RI QʼOPOJIʼ KʼOJOLAʼ NKIKʼUTUJ QA REʼ CHKIWÄCH
¿Achkë rubʼanik yirutoʼ le Biblia? Naʼäy peraj: Takanuj bʼeyomäl chpan le Biblia
«Kʼo mul nchapon ruskʼixik ruwäch le Biblia, ye kʼa xa yikos nskʼij ruwäch rma nnaʼ chë majun bʼëy xtinkʼïs ta» (Briana, 15 rujunaʼ).
¿Ke riʼ chqä nanaʼ rït? We ke riʼ, ri naʼoj ri ye kʼo chpan re peraj kan kowan xkatkitoʼ.
¿Achkë rma kan nkʼatzin naskʼij ruwäch le Biblia?
¿Nikʼo akʼuʼx rït naskʼij ruwäch le Biblia? We ke riʼ, röj kan nqʼax chqawäch ri nanaʼ. Rkʼë jbʼaʼ nikʼo akʼuʼx naskʼij ruwäch rma natzʼët chë le Biblia kʼo kowan ruxaq, xa xuʼ letras ye kʼo chpan y majun ta jun achbʼäl chpan. Kan ma junan ta rkʼë natzʼët televisión o videos, ¿tapeʼ?
Ye kʼa kachʼobʼon chrij reʼ: xa ta rït nawïl jun kax ri kʼo kʼïy bʼeyomäl chpan, ¿tapeʼ chë kan kʼo ta nawajoʼ najäq yän?
Le Biblia kan achiʼel ri kax riʼ ri kʼo kʼïy bʼeyomäl chpan. Chpan le Biblia xtawïl kʼïy naʼoj ri xkatkitoʼ rchë:
Xtachaʼ xtaʼän ri ütz chpan akʼaslemal.
Ütz xtakʼwaj awiʼ kikʼë ateʼ atataʼ.
Xtawïl utziläj taq awachiʼil.
Ma kan ta xtchʼpü akʼuʼx (xkamayon).
¿Achkë rma nqaʼij chë le Biblia, tapeʼ kan ojer chik riʼ tzʼibʼan qa, kʼo utzil nukʼäm pä pa qawiʼ? Rma «ronojel ri Tzʼibʼatäl qa [chpan le Biblia] petenäq rkʼë Dios» (2 Timoteo 3:16). Reʼ ntel chë tzij chë jontir ri naʼoj ye kʼo chpan petenäq rkʼë Dios, ri kʼo más ruqʼij chwäch xa bʼa achkë na chik jun.
Le Biblia kan achiʼel jun kax ri ye kʼo kʼïy bʼeyomäl chpan.
Jojun rubʼanik ri ütz naskʼij ruwäch le Biblia
Jun rubʼanik ya riʼ nachäp äl ruskʼixik rkʼë ri naʼäy libro kʼa taq xtakʼïs rkʼë ri rukʼisbʼäl. Reʼ xkaturtoʼ rchë xtatzʼët qäs nutzjoj le Biblia. Kʼo kʼïy rubʼanik ri xkakowin xtaskʼij ruwäch le Biblia. Tqatzʼetaʼ kaʼiʼ rubʼanik:
Ütz nachäp ruskʼixik rkʼë ri libro ri kʼo pa naʼäy y nakʼïs rkʼë ri rukʼisbʼäl, ntel chë tzij, nachäp rkʼë Génesis y nakʼïs rkʼë Apocalipsis (Revelación).
Ütz chqä nachäp pä ruskʼixik rkʼë ri xebʼanatäj pa naʼäy y chrij riʼ rkʼë ri xebʼanatäj pä chkipan ri junaʼ ri xeqʼax chrij riʼ.
Ri ütz naʼän: Chpan ri peraj 4-A rchë ri folleto Guía para el estudio de la Palabra de Dios xtawïl jun lista chrij ri xbʼanatäj chpan rukʼaslemal Jesús.
Jun chik rubʼanik ya riʼ nakanuj jun tzijonem ri rukʼwan riʼ rkʼë ri najin naqʼaxaj rït chpan akʼaslemal. Jojun tzʼetbʼäl:
¿Nawajoʼ rït yejeʼ awachiʼil ri kan ütz nakʼuqbʼaʼ akʼuʼx chkij? We ke riʼ, taskʼij ri xbʼanatäj rkʼë David chqä Jonatán (1 Samuel, capítulos 18 kʼa 20). Chrij riʼ, tabʼanaʼ ri nuʼij chpan ri peraj «Cómo encontrar amigos de verdad» rchë natamaj qa utziläj taq naʼoj chrij ri xbʼanatäj rkʼë David chqä Jonatán.
¿Nawajoʼ rït naqʼät awiʼ rchë ma xkatzaq ta chpan jun mak? Ütz naskʼij ri xbʼanatäj rkʼë José y natzʼët achkë ütz naʼän rchë ma naʼän ta jun mak (Génesis, capítulo 39). Chrij riʼ, tabʼanaʼ ri nuʼij chpan ri peraj «Cómo resistir las tentaciones» chqä «Acusado falsamente», ri xtkikʼüt qa utziläj taq naʼoj chawäch.
¿Nawajoʼ natamaj achkë rubʼanik yaturtoʼ ri yachʼö rkʼë Dios? Taskʼij ri xbʼanatäj rkʼë Nehemías (Nehemías, capítulo 2). Chrij riʼ, tabʼanaʼ ri nuʼij chpan ri peraj «Jehová contestó su oración» rchë natamaj qa utziläj taq naʼoj chpan.
Ri ütz naʼän: Taq nawajoʼ naskʼij ruwäch le Biblia, takanuj jun lugar ri akuchï majun ta jun nnaqö awchë. Riʼ xkaturtoʼ rchë kan xtayaʼ awan chrij ruskʼixik a-Biblia.
Jun rukʼisbʼäl rubʼanik ya riʼ nachaʼ jun tzijonem o jun salmo, naskʼij ruwäch y chrij riʼ naquʼ rij achkë rubʼanik xkaturtoʼ chpan akʼaslemal. Taq nakʼïs ruskʼixik, tabʼanaʼ qa re kʼutunïk reʼ chawäch:
¿Achkë rma Jehová xyaʼ qa re tzij reʼ chpan le Biblia?
¿Achkë nukʼüt qa reʼ chi nwäch chrij Jehová chqä chrij ri rubʼanik nuʼän jontir?
¿Achkë rubʼanik yirutoʼ chpan nkʼaslemal ri kʼa riʼ xinskʼij qa?
Ri ütz naʼän: Tayaʼ chawäch naskʼij ruwäch a-Biblia. Taksaj ri «Programa rchë naskʼij ruwäch le Biblia», ri kʼo pa qa sitio pa Internet, rchë nayaʼ qa retal ri qʼij ri nawajoʼ nachäp ruskʼixik ruwäch a-Biblia.