Keuheūtngöre chūök ngam hinëngö hēk tö ngam lanāmö nö in në tö vīlöng ik sā ngam inyööngö tö ngam Tēv misī

Kūö Yòh Öi Hòṅ Lōnu Tö Ngam Pūlngö Ngam Tēv?

Ik sa vinīlö nak raneh tarik nā Ātöm nā Ēva, ngaich hē e ngam vamīlen hī ang Yāvē nöng anga-aṅ töng hěngtak tö keuheūtngöre chūök nö hayöng. Holtö hanangenlōnre anga-aṅ nö hayöng. Lökten ò nö vīlö ngam tövai chūök cha, ngam panò-òṅ Ēten. Kē-ěkūö cha anga-aṅ tö nyā-aṅkūö hēk kētö la-en cha inrē. (Ranehlö 1:28, 29; 2:8, 15) Yēḵ nā Ātöm nā Ēva öre nö elkatòh ngam inyööngö tö ngam Tēv ngaich ṙòkhöre öre ayī-ö tarik öi kuchīken.

Aṅhav eltī an Ātöm tö ngam ṙòng chōn ngam kinë-ekūö ò tö Ēva. — Sō-en ngam inyööngö tö ngam Tēv nak raneh tarik

Vë-eny nang hī an ngam Paipöl tö inlahen ngam töhěng tak ma-ahānga mahalôngen chööngö ngam Tēv ngaich vī-ingre nö Sī-ö. Asöklö ngam intöönö anga-aṅ i inlahen ngam inyööngö tö ngam Tēv yěn mihôiṅ nö hayöng. Tö ngö manah angū-ö tö ngòh tarik nö mihôiṅ nö ṙamlōn yěn öt hayööngö tö ngam Tēv. Ngaich pöri nā Ātöm nā Ēva nö sā ngam Sī-ö nö halôngö chööngö ngam Tēv.—Ranehlö 3:1-6; Inmeukhömat 12:9.

Sō-en ngam inyööngö ngam Tēv nā Ātöm nā Ēva lökten cha-a nö chatngen tī tök Peretāis. Rö-ö nöng angū-ö pön löhlö tī inrē cha-a tö ngam maheūkköre, ngam nômö tö-örheūheu aṅ. (Ranehlö 3:17-19) Lökten ngaich tarik nö kihngen tö kūö ngam tövaich katöllö cha. Ngöṙô ngam Paipöl, löktö in Ātöm ‘ngam tökööl nö yih nö ing panam hēk lökten im tökööl inrē ngam kinpaha.’ (Rōma 5:12) Ngih inrē tötlöng ṙòng ngam tökööl: “Ngam tarik nö hayöng tarik nö chökhuṙen tö ò.” (Mumkahten 8:9) Tö ngö manah angū-ö tö ngòh tarik nöng kanihngen nyöre yěn hayööngö tö tarik.

RANULTEN INYÖÖNGÖ TÖ TARIK

Hameuktö ngam tanāilöre ang Nimròt nö sökhaka. La-uk ò më tarik vamī ngam tömarô-òlkui patī. — Filal chööngö Yāvē ang Nimròt

Vënyö nang hī ngam Paipöl tö Nimròt nö raneh nö mahayöng tarik. Öt ṙamatö-ellōnre anga-aṅ nö im inyöngö tö Yāvē. Löktö kūö ik ṙētak Nimròt yip tökalēḵ tarik nöng öt löngö tī nö hayöng. Lohten ngaich nö urēhěkūö ngam tö 3,000 samyeūheu ang Sòlòmön nö ngöṙô: “Yěh meuk, nup mak mat tö hakihtuṙen, ngaich cha-a nö öt hĕng tak mahaṙamkölōn! Lā in yip mahakihten cha ap kumlēḵ.”—Mumkahten 4:1.

Ngatī inlahen ön ngih panam töngamuh. Ik 2009 angū-ö nö vënyu nö in ök töhěng līpöre United Nations “tö minë kanihngen nöng sīöphökūöre nö ing panam tö kūö tī më tötlöng mahayöng.”

RÖHTA AN NGAM INLÖÖKTIT!

Lōnu ön ngih panam tö öp tövai inyööngö hēk öp tölööngö tī inrē nö hayöng. Kilēḵngôre an ngam vamīlen hī tö ò min nö kētö öp tö ngatī inyööngö!

Minë nyat: Ṙòng ngam inyööngö tö tarik. 1. Uichhaka ngam yöngnyīö el ngam tö mumuvö talöökö nö këm ngam kūönre pameuny. 2. El anspū ngam tököiny tarik tövahav nö el ngam chamam re. 3. Më tarik kumyung nö aṅhav eltī tö minë aṅ tī kumyung nö hareul. 4. Ayôra më tarik nö aṅhav eltī tö ngam penör nö holtö tanāinyö re. 5. Lā tunyī ngam patī re minā tökūöre ngaich ngam tinmël ngam kūö patī re cha-a nö lakuk. 6. Lulnyöre ngam elpanam ngaich pōyen inrē minë pavör kepöl. — Pòrô tarik nö vayö tī nö hayöng sön pöri nö öt kanò-òv nö kēngen në kanihngen ikūö ngih panam

Ngaich ngam Tēv nö vīlö ngam töhěng inyööngö re, ngaich löktö in ngam inyööngö min anga-aṅ nö ahetngen në inyööngö tö tarik. Höng angū-ö min ngih ‘inyööngö tö ngam Tēv tö örheūheu nö köp.’ (Tanīěl 2:44) Angū-ö ngih ṙô yip tö lāku ṙôken tarik yěn vë-ekūötēv. (Mëtiv 6:9, 10) Öt hakôten re pöri ngam Tēv nö hayöng. Pò ò nö katöllö öp töhěng tak rācha öp yamih misī nö ing panam. Achīöp katöllö ngam Tēv nö rācha ngam Pūlngö ò?