasco, y chriʼ xtkiʼij chawä achkë nkʼatzin naʼän». Chrij riʼ, Saulo ma xtzuʼun ta chik. Rma riʼ, xkʼatzin xkʼwäx chuqʼaʼ kʼa taq xapon pa tinamït.

Chriʼ Damasco, Jesús xuʼij reʼ che rä ri cristiano Ananías chpan jun visión: «Jät chrachoch Judas, ri kʼo chpan ri bʼey ri Recta rbʼiʼ, y takanuj Saulo». Ananías xuʼij: «Ajaw, rïn kʼïy ma ütz ta nkʼoxan chrij ri achï riʼ. Ryä najin yerjuʼ atzeqelbʼëy pa cárcel». Pero Jesús xuʼij: «Jät rkʼë, rma xinchaʼ rchë nutzjoj ri ütz taq rtzjol ri ye petenäq rkʼë Dios chkipan kʼïy tinamït».

Rma riʼ, Ananías xapon rkʼë Saulo y xuʼij: «Wachʼalal Saulo, Jesús xirtäq pä rchë yatzuʼun chik jmul». Chaq kʼateʼ, Saulo xtzuʼun chik jmul. Taq xtamaj más chrij Jesús, xbʼeʼok rtzeqelbʼëy. Ryä xuʼän bautizar riʼ chqä xchäp rtzjoxik Rchʼaʼäl Dios chkipan ri sinagogas kikʼë ri nkʼaj chik cristianos. Ri judíos kan ma nkinmaj ta wä ri najin nkitzʼët. Komä Saulo najin wä chik nutzjoj chrij Jesús. Rma riʼ xkiʼij: «¿Ma ryä ta ri najin nyaʼö poqonal pa kiwiʼ ri cristianos kʼa?».

Saulo oxiʼ jnaʼ xtzjoj Rchʼaʼäl Dios chriʼ Damasco. Ri judíos itzel xkinaʼ che rä, rma riʼ xkajoʼ xkikamsaj. Pero ri cristianos xkitamaj riʼ y xkitoʼ rchë xanmäj äl. Ryeʼ xkiyaʼ äl chpan jun canasta y xkesaj äl chpan jun jül ri kʼo che rä rmuro ri tinamït.

Taq Saulo xbʼä Jerusalén, xebʼertzʼetaʼ ri cristianos. Pero ryeʼ nkixiʼij wä kiʼ chwäch. Rma riʼ Bernabé, jun cristiano ri kan ütz rnaʼoj, xkʼwaj äl Saulo kikʼë ri apóstoles y xtzjon kikʼë rchë xqʼalajin chkiwäch chë Saulo rjalon wä chik rnaʼoj. Saulo xkanaj qa pa congregación ri kʼo Jerusalén, y kiʼ rkʼuʼx xchäp rtzjoxik ri ütz taq rtzjol chkë ri winäq. Taq xqʼax ri tiempo, Pablo chik xbʼix che rä Saulo.