Ri naʼäy oxiʼ poqonal

Ri egipcios kan kʼïy wä samaj kiyaʼon pa kiwiʼ ri israelitas. Jehová xtäq Moisés chqä Aarón rchë nkibʼeʼij reʼ che rä ri faraón: «Tayaʼ qʼij chë ntinamit nbʼä pa desierto rchë nbʼeryaʼ nqʼij». Rma ri faraón kowan nunaʼ riʼ, xuʼij: «Majun rqʼij ta chi nwäch rïn ri nuʼij Jehová. Ma xtinyaʼ ta qʼij chkë ri israelitas yebʼä äl». Chrij riʼ ri faraón xyaʼ más samaj chkij ri israelitas, pero Jehová ma chaq ke riʼ ta xkanaj qa chwäch. ¿Achkë xuʼän? Xyaʼ pä 10 poqonal pa rwiʼ Egipto. Jehová xuʼij reʼ che rä Moisés: «Ri faraón ma nunmaj ta ntzij. Chwaʼq nmaqʼaʼ, ryä xtbʼejeʼ chuchiʼ ri raqän yaʼ Nilo. Katapon rkʼë y taʼij che rä chë jontir ri yaʼ xtbʼeʼok kïkʼ, rma ma ryaʼon ta qʼij chë ntinamit nbʼä äl». Moisés xnmaj tzij chqä xapon rkʼë ri faraón. Ri faraón xtzʼët taq Aarón xkajij ri yaʼ rkʼë ri cheʼ ri rkʼwan pa rqʼaʼ. Taq Aarón xuʼän riʼ, ri yaʼ xbʼeʼok kïkʼ. Ri raqän yaʼ xchwïr, ma ütz ta wä chik naqüm chqä ri kär xekäm. Tapeʼ ke riʼ, ri faraón ma xrajoʼ ta xyaʼ qʼij chë ri israelitas yebʼä pa desierto.

Siete qʼij chrij riʼ, Jehová xtäq Moisés rchë nbʼeruʼij reʼ che rä ri faraón: «Si ma nayaʼ ta qʼij chë ntinamit nbʼä äl, Egipto xtnuj chë wukük». Rma ri faraón ma xnmaj ta tzij, Aarón xyäk rcheʼ y jontir ri tinamït xnuj chë wukük. Ri wukük ye kʼo wä pa kachoch ri winäq, pa kichʼat, pa kilaq... ¡Xa bʼa akuchï ye kʼo wä! Rma riʼ ri faraón xuʼij reʼ che rä Moisés: «Taʼij che rä Jehová chë ttnabʼaʼ ri najin nbʼanatäj. Chrij riʼ xtinyaʼ qʼij chë ri israelitas xkebʼä». Rma riʼ Jehová xuʼän chë ri wukük xekäm, y ri egipcios kan kʼïy wukük xekimöl. Ri tinamït kowan xchwïr. Tapeʼ ke riʼ, ri faraón jmul chik ma xyaʼ ta qʼij chë ri israelitas xebʼä äl.

Jehová xuʼij chik reʼ che rä Moisés: «Taʼij che rä Aarón chë tkajij ri ilew rkʼë rcheʼ. Taq ryä xtuʼän riʼ, ri poqlaj xtbʼeʼok koköj taq üs». Y kan ke riʼ xbʼanatäj. Xa bʼa akuchï xejeʼ koköj taq üs ri xekichʼöp ri winäq. Jojun egipcios xkiʼij reʼ che rä ri faraón: «Ya reʼ kan yë Dios najin nyaʼö pä pa qawiʼ». Tapeʼ ke riʼ, ri faraón ma xyaʼ ta qʼij chë ri israelitas yebʼä äl.