TÖHAKÖÖPÖ ĀTIKÖL 19
TINKÖÖKÖ 22 Ngaich Ngam Inyööngö El halīöngö —Ngatī Yēḵ Nö Ing Panam!
Sitih Inlahen Min Yāvē nö Kahòkken Yip Tarik ip Yamih Ṙētak?
“Tēv [Yāvē] . . . öt hōten yīö hěng hang tak tölëlngö.”—2 PĪT. 3:9.
ASUH ÖP MIN HAKÖP HĪ?
Mihôiṅ öi ṙatö-ellōnre tö ngam Tēv min yē ò nö kahôkken taṙòkhöre tarik nö lööngö tī.
1. Kūö yòh öi mihôiṅ ngö ṙô tö hī öi hang el ṙētak ngih tökiröng ṙanamlōn?
TÖKIRÖNG ön ngih nö ṙētak ṙanamölōn hī! Ngaich inrē öi kôta mat öi meuk minë tö vënyu tö ngam Paipöl. Tö sā në, nö lā-al höö min minë “miyööngö aṅ lā kapā” hēk tö ngam “miyööngö aṅ lā lòhngö.”. (Tan. 11:40.) Meuk inlahen ngam Pūlngö ngam Tēv inrē min nö keuheūtngöre chūök inhangka, lāku ṙôken inrē min yip tarik kamtöllö lōnre nö i linöklōn ò. (Isa. 60:22; Mët. 24:14) Hěnghöre teūngen inrē ayī-ö tö minë pöplikēsön hēk meskěsin nö löngö ṙētak, ngam löktö ngam innôlö hī mihôiṅ nö ngönlöre nö in ngam Tēv.—Mët. 24:45-47.
2. Asuh öp ṙinatö-ellōn hī hēk asuh nup ṙô tö hō-ovö tö hī?
2 Kiröngen nup min inlahngen tö hòṅ yih, örheūheu pöri ang Yāvē nö mikahktö elnang hī tö inlahen u. (Inch. 4:18; Tan. 2:28) Mihôiṅ ayī-ö ṙinātu-ellōn töre öi urěhti mikahlōn tö inlahen ranulten ngam tökiröng kanihngen, lökten hī mihôiṅ chiplö löklōn Yāvē pòrô el ṙētak minë kanihngen, köptī inrē min ayī-ö tö ngam hīnëngö. Hěng pöri ngih chūök hī hòṅ ṙatö-ellōnre, pön ōt nup ṙô inup yamih ṙētak töt mikahkūö hī. In ngih ātiköl in min öi mikahtökūöre tö nup yamih inlahen nö kūö yòh anū-ö nö harīkiyö. Në min inrē ngahëichkö hī, tö nup inlahen tī Yāvē min in nup yamih ṙētak.
ASŪP TÖT MIKAHKŪÖ HĪ
3. Sitih lōn öi sin tö yip tarik töt ṙamatö-ellōnre nö in Yāvē hēk kūö yòh?
3 Ngö ṙô in sin i nuk urěh ṙētak, yěn rultenre min ngam tökiröng kanihngen ngaich öt ṙētakvö min yip tarik nö ṙatö-ellōnre nö in Yāvē hēk öt kô-òngvah inrē ip yanīhi öp Armakētòn. Kūö yòh öi ngatī ṙô? Pöi ngö lō sin tö e nöng sā inlahen ngam Ṙanööingö. Tö sā ngih inchōḵelmat, öi ngö lōn tö e nö sā inlahen Yāvē nö öpngö kūö inkūp ngam chōng urēhěkūö yanīhi ngam Ṙanööingö, ngatī inlahen anga-aṅ ip ranulten ngam tökiröng kanihngen nö “öpngökūö inkūp” më tarik aṅ ngih panam ngaich öt ṙētakvö min cha-a nö laklöre.—Mët. 24:37-39.
4. Kūö yòh öi öt ṙātö-ellōnre tö inlahen öp yamīh min ṙētak nö sā inlahen nuk ṙētak Nō-a? Mikahtö elmat hī.
4 Löng öng min ngam inlahen hī yěi kakkö inlahen ngam Ṙanööyngö nö vamënyö inlahen öp yamih min ṙētak? Hö-ö. Kūö yòh öi mihôiṅ ngatī ṙô? Pön öt vënyu angū-ö nö imat ngam Paipöl.a Asā tö ngam yanīhi re misī Yēsū nö in ngam ‘sakāmö Nō-a’, öt hěngheuh pöri anga-aṅ nö kakken ök sakāmö Nō-a nö vënyö inlahen öp yamih min ṙētak. Tö sā ngih, öpingökūö inkūp ngam chōng. Sön pöri ayī-ö öi haköplu in Nō-a hēk tö inlahen ngam Ṙanööingö inrē.
5. (a) Sitih inlahen ök Nō-a nö hameuktö ṙinatö-ellōnre nö in ngam Tēv urēhěkūö ök Ṙanööyngö? (Heprāi 11:7; 1 Pītör 3:20) (b) I alaha ngam inhānga, sitih inlahen nö hěngren in në sakāmö hī hēk tö nuk sakāmö Nō-a?
5 Ik sā Nō-a nö hang ngam inlēnö lamöktö in Yāvē, ngaich ilöö kē-ělkūö alahare ang Nō-a nö vī ngam chōng hēk hameuktö ngam ṙinatö-ellōnre inrē nö in ngam Tēv. (Vë-evkūö Heprāi 11:7; 1 Pītör 3:20.) Hòṅ ngati inlahen yip tarik töngamuh yěn hang ngam tölöök inhāngkö ngam Pūlngö ngam Tēv ngaich hòṅ ilööṙen cha-a nö kē-ělkūö alahare. (Inl. 3:17-20) Ngö ṙô tī ang Pītör nö kūich inlahen Nō-a nö “ma-ahangkö ngam lanöökö.” (2 Pīt. 2:5) Hōltö ellōnre anga-aṅ nö ahānga, sā maheuk hī in nuk urěh ātiköl nö öt vënyu angū-ö nö imat ngam Paipöl tö inlahen ò nö ahānga nö in më tarik urēhěkūö yanīhi ngam ṙanööingö. Yěi ṙôtenre pöri, ngaich ngatī inlahen ayī-ö töngamuh öi holtö kumlēḵ lōnre vë-eny nang më tarik öt keuheūtngöre chūök nö ing panam tö ngam tölöök inhānga. Pòrô öp sitih inlahen hī öi ma-ainyre ahangkö ngam tölöök inhānga, sönen nöng öt ṙôkhöre tarik nö teunghu tö ngam tölöök inhānga urēhěkūö öp manāngen. Kūö yòṅ öi ngatī ṙô?
6-7. Kūö yòh öi mihôiṅ ngö ṙô urēhěkūö ngam manāngen nö yih löktö më tarik min nö öt ṙôkhöre nö teunghu tö ngam tölöök inhānga? Mikahtö elmat hī.
6 Töi chumkūöṙen öi hang ngam ṙô Yēsū i alaha ngam tölöök inhānga. Ngö ṙô anga-aṅ, “ahangka min ngih tölöök inhangkö ngam Pūlngö nö i në taṙòkhöre panam nö inmeukhömat taṙòkhöre.” (Mët. 24:14) Kôtamat ayī-ö töngamuh öi meūkö u nö teungtakūö. Pōyen tö tö 1,000 ëlô inhangka ngam Pūlngö hēk katānö inrē minë līpöre u. Hěnghöre löktö in ngam jw.org vepsāit hī inrē nö halēnlöng nö chö-inyten yip taṙòkhöre tarik ikūö ngih panam.
7 Ngö ṙô pöri ang Yēsū nö in yik haköptö re yē ò min nö yih, ngaich ‘öl rēhěn min öi keuheūt röön chuh in minë panam,’ tö ngö manah hö-ö min më ṙòkhöre tarik nö teunghu tö ngam tölöök inhānga. (Mët. 10:23; 25:31-33) Teungtakūö nun ngaich minë ṙô Yēsū in në ṙētak hī töngamuh. Pōyen tarik in nup panam hēk kamngö töt teunghu töm tölöök inhānga minë chūök hī öt halöngtuṙen ahangkö ngam tölöök inhānga. Rö-ö nöng angū-ö, pön pōyen yip nyīö tö kaheuk minit nö fötnyu nö keuheūtngöre chūök nö ikūö ngih panam. Pòrô min öi ma-ainyre öi ahangkö ngam tölöök inhānga öi ikūö ngih panam, in vë “pumnāmö tarik, miyöngö, tum mi-ëlô, tarik inrē.” kô-en in öt keuheūtngöre chūök öi ing panam öi ahangkö ngam tölöök inhānga urēhěkūö öp manāngen nö yih.—Inm. 14:6.
8. Asuh öp tö mihôiṅ intöönö elkuilōn hī tö inlahen ngam Tēv min nö kahôkken tarik ip yamih min ṙētak? (Ngëichkö ngam nyat.)
8 Hěng pöri ngih intöönö i alaha ngam tö kakka taheui tö hī: Sitih inlahen ṙô öi min tö yip tarik töt teūngen tö ṙētakre nö hang ngam tölöök inhānga urēhěkūö yanīhi ngam tökiröng kanihngen? Sitih inlahen min ang Yāvē hēk tö ngam kūön ò nö kahòkken yip tarik? (Yôh. 5:19, 22, 27; Inl. 17:31) Öt akahakūö in töp sanapṙô u, pön öl ang Yāvē nö hameuknyen u nö in hī. Öt uroh ang Yāvē nö vënyö nup tö ngaich la-enre nö in hī hēk i nup yamih min ṙētak. Hěng pöri ngih mikahkūö hī in ngam kui ngih ātiköl in ngih tö kūichi miröökö. Ngö ṙô ang Yāvē, “öt hōten yīö hĕng hang tak tölëlngö, hōten yīö pöri ṙòkhöre yihtöre im invöötö ellōn.”—2 Pīt. 3:9; 1 Tim. 2:4.
Sitih inlahen tī ang Yāvē min nö kahôkken yip tarik töt teūngen nö hang ngam tölöök inhānga urēhěkūö ngam tökiröng kanihngen? (Ngëichköm perekrāf 8)c
9. Asuh öp ṙô Yāvē nö vë-eny nang hī nö löktö imat ngam Paipöl??
9 Hö-ö in ṙòklöre mikahkūö tö nup la-en Yāvē min in nup yamih ṙētak. Ōtreh pöri nup vahënyö ò nö in hī nö löktö mat ngam Paipöl. Tö sā kinūichngö e, tö Yāvē min nö ha-aṅlen yip “tötlöök” tarik yip töt ṙētakvö nö mikahtökūöre töm kanô-en hēk öt ṙētakvö nö halöktitre urēhěkūö kinpahare. (Inl. 24:15; Lūk. 23:42, 43) Ōt nup ihih intöönö töt ṙanāngen min nö kahakkö hī.
10. Asup nup intöönö mihôiṅ yamih nö elkuilōn hī?
10 Yip tarik tö kapah im ṙētak ngam tökiröng kanihngen, öt hēk hòng min ch-a nö ha-aṅlöng? Lööknyi ṙô ön ngam Paipöl nö vë-eny nang hī tö yip tarik min mahalòngen chööngö Yāvē, ahëti min cha-a tö Yāvē hēk tö yip hol ò kumyung ip Armakētòn ngaich öt hēk min cha-a nö ha-aṅlöng. (2 Tös. 1:6-10) Sitih inlahen yip min tarik tökapah kūö kanöinyöre hēk kūö invah, kūö pinlāngen hēk kūö finëlngöre inrē tö holre? (Mum. 9:11; Sak. 14:13) Ōtre hòng min tarik tö ha-aṅlöng nö in yip “tötlöök” nö el öp tufömngöre panam? Hö-ö in akahakūö tö inlahen cha.
ASŪP MIKAHKŪÖ HĪ
11. Asūp min lökngörit Yēsū nö kahòkken yip tarik?
11 Ōtre nup mikahkūö hī inlahen nup yamih min ṙētak. Tö sā mikahkūö hī tö Yēsū nö asā inlahen tinrīken yip tarik nö in yip kahëm ò ngatī inlahen min anga-aṅ nö kahòkken cha. (Mët. 25:40) Yip tarik mahamòlṙen më töhachamö elkui Kristīön hēk tö Kristū inrē, kaheukö min cha-a nö sīṅp. Ōtre yip min kahëm Kristū hē ranulten ngam tökiröng kanihngen nö ing panam. Ip ranehtökūö ngam Armakētòn min cha-a nö kēḵlöng nö chuh el halīöngö. Hanöng sā cha pöri nö ōtre nö ikūö ngih panam, angū-ö ṙētak yip tö yāichö ellōn nö holṙen cha nö ahangkö ngam tölöök inhānga. (Mët. 25:31, 32; Inm. 12:17) Kūö yòh anū-ö në ṙô nö töt ṙanāngen?
12-13. Sitih inlahen yip min tarik yěn meuk inhëtngö ngam “Tökiröng Pēpilön”? (Ngëichkö ngam nyat.)
12 Yē ngam “Tökiröng Pēpilön” min nö ahëtiyö ip tökiröng kanihngen, lohten yip rīkre min tarik nö fē-ělre tö ṙô më Vamënyen Yāvē nö vënyö inlahen u. Ōtre hòng min yip tarik ṙamatö-ellōnre nö in Yāvē ip hē e hēk kētöre inrē nö löklōn ò?—Inm. 17:5; Isi. 33:33.
13 Ngatī inlahen nuk misī sakāmö Môsös. Ik sā yik tarik i Aikup nö meuk minë tö 10 kanihngen ṙô Môsös nö teungtakūö, ngaich lohten nö ōt yip in cha ṙamatö-ellōnre nö in Yāvē. Angū-ö lāinyngen e nö kūichi nö imat ngam Paipöl, ‘tö yik aṅ Israel nö kunyī-inyre nö ṙā-ang Aikup. (Man. 12:38) Ngaich lohten nö ngatī inlahen unôichrit inhëtngö ngam Tökiröng Pēpilön, ōtre min yip tarik ṙamatö-ellōnre nö in ngam Tēv Yāvē urēhěkūö öp manāngen. Haṙivlōn hòng më-eṅ öm meukö u, kihngen ellōn hòng inrē? Hö-ö. Sā ngam Yöngre pöri ayī-ö Yāvē ngam tö, “tööḵlö tö miṙēlōn neūkölōn inrē, töt veūtö lanīnö, tö pōyen miṙēlōn i tö köṅnyu aṙēlö.”b—Man. 34:6.
Rīkre min yip tarik lohten famë-ělre yěn meuk inlahen inhetngö ngam Tökiröng Pēpilön tö inlahen yip Vamënyen Yāvē nö vë-eny nang cha hē e tö inlahen e (Ngëichköm perekrāf 12-13)d
14-15. Asuh öp löktö taneūngen ngòh tö hěngtak tarik tö ngam nômö tö örheūheu aṅ hēk yěn hö-ö? Mikahtö elnang hī. (Salmai 33:4, 5)
14 Hēṙu yip ṙung tarik nö ngö mufē tö inlahen yip hanöng kisānöre, tö cha yěn kapah min urēhěkūö ngam tökiröng kanihngen, ngaichlohten min cha-a nö ha-aṅlöng tö Yāvē ip tufömngöre panam. Tölöng ngam mufē cha nö ngatī. Öt akahakūö pöri ayī-ö tö ngòh tö hěngtak tarik min yěn teūngen tö ngam tö örheūheu aṅ nômö hēk yěn hö-ö. Pöi ötkô öi höng halöng ṙô re töp ṙētak ngam kinpahare. Tö hangenlōn an Yāvē tö inkaha fālen, lökten nup fësla ò nö tölöng nö asā minë kamngö ò. (Vë-evkūö Salmai 33:4, 5.) Lökten öi mihôiṅ ṙatö-ellōnre tö ò nö öthō nö öt lööngö tī nö “akah fālen në taṙòkhöre panam.”—Ran. 18:25.
15 Mihôiṅ in öi ngö ṙô tö ngòh tö hěngtak tarik nö rö-ö nö teūngen tö ngam tö örheūheu aṅ nômö nö löktö i minë kamngö ò nö iyöng. Öthō an Yāvē nö “pökörevö” elmat tö më tö lāku ṙôken tarik aṅkūö në panam yip tö öl nö teunghu tö ngam tölöök inhangkö ngam Pūlngö. (Mët. 25:46) Tö chumkūöṙen anga-aṅ tö taṙòkhöre tarik ngam ma-akah fālen në taṙôkhöre panam, ötrehěn in ayī-ö öi sāḵta inlahen in ò nö chumkūöṙen tö hī. Hö-ö in ayī-ö akahakūö tö inlahen Yāvē nö harīkngö ṙētak ngam tökiröng kanihngen. Lohten min nö ōtre yip in cha tö ṙētakvö nö haköp inlahen Yāvē hēk ṙatö-ellōnre inrē nö in ò. Yěn harōilö ngam minë-enyre min ang Yāvē nö ikūö minë pumnāmö, ngaich lohten min cha-a nö kētöre nö holṙen Yāvē.—Isi. 38:16.
Yěn rultenre min ngam tökiröng kanihngen, ōtre hòng min yip tarik tö hòṅ ṙatö-ellōnre nö in Yāvē hēk kētöre inrē nö löklōn ò?
16. Asūp ngaich mikahkūö hī tö inlahen Yāvē? (Ngëichkö ngam nyat.)
16 Kūöre in ayī-ö haköpmat ngam Paipöl, öi akahakūö tö Yāvē nö pōi ṙāi mat tö vë taṙòkhöre tarik. Kēten ngam Kūönre anga-aṅ, pön hōten hī öi ṙòkhöre teūngen tö ngam nômö tö örheūheu aṅ. (Yôh. 3:16) Ngaich ṙòkhöre ayī-ö akahakūö tö Yāvē nö chumkūöṙen tö hī hēk kirööngen hanangenlōn inrē. (Isa. 49:15) Öt hěngtak tarik töt mikahkūö ò, pò ò nö ṙòkhöre mikahkūö tö hī, yěi pòrô min öi kapah ngaich mihôiṅ min anga-aṅ nö ha-aṅlen hī nö havantö nuk urěh mineūkö hī sin. Rö-ö nöng anū-ö pön minë mufē hī, minë kuilōn hī inrē nö havan. (Mët. 10:29-31) Lökten mihôiṅ öi ṙatö-ellōnre öi in ngam Yöngre Yāvē ngam tö hangenlōn tö hī, tö lööngö tī inrē nö akah fālen. Tö chipötī inrē anga-aṅ nö akah fālen nö sā minë kamngö ò hēk sā ngam neūkölōn ò inrē.—Yāk. 2:13.
Mihôiṅ in kirööngen ṙinatö-ellōn tö Yāvē min nö lööngö tī nö kahôkken tarik, tö vaiyö tī anga-aṅ yěn kahôka, sā nup töhët chööngö ò hēk aṅhavin inrē anga-aṅ töm miṙēlōn (Ngëichköm perekrāf 16)
17. Asuh öp haköp hī min ip yamih ātiköl?
17 Ngam tufömngöre mikahkūö hī, löktö in e ayī-ö akahaiṙen tö ngam la-en inhānga nö tö mööḵlö kinëkaren angū-ö töngamuh. Kūö yòh öi mihôiṅ ngatī ṙô? Asūp mihôiṅ mahayööken hī ngöt öi in ngam inhangkö ngam tölöök inhānga? In öp yamih in min ātiköl öi mikahtökūöre tö sanapṙô në intöönö.
TINKÖÖKÖ 76 Sitih Ellōn Öm?
a Kūö yòh anū-ö nö halööktitvö, mihôiṅ öm mikahtökūöre tö inlahen u in ngam 15 Māch, 2015 im Chūökamahati-HI pěch 7-11 kò-òṙen öm vë-ekūö e im ātiköl tö ngö kui, “Lōn Meh Takô Nö Ngatī Inlahen.”
b Yěn hòṅ la-al hī min ngam Kōk Makōk unôichrit inhëtngö ngam Tökiröng Pēpilön, ngaich ṙòkhöre min yip lamöklōn Yāvē nö kalaha ngam ṙinatö-ellōn cha. Yip tarik hamòlṙen më tarik Yāvē inrē ip hē e, cha-a inrē min tö kalaha ṙinatö-ellōn.
c VAMË-ENY INLAHEN NGAM NYAT: Tö sā minë tö lūöi nyat tö hameuktu, minë lökngen hī mihôiṅ öt teungten vë-eny nang më tarik tö ngam tölöök inhānga: (1) Ngam yöngnyīö mi-iyöng kūö ngam panam chūök yip tö pōyen ramātö-ellōnre nö in nup tahëng tinlööken hēk kihngen inrē öi ahangkö ngam tölöök inhānga , (2) Minā pamīhöre mi-iyöng kūö ngam panam chūök sinôngö inhangkö ngam tölöök inhānga, hēk (3) Hěngtak ngam tarik mi-iyöng in ngam kamngö tötkô nö chahu in hī.
d VAMË-ENY INLAHEN NGAM NYAT: Ahëti ngaich ngam “Tökiröng Pēpilön.” Ngam ramāngenre sin yöngnyīö nö löklōn Yāvē, ngaich afēkö inlahenre anga-aṅ nö haköpö u sin ik urěh . Halööktitre pöri anga-aṅ ngaich havan nö chuh in minā yöngre Vamënyen Yāvē. Yěn ngatī inlahen min yip tahëng, ngaich hòṅ asīnken ngam yöngre ayī-ö Yāvē öi hameuktö ngam miṙēlōnre hēk holtö ṙanamlōnre öi ha-öinytö yanihī ò nö havan nö in Yāvē.