TÖHAKÖÖPÖ ĀTIKÖL 42
Um Kintöngulōn Töre Īnu Töm Kanô-en
“Kalah tökeuheūttöre; ṙapngötīre köptī im tölöök.”—1 TÖS. 5:21.
TINKÖÖKÖ 142 Köptī Töm Mineūka
RAHËICHTAMATa
1. Sitih ṙô yip tarik tö në tinlööken töngamuh, ngaich kūöyòh?
PŌYEN nun në tinlööken töngamuh ikūöng panam vamë-enyre nö hō-ōvö tö ngam Tēv. Lökten nö pōyen tarik tö katööngalōn töp katöllö re talöökö. Ngö lōn cha-a, “Ōt hòng vöh öp tökô-en tinlööken? Ṙòkhöre ṙöng në tinlööken nö ṙamölōn tī tö ngam Tēv?” Sitih lōn öi ayī-ö? Kô-en öi ayī-ö ṙatö-ellōnre, töre öi lööngö inlahen öi löklōn Yāvē? Asuh nup lāinyngen hī ṙātö-ellōnre? Ta-a töi mikahtökūö re.
2. Kūöyòh takô ök Pôl nö ṙinatu-ellōn töre nö īnu töm kanô-en? (1 Tösalònikē 1:5)
2 Ṙātö-ellōnre takô ang Pôl töre nö īnu töm kanô-en. (Vë-evkūö 1 Tösalònikē 1:5.) Rö-ö pöri ngam ṙinatö-ellōn ò nö töng öt chöönyu. Pön chumkūöṙen anga-aṅ nö haköp minë Ṙô ngam Tēv. Ṙatö-ellōnre inrē anga-aṅ tö ngam “Töhet Līpöre nö tö uhômhötvö nö ellōn tö ngam Tēv.” (2 Tim. 3:16) Asuh nuk rih kanôtökūö ò nö haköp? Kôtökūö anga-aṅ tö nuk ineūkö Yēsū tö ò nö tö kilē-ěyö nö Mesayā. Hö-ö pöri yik mākūö kuönṙô yik Yahuti nö ṙātö-ellōnre tö u. Vë-enyre cha-a nö mahaköptö ṙô ngam Tēv, öt ngatī pöri minë la-en cha. (Tai. 1:16) Öt sā cha ang Pôl nö atöllö lōn re tö nup chūök re nö ṙātö-ellōnre ngaich sō-en nup tahëng. Pön hō-en minë “inlēnö aṅ im Tēv” anga-aṅ nö keuheūtlöre.—Inl. 20:27.
3. Hòṅ keuheūtlöre mikahkūö hòng ayī-ö tö ṙô ngam Paipöl ngaich möl öi ṙātö-ellōnre? Mikahtö elmat hī. (Ngëichköm pòks “Pōyen Nun Tö Tötkanṙeūken Minë La-en Hēk Kuilōn Yāvē.”)
3 Höng ngam tökô-en tinlööken an nyin tökô nö kētö sanapṙô nup töng intöönö, pòrô anū-ö nö öt aṅmat ngam Paipöl. Kô-en hòng angū-ö nö ngatī? Töi hangṙô Pôl nö tölṙô yik holre Kristīön nö, “kalah tökeuheūttöre,” vë-eny nang cha pöri inrē anga-aṅ tö re nö öt keuheūtlöre mikahkūö tö u. (1 Tös. 5:21) Ngö ṙô anga-aṅ, “Pò hī höng hěng lā mikahlōn . . . Höng paṙūöyamat in töngamuh ngëichkö kūöre i tö-ayānga.” (1 Kòr. 13:9, 12) Kô-en Pôl nö öt ṙòklöre mikahkūö tö nup ṙô ngam Paipöl, ngatī ayī-ö inrē. Sön pöri anga-aṅ nö ṙātö-ellōnre tö minë inlahen ngam Tēv asā ṙôken mikahkūö ò.
4. (a) Sitih inlahen öi ngönlöre ṙinatö ellōn töre öi īnu töm kanô-en? (b) Asuh nup min haköp hī inlahen yip tökô-en Kristīön?
4 Yěm hòṅ hangönlö ngam ṙinātö-ellōnre tö re öm īnu töm kanô-en, ngaich hòṅ ngëichkö inlahen re më-eṅ yěm sāta inlahen in Yēsū nö ha-öiny ngam Tēv hēk ngëichkö inlahen yip Vamënyen Yāvē inrē. In ngih ātiköl in min öi mikahtö kūö re tö yip tökô-en Kristīön nö (1) öt vë-ekūö insātēv, (2) haṙōilö ngam minë-eny Yāvē, (3) hangenlōn tö ngam kanô-en, hēk (4) hangenlōn inrē tö höö.
ÖT VË-EKŪÖ INSĀTĒV YIN
5. Sitih inlahen ök Yēsū nö löklōn ngam Tēv, asuh öp haköplö hī öi in ò?
5 Kūö ngam tökiröng hanāngenlōn re ang Yēsū tö Yāvē, lökten nöng anga-aṅ lahök lōn ò, nö el halīöngö hēk ing panam inrē. (Lūk. 4:8) Haköptö yik haköptöre inrē anga-aṅ nö ngatī inlahen. Öt hěngheuh Yēsū, ötrēhěn yik haköptö ò nö vī insā ngaich vë-ekūö u. Kūöyòh? Pön öt hěngtak tökô nö meuk ngam Tēv, kūö ò nö töt meukö. Lökten öi öt kô öi haṙongten ò inup tö vī-i nyat hēk insā inrē. (Isa. 46:5) Löng hòng ayī-ö yěi vī insā yip tarik töhet tö ṙô ngaich vë-ekūö cha? Ngö ṙô ang Yāvē hē ò nö kētö minë Tösöm Chööngö: “Uh man vī Tēvre tö insā, un rēhēn nup tösā el halīöngö lā, el tumlat lā taṙeuḵ . . . Um sōntö kūöre in u.” (Man. 20:4, 5) Lökten yip tarik tö hòṅ haṙamlōn ngam Tēv, nö öt vë-ekūö insātēv.
6. Achī-ö yik tö asīnkaṙen töngamuh tö vē Vamënyen Yāvē yěn ha-öiny ngam Tēv?
6 Vënyu inlahen yik raneh Kristīön tö më tarik vamë-eny inlahen nuk töngaichngen tö cha nö öt vë-ekūö tahëng Tēv. Sā ṙô ngam līpöre History of the Christian Church nö vënyö inlahen yik raneh Kristīön “nö öt rahëichyen lōn töm vinë-ekūö insātēv.” Ngatī yin töngamuh vē Vamënyen Yāvē nö asīnkö inlahen yik raneh Kristīön, nö öt vī insā yip tarik töhet tö ṙô hēk tö yip ma-aṅhānga öt rēhěn nö vë-ekūö Yēsū inrē. Öt rēhěn cha-a inrē nö salām nup tö asöklöng maharōilö panam. Pòrô nö timlöng alaha, pön köpölōn cha-a tö ngam ṙô Yēsū nö ngö ṙô: ‘Vë-ekūö ngam Tēv Yāvē man höng anga-aṅ lahök la-en meh.’—Mët. 4:10.
7. Asuh nup inrikngöre më Vamënyen Yāvē tö yip tarik tö tahëngö tinlööken?
7 Pōyen tarik ṙamatö ellōn re nö in yip tökiröng tö akahka mahaköphöti nö el minë chūök vinë-ekūötēv. Uroh mihôiṅ nö ha-ööinyö cha. Havah nup līpöre cha, ngaich kētö tö pōyen tōnesön inrē nö in cha. Hang nup töng sitih ṙô cha inrē cha-a. Pòrô öre Yēsū nö yih nö ihôi cha öt rēhēn min cha-a nö hōḵ nö hangṙô ò. Öt ngatī pöri yip lamöklōn ngam Tēv, pön höng hangṙô Yāvē cha-a mötlö tö tarik. Milēḵṙen cha-a tö yip töhalēnlöng nö mahayöngken cha, köpölōn pöri inrē tö ngam ṙô Yēsū nö ngö ṙô: “Ṙòkhöre yī-ö öi holre.” (Mët. 23:8-10) Hö-ö in ayī-ö ha-öiny tarik. Pòrö nö yōm kūö tinlööken hēk yip mākūö ngih panam inrē. Öt rēhēn ayī-ö öi asinkö nup lōn cha. Öt atöltuṙen pöri ayī-ö öt rēhēn öi löök lōn ngih panam. Pöi harikngöre tö yip ameūkköre nö Kristīön.—Yôh. 18:36.
HARŌILÖ NGAM MINË-ENY YĀVĒ YIN
Ṙamlōn yin vē tökô-en Kristīön nö eūken Yāvē nö i tahëng (Ngëichköm perekrāf 8-10)d
8. Sitih löktö mikahlōn öi tö Yāvē nö lōnu tö taṙòkhöre tarik nö akahakūö tö ngam mine-eny ò?
8 Hěngheuh ang Yēsū nö vë-ekūötēv nö ngö ṙô: “Kayöngö, hakôlò ngam mine-enyre man.” Ngaich löktö el halīönö ṙô ang Yāvē nö kilēḵngôre tö re min nö harōilö ngam mine-enyre. (Yôh. 12:28) Ngatī inrē ang Yēsū nö vë-eny nang yik tahëng tö minë-eny ngam Yöng re Yāvē ngaich harōilen e. (Yôh. 17:26) Ngatī töngamuh vē tö kô-en Kristīön nö asīnken Yēsū nö kē mine-eny ngam Tēv ngaich vë-eny ngam yip tahëng inrē tö e.
9. Sitih inlahen yik Kristīön ik raneh senchurī nö harōilö mine-eny ngam Tēv?
9 Unôichhrit ranulten ngam tökô-en Kinristīönö ang Yāvē, nö ngëichkö yik ‘tahëng mihëṅṙö tarik pò ò nö hòṅ kēḵ tarik re tö aṅ in cha.’ (Inl. 15:14) Ngaich cha-a nö kēḵ mine-eny ngam Tēv hēk vë-eny nang tahëng inrē cha. Ik sā cha inrē nö kūich ngam Paipöl, ngaich kūichhöt ngam mine-eny ngam Tēv cha-a.b Lökten in e cha-a nö hameuktöre nö maharōilen ngam Tēv.—Inl. 2:14, 21.
10. Kūöyòh öi kò-òren ngö ṙô tö vë Vamënyen Yāvē nöng acha-a maharōilö minë-eny Yāvē?
10 Achīö yip töngamuh maharōilö mine-eny ngam Tēv Yāvē? Pōyen yip yōm tinlööken tö hòṅ hayunngö ngam mine-eny ngam Tēv. Kēngen e nö ṙā-ang imat ngam Paipöl. Sōten yip tarik inrē nö kēḵ mine-eny ngam Tēv nö el keurcha.c Harikngöre pöri vë Vamënyen Yāvē tö cha. Lööngö kinṙeūkö nö Vamënyen Yāvē kūö cha nö maharōilö minë-eny ngam Tēv Yāvē. (Isa. 43:10-12) Ngaich nö 24 körōr ṙôken ngam Paipöl Pövitrö Saströ Kā Nöyī Tūniya Anuvāt nö katānö. Ngaich nup chūök ngam minë-eny Yāvē nö kē-ěyö inup tahëng Paipöl, havantu anū-ö nö imat e. Pōyen tö töhěng kööiny ëlô minë līpöre tö aṅhav mat tö mine-eny Yāvē. In e öi akahakūö tö vë Vamënyen Yāvē nöng acha-a maharōilö mine-eny ngam Tēv.
HANGENLŌN YIN TÖ NGAM KANÔ-EN
11. Sitih inlahen yik raneh senchurī Kristīön nö hameuktöre nö hanangenlōn töm kanô-en?
11 Akahakūö ang Yēsū tö nuk kuilōn Yāvē. Hangenlōn inrē anga-aṅ tö ngam kanô-en. Lökten anga-aṅ nö ngatī tinrīken hēk vë-eny nang yip tahëng inrē tö e. (Yôh. 18:37) Ngatī inrē yik haköptö Yēsū nö hangenlōn tö ngam kanô-en. (Yôh. 4:23, 24) Vënyen ngam talöökö Kristīön inrē ang Pītör nö “talöökö kanô-en.” (2 Pīt. 2:2) Hangenlōn inrē misī yik Kristīön tö ngam kanô-en. Lökten nö sō-en nuk inköphöti hēk tinrīken ngih panam nuk töt sā ta nö i ṙô ngam Paipöl. (Kòl. 2:8) Ngatī töngamuh yip tö kò-en Kristīön nö pītnyöre nö lök in ngam “talöökö kanô-en.” Ngaich ngatī nup haköp cha hēk tinrīken nö asā ṙô ngam Paipöl.—3 Yôh. 3, 4.
12. Yěn akahngen re ngam Yôm La-en tö nup tö hòṅ halööktitvö ngaich sitih inlahen cha-a, ngaich kūöyòh?
12 Öt eū-eure yin vē Vamënyen Yāvē nö keuheūtlöre mikahkūö tö ṙô ngam Paipöl. Hēkpī ṙung cha-a nö vaichö mikah elnang tö minë inköphöti ṙô ngam Paipöl. Öt pingangkūö pöri ayī-ö tö e. Pòn vë-eny nang hī ngam Paipöl tö inlahen tī Yāvē nö hiṙeūtkö tīre yěn mikahtö elnang hī tö ngam kanô-en. (Inch. 4:18; Kòl. 1:9, 10) Lökten ayī-ö hòṅ höktöre tö ṙētak re min mikahtu elnang töm tölöng mikah elnang. Hamöiyö re inrē öi hökkö ngam ṙētak. Yěn kôtökūö ṙung ngam Yōm La-en tö nup tö hòṅ halööktitvö mikah elnang hī tö minë töhakööpö ngaich öt ahāṅken re cha-a nö halööktit u. Yēḵ hī pöri öi ngëichkö minë tahëng Kinristīönö, kūö re cha-a nö hòṅ haṙamlōn tarik lökten nö halööktit nup ṙinātö-ellōnre. Öt ngatī pöri vē Vamënyen Yāvē yěn ōt nup tö hòṅ halööktuvö, pön kūö re cha-a nö hòṅ haṙamlōn Yāvē hēk asīnken Yēsū cha-a nö i linöökö lōn ngam Tēv. (Yāk. 4:4) Öt kūö re ayī-ö öi hòṅ sā ta ing panam lökten öi harikngö nup inlahen re, tön halööktit re ayī-ö kūö hī teūngen tö nup mikal elnang re aṅ mat ngam Paipöl, hangenlōn ayī-ö inrē töm kanô-en!—1 Tös. 2:3, 4.
HANGENLŌN YIN TÖ HÖÖ
13. (a) Asuh ök tö mööḵlö in nuk tinrīken yik raneh senchurī Kristīön? (b) Asup mikahkūö hī tö vē vamënye Yāvē tö ngamuh nö ngatī tinrīken?
13 Pōyen nuk tövai tinrīken yik Kristīön misī ik raneh senchurī. Ngam hanangenlōn pöri tö mööḵlö nö in u. Ngö ṙô ök Yēsū: “In e inkaha yin min tö taṙòkhöre tarik, öi mahaköp in chu.” (Yôh. 13:34, 35) Meuk ngam hinëngö töm hanangenlōn in töngamuh inrē nö ihôi vē Vamënyen Yāvē. Pòrô cha-a nö kö harīkngöre panam hēk tinrīken, sön nöng sā töhěng mikūönö. Akahaiṙen ayī-ö tö ngam hanangenlōn yē hī el mīting, el asemli hēk könvensön inrē. Lökten in e sanīöpö ngam ṙinatö-ellōn hī tö hī öi lööngö inlahen öi löklōn Yāvē.
14. Sā ṙô ngam Kòlòsī 3:12-14 sitih inlahen öi ayī-ö öi kö hangenlōn tö höö?
14 Hōten hī ngam Paipöl öi ‘kô-en hangenlōn tö höö.’ (1 Pīt. 4:8) Tö hěng nö tinrīken hī öi hameuktö ngam hanangenlōn, öi Aṙēlö öp holre hēk möi in nup vanāichö höö. Innët tinrīken, hameuktö ngam minṙēlōn re el ngam māṅ hēk havëtö yip holre nö nyat nö i patī re, möthē öp tö haṙivlōn tī tö meh. (Vë-evkūö Kòlòsī 3:12-14.) Ngam hanangenlōn el hòi, inkaha hī angū-ö öi tö kô-en Kristīön.
“HĚNG ṘINATÖ-ELLŌN”
15. Asuh nup inrē chūök hī öi sā inlahen yik raneh senchurī Kristīön?
15 Tahëng nun minë chūök hī inrē öi sā ta inlahen in yik raneh senchurī Kristīön im linöklōn Yāvē. Tö sā ngam inlēnlö më mahaṙūötken hī el në māṅ nö hěngren inlahen. Ōt më sörkit ovörsīör, minṙöinylen hēk tö yip mahayööken töla-evṙen inrē sā cha nö ōt misī. (Filip. 1:1; Tai. 1:5) Asīnken yik Kristīön ayī-ö inrē öi hang minë chööngö ngam Tēv i alaha ngam insěha, ngam pinīhö hēk öt kine-e mahām inrē. Ngaich yěn ōt yip tarik töt mahalööktit re tö nup fālen re, ngaich ha-uknyu cha.—Inl. 15:28, 29; 1 Kòr. 5:11-13; 6:9, 10; Hep. 13:4.
16. Asup öp haköp hī in ngam Efisös 4:4-6?
16 Ngö ṙö ök Yēsū, pōyen yip min vamë-eny re nö mahaköp nö in chu, hö-ö pöri nö tökô-en. (Mët. 7:21-23) Ngatī ṙô inrē ngam Paipöl tö yip tarik min nö ōt ‘yip mahanyatkö elmat’ hī töre nö lamöklōn ngam Tēv. (2 Tim. 3:1, 5) Höng hěng pöri ngam ṙinātö-ellōn tö hō-ovö tö ngam Tēv.—Vë-evkūö Efisös 4:4-6.
17. Achīö yip töngamuh ma-asīnken Yēsū nö hěngö ṙinatö-ellōn?
17 Achīö yip cha-a töngamuh, tö hěngö ṙinatö-ellōn? Höng cha-a më Vamënyen Yāvē. Cha-a yin ma-asīnken Yēsū hēk tö yik raneh senchurī Kristīön inrē nö i linöklōn ngam Tēv. Ṙamölōn in ayī-ö töre öi Vamënyen Yāvē kūö hī inrē akahakūö tö Yāvē tö minë kūilōn ò inrē. Lökten ta-a, ui kintöngulōn töre īnu töm kanô-en.
TINKÖÖKÖ 3 Kumlēḵ, Maheūṅkö, hēk Inyönglen Ih
a El ngih ātiköl in min meuk ngam inchōten re tö Yēsū im linöklōn ngam Tēv. Meuk inlahen yik Kristīön inrē min ayī-ö ik raneh senchurī yik ma asīnken Yēsū hēk sitih inlahen yip Vamënyen Yāvē töngamuh nö asīnken e angū-ö inchōten.
b Ngëichköm pòks “Kēḵ Minë-eny Ngam Tēv Hòng Yik Kristīön Ik Raneh Senchurī?” imat ngam Chönvörī-Māch 2011 Chūökamahati-HI pěch 18.
c Sā inlahen ngam chööngö kahëtö ök tinfūölsīönö Pisöp ang Pōp Penetik ik samyeūheu 2008 nö sōten yik aṅ ngam Ketòlik nö kakkö minë-eny ngam Tēv yěn vë-ekūötēv hēk yěn tikökṙô re inrē
d VAMË-ENY INLAHEN NGAM NYAT: Katānö ngam Paipöl New World Translation tö më Vamënyen Yāvē nö pōyen tö tö 200 ṙôken ëlô, pön hōtu tarik nö i ëlô re nö vë-ekūö e. Aṅhav mat angū-ö töm minënyö ngam Tēv.