TJONÏK 56
Katoʼon rchë kan junan nuʼän qawäch pa congregación
Taq nqjeʼ kikʼë ri qachʼalal, röj nqanaʼ ri xnaʼ David, ri qʼatöy tzij. Ryä xuʼij: «¡Titzuʼ!, ¡kan janina ütz y kan jaʼäl chë qonojel qachʼalal qiʼ junan yoj kʼo chqä junan qawäch!» (Salmo 133:1). Ye kʼa jontir nkʼatzin nqtoʼon rchë ronojel mul junan nuʼän qawäch pa congregación.
1. ¿Achkë nkʼutü chë kan junan rubʼanon qawäch chpan rutinamit Dios?
We rït yabʼä chpan jun congregación pa jun chik tinamït, rkʼë jbʼaʼ ma xtqʼax ta chawäch ri kichʼaʼäl ri qachʼalal, ye kʼa kan jaʼäl xtanaʼ xkajeʼ kikʼë. ¿Achkë rma? Rma, tapeʼ xa bʼa akuchï na xkabʼä wä, xtatzʼët chë ri Testigos xa junan ri publicaciones yeqaksaj rchë nqatjoj qiʼ chrij le Biblia. Chqä, nqatäj qaqʼij rchë nqajowalaʼ qiʼ chqawäch. Tapeʼ xa bʼa achkë na qatinamit, jontir nqajoʼ nqatzjoj rubʼiʼ Jehová chqä junan nqayaʼ ruqʼij (Sofonías 3:9; nota).
2. ¿Achkë ütz naʼän rït rchë kan junan nuʼän qawäch pa congregación?
«Kan rkʼë ronojel iwan tiwajowalaʼ iwiʼ chiwäch» (1 Pedro 1:22). ¿Achkë rubʼanik naʼän riʼ? Pa rukʼexel xa xuʼ ri ma ütz ta nkiʼän ri nkʼaj chik ya riʼ natzʼët, ri más ütz ya riʼ nayaʼ awan chkij ri utziläj taq naʼoj kʼo kikʼë. Ma xa xuʼ ta takʼwaj awiʼ kikʼë ri nqä chkiwäch nkiʼän ri nqä chawäch rït; tatamaj chqä kiwäch winäq ri jun chik kitinamit o kijatzul. Chqä, tatjaʼ aqʼij rchë nawesaj äl pan awan xa bʼa achkë jun ri nbʼanö chawä chë itzel yeʼatzʼët ri nkʼaj chik (taskʼij ruwäch 1 Pedro 2:17).a
3. ¿Achkë xtaʼän taq rït chqä jun chik qachʼalal xtjeʼ jun oyowal chiwäch?
Tapeʼ röj kan junan rubʼanon qawäch, rma xa yoj ajmakiʼ, kʼo mul yeqasök ri qachʼalal. Rma riʼ ri Ruchʼaʼäl Dios nuʼij reʼ chqë: «Ronojel mul [...] tikuyulaʼ imak chiwäch». Chqä nuʼij: «Jehová ma xkʼewaj ta xixurküy rïx, rma riʼ ke riʼ chqä tibʼanaʼ rïx» (taskʼij ruwäch Colosenses 3:13). Tapeʼ röj kan kʼïy mul nqayaʼ bʼis pa ran Jehová, ryä kan nuküy qamak. Rma riʼ nuyoʼej chë röj yeqaküy ri qachʼalal. We rït nanaʼ chë xasök jun qachʼalal rkʼë ri xaʼij o xaʼän, tatjaʼ aqʼij rchë nasöl ri kʼayewal riʼ rkʼë (taskʼij ruwäch Mateo 5:23, 24).b
TQATAMAJ MÁS CHRIJ RE NAʼOJ REʼ
Kachʼobʼon chrij ri achkë rubʼanik yatoʼon rït rchë kan junan nuʼän qawäch pa congregación.
¿Achkë xtaʼän rït rchë xtasöl jun kʼayewal rkʼë jun qachʼalal?
4. Ma itzel ta tanaʼ chkë ri nkʼaj chik
Röj nqajoʼ nqakʼüt chkiwäch jontir qachʼalal chë yeqajoʼ. Ye kʼa rkʼë jbʼaʼ kʼayewal nuʼän chqawäch nqakʼwaj qiʼ kikʼë jojun rma nqatzʼët chë ma ye junan ta qkʼë röj. ¿Achkë xtqtoʼö rchë xtqakʼwaj qiʼ kikʼë jontir? Tiskʼij ruwäch Hechos 10:34, 35 y kixtzjon chrij reʼ:
Jehová nrajoʼ chë jontir kiwäch winäq yeʼok ru-Testigos. Rkʼë riʼ, ¿achkë rubʼanik kʼo chë yeʼatzʼët ri winäq ri ma ye junan ta awkʼë?
Chpan atinamit rït, ¿achkë nbʼanö chë ri winäq itzel nkinaʼ chkë ri nkʼaj chik? ¿Achkë rma ma ütz ta chë rït chqä ke riʼ nanaʼ chkë ri winäq?
Tiskʼij ruwäch 2 Corintios 6:11-13 y kixtzjon chrij reʼ:
¿Achkë ütz naʼän rït rchë más yeʼawajoʼ ri qachʼalal?
5. Ma takʼewaj ta naküy kimak ri nkʼaj chik
Jehová majun ta jun rumak rubʼanon chqë rchë nqaküy. Tapeʼ ke riʼ, ryä kan ma nukʼewaj ta nuküy qamak. Tiskʼij ruwäch Salmo 86:5 y kixtzjon chrij reʼ:
¿Achkë nukʼüt re texto reʼ chqawäch chrij ri rubʼanik nuküy qamak Jehová?
¿Nanaʼ rït chë nkʼatzin yatyoxin che rä Jehová rma nuküy qamak? ¿Achkë rma?
¿Ajän riʼ taq rkʼë jbʼaʼ kʼayewal nuʼän chqawäch junan nuʼän qawäch kikʼë ri nkʼaj chik?
¿Achkë kʼo chë nqaʼän rchë nqakʼän qanaʼoj chrij Jehová, rchë ke riʼ kan junan nuʼän qawäch kikʼë ri qachʼalal? Tiskʼij ruwäch Proverbios 19:11 y kixtzjon chrij reʼ:
Taq jun qachʼalal kʼo jun ri ma ütz ta nuʼän o nuʼij chawä, ¿achkë ütz naʼän rït rchë ma xtjeʼ ta chʼaʼoj chiwäch?
Kʼo mul, kan yë röj ri nqbʼanö jun ri ma ütz ta chkë ri nkʼaj chik. Taq nbʼanatäj riʼ, ¿achkë kʼo chë nqaʼän? Titzʼetaʼ ri VIDEO y kixtzjon chrij reʼ:
¿Achkë xuʼän ri qachʼalal ri xel pa video rchë xsöl ri kʼayewal xrïl rkʼë jun chik qachʼalal?
6. Tatzʼetaʼ ri utziläj taq naʼoj kʼo kikʼë ri qachʼalal
Taq nqatamaj más kiwäch ri qachʼalal, röj ma xa xuʼ ta nqatzʼët ri utziläj taq naʼoj ye kʼo kikʼë, xa kan nqatzʼët chqä ri ma ye ütz ta. ¿Achkë ütz nqaʼän rchë xa xuʼ chkij ri utziläj taq naʼoj kʼo kikʼë nqayaʼ wä qan? Titzʼetaʼ ri VIDEO y kixtzjon chrij reʼ:
¿Achkë xkatoʼö rchë xtatzʼët ri utziläj taq naʼoj ye kʼo kikʼë ri qachʼalal?
Jehová kan yë ri ütz taq naʼoj kʼo qkʼë ya riʼ nutzʼët. Tiskʼij ruwäch 2 Crónicas 16:9a y kixtzjon chrij reʼ:
¿Achkë nanaʼ rït taq natamaj chë Jehová kan yë ri ütz taq naʼoj kʼo awkʼë ya riʼ nutzʼët?
Yajün ri jaʼäl taq diamantes kʼo nbʼanö chkë chë ma kan ta yetzʼitzʼan; tapeʼ ke riʼ kan nüm kajäl. Ke riʼ chqä nbʼanatäj kikʼë ri qachʼalal: ryeʼ xa ye ajmakiʼ, ye kʼa kan kowan kiqʼij chwäch Jehová.
JOJUN WINÄQ NKIʼIJ REʼ: «Rchë nküy rumak jun winäq, ryä naʼäy kʼo chë nukʼutuj kuyubʼäl mak chwä».
¿Achkë rma kan ronojel mul kʼo chë ma nqakʼewaj ta nqaküy kimak ri nkʼaj chik?
RI XQATAMAJ QA
We rït naküy kimak ri qachʼalal chqä nakʼüt chkiwäch jontir chë yeʼawajoʼ, xkatoʼon rchë kan junan xtuʼän qawäch pa congregación.
Tqakamluj ri xqatzʼët qa
¿Achkë xkatoʼö rchë ma itzel ta xtanaʼ chkë ri nkʼaj chik?
¿Achkë xtaʼän taq rït chqä jun chik qachʼalal xtjeʼ jun oyowal chiwäch?
¿Nawajoʼ rït naküy kimak ri nkʼaj chik achiʼel nuʼän Jehová? ¿Achkë rma?
RCHË NATAMAJ MÁS
Jesús xyaʼ jun tzʼetbʼäl ri nqrtoʼ rchë ma itzel ta nqtzjon chkij ri nkʼaj chik. Tatzʼetaʼ achkë tzʼetbʼäl riʼ.
¿Kʼo chë nqakʼutuj kuyubʼäl mak che rä jun winäq tapeʼ nqanaʼ chë majun ta qabʼanon che rä?
Tatzʼetaʼ achkë toʼoyon kichë jojun qachʼalal rchë ütz kinaʼoj nkiʼän kikʼë nkʼaj chik tapeʼ xa bʼa achkë na kijatzul, kijnaʼ chqä kitinamit.
Tatzʼetaʼ achkë rubʼanik nqasöl jun kʼayewal rkʼë jun qachʼalal rchë ma njeʼ ta chʼaʼoj chpan ri congregación.
«Kan rkʼë ajowabʼäl tqasoloʼ ri kʼayewal kʼo chqawäch» (Ri Chajinel, mayo 2016)