Òktopör

Mihôiṅ in ṙôkhöre öi holtö ṙanamlōnre öi tikökṙôre hēk kētö sanapṙô inrē öi el mīting. Ōt pöri yip in hī tö kihngen nö ngatī inlahen. Yēḵ meh më-eṅ ngatī inlahen ngaich mihôiṅ öm ngëichkö inlahen yip prötör sistör yip töngatī inlahen sin, ngaich sitih inlahen cha-a nö la-al u. Yöölen yip rīkre yē cha nö holtö ṙanamlōn re nö tikökṙôre. Hòṅ köpölōn ayī-ö, yēḵ hī öi tikökṙôre el mīting ngaich löktö nöönyö Yāvē angū-ö. Lökten yěi halēn ngam mīting, ngaich hē e öi hòṅ harun ṙô re tö minë tinköökö. Chumkūöṙen inrē öi ngëichkö ṙô minë tinköökö nö sitih inlahen nö sāta nö in minë töhakööpö. Hòṅ chumkūöṙen takô ayī-ö tö nup ṙô minë tinköökö rö-ö öi höng afēkö vanayö ṙô re öi tikökṙô re. Ōt yip tö kihngen nö kētö sanapṙô nö el mīting. Asuh öp min mahayööken cha? Kalah um ṙāngö töhěng mīting öm kētö sanapṙô. Köplōn inrē tö e nö tövai yēk nup sanapṙô meh nö cheūḵta hēk lööṙen inrē. Ṙamlōn ang Yāvē yěn meuk inlahen hī öi öt ṙākenre öi kētö nöönyö ò el mīting. w22.04 pěch 7-8 përa 12-15

Ngam ṙô Pôl inlahen öp hamòlṙen, nö vë-eny inlahen öp tarik öp mameuk öp holre nö kihngen ngaich ilöö yihtöre nö hayööken ò. Ngatī inlahen ang Yāvē nö ilöö yihtöre nö hayööken hī yěn meukö hī öi kihngen. Lökten ayī-ö mihôiṅ öi lā-al nup töng sitih kanihngen re yěn hayööken hī anga-aṅ, ngaich ṙamlōn öi löklōn ò. Sitih inlahen tī ang Yāvē nö hayööken hī? In ngam līpöre Isayā in min öi teungen tö sanapṙô u. Pōyen nun minë tö vënyu nö imat ngih līpöre tö ngaich nö teung inrē nö in minë ṙētak hī töngamuh, kôti kūö inrē ayī-ö tö ngam tinrīken ngam Tēv Yāvē öi imat ngih līpöre. Tö sā ngam tö 30 mirūlö nö vë-eny minë inlahen tī Yāvē nö hayööken yip tarik re, (1) Tö sā ò nö hang minë ṙô hī öi vë-ekūötēv ngaich sapṙô hī inrē, (2) Hachōḵ el talöökö hī hēk, (3) Kētö inkòlô hī töngamuh inup yamih inrē min ṙētak. w22.11 pěch 8 përa 2-3

Minë ṙô Yēsū chamuh in minë māṅ i Ismörnā hēk Filitalfiā inrē. Ngöṙô anga-ṅ nö in cha uh yin pa-ekūö tö minë inkihten, haköpöre pöri öi i linökölōn ngam Tēv Yāvē ngaich teūngen min yī-ö tö raneushöre. (Inm. 3:10) Öthō in ayī-ö öt hakihtuṙen, lökten öi hòṅ hīnöre öi la-al minë inkihten re. (Mët. 24:9, 13; 2 Kòr. 12:10) Imat ngam līpöre Inmeukhömat in akahalōn tö yip tarik ngam Tēv min nö hakihtuṙen ip “sakamö ngam Mā.” (Inm. 1:10) Töi ngëichkö inlahen ngam ranulten “sakāmö ngam Mā.” Asuh nup hē e tömeūkö. Vënyu ngam inyööngö tö ngam Tēv ngaich nö rultenre nö el halīöngö. Ilööṙen ngam kinyūngö nö el halīöngö tö Yēsū hēk tö yip ma-ahānga ò nö la-al yip tötlöök Sī-ö. (Inm. 12:7, 8) Asuh ngaich öp ṙòng e? Ötkô ngaich ngam Sī-ö, lökten nö suktu nö ing panam. Unôichrit e ngaich minë kanihngen nö ikui tarik.—Inm. 12:9, 12. w22.05 pěch 5 përa 12-13

Ṙòkhöre nun minë atöllö Yāvē nö tö löng. Öt tö atöltuṙen inrē anga-aṅ. Hö-ö anga-aṅ nö ngëichken ngòh tarik yěn tö kòlô hēk yěn tö yāich, öt ngëichkö elmat ngòh tarik inrē anga-aṅ, ötrēhěn inrē nö ngëichken ò yěn tö kamngu hēk yěn tö īnu tö heuneū-en re. (1 Sa. 16:7; Yāk. 2:1-4) Öt hěngtak tö kô nö aṅti tö rupīö nö havaha Yāvē hēk timlö alaha ò inrē. Rö-ö ang Yāvē nö meuk arëkūö ngòh tarik nö kē-ělkūö alaha re. (Man. 34:7) Keuheūtlöre mikahkūö anga-aṅ tö hī tö nup kahëken hī la-en, öi kūö yòh öi kēken u. Lökten anga-aṅ nö tö akaha nö kamhôka. (Chöö. 32:4) Öt tö insā-avö ngam inlahen tī Yāvē yěn aṙēlö tarik. Akahakūö inrē yik kamūich ngam Töhet Līpöre tö inlahen e. Lökten cha yěn vë-eny inlahen tī Yāvē nö aṙēlö tarik, ngaich harīkngöre öp ṙô cha yěn kakken e. Ngö ṙô ök ih töhěng līpöre, “Ngam ṙô, tö yūsö tö cha nö vë-eny inlahen ngam Tēv yěn aṙē-ěl tarik, tahëng angū-ö tö ngam ṙô cha yěn vë-eny inlahen tarik nö aṙēlö holre, pön töng tölngu kūö ngam inlahen ngòh tarik yěn aṙēlö holre.” Höng Yāvē pöri tö keuheūtlöre tī yěn këtö inṙē-ěl. w22.06 pěch 4 përa 10-11

Yē meh hěngtak haruklö kūönre hēk töt ṙamatö ellōnre öp pihö meh, Sön më-eṅ hôṅ ṙatö-ellōnre tö minë tövai tinrīkenre nö reuslöre alaha tī tö yip prötör sistör el ngam māṅ. Pi-a öm ngö lōn töp kūönre nö öt hôṅ löklōn Yāvē. Köplōn pöri më-eṅ tö më nyīö nö öt veut ngam inkööpö tö cha. Unôichrit meh teūch tö öp kulöl pi-a öi ngölōn tövayö saniöpö öngvö min ngòh chōn nö kamëtö ṙông. Öt ël tī hi pöri ngam sanīöpö ngam chōn,höng ṙamös tö röönti ò in ayi-ö tö mak hôṅ ò nö sīöp. (Māk. 4:26-29) Ngatī ṙēngen ngam inköptö vē nyīö. Öt ël tī hi ngam inlahen cha yěn löklōn Yāvē hēk yěn hö-ö. Höng mahayööken cha in ayi-ö hôṅ cha nö hol Yāvē. Lökten öi hôṅ ma-anyre im inköptö cha tö inlahen Yāvē. w22.04 pěch 19-20 përa 16-17

Hanöng saha Sòlòmön nö köp nö löklōn Yāvē, vāyö mufē anga-aṅ nö in re. Ik sā ò nö ṙālö hēk fömlöre vinīlö inrē nö rācha, ṙòngmö aṅhav in anga-aṅ tö ngam inyāichngö. Havëkö inyööken re anga-aṅ nö in Yāvē pön akhakūö töre nö kūöṅn heuneū-en. (1 Rā. 3:7-9) Akahakūö inrē anga-aṅ, nö öt löng ngam inlahen hī yēḵ hī öi tailölōn. Vaichngö pöri ngaich anga-aṅ tö ngam ṙô re, uroh anga-aṅ nö öt hang chööngö ngam Tēv kūö ò nö tailölōn. Tö sā ngam Tēv nö kētö chööngö yip racha nö ötkô nö ṙōltak pīhö ‘hòṅ ngam el kuilōn cha nö öt lō-ongkūö.’ (Chöö. 17:17) Hö-ö pöri ang Sòlòmön nö hang ngam chööngö. Pōyen kahë anga-aṅ tö pīhöre, 700 yik pīhö ò ngaich 300 yik pīhö ò tötöl, ngaich pōihöl më pīhö ò vamë-ekūö insā tēv. (1 Rā. 11:1-3) Ngö lōn lohten ang Sòlòmön, öthō chin öich fehnguṙen, vaich pöri anga-aṅ. Kūö tī më pīhöre ngaich anga-aṅ nö marôvat tö ngam Tēv Yāvē.—1 Rā. 11:9-13. w22.05 pěch 23 përa 12

Hòṅ ṙòkhöre in töngamuh öi katöllö lōn re, yēḵ hī öi hòṅ holṙen ngam Tēv Yāvē ngam tö Keuheūttöre Chööngö hēk yěi holṙen ngam Sī-ö. Ötkô pöri ayī-ö öi nëtö katöllö. Sā ngam katöllö hī töngamuh, ngatī min nup yamih ṙētak hī. (Mët. 25:31-33, 46) Yěn kahòkkaṙen min tarik hē ngam “yöng kanihngen,” hē e min öi akahakūö tö yip töt kô-òngvah hēk yip tö ha-eti inrē. (Inm. 7:14; 14:9-11; Isi. 9:4, 6) Yēḵ meh öm atöllö lōn re öm i rītö Yāvē ngaich tölöng angū-ö nö inlahen meh. Pi-a lohten inrē öm hòṅ hayööken yip tahëng nö ngatī atöllö. Yip tö chiplö nö i linökölōn Yāvē, teūngen min cha-a tö nup inkôlò. Ngaich yēḵ meh min öm vë-ekūö në töngatī ngaich fēken u inrē, ngaich yěn yih min minë kanihngen ngaich iṙūöhen min më-eṅ öm i linökölōn Yāvē, hěnghöre mihôiṅ inrē min öm hayööken yip tahëng tö cha nö löklōn Yāvē nö atöllö lōn re ngaich köp inrē nö in e. w22.05 pěch 15 përa 1-2

Ötkô in hangihtöre tö nup ṙô yip tö kunyaha elmat tö hī, höng hòṅ hangihtöre ayī-ö tö ṙô Yāvē. Hangihtöre ök inrē misī Yōp, hē Yāvē nö vë-ekūö ò, hē ò nö fēḵlen ò hēk halööktö mufē ò inrē. Sā tö ngö ṙô anga-aṅ nö in Yōp: ‘Sitih lōn öm më-eṅ öt mihôiṅ öich tö lōn meh öich hakūöken meh? Keuheūtlöre mikahkūö chin tö minë kanihngen meh?’ Hē Yōp ngaich nö hang minë tökiröng la-en Yāvē, ngaich kirööngen ṙô anga-aṅ nö ha-öönyan nö ngö ṙô: “Hangken meh chin lökten i hināngö elnang, ngaich pöri töngamuh ngih mat chu nö meūkö meh.” (Yōp 42:5) Köplōn man tö ngih ṙô Yōp nö tö ṙônyu tö ò, hē ò misī nö ṙömöng ūichhaka nö el tisum. Ṙömöng pōyen nuk vah alaha ò. Fēḵlen ò pöri ang Yāvē tö ò nö hangenlōn tö ò hēk ṙamlōn inrē nö in ò. (Yōp 42:7, 8) Pōyen yip tarik töngamuh töt lamëkö elnang hī, mumṙēngen hī inrē. Hēṙu yip ṙung nö öt lēkö elnang yip Vamënyen Yāvē hēk sūöchkö inlahen cha inrē. (Mët. 5:11) In ngam inlahen Yōp in öi haköplu tö hī mihôiṅ köp öi löklōn Yāvē, yěn pòrô nup kanihngen hī. w22.06 pěch 24 përa 15-16

Ṙamlōn inrē min yip el halīöngö yěn ha-etiyö ngam Tökiröng Pēpilön. Ōtre pöri min hēk öp töhěng ṙanamlōn el halīöngö. (Inm. 19:1-3) In ngam mana-aṅ ṙô ngam Inmeukhömat angū-ö nö vënyu ngam ‘inpīhö ngam Sīṅp’ min. Hamūlöre min më tö 1,44,000 nö el halīöngö, urěh hë tö ngam kinyūngö Armakētòn. Hö-ö pöri nö hē e ngam inpīhö. (Inm. 21:1, 2) Yěn höng keuheūtngöre min nö ha-etiyö yip la-al ngam Tēv nö ip kinyungö Armakētòn, unôichrit e min ngam inpīhö ngam Sīṅp. (Sal. 45:3, 4, 13-17) Yěn hapīhö ṙung ngam kikōnyö töm kikanö kaheukö ngaich cha-a nö töng hěng nö alaha. Ngatī ṙēngen min hē ngam inpīhö ang Yēsū nö hamūltöre nö in ngam “pīhöre kikānö” më tö 1,44,000. Holṙen re min cha-a nö 1,000 samyeūheu rô-òten nö hayöng nö ing panam.—Inm. 20:6. w22.05 pěch 17 përa 11-13

Vë-eny nang hī ang Yēsū tö ò nö ing manā-aṅ sakāmö nö halēnlö ngam ‘tö-akaha mahalanṙen’ ngam mahachō kūö hī min nö im ṙô ngam Tēv. (Mët. 24:45) Ngaich ngatī inlahen töngamuh ang Yēsū nö löktö in më töng rahëichyen hol më töhachāmö elkui Kristīön nö kētö minë tö ‘löngö ṙētak nya-aṅkūö’ nö in yip tarik ngam Tēv in cha inrē yip töng hō tö minë ṙô ngam Tēv. Ma-anyre yin töngamuh më prötör nö im la-en re, hö-ö pöri cha-a nö ngö mufē töre nö mahayōm ngam ṙinatö-ellōn hī. (2 Kòr. 1:24) Pön ṙatö-ellōnre cha-a tö Yēsū nö anga-aṅ “mahachōkūö töchööngu inrē.” (Isa. 55:4) Löktökūö ik 1919 më tö-akaha mahalanṙen nö halēnlen minë līpöre nö yöölen tī tö më tarik nö haköp ngam kanô-en. Sā ṙēngen minë nya-aṅkūö nun minë līpöre nö löngö ṙētak kinë-eti pön yöölen tī anū-ö tö më tarik nö haköp mat ngam Paipöl. Ik samyeūheu 1921 më tö-akaha mahalanṙen nö halēnlö ngam līpöre Ranöng Ngam Tēv-HI ngaich halēnlö minë līpöre ngaich më tö-akaha mahalanṙen minë tufömngöre töhakööpö mat. Asuh öp līpöre mahayööken meh më-eṅ öm akahakūö tö Yāvē hēk haröhtöre inrē öm in ò? w22.07 pěch 10 përa 9-10

Töt milip tī an Yāvē nö Tēv. Yěm kahëkuṙen min tö nup töng sitih la-en ò ngaich pōyen tī min anga-aṅ nö reushen meh. (Māk. 10:29, 30) Yěn sāḵ ta min minë tinrīken meh nö sā nup lōn ò ngaich pōyen inkòlô min më-eṅ tö tī ò. Öt hō min öm hēngö hanakten öm ikūö ngih tötlöök panam, teūngen pöri min më-eṅ tö nup ṙanamlōn. Höng ranehtökūö u nun anū-ö në! Hēk min nö ngönlöre ngam innôlö meh öm in ngam yöngre Yāvē, höng örheūheu min inrē öm löklōn ò. Sā Yāvē nö tö örheūheu aṅ nö Tēv ngatī min më-eṅ öm höng örheūheu öm aṅ. Yē meh öm kētöre ngaich kē ngam vinôkö, töt insā-av angū-ö nö ṙētak meh öm kētö nup kahëtö re öm in ngam yöngre Yāvē. Në töng sitih taneūngen hī töngamuh ṙētak ṙanamlōn, tö në chehen inrē aṅ in hī, ṙòkhöre anū-ö nöng aṅ in Yāvē nö kahëtö ò nö in hī. Pön vahīlö ò ngih tumlat tö ngam halīöngö. Mihôiṅ pöri ayī-ö öi höng kētö ngam tötkô nö inlahen ò. Ngam inlahen hī öi höng ha-öönyö ò. (Yōp 1:8; 41:11; Inch. 27:11) Asuh öp min tö mötlö tö e angū-ö nö tinrīken hī? w23.03 pěch 6 përa 16-17

Asā ngòh ṙālö tarik nö kiröng rūöhöl re ngam el kuilōn ò nö hòṅ asěha nö i tahëng. Ngö ṙô pöri më tarik aṅ kūö ngih panam tö meh öm mihôiṅ kēkö ngam insěha urěhēkūö re öm kē ngam pinīhö pön töt vāich angū-ö nö in cha, ngaich mihôiṅ cha-a nö tölṙô meh öm kēken e. Lōnu inrē ngam Sī-ö tö meh öm kēken u, pön hōten meh öm vaichköreṙen. Sitih inlahen pöri më-eṅ lāköre tö minë töchōch la-en? (1 Tös. 4:3, 4) Yēḵ meh pöri hěngtak öm vë-ekūötēv, ngaich mihôiṅ më-eṅ keuheūtnyö ṙô el kuilōn re in Yāvē tö ò nö hayööken meh öm ṙāpöre in minë töt löng el kuilōn re. (Mët. 6:13) Köpölōn tö Yāvē nö hòṅ hayööken meh rö-ö nö kamëtö sācha meh. Pò ò nö hol meh, rö-ö nö tö kunyah elmat tö meh. (Sal. 103:13, 14) Um ngö mufē töre öm höng më-eṅ lama-al minë tötlöng el kuilōn re. Pöm mihôiṅ öm vë-ekūö nap yöng re tö ngam inlahen re. Lohten pöri më-eṅ kihngen öm vë-eny nang cha tö ngam inlahen re, töt ṙanāngen pöri angū-ö. Lökten yēḵ meh vë-ekūö ngam Paipöl, ngaich rahëichtakūö öm afēkö minë haköp re, ngaich katöllö nup tölöng min më-eṅ la-en re nup tö ṙamlōn tī tö Yāvē. Öthō min ngaich më-eṅ höng örheūheu chöh nup chööngö aṅmat ngam Paipöl yē meh hòṅ katöllö nup la-en re. w22.08 pěch 5 përa 10-12

Lōnu ang Yāvē tö ngam kui ngam mikūönö nö chumkūöṙen nö meukṙen ngam mikūönö re. Pī-a lohten öm ngö mufē yěm kui ngam mikūönö, sitih inlahen öich min chū-ö hateungngö kuilōn ngam mikūönöre? Sitih inlahen min öich kēnyö ṙāi patī re? Hēk pī-a lohten öm öt yah inlahen öm i linöökölōn ngam Tēv. Pò meh öm pa-ekūö töre öm sitih inlahen min öm ha-aṅ nômöre öm in minë töng rahëichyen pësa re. Kirööngen miṙivlōn in pò yip rīkre prötör sistör nö kūönngöre nö löklōn Yāvē tö kūö cha nö pinhëlöngkūö tö ngam Sī-ö. Lōnu an ngam Sī-ö tö hī öi ngö mufē, tö Yāvē nö öt chumkūöṙen tö hī hēk öt chumkūöṙen inrē tö hanaten ngam mikūönö hī. Pöi hòṅ kahngenre ayī-ö öi ngëichkö ngam mikūöre. Lökten mihôiṅ ayī-ö öi ngö mufē, ‘tö ngam kinmānö hī nöng angū-ö maha-aṅ nômö hī.’ Ngaich öt halöngngen ngam kinmānöre më-eṅ nö ṙā-ang eltī meh. Lökten më-eṅ ngaich öm kūöṅn elmat tö minë lökngörit chööngö aṅmat Paipöl tö kūö ngam kinmānöre. w22.06 pěch 15 përa 5-6

Tö ‘tööḵlö tö miṙēlōn neūkölōn inrē, töt veūtö lanīnö, tö pōyen miṙēlōn hēk kanô-en inrē.’ (Man. 34:6) Örheūheu anga-aṅ nö akah fālen. (Isa. 61:8) Haṙivlōn anga-aṅ nö meūkö hī yěi kihngen, hökkö öp ṙētak re inrē anga-aṅ nö kēngö në kanihngen hī. (Yar. 29:11) Ngatī inrē ayī-ö öi hòṅ hökkö ngam ṙētak. Kô-en an ngam Tēv Yāvē nö kirööngen hanangenlōn tö hī, lökten inrē ayī-ö öi hòṅ hangenlōn tö ò. Ngamuh inrē töhěng lāinyngen hī hangenlōn tö ngam kanô-en, pò hī öi teūngen tö minë yanöölen re. Vënyu ön nö imat ngam Paipöl tö ngam Tēv min nö kētö kumchikṙen hī ip yamih ṙētak. Yěn chōchö el ngam mai, ngaich sumtö kirap re ṙung öp chōng nö mahaköpken e. Ngatī ṙēngen yěn yih minë kanihngen hī minë tö sā Chanôichö, ngaich haköpken hī min minë maheūkkö hī yěi fēken u Ngatī ṙô tī ang Pôl nö in yip töhachāmö elkui Kristīön, yip tö maheukkūövö nö chuh el halīöngö. Sā ṙēngen kirap ön ngam maheūkkö yip Kristīön mi-iyöng kūö ngih panam. (Yôh. 3:16) Yēḵ hī öi teūngen tö ngih maheūkköre, ngaich teūngen ayī-ö tö chö-öinyre öi aṅ. w22.08 pěch 14-15 përa 3-5

Yēḵ meh öm hangenlōn tö yip prötör sistör re, ngaich ṙātö-ellōnre min më-eṅ in cha. In ngam 1 Kòrin 13 mirūlö, pōyen nup ṙô e nö vë-eny inlahen ngam hanangenlōn. Yěi chumkūöṙen min ngëichken e, ngaich lööṙen min öi ṙātö-ellōnre öi in yip prötör sistör. Yěn ōt pöri öp pumsū ngam ṙinatö-ellōn hī, ngaich mihôiṅ min hēk öi ṙātö-ellōnre öi in cha. (1 Kòr. 13:4-8) Sā ngam tö kūchi im tö 4 miröökö ‘tömarô-òten manöiyö an ngam hanāngenlōn; tö aheukölōn inrē.’ Pòrô nup vanāchö hī nö pōyen, sön ang Yāvē nö hamöiyöre. Lökten yěi haṙivlōn tö tī yip prötör sistör, ngaich hòṅ hamöiyöre ayī-ö. Kūichi an inrē nö in ngam tö 5 miröökö: ‘öt harunnyö lanīnöre an ngam hanangenlōn, öt afēkö inyëḵngenre inrē.’ Yěn amahaiṙen yip prötör sistör hī nö vaichö inlahen nö in meh hēk in nup ṙôre inrē, ngaich ui fēkö minë inyëḵngenre tö cha. Kūichi an inrē nö in ngam Mumkahten 7:9 ‘tö hī ötkô veūtö tanānyö.’ Hòṅ chumkūöṙen ayī-ö tö minë ṙô cha, pön ngatī inrē Yāvē nö chumkūöṙen. Kirööngen hanangenlōn inrē ang Yāvē tö cha, hö-ö inrē anga-aṅ nö ngëichkö nup vanāchö cha. Hòṅ ngatī inlahen in ayī-ö sā Yāvē. (Sal. 130:3) Ötkô in öi ngëichkö minë vanāchö cha, pöi hòṅ ngëichkö nup tövai tinrīken cha.—Mët. 7:1-5. w22.09 pěch 3-4 përa 6-7

Vënyu nang in tö ngam līpöre Tanīěl tö inlahen nup tömeukö min pinngangkūö ip manā-aṅ sakāmö. Sā ṙô ngam līpöre Tanīěl 12:1 nö vë-eny inlahen Maiköl ngam tö vënyu nö Yēsū Kristū, min nö ‘sökhak nö lāritö yip tarik ngam Tēv.’ Teūngtökūö ngih tö eūka nö ik 1914 hē Yēsū nö vīlöng nö Rācha ngam Pūlngö ngam Tēv nö el halīöngö. Vënyu nang inrē ang Tanīěl tö inlahen Yēsū, nö hē e min nö ‘sökhaka’ yěn yih ngam “hē kanihngen, tötha-eh misī hēten tö pumnāmö tarik.” Tö sitih manah angū-ö? Ngam “hē kanihngen” vahënyö Tanīěl, ṙôtö ngam “yöng ötkanôlò” angū-ö ngam tö vënyu nö im Mëtiv 24:21. Lökten yěn sökhaka ang Yēsū hē ngam kanihngen, ngaich tö ngö manah angū-ö tö ò min nö laklen yip tarik ngam Tēv ip Armakētòn ngam manā-angrit ngam yöng ötkanôlò. Yip tö lāklöng min tö Yēsū, vënyu cha-a nö ‘tökiröng kiteūm’ nö in ngam līpöre Inmeukhömat vē ṙamā-ang el ngam “yöng kanihngen.”—Inm. 7:9, 14. w22.09 pěch 21 përa 4-5

Tö ngö manah angu-ö, tö Yāvē nö sā ṙēngen kamūich minë minë-eny nö aṅtī tö pensil ngam tö mihôiṅ min nö sīchiyö. (Inm. 3:5) Lōnu pöri ayī-ö tö minë minë-enyre nö un sīchiyö nö imat ngam līpöre Yāvē. Lökten ayī-ö öi hòṅ la-evṙen tö nup tölöng nö imat Yāvē, hòṅ minë minë-eny hī nö sā ṙēngen tö kūchiyö tö Yāvē nö aṅtī tö pen minë töthō nö sīchngöre. In cha yip tö minënyu nö i mat ngam līpöre nômö, raneh yip tarik tökatöllöngö nö hol Yēsū nö hayöng nö el halīöngö. In ngam chitri kahūich Pôl chamuh in yik Kristīön aṅ Filipī in akahakūö tö ngam minë-eny yip töhachamö elkui Kristīön nö kūichhötvö nö i mat ngam līpöre nômö. (Filip. 4:3) Yěn lōnu më töhachamö elkui Kristīön tö ngam minë-enyre nö köp nö i mat ngam līpöre nômö ngaich hòṅ chiplen cha-a nö i linöökö lōn Yāvē. Yěn ngaich min ngam mana-aṅ minkahngö cha, ngaich kūichhötvö min ngam minë-eny cha nö köp nö i mat ngih līpöre nômö urēhěkūö kinpaha cha hēk urēhěkūö öp tökiröng kanihngen.—Inm. 7:3. w22.09 pěch 14 përa 3; pěch 15 përa 5-6

Hēṙu öm ṙung kē-ěvkūö töp tökuchik nyā-aṅkūö öp ööilōn meh, ūichngöre ngaich öm nyā, yò-òvkūö pöri öp mufē meh öt chumkūöṙen öm nyā pò meh afēkö öp tahëng? Öt ṙētakvö inrē më-eṅ lökten öm höng haveutkūöre öm nyā, öm höng öt kumchikngökūö re töm nyā-aṅ re? Ngaich unôichngöre öm afēkö inlahen re öm höng veutkūö, öm ngöṙô, söö öre taheui, yěch haṙēmngenre öich nyā öich kumchikngö kūöre. Ngatī ṙēngen ngam inkööpö mat Paipöl. Pi-a lohten öm höng haveut ṙô re öm haköp, ngaich öt chumkūöṙen tö nup lōn Yavē nö hòṅ haköpten meh. Lökten yēḵ meh haköp mat Paipöl um höng haveut ṙô re. Yěm haköp öp töhěng pöri inlahen, hòṅ asehkūöre më-eṅ, asuh öp haköp meh inlahen u, yēḵ meh min ngatī inlahen ngaich teūngen min më-eṅ töm ṙanamlōn Halēnlö yip “tö-akaha mahalanṙen” ang Yēsū hòṅ cha nö ’lööngö ṙētak tī nö kētö nyā-aṅkūö hī.’ Ngaich yin töngamuh më Mahalanṙen nö teungten nö i minë la-enre. Pōyen nun në lipöre in hī. (Mët. 24:45) Minë līpöre halēnlö më tö-akaha mahalanṙen ṙòkhöre anū-ö nö lamökngörit im Paipöl.—1 Tös. 2:13. w22.10 pěch 7-8 përa 6-8

Urěhnyi ṙô ngam Paipöl nö vë-eny nang hī, tö yip tarik min nö pōyen yip tö mināich in ngih manā-aṅ sakāmö. (2 Pīt. 3:3, 4) Lök minë kuilōnre cha-a tötlöng, lökten nöng miyëḵ elmat tö yip holre yip ma-asīnken minë chööngö aṅmat ngam Paipöl. (Yūt. 7, 17, 18) Hòṅ chumkūöṙen ayī-ö pöi ötkô öi sā inlahen yip tö miyëḵ. Lökten ayī-ö hòṅ chumkūöṙen tö nup ihih ṙô tö vënyu. Tö sā hī öi hòṅ ṙūöhöngre tö yip tö örheūheu nö chöh vanāchö holre. (Sal. 1:1) Ngatī inlahen yip ihih inrē lama-al ṙô ngam Tēv, lökten ayī-ö ötkô hang ṙô cha hēk vë-ekūö nup līpöre cha inrē. Yēḵ hī inrē öi kēnyö ṙētakre öi in cha ngaich mihôiṅ min öi sā inlahen cha. Pī-a inrē min ayī-ö öi örheūheu öi höng kömplēn yip holre tö nup inlahen cha hēk mihôiṅ inrē min öi yīhi kintööngölōn tö Yāvē nö hachō-okūö ngam söngkötön tö minë inlēnö inrē kahëtö ò yēḵ u nö tölöng? Lökten ayī-ö hòṅ chumkūöṙen hòṅ hī öt ngatī inlahen min. Lökten ayī-ö öi hòṅ fēken u yěn ōt nup tufömngöre inlēnö hēk nup tö haṙī-ingre inrē mikah elmat, nup tö tufömngöre inrē mikahkūö hī ilööṙen hòng öi hāngö u hēk kömplēnö u ṙöng? Yip mahachōkūö hī el ngam söngkötön chöh nup vanāchö cha hòng chū-ö? Ngaich yēḵ meh öm ngatī inlahen. Ngaich hòṅ ilööṙen më-eṅ öm hòṅ halööktitre. Ngaich ṙamlōn min ang Yāvē tö ngam inlahen meh.—Inch. 3:34, 35. w22.10 pěch 20 përa 9-10

Löktö in ngam töhet fanöinylö anga-aṅ nö teūngen tö nganötöre nö ahāngtö nang më “töngë-eṅ ellōn” tarik. Ngö ṙô ang Yāvē nö in Isikīěl, “vī ngam kūö meh chin nö ngëḵ nö havöötu nö i kūö cha. Sā töngëḵ tö ta-ök tameūyö ihong tī chu. um pa-ekūö tö cha, um rēhĕn ngangngökūö tö mineūkö cha.” (Isi. 3:8, 9) Sā tö ngöṙô ang Yāvē nö in Isikīěl, ‘Uh man öm vöö tö ṙô vē tarik töngë-eṅ ellōn tön in meh chin chū-ö chin min kamëtö kumlēḵ meh.’ Unôichrit e ngaich ngam töhet fanöinylö Yāvē nö hachōkūö Isikīěl nö chuh im chūök ò nö ahangkö ngam tölöök inhānga. Ngöṙô anga-aṅ, “kalēḵ ngam kël ngam Mā Tēv nö in chu.” Hòṅ urěh pöri anga-aṅ nö akahakūö tö ngam vahë-eny re ngaich möl min anga-aṅ nö heuveū-eu ṙô nö vë-eny nang yip tarik. Lökten ò nö sat sumkam nö ip chūökre nö iyöng. (Isi. 3:14, 15) Ngaich möl ngaich ang Yāvē nö tölṙô ò nö chuh in ngam tö ṙā-akūö panam ngaich chūök ngam ‘töhet fanöinylö ngam Tēv nö meuthöt nö in ò.’ (Isi. 3:23, 24) Ngaich takô ang Isikīěl nö lēn nö im inhangkö ngam tölöök inhānga. w22.11 pěch 4-5 përa 8-9

Pōyen nuk yamih kanihngen ök pròfět Hapakūk misī. Hěng heuh anga-aṅ nö kirööngen miṙivlōn, ngölōn anga-aṅ tö Yāvē yěn chumkūöṙen hòng tö ò hēk hö-ö. Keuheūtnyö nup ṙô ellōnre anga-aṅ nö vënyěn u nö in Yāvē. Hangṙô ò ang Yāvē ik sa ò nö vë-ekuötēv ngaich kētö ṙinatö-ellōn ò tö nup ṙētak min nö vailöre. (Hap. 2:2, 3) Ngaich ik sā Hapakūk nö fēkö inlahen tī Yāvē nö laklö yip tarikre misī, Ngaich havantöre ngam ṙānamlōn ò. Ṙinātu-ellōn ngaich anga-aṅ tö Yāvē nö chumkūöṙen tö ò hēk hayööken ò nö lā-al nup töng sitih kanihngen. (Hap. 3:17-19) Asūp haköplö hī in Hapakūk? Yěn yih nup kanihngen hī, ngaich hòṅ vë-ekūö Yāvē öi keūheutnyö nup ṙô ellōnre hēk ṙātö-ellōnre inrē. Fēken nup tī sin nö hayööken meh īnuk lāurěh. Ngaich ṙinatu-ellōn min ayī-ö tö Yāvē nö hayööken hī hēk kētö kumlēḵ hī öi lā-al nup kanihngenre. Ngaich yē hī min öi meuk inlahen tī Yāvē nö hayööken hī, ngaich sīöplöre min ngam ṙinatö-ellōn hī. Hòṅ havai ngam innôlöre öi in ngam Tēv Yāvē ngaich öt hěngtak min tökô nö haṙevngen hī tö ò.—1 Tim. 6:6-8. w22.11 pěch 15 përa 6-7

Kilöllöng Yēsū nö holtö nak tönët tak tötūmu nö irōi ök chōn. Kihngen cha-a nö kē unhômöre pön kalē-ě chanöökö. (Lūk. 23:32, 33) Ötlēkôre minā tötumu tö Yēsū. (Mët. 27:44; Māk. 15:32) Hěngtak pöri ök in cha ṙamatö-ellōnre nö in Yēsū ngaich ngö ṙô nö in ò: “Yēsū, köpölōn pömchö tö chu, Yēḵ meh yih im pūlngöre.” Ngaich sapṙô ò ang Yēsū nö sā ṙô ngam tövë-evkūö töngamuh. (Lūk. 23:39-43) Löktö im ṙô Yēsū ayī-ö mihôiṅ öi fēken nup tinrīkenre el Peretāis. Mihôiṅ in akahakūö tö inlahen öp Peretāis min öi löktö im inyööngö tö ök Rācha Sòlòmön. Tö mööḵlö ang Yēsū tö Sòlòmön. Lökten öi mihôiṅ ṙātö-ellōnre tö ò min vī ngih panam nö Peretāis nö holten tö yip tö 1,44,000 ṙôken. (Mët. 12:42) Yěn lōnu yip “tahëng kiteum” töre nö hòṅ örheūheu nö aṅ nö el Peretāis, ngaich hòṅ fēkö nup kahëken re cha-a töngamuh yěn hòṅ iyöngkūö e.—Yôh. 10:16. w22.12 pěch 8 përa 1; pěch 9 përa 4

In e ayī-ö öi akahakūö tö Yāvē yē hī öi havëkö inyööken re öi in ò ngaich ilööṙen anga-aṅ nö hayööken hī hē el kanihngen. Ngöṙô inrē ang Isayā, “yē ò min nö hang, sapṙô meh min anga-aṅ.” Ngam tö ngö manah, tö Yāvē nö ilööṙen nö hayööken hī yē hī öi havëkö kūö ò. Pò-ò nöng hòṅ höktöre nö hayööken hī. Yē hī min öi chumkūöṙen tö në öthō min öi haṙivlōn hē el ṙētak minë kanihngen, hòṅ īnu pörī ayī-ö tö ngam manööyö. Chumkūöṙen ang Yāvē nö hang ṙô hī yěi vë-ekūötēv. Kūö yòh öi mihôiṅ ngatī ṙô? Kūö Yāvē nö havëken cha nö “yī-ö” ngöṙô tö më aṅ Israel sā ṙô ngam ranehyö ṙô ngam tö 30 mirūlö. Ṙën anga-aṅ nö ngatī ṙô pön ṙòkhöre ṙô anga-aṅ nö vë-ekūö më aṅ Israel. Ṙôtö ngòh töhěng tak pöri ang Isayā im tö 19 miröökö ngam tö ngö “hö-ö min më-eṅ ngöhöre ṙô peuiny,” “kô-en ap min nö aṙē-ĕlōn tö ṙô meh peuiny” ngaich ‘hangṙô meh min anga-aṅ.’ In e mikahkūö ayī-ö tö Yāvē nö chumkūöṙen tö hī öi hěngtak. Chumkūöṙen inrē nö hang ṙô hī yē hī öi vë-ekūötēv.—Sal. 116:1; Isa. 57:15. w22.11 pěch 9 përa 5-6

Yěi iṙūöhen pöri öi ahangkö ngam tölöök inhāngö yěi pòrô ötlēkaṙen iṙūöhen inrē öi in ngam inköphöti ngaich ṙamlōn min ayī-ö teūngen inrē töm lanāmö. Ngatī inlahen yik mu-urěh Kristīön ik sā cha nö vë-evkūö tö yik Yahūti mākūö kūönṙô nö sōten cha nö ahangköm tölöök inhāngö. Hö-ö pöri cha-a nö hang chööngö cha pön hang chööngö ngam Tēv, iṙūöhen cha-a nö im la-en inhānga ngaich teūngen cha-a töm tökiròng ṙanamlōnre. (Inl. 5:27-29, 41, 42) Yēḵ ngam la-en hī nö asökiröön ngaich hòṅ haṙēmngenre ayī-ö ayī-ö öi ahangkö ngam tölöök inhānga. Öp töng kanò-òṅ hī pöri öi kēken ngam la-en inhāngköm tölöök inhanga ngaich teūngen min ayī-ö tö ngam lanāmö ngaich ṙamlōn min ang Yāvē. Ṙën in öi hòṅ kēken ngih la-en hòṅ yip tarik nö öt kapah. Ṙatö-ellōnre yin pòrô nup töng sitih kanihngen sön ayī-ö mihôiṅ īnu tö ngam lanāmö. Hòṅ īnu ayī-ö tö ngam lanāmö ngam Tēv Yāvē pön höng anga-aṅ tö mihôiṅ nö kētö ngam lanāmö. Lökten yěn yih minë tö ngatī kanihngen, tölëlngökūö invah hēk nup töfaltöre kanihngen hēk yěi hakihtuṙen hòṅ ṙatö-ellōnre ayī-ö in Yāvē. Hòṅ hang minë inlēnö inrē lamöktö in ngam söngkötön, haṙöhtöre in më prötör sistör. Köpölōn tö ngam kinlēḵngô Yāvē tö ò min nö kē-ekūö töm kumchikṙen. Yěm ngatī inlahen min “ngaich in më min ngam Tēv lanāmö nö örheūheu.”—Filip. 4:9. w22.12 pěch 21 përa 17-18

Ōtre yip tö kihngen nö ngatī inlahen. Tö sā tinrīken yip rīkre nö tö veūtö tanānyö hēk ilöö līn nö löktö in nup töng rahëichyēn ṙô hēk ṙānyngö inrē tö yip holre. (Efi. 4:31, 32) Vënyu nang in inrē tö ngam Paipöl nö ōt min yip “tötainy” hēk tö “angëṅ” inrē. (Inch. 29:22) Ngaich yē hī hòṅ ṙāngen në töngatī öi keuheūtngen u unôichrit inlahen hī öi kē ngam vinôkö ngaich hòṅ mā-anyre ayī-ö öi ṙāngen u. (Rōm. 7:21-23) Vë-eny nang Yāvē më-eṅ tö inlahen meh öm sitih inlahen öm mā-anyre öm ṙāngenre tö minë hötṙeh la-enre. Ṙātö-ellōnre man tö ò min nö hangṙô meh hēk öthō inrē nö öt hayööken meh. (1 Yôh. 5:14, 15) Hö-ö ön nö hameuktö pinngangkūö nö kēngen u, kētö kumlēḵ meh pöri anga-aṅ öm la-al u. (1 Pīt. 5:10) Ngaich yē meh öm vë-ekūö Tēv ngaich hòṅ kētöre inrē më-eṅ öm hòṅ ṙāngen u. Hòṅ chumkūöṙen më-eṅ öm ötkô öm fēken minë tötlöng mufē hòṅ u nö öt yih nö elkuilōn meh.—Filip. 4:8; Kòl. 3:2. w23.01 pěch 10 përa 7, 9-10

Hěng ön ngam inlahen hī yěi hòṅ hameuktö hanangenlōnre tö yip tahëng ngam inlahen hī öi ahangkö ngam tölöök inhānga. Vë-eny nang taṙòkhöre tarik in töm tölöök inhānga. Öi hameuktö hanangenlōnre tö cha. Öt ngëichken cha yěn tökòlò hēk yaich hēk yěn tökiröngö kamngö inrē. Ngatī inlahen ayī-ö öi hateungngö kuilōn Yāvē. Pön angū-ö kuilōn ò “hamôtö taṙòkhöre nö hayöökaṙen hēk yih inrē nö im inkaha kanô-en.” (1 Tim. 2:4) Yē hī öi hangenlōn tö yip prötör sistör re ngaich hameuktöre min ayī-ö öi hangenlōn tö Yāvē hēk tö Yēsū inrē. Chumkūöṙen in tö yip prötör sistör re. Yěn yih nup kanihngen nö in cha, ngaich hīnöre ayī-ö öi hayööken cha. Yē cha nö haṙivölōn, ngaich kētö inreuskö alaha cha ayī-ö. (2 Kòr. 1:3-7; 1 Tös. 5:11, 14) Mihôiṅ inrē öi vë-elkui cha, pò hī öi akahakūö tö “Ngam vine-elkui ṙô ngòh tölöök tarik nö pōyen taneūngen.”—Yāk. 5:16. w23.01 pěch 28-29 përa 7-8

Yēḵ öp mamānlö patī, ngaich hòṅ asīöp ngam heuneū-enre nö vī ngam tö ngön patī, ngaich ngatī inlahen inrē ayī-ö harunöre öi köö hareuskö alaha më prötör sistör re öi sitih inlahen öi hangönken cha. Yip tö kihngen prötör sistör hī mihôiṅ ayī-ö öi fēlen cha tö inlahen yip tahëng nö sitih inlahen cha-a nö chiplen nö la-al minë kanihngenre. (Hep. 11:32-35; 12:1) Mihôiṅ inrē ayī-ö öi ṙòngnyökūö ellōnre öi eu nup la-en yip holre, ötkô öi höng köp öi in nup ṙô re. Pöi hòṅ hangihtöre tö ṙô yip tahëng. Ngaich yēḵ hī öi lin öi in höö, ngaich hòṅ aṙēlen höö ayī-ö. Yēḵ hī min öi ngatī inlahen köp min ngam hanangenlōn hēk tö ngam lanāmö el ngam māṅ. (Efi. 4:3) Ngaich hangön ngam ṙinatö-ellōn më hol maneukre inrē min ayī-ö öi vë-eny minë kanô-eṅ aṅmat ngam Paipöl. Ngaich el ṙētak minë kanihngen öi mihôiṅ öi hayööken cha yip tö kuṅnö ṙinatö-ellōn hěnghöre hareuskö alaha cha inrē. Ngatī inlahen yēḵ hī öi hareuskö alaha më prötör sistör, ngaich teūngen cha-a tö nganöönöre, ngatī inrē ayī-ö öi ṙamlōn. Pòrô öp machööḵlö nö tö ngön, sön pöri min angū-ö ip yamih ṙētak nö öt ngönngöre, ngaich mihôiṅ nö taṙōliyö. Ngaich yēḵ hī öi kētö inngönkö më prötör sistör re, ngaich örheūheu cha-a nö teūngen tö yanöölenre. w22.08 pěch 22 përa 6; pěch 25 përa 17-18

Vë-eny nang hī ang Yēsū tö ngam tahëng töt ṙanāngen inlahen hī yěi vë-ekūö mat ngam Paipöl. Ngöṙô anga-aṅ: ‘Hökngen ngam vame-eṅkūö e nö akaha elmat.’ (Mët. 24:15) Tö sitih manah öng ngam ṙô ò? Yēḵ hī öi vë-ekūö mat ngam Paipöl ngaich hòṅ afēkö ṙô minë haköp re ayī-ö minë tö hayūni manah. Hòṅ ngëichkö manah u ayī-ö öi haṙongten u öi inup tahëng, hēk ngëichkö inrīkngöre u inrē tö nup tahëng miröökö. Löktö in ngam ṙô Yēsū in inrē öi akahakūö tö hī yěi hòṅ akahakūö nö sitih inlahen taneungtökūö minë tö eūka aṅ mat ngam Paipöl, ngaich hòṅ akaha elmat ayī-ö tö u. Kô-en, yěi hòṅ yöölen öi löktö in minë vahë-ekūöre aṅmat ngam Paipöl ngaich hòṅ yūs ngam mikah elmatre ayī-ö. Kamëtö mikah elmat yip tarik re an ngam Tēv Yāvē, lökten havëkö kūö ò tö mikah elmat re, öm vë-ekūötēv. Hòṅ kēkö kaha nup ṙô re pöri më-eṅ yěm vë-ekūötēv. Yēḵ meh öm haköp öp töhěng ṙô aṅmat ngam Paipöl, hòṅ ngëichkö öp köneksön e më-eṅ yěn ṙongta angū-ö nö in minë tö urěhangen haköp meh, hēk yěn sāḵta ṙô anū-ö nö in höö. Yēḵ meh min öm ngatī inlahen ngaich akaha elnang min më-eṅ tö minë ṙô aṅ mat ngam Paipöl hēk akahakūö inrē tö inlahen re öm asīnkö minë haköpre aṅ mat e. (Hep. 5:14) Lökten yēḵ meh öm haköp mat ngam Paipöl ngaich hòṅ aṙū-uti ngam mufē meh öm fēken u. Ngaich sīöplöre min ngam mikah elnang meh tö inlahen ṙô ngam Paipöl. w23.02 pěch 10 përa 7-8

Asehkūöre man, yěm kē-ěvkūö tö öp yöngre tö ngam patī töngön hēk tövai inrē. Rö-ö ön pön höng hòṅ chuhngöre ngam pēnt (paint) e, pōiṙāi pöri ngam patī. Öt milēḵṙen hòng min më-eṅ tö ngam inlōnti re? Öt chumkūöṙen hòng min më-eṅ tö e? Pò yòh! Ngatī inlahen tī ngam Tēv Yāvē nö kē-ěkūö hī tö ngam töpōiṙāi inlōnti, ngam nômö. Pōiṙāi an ngam nômö hī nö imat Yāvē, lökten anga-aṅ nö uroh nö kēngö nômö ngam kūönre nö chö-önyten hī. (Yôh. 3:16) Yāvē an kamëtö ngam nômö hī. (Sal. 36:9) Ṙatö-ellōnre ök inrē Pôl, lökten nö ngö ṙô tī nö kūich: “Pò hī höng in Ò öi aṅ, halöinyköre, ngaich öi tarik.” (Inl. 17:25, 28) Kô-en, töpōiṙāi an nö inlōnti ngam nômö hī nö kahëtö ngam Tēv. Hangenlōn anga-aṅ tö hī, lökten nö kē-ěkūö hī tö minë taṙòkhöre chehen hòṅ hī öi aṅ. (Inl. 14:15-17) Öt laklen ngam nômö hī pöri anga-aṅ nö löktö in minë pinngangkūö. Pön lōnu anga-aṅ tö hī öi chumkūöṙen töre, ngaich nup töng kanò-òṅ hī, ngatī inlahen ayī-ö öi holtö ellōnre im linöklōn ò.—2 Kòr. 7:1. w23.02 pěch 20 përa 1-2

Ha-öinyö Yāvē in kūö ò nö kē-ěkūö hī tö ngam Paipöl. Imat e nun minë tövai inlēnö, yěi hāngö u min ngaich heuveū min öi la-al nup kanihngenre. Löktö in e tī anga-aṅ inrē nö kētö ngam tövai maheūkkö hī. Ngam tömötlö pöri in u nö ṙòkhöre, löknyö mat ngam Paipöl ṙô anga-aṅ nö vënyö inlahen re nö Tēv, tö minë tinrīken ò inrē. Yēḵ hī min chumkūöṙen öi kēnyö ṙētakre öi afēkö minë tinrīken ò, ngaich ṙamlōn min ayī-ö, sīöp min inrē ngam kuilōn hī öi hòṅ hol ò. (Sal. 25:14) Lōnu Yāvē tö tarik nö akahakūö tö ò. Lökten anga-aṅ misī nö vë-eny inlahen re nö in yik tarik nö löktö i heūvö, inmeukhömat hēk löktö i ma-ahāngö inrē. (Kin. 12:6; Inl. 10:3, 4) Asehkūöre man, yěn öt hěngtak öre tarik kamūichngö minë inlahen ò ngaich sitih inlahen öre ayī-ö öi akahakūö tö ò. Lökten ang Yāvē nö katöllö yik tarik kamūichngö minë inlahen ò nö imat öp “töhěng līpöre.” Vai nup töng sitih la-en kahëken Yāvē, ‘ṙòkhöre anū-ö nö tö teung.’ Lökten öi ṙinātu-ellōn tö ò nö löngö inlahen nö halēnlö yik kamūich ngam Paipöl. Yēḵ hī min vë-ekūö e ngaich yöölen min ayī-ö.—Sal. 18:30. w23.02 pěch 2 përa 1-2

Vī minë tövai chö-öny re. Yēḵ meh hòṅ asīöp ngam ṙinātö-ellōnre hēk hòṅ teung öm Kristīön ngaich hòṅ vī ngam chö-önyre më-eṅ. (Efi. 3:16) Tö sā në, mihôiṅ man örheūheu öm haṙunöre vë-ekūö ngam Paipöl. (Sal. 1:2, 3) Mihôiṅ öm vī ngam chö-önyre öm ṙūöhlö inlahen re im vinë-ekūötēv. Mihòiṅ öm löktö kūö ing töngamuh öm chumkūöṙen tö nup chūök re tölöng inṙamlōn hēk asuh nup la-en chūök meh öm kēnyö ṙētak re. (Efi. 5:15, 16) Töteung man öm Kristīön yēḵ meh hayööken yip tahëng holre. Tö sā në, mihôiṅ man öm kēnyö ṙētak re öm hayööken yip tö köinyö ṙēḵti el ngam māṅ hēk yip tövahöv prötör sistör inrē. Ngaich mihôiṅ inrē öm hayööken cha kē nup lōn cha el pachār. Mihôiṅ inrē öm hayööken cha nö yūs nup fūn hēk kömpiyutör (computer) inrē. Mihôiṅ man inrē löktö in ngam tölöök inhānga öm hayööken yip tahëng. (Mët. 9:36, 37) Mihôiṅ öm vī ngam chö-önyre inrē öm keuheūttö ṙētak re i linöökö lōn ngam Tēv. w22.08 pěch 6 përa 16-17