Najin nkʼis ri yaʼ chwäch le Ruwachʼlew | ¿Achkë nuʼij le Biblia chrij riʼ?

• «Kan kowan kʼatän najin nuʼän chlaʼ China chqä majun ta jöbʼ najin nuʼän» (The Guardian, 7 de septiembre, 2022).

• «Chlaʼ el Gran Cuerno de África majun ta jöbʼ najin nuʼän; ya bʼenäq chik 5 junaʼ ri ma rubʼanon ta jöbʼ» (Ri rutzjol nuyaʼ ri ONU, 26 de agosto, 2022).

• «Más pa nkʼaj che rä Europa, ri winäq najin nkʼis kiyaʼ. Majun bʼëy bʼanatajnäq ta reʼ chpan ri 500 junaʼ ri ye qʼaxnäq pä» (BBC News, 23 de agosto, 2022).

Ye kʼïy etamanelaʼ nkiʼij chë re kʼayewal reʼ más xtnmatäj. ¿Ütz komä nqayoʼej chë xtkʼachöj ri kʼayewal riʼ? ¿Achkë nuʼij le Biblia chrij riʼ?

Ri majun ta yaʼ chqä ri profecías ri ye kʼo chpan le Biblia

Ya reʼ xuʼij le Biblia chë xtbʼanatäj pa qaqʼij komä:

• «Xa bʼa akuchï xtjeʼ wayjal» (Mateo 24:7).

Kʼïy mul, taq majun ta yaʼ njeʼ chqä wayjal, y ri profecías ri ye kʼo chpan le Biblia yetzjon chrij ri wayjal chqä ri kʼayewal nukʼäm pä, chrij ri tijöj poqonal chqä ri kamïk (Apocalipsis 6:6, 8).

¿Achkë rma najin nkʼis ri yaʼ chwäch le Ruwachʼlew?

Le Biblia nuʼij jun chkë rma ri nbʼanatäj riʼ. Nuʼij:

• «Jun winäq ma [...] yaʼon ta pa ruqʼaʼ rchë nukʼwaj rubʼey» (Jeremías 10:23).

Reʼ ntel chë tzij chë ri winäq majun ta ütz xtkïl we xa kiyonïl ryeʼ xtkikʼwaj kibʼey o xtkiqʼät tzij. Y, rma jontir ri kibʼanon, najin nkʼis ri yaʼ chwäch le Ruwachʼlew.

• Ye kʼïy científicos nkiʼij chë ri winäq najin nkiʼän chë njeʼ más kʼatän chwäch le Ruwachʼlew, y ya riʼ rubʼanon chë chpan kʼïy tinamït majun ta yaʼ.

• Ri choy chqä ri raqän taq yaʼ rkʼë jbʼaʼ xa xkechaqiʼj qa. ¿Achkë rma? Rma ri winäq kan kowan yejakʼäkʼ chqä ri políticos ma pa rubʼeyal ta najin yesamäj, kibʼanon chë yeqpïx cheʼ, nkitzʼilbʼisaj ri yaʼ chqä ma pa rubʼeyal ta nkiksaj ri ye kʼo chwäch le Ruwachʼlew.

Ye kʼa, le Biblia kan nukʼuqbʼaʼ qakʼuʼx.

¿Kʼo komä jun qʼij xtkʼachöj re kʼayewal reʼ?

Le Biblia nuʼij chë Dios xtsöl ri kʼayewal ri najin nbʼanatäj rkʼë ri yaʼ. ¿Achkë rubʼanik xtuʼän riʼ?

1. 1. Dios xtchüp kiwäch «ri winäq ri najin nkitzʼlaʼ le Ruwachʼlew» (Apocalipsis 11:18). Ryä xtchüp kiwäch ri winäq, ri kowan yejakʼäkʼ, ri najin nkitzʼlaʼ le Ruwachʼlew (2 Timoteo 3:1, 2).

2. 2. «Ri ilew ri chaqiʼj rubʼanon rma ri Qʼij, kan xtrmeʼ yaʼ chwäch chqä xtnuj chë aj» (Isaías 35:1, 6, 7). Dios xtchojmij le Ruwachʼlew chqä xtuʼän jun kotzʼijaläj ilew che rä ri akuchï kan kʼïy yaʼ xtjeʼ.

3. 3. «Rït yachajin le Ruwachʼlew y kan nayaʼ ruchqʼaʼ rchë xa bʼa achkë nkʼïy chwäch» (Salmo 65:9). Rkʼë rutoʼik Dios, kan pa rukʼiyal qaway xtjeʼ chwäch le Ruwachʼlew chqä chʼajchʼöj taq yaʼ.