Jesús kan pa mil winäq yertzüq

Taq ya nbʼeqä ri Pascua rchë ri jnaʼ 32, ri apóstoles xetzolin rkʼë Jesús. Ryä xrajoʼ chë xeʼuxlan jbʼaʼ rma kan kʼïy tiempo xebʼä chutzjoxik Rchʼaʼäl Dios. Rma riʼ xerkʼwaj äl chpan jun barco rchë yebʼä Betsaida. Taq xeʼapon chuchiʼ yaʼ, Jesús xtzʼët chë kan pa mil chik winäq ye kʼo chriʼ. Tapeʼ nrajoʼ wä njeʼ kikʼë rapóstoles, ryä kan kiʼ rkʼuʼx xerqʼomaj ri yawaʼiʼ chqä kan kʼïy xkʼüt chkiwäch. Y jun qʼij xtzjoj chrij Rqʼatbʼäl Tzij Dios chkë. Taq xqä qa qʼij, ri rapóstoles xkiʼij reʼ che rä: «Ri winäq rkʼë jbʼaʼ nnüm kipan. Taʼij chkë chë kebʼä äl rchë nkikanuj achkë nkitäj».

Pero Jesús xuʼij: «Ma nkʼatzin ta yebʼä äl. Yïx kixyaʼö kiway». Ri apóstoles xkikʼutuj: «¿Nawajoʼ chë nqabʼeloqʼoʼ pan rchë nqayaʼ chkë?». Felipe, jun chkë rapóstoles, xuʼij: «Tapeʼ kʼïy ta qarajil kʼo, ma xtqkowin ta xtqalöqʼ pan chkë jontir re winäq reʼ».

Jesús xuʼij: «¿Jaruʼ rkïl wäy kʼo qkʼë?». Andrés xuʼij: «Kʼo cinco pan chqä kaʼiʼ kär. Pero ya riʼ ma xtqʼiʼ ta». Jesús xuʼij: «Tikʼamaʼ pä ri pan chqä ri kär». Chrij riʼ xuʼij chkë ri winäq chë tkimoloʼ kiʼ pa 50 chqä pa 100 y xuʼij chkë chë ketzʼyeʼ. Ryä xkʼän apü ri pan chqä ri kär, xtzuʼun chkaj y xuʼän jun oración. Chrij riʼ, xyaʼ ri rkïl wäy chkë rapóstoles rchë xkijäch. Ri 5,000 achiʼaʼ ri ye kʼo chriʼ, y ri ixoqiʼ chqä ri akʼalaʼ xnuj kipan. Pa rkʼisbʼäl, rchë majun ta nkʼaq äl, ri apóstoles xkimöl jontir ri xtotäj qa. ¡Xnuj 12 chakäch! Kan ntel akʼuʼx che rä re milagro reʼ, ¿tapeʼ?

Jontir xel kikʼuʼx che rä Jesús, rma riʼ xkajoʼ chë ntok kirey. Pero Jesús ma xrajoʼ ta, rma rtaman chë majanä tbʼeqä ri tiempo chë Jehová nuʼän chë ntok rey. Rma riʼ xertäq äl ri winäq chkachoch chqä xuʼij chkë rapóstoles chë kebʼä jkʼan chik che rä ri mar rchë Galilea. Ri apóstoles xebʼä äl chpan ri barco, pero Jesús xjoteʼ ryonïl pa rwiʼ jun jyuʼ. ¿Ataman rït achkë rma? Rma nrajoʼ wä ntzjon rkʼë Rtataʼ. Tapeʼ kʼo kʼïy achkë xuʼän, Jesús ronojel mul xjäm rwäch rchë xuʼän orar.