RI QʼOPOJIʼ KʼOJOLAʼ NKIKʼUTUJ QA REʼ CHKIWÄCH
¿Kan nkʼatzin komä yichʼö rkʼë Dios?
Chlaʼ Estados Unidos, jun 80% chkë ri qʼopojiʼ kʼojolaʼ yechʼö rkʼë Dios, ye kʼa xa xuʼ pa nkʼaj chkë ryeʼ nkiʼän riʼ ronojel qʼij. Rkʼë jbʼaʼ ye kʼo jojun nkikʼutuj qa reʼ chkiwäch: «¿Yichʼö rkʼë Dios xa xuʼ rma jaʼäl nunaʼ wan taq nbʼän riʼ?».
¿Achkë ntel chë tzij yachʼö rkʼë Dios?
Taq yachʼö rkʼë Jehová, rït najin yachʼö rkʼë ri xbʼanö ronojel. Taquʼ rij reʼ: tapeʼ ryä kʼo más ruqʼij chkiwäch ri winäq, «ryä ma kan ta näj kʼo wä chqë röj» (Hechos 17:27). Rma riʼ, le Biblia nuʼij chqë chë tqabʼanaʼ reʼ: «Kixjelun rkʼë Dios, y ryä xtjelun pä iwkʼë rïx» (Santiago 4:8).
¿Achkë ütz naʼän rchë más junan nuʼän awäch rkʼë Dios?
Yachʼö rkʼë.
Natjoj awiʼ chrij le Biblia. Ke riʼ rubʼanik «ntzjon pä» Dios awkʼë.
Ri yachʼö rkʼë Dios chqä natjoj awiʼ chrij Ruchʼaʼäl xkaturtoʼ rchë más junan xtuʼän awäch rkʼë.
«Ri yachʼö rkʼë Jehová, ntel chë tzij, rkʼë ri Nimaläj Ruqʼij, ya riʼ jun chkë ri spanïk más nüm yaʼon chkë ri winäq» (Jeremy).
«Taq nbʼij che rä Jehová achkë kʼo pan wan, rïn kan más junan nuʼän nwäch rkʼë» (Miranda).
¿Yirukʼoxaj komä Dios taq yichʼö rkʼë?
Tapeʼ nanmaj chë kʼo Dios chqä yachʼö rkʼë, kʼo mul rkʼë jbʼaʼ kʼayewal nuʼän chawäch nanmaj chë ryä najin yaturkʼoxaj. Ye kʼa le Biblia nuʼij chë Jehová kan nukʼoxaj «ri chʼonïk yebʼan» che rä (Salmo 65:2). Chqä nuʼij chë taʼij che rä achkë nbʼanö chawä chë nchʼpü akʼuʼx (yamayon). ¿Achkë rma? Rma Dios kan nrajoʼ yaturtoʼ pä (1 Pedro 5:7).
Kachʼobʼon chrij reʼ: ¿Chaq taqïl yatzjon rït kikʼë awachiʼil? We ke riʼ, ütz chqä naʼän ya riʼ rkʼë Jehová. Chaq taqïl katzjon rkʼë chqä taksaj rubʼiʼ (Salmo 86:5-7; 88:9). Ütz naʼän riʼ rma kan yë le Biblia nbʼin chawä chë chaq taqïl kʼo chë yatzjon rkʼë Dios (1 Tesalonicenses 5:17).
«Taq yichʼö rkʼë ri nimaläj Ntataʼ kʼo chkaj, rïn nbʼij che rä jontir ri kʼo pa wan» (Moises).
«Kan achiʼel nbʼän rkʼë nteʼ chqä kikʼë wachiʼil taq ntzjoj chkë jontir ri yenqʼaxaj, kan ke riʼ chqä nbʼän rkʼë Jehová; ntzjoj jontir ya riʼ che rä» (Karen).
¿Achkë ütz ntzjoj che rä taq yichʼö rkʼë?
Le Biblia nuʼij: «Xa bʼa achkë na kʼa najin niqʼaxaj, kixchʼö qʼanäj rkʼë Dios rchë niʼij che rä achkë niwajoʼ nikʼutuj che rä» (Filipenses 4:6).
¿Ntel chë tzij riʼ chë ütz natzjoj che rä Dios ri kʼayewal najin naqʼaxaj? ¡Jaʼ, ütz natzjoj ya riʼ che rä! Le Biblia nuʼij chë tqabʼanaʼ reʼ: «Tayaʼ awejqaʼn chrij Jehová, y ryä xkaturtoʼ» (Salmo 55:22).
Ye kʼa, ma ütz ta we xa xuʼ ri kʼayewal ri najin naqʼaxaj natzjoj che rä Dios. Jun qʼopoj ri rubʼiniʼan Chantelle nuʼij: «Ma yïn ta jun utziläj rachiʼil Jehová we xa xuʼ yichʼö rkʼë rchë nkʼutuj ntoʼik che rä». Chqä nuʼij: «Rïn nbʼij chë ri naʼäy ri kʼo chë nqaʼän, ya riʼ nqtyoxin che rä. Y kantzij na wä chë kʼo kʼïy ri achoq chrij ütz nqtyoxin wä».
Kachʼobʼon chrij reʼ: ¿Achkë nawajoʼ rït natyoxij che rä Dios? Taquʼ kij oxiʼ ri xaqʼaxaj chpan re qʼij reʼ ri ütz natyoxij che rä Jehová.
«Yajün taq xa xuʼ natzʼët jun ti jaʼäl kotzʼiʼj nkowin nuʼän chawä chë nawajoʼ yatyoxin che rä Jehová» (Anita).
«Kachʼobʼon chrij jun texto chpan le Biblia ri kowan nqä chawäch o chrij jun ri rubʼanon qa Jehová ri kan ntel akʼuʼx che rä. Chrij riʼ katyoxin che rä rma ya riʼ» (Brian).