Ri rkʼisbʼäl waʼin xuʼän Jesús

Ronojel jnaʼ, ri judíos nkiʼän wä ri Pascua ri qʼij 14 rchë ri ikʼ nisán. Ryeʼ nkiʼän wä riʼ rchë nkinataj ri qʼij taq Jehová xeresaj pä Egipto chqä xerkʼwaj chwäch ri ilew ri xtzüj chkë. Chpan ri jnaʼ 33, Jesús chqä rapóstoles xkiʼän ri Pascua chpan jun cuarto ri kʼo pa rwiʼ jun jay chriʼ Jerusalén. Taq xkikʼïs waʼin, Jesús xuʼij: «Jun chiwä rïx xkirkʼayij». Ri apóstoles xsach kikʼuʼx, rma riʼ xkikʼutuj reʼ che rä: «¿Achkë xtbʼanö riʼ?». Jesús xuʼij: «Ri achï ri xtinyaʼ re jwechʼ pan reʼ che rä». Ya riʼ taq xyaʼ jwechʼ pan che rä Judas Iscariote. Taq xbʼanatäj riʼ, Judas xbʼä äl.

Chrij riʼ, Jesús xuʼän jun oración, xwächʼ jun pan y xyaʼ chkë rapóstoles. Ryä xuʼij: «Titjaʼ re pan reʼ. Ya reʼ nukʼambʼej tzij nchʼakul ri xtinyaʼ iwmä rïx». Chrij riʼ, xuʼän jun oración rma ri vino, xyaʼ chkë rapóstoles y xuʼij: «Tiqmuʼ re vino reʼ. Ya reʼ nukʼambʼej tzij nkikʼel ri xtinyaʼ rchë nkuytäj imak. Nyaʼ nchiʼ chiwä chë rïx xkixok reyes wkʼë chlaʼ chkaj. Ronojel jnaʼ tibʼanaʼ reʼ rchë yininataj». Ri cristianos kʼa nkimöl na kiʼ ronojel jnaʼ chpan ri fecha riʼ taq nqä qa qʼij. Che rä ya riʼ nbʼix ri Loqʼoläj Waʼin.

Taq xkikʼïs waʼin, ri apóstoles xkichäp chʼaʼoj chkiwäch chrij ri achkë chkë ryeʼ kʼo más rqʼij. Pero Jesús xuʼij reʼ chkë: «Ri kʼo más rqʼij chikojöl rïx, xa tbʼanaʼ chë achiʼel ta ya riʼ majun ta rqʼij».

Jesús chqä xuʼij: «Rïx yïx wamigos, rma riʼ nbʼij jontir chiwä ri nrajoʼ Ntataʼ chë nitamaj. Rïn ya yitzolin chkaj, akuchï kʼo wä Ntataʼ. Pero rïx xkixkanaj qa aweʼ, y ri winäq xtkitamaj chë rïx yïx ntzeqelbʼëy rma rbʼanik xtiwajoʼ iwiʼ. Rïx nkʼatzin niwajoʼ iwiʼ achiʼel yixinwajoʼ rïn».

Pa rkʼisbʼäl, Jesús xuʼän jun oración akuchï xuʼij che rä Jehová chë kerchajij rtzeqelbʼëy, chë kertoʼ rchë jnan nuʼän kiwäch chqä chë loqʼoläj tbʼan che rä rbʼiʼ. Chrij riʼ, Jesús chqä rapóstoles xebʼixan che rä Jehová y xebʼä äl. Xa jbʼaʼ wä chik nrajoʼ rchë nekʼwäx äl Jesús.