RI QʼOPOJIʼ KʼOJOLAʼ NKIKʼUTUJ QA REʼ CHKIWÄCH
¿Achkë rma ütz yibʼä chkipan ri moloj yebʼan pa Salón del Reino?
Ri testigos de Jehová nkimöl kiʼ kaʼiʼ mul pa jun semana chkipan jojun jay ri nbʼix Salones del Reino chkë. ¿Achkë nkiʼän ryeʼ chkipan ri jay riʼ? ¿Achkë utzil xtawïl rït we xkabʼä chkipan ri moloj riʼ?
¿Achkë nbʼan chpan jun Salón del Reino?
Chpan jun Salón del Reino yetjöx ri winäq chrij le Biblia chqä nkʼut chkiwäch achkë rubʼanik nkismajij ri naʼoj ye kʼo chpan Ruchʼaʼäl Dios. Ri moloj ri yebʼan chkipan ri jay riʼ xkatkitoʼ rchë:
natamaj ri kantzij chrij Dios.
nqʼax chawäch achkë rma najin yebʼanatäj kʼïy kʼayewal komä.
más ütz anaʼoj xtaʼän.
xtawïl awachiʼil ri kantzij yatkajoʼ.
¿Ataman rït reʼ? Ri jay ri nkiksaj ri testigos de Jehová rchë nkiʼän kimoloj chpan, nbʼix Salón del Reino che rä, rma ri más ntzjöx chriʼ ya riʼ ri Ruqʼatbʼäl Tzij Dios (Mateo 6:9, 10; 24:14; Lucas 4:43).
¿Achkë rma ütz yabʼä chkipan ri moloj riʼ?
Ri naʼoj yekʼut chkipan kan xkatkitoʼ. Ri naʼoj ri yek’ut chkipan ri kimoloj ri testigos de Jehová kan xkatkitoʼ rchë xtjeʼ más anaʼoj (Proverbios 4:5). Reʼ ntel chë tzij chë le Biblia nkowin yaturtoʼ rchë nachaʼ naʼän ri ütz chpan akʼaslemal. Chqä, yeruqʼalajsaj jojun kʼutunïk achiʼel reʼ:
Ya reʼ kibʼiʼ jojun tzijonem ri yeyaʼöx chkipan ri kimoloj ri Testigos ri qʼij sábado o domingo:
¿Achkë rma kʼo chë nqakanuj qanaʼoj chpan le Biblia?
¿Achoq rkʼë nqatoʼ wä qiʼ taq nqaqʼaxaj kʼayewal?
¿Achkë najin nuʼän ri Ruqʼatbʼäl Tzij Dios pa qawiʼ?
«Jun wachiʼil pan escuela xapon pa qamoloj. Ryä xtzʼyeʼ rkʼë n-familia, y röj xqaqʼaxaj apü ri qa-libros che rä. Taq xkʼis ri qamoloj, ryä xuʼij chwä chë kowan xqä chwäch ri comentarios xkiyaʼ ri winäq taq xebʼan kʼutunïk. Chqä xuʼij chwä chë chpan ru-iglesia majun ta wä publicaciones achiʼel ye kʼo qkʼë röj» (Brenda).
¿Ataman rït reʼ? Ri yatok pa Salones del Reino ma tojon ta chqä ma nkʼutüx ta päq chkë ri winäq ri yeʼapon.
Ri winäq ri xtatamaj kiwäch chriʼ kan kowan xkatkitoʼ. Le Biblia nuʼij chë jun chkë rma ri nkimöl kiʼ ri cristianos, ya riʼ rchë nkikʼuqbʼalaʼ kikʼuʼx chkiwäch (Hebreos 10:24, 25). Chpan ri tiempo yoj kʼo komä, kan kowan nukʼuqbʼaʼ akʼuʼx ri yajeʼ kikʼë winäq ri ma xa xuʼ ta ryeʼ nkiquʼ qa kiʼ, xa kan nkajoʼ Dios chqä yekajoʼ ri nkʼaj chik.
«Kʼo mul, taq nkʼis qa jun qʼij nnaʼ chë kowan yikosnäq chqä yibʼison, ye kʼa ri yeʼapon pa Salón del Reino kan nkikʼuqbʼaʼ nkʼuʼx. Taq nkʼis ri moloj, kan kiʼ nkʼuʼx yitzolin äl chwachoch chqä nnaʼ chë kʼo más wuchqʼaʼ» (Elisa).
¿Ataman rït reʼ? Chwäch jontir le Ruwachʼulew ye kʼo más 120,000 congregaciones kichë ri testigos de Jehová chqä ye kʼo más 60,000 jay ri akuchï nkimöl wä kiʼ. Ronojel junaʼ yeyak jun 1,500 Salones del Reino rma kan más ye kʼïy winäq najin yeʼapon chkipan ri qamoloj.a
a We nawajoʼ natamaj akuchï kʼo jun Salón del Reino, katok chpan ri página «Ri kimoloj ri testigos de Jehová» y tayaʼ clic chrij ri peraj «Tatzʼetaʼ akuchï más naqaj nkanaj wä chawä».