Jesús nbʼiyïn pa rwiʼ yaʼ

Jesús ma xa xuʼ ta xkowin xerqʼomaj ri yawaʼiʼ chqä xerkʼasoj ri kamnaqiʼ, xa kan xkowin chqä xpabʼaʼ ri kaqʼiqʼ chqä ri jöbʼ. Taq xkʼïs roración pa rwiʼ ri jyuʼ, Jesús xtzʼët chë xpë jun mamaʼ jöbʼ pa mar rchë Galilea. Ri rapóstoles ye kʼo wä chpan jun barco chqä najin wä nkitoʼ kiʼ chwäch ri jöbʼ. Rma riʼ, Jesús xxleʼ äl y xbʼiyïn äl pa rwiʼ mar rchë napon kʼa rkʼë ri barco. Taq ri apóstoles xkitzʼët chë kʼo jun najin nbʼiyïn pa rwiʼ yaʼ, kowan xkixiʼij kiʼ. Pero Jesús xuʼij: «¡Xa yïn rïn, ma tixiʼij ta iwiʼ!».

Pedro xuʼij: «Ajaw, si yït rït, taʼij chwä chë yibʼä awkʼë». Jesús xuʼij: «¡Katampä!». Rma riʼ, Pedro xqä qa y xbʼiyïn äl pa rwiʼ yaʼ kʼa rkʼë Jesús. Taq ya napon apü rkʼë, xxiʼij riʼ rma xa yë ri mamaʼ jöbʼ xtzuʼ. Y rma xbʼä äl chuxeʼ yaʼ, xuʼij: «¡Ajaw, kinatoʼ!». Jesús xchäp chuqʼaʼ y xuʼij reʼ che rä: «¿Achkë rma xaxiʼij awiʼ? ¿Majun ta akʼuqbʼäl kʼuʼx kʼa?».

Taq Jesús y Pedro xejoteʼ chpan ri barco, ri mamaʼ jöbʼ xtaneʼ. ¿Achkë komä xkinaʼ ri apóstoles naʼij rït? Ryeʼ xkiʼij: «Kan nqʼalajin chë rït yït Rkʼajol Dios».

Jesús ma xa xuʼ ta jmul xkʼüt chë nkowin nupabʼaʼ ri kaqʼiqʼ chqä ri jöbʼ. Jun chik qʼij, taq Jesús chqä rapóstoles ye bʼenäq äl chpan ri barco pa rwiʼ ri mar, Jesús xbʼä kʼa chrij ri barco y xwär. Taq warnäq, xchapatäj jun mamaʼ jöbʼ. Rma riʼ, kowan rwiʼ yaʼ xpë y xok yaʼ chpan ri barco. Ri apóstoles xkikʼasoj Jesús y xkiʼij reʼ che rä: «¡Ajaw, xtqkäm! ¡Kojatoʼ!». Jesús xkatäj y xuʼij reʼ che rä ri mar: «¡Kataneʼ qa! ¡Ma kaqʼajan ta chik!». Ri kaqʼiqʼ chqä ri mar xetaneʼ. Chrij riʼ, Jesús xkʼutuj reʼ chkë rapóstoles: «¿Majun ta ikʼuqbʼäl kʼuʼx kʼa?». Ryeʼ xkiʼij reʼ chkiwäch: «Hasta ri kaqʼiqʼ y ri mar nkinmaj rtzij». Ri apóstoles xqʼax chkiwäch chë majun rma nkixiʼij kiʼ si kan rkʼë ronojel kan nkikʼuqbʼaʼ kikʼuʼx chrij Jesús.