Öthō Nö Öt Teung Minë Maheuṅkkö Hī

1. Kūö yòh ök Aprahām nö meukkenre nö kūönu?

KILĒḴNGÔRE misī ang Yāvē nö in ök holre Aprahām tö yip taṙòkhöre min tarik ikūö ngih panam nö teūngen tö inkôlò re nö löktö ip kūön ò. (Ran. 15:5; 22:18) Ngön takô ngam ṙinātö-ellōn Aprahām nö in Yāvē lökten anga-aṅ nö ṙātö-ellōn tö ò nö öt löktu nö öt hateung ngam kinlēḵngôre min. Ngaich pöri ang Aprahām nö 100 samyeūheu ṙēḵti ngaich ngam pīhö ò nö 90 samyeūheu ṙēḵti, öl cha-a nö kūönu. (Ran. 21:1-7) Sön ang Aprahām nöng “ṙātö-ellōnre nö im mineūka pòn hōtu anga-aṅ nö yöng tö ṙōl mihëṅṙö tarik, sā ngam tö ngaich misī tö eūka.” (Rōm. 4:18) Akahakūö in töm maheūṅkkö Aprahām nö ngaich nö teung. Kūönu anga-aṅ tö Isāk ngam maheuṅkkö cha sin. Kūö yòh pöri ang Aprahām nö ṙātö-ellōnre tö Yāvē min nö hateunngö ngam kinlēḵngôre?

2. Kūö yòh ök Aprahām nö kirööngen ṙinātö-ellōn tö ngam kinlēḵngô Yāvē nö öt löktu nö öt teung?

² Kirööngen mikahkūö ang Aprahām tö Yāvē misī, lökten anga-aṅ nö “pōyen ṙinātö-ellōn tö ngam kinlēngô ngam Tēv nö öthō nö öt teung. (Rōm. 4:21) Kūö ngam tö ngön ṙinātö-ellōn Aprahām ang Yāvē nö ṙamölōn nö in ò hēk kaheūkan inrē nö tölöök. (Yāk. 2:23) Sā mikahkūö hī öi löktö in ngam Rōma 4:18, tö Aprahām nö ṙātö-ellōnre nö in Yāvē hēk maheuṅkku inrē nö in ò. Ta-a töi kakkö ngam inlahen ṙô Pôl tö ngam mineūka, mihôiṅ in öi haköp ngam ṙô ò im Rōma tö 5 mirūlö.

3. Sitih ṙô ang Pôl nö mikahtö elmat hī tö inlahen minë maheuṅkkö?

³ Mikahtö elmat hī ang Pôl tö hī kūö yòh mihôiṅ ṙātö-ellōnre “tö ngam maheūṅkkö hī nö öthō nö miṙivngölōn hī.” (Rōm. 5:5) Vënyö inlahen ngam maheūṅkkö hī inrē anga-aṅ öi Kristīön öi sitih inlahen hēk hangönlen e. Ta-a chěi tö chumkūöṙen tö ngam ṙô Pôl im Rōma 5:1-5, ngönlöre hēk min ngam maheūṅkkö meh yěm örheūheu fēken e. Ngam kahakkö hī min, in e min öm akaha elmat tö meh öm sitih inlahen hēk öm hangönlö ngam maheūṅkkö re. Töi urěh pöri sin öi kakken ngam töt insā-avö maheūṅkkö, ngam kahakkö Pôl tö e nö töthō nö miṙivngölōn hī.

TÖT INSĀ-AV NGAM MAHEŪṄKKÖ HĪ

4. Asūp tö kakka inlahen im Rōma 5:1, 2?

⁴ Vë-evkūö Rōma 5:1, 2. Kūich ngih ṙô ang Pôl nö chö-öinyten tö ngam māṅ i Rōm. Haköp inlahen nā Yāvē nā Yēsū acha-a hēk ṙātö-ellōnre, ngaich vītöre nö Kristīön. Kūö ngam ṙinātö-ellōn cha ang Yāvē nö “kaheukö cha nö löök” ngaich hacham elkui cha töm töhet fanöinylöre. Aṅhavin ngaich cha-a töm töt insā-avö maheūṅkkö re hēk ṙātö-ellōnre cha-a tö e nö öthō min nö öt teung.

5. Asūp maheuṅkkö yip tö hachāmö elkui Kristīön?

⁵ Unôichrit e hēk ang Pôl nö kūich chitri yik töhachamö elkui Kristīön aṅ Efīsös nö vënyö inlahen ngam maheūṅkkö cha. Vënyö ngam maheūṅkkö cha anga-aṅ “nö amin yip töhet.” (Efi. 1:18) Ngaich ik sā Pôl nö kūich chitri yik aṅ Kòlòsī ngaich vë-eny nang cha anga-aṅ tö inlahen ngam maheūṅkkö cha nö isuh chūök min angū-ö nö teungtökūö. Ngö ṙô anga-aṅ ‘el halīöngö an ngam hinöngken yīö mineūka.’ (Kòl. 1:4, 5) Lökten mihôiṅ öi ngö ṙô tö më töhachamö elkui Kristīön, nö ṙôkhöre min cha-a nö chuh el halīöngö nö hol Kristū nö hayöng.—1 Tös. 4:13-17; Inm. 20:6.

6. Asuh öp ṙô öp ih töhěngtak töhachāmö elkui prötör nö vë-eny inlahen ngam maheuṅkkö?

⁶ Milēḵṙen yin më töhachāmö elkui Kristīön tö ngam maheuṅkkö re. Töi ngëichken ngih ṙô Prötör Frëtrik Frans ngòh töhachāmö elkui, nö vë-eny inlahen ngam maheuṅkkö re ik 1991 nö ngö ṙô: “Tökô-en ön ngam maheuṅkkö hī nö tö teung min nö in hī öi tö 144,000, minë töt mufē hī inlahen e.” Samyeūheuv rò-òten cha-a nö köp nö i linöklōn Yāvē, ngö ṙô inrē anga-aṅ : “Söl ing töngamuh ön ngam maheuṅkkö hī nö töpōiṙai . . . Sā rò-òten hī öi hökken e ngatī sanīöpö ngam minlēḵṙen hī tö e. Pön töt insā-avö ngam maheuṅkkö hī, lökten öp töng yòh rò-òten hī öi hökken e, höng ṙamlōn ayī-ö. Lökten hēk nö sīöplöre ngam minlēḵṙen chu öich in ngih maheuṅkkö re.”

7-8. Asūp maheuṅkkö yip tarik ngam Tēv? (Rōma 8:20, 21)

⁷ Öt ṙôkhöre yip tarik ngam Tēv töngamuh nö tö hachāmö elkui, maheūṅkku pöri cha-a. Sā inlahen ngam maheuṅkkö Aprahām min cha-a nö örheūheu nö aṅ yěn hayöng min ngam Pūlngö ngam Tēv nö ing panam. (Hep. 11:8-10, 13) Töt insā-av min ngam maheuṅkkö cha tö ṙô Pôl. (Vë-evkūö Rōma 8:20, 21.) Kò-òren man fē-a sin. Ik raneh van meh hang minë kinlēḵngô ngam Tēv, asuh öp hē e tö lökngöre tī tö meh? Ngam inlahen hī hòng öi öt vāhavö, öt köiny hēk öt kapah inrē? Hēk ngam inlahen hī ṙöng öi meukkūö yip holmaneuk re yip tö ha-aṅlöng min ngaich in cha min öi örheūheu iyöng el öp peretāis? Kūö ngam “maheuṅkköre” min më-eṅ öm hökken minë töpōyen inkôlò re.

⁸ Töt insā-avö ön ngam maheuṅkkö hī yěi pòrô chuh el halīöngö hēk ing panam inrē, ṙamlōn ayī-ö kūö ngam maheuṅkköre. Mihôiṅ pöri hēk nö ngönlöre ngam maheuṅkkö hī. Mikahtö elnang hī ang Pôl tö inlahen e. Ta-a töi ngëichkö ṙô ò nö vë-eny inlahen ngam maheuṅkkö hī. Löktö in e min ngam ṙinātö-ellōn hī nö sīöplöre tö ngam maheuṅkkö hī min öthō nö öt teungtökūö.

NGÖNLÖRE NGAM MAHEUṄKKÖ HĪ

9-10. Hòṅ asuh öp ṙinātö-ellōn yip Kristīön töngamuh nö sā Pôl? (Rōma 5:3) (Ngëichkö nyat lamā uk.)

⁹ Vë-evkūö Rōma 5:3. Ngö ṙô ang Pôl tö hī yěi la-al minë kanihngenre ngaich lökten in e min ngam maheuṅkkö hī nö ngönlöre. Lohten öi harikngöre mufē yěi hangö e. Kô-en më Kristīön nö hòṅ la-al minë kanihngen min. Akahakūö inrē ang Pôl lökten ò nö kūich chitri yik holmaneukre aṅ Tösalònikē nö ngö ṙô tī: “Kô-en in, vë-eny nang yīö lā-urĕh, ik hē ih in yīö, tö hī öi tökihngen, nö sā e nö ngaich töngamuh.” (1 Tös. 3:4) Kūich chitri yik holmaneukre inrē anga-aṅ aṅ Kòrin, nö ngö ṙô tī: ‘Pò ih sōten yīö öt akahalōn, kahōlö, tö inlahen kanihngen ih. Ngöṙô lōn ihö töre tö ih ngaich töng öt aṅ.”—2 Kòr. 1:8; 11:23-27.

¹⁰ Akahakūö in ayī-ö Kristīön töre töngamuh öi tö hòṅ la-al minë kanihngenre. (2 Tim. 3:12) Sitih ṙô öm tö inlahenre? Kihngen hòng më-eṅ, kūö meh öm haköp in Yēsū hēk ṙātö-ellōnre öm in ò? Pi-a man lohten öm ötlēkaṙen tö yip holre hēk tö yip holmaneukre inrē. Hēk sōḵ inrē lohten më-eṅ öm michūṙen ichūök re kamān lökten öm hakihtuṙen? (Hep. 13:18) Hēk lohten inrē öm hakihtuṙen tö më mā mahayöng, kūö meh öm vënyö ngam maheuṅkköre öm in yip tahëng. Pòrô öp tö sitih kanihngen hī hòṅ ṙamölōn ayī-ö. Ngatī ṙô inrē ang Pôl. Kūö yòh pöri anga-aṅ nö ngatī ṙô?

11. Kūö yòh öi hòṅ īnu tö ngam manööyö öi la-al nup kanihngenre?

¹¹ Mihôiṅ in öi ṙamlōn pòrô öi īnu tö minë kanihngenre, pön angū-ö lökten hī heuveū-en im manööyö. Ngatī ṙô ngam Rōma 5:3, “tö ngam kanihngen nö vītö manööyö.” Ṙôkhöre yip Kristīön nö yihīvö tö minë kanihngen. Lökten öi hòṅ aṅhavin töm manööyö öi la-al u. Yē hī min öi möi hēk iṙūöhen öi im linöklōn Yāvē ngaich meuk taneungtökūö minë maheūṅkköre min ayī-ö. Hö-ö in öi lōnu töre öi sā yip tarik im inchōḵ-oṙô Yēsū ngam inlahen nup kulöl famuk kui ihong. Yěn ‘hakihtuṙen hēk öt lēkaṙen cha-a,’ ngaich ilöö ṙāngenre cha-a nö ṙātö-ellōnre. (Mët. 13:5, 6, 20, 21) Kô-en in öt lööṙen öi la-al minë kanihngenre, yěi holtö manööyöre pöri min öi la-al u hēk iṙūöhen inrē öi löklōn Yāvē ngaich yöölen min ayī-ö. Öi sitih inlahen?

12. Asūp yanöölen hī yěi aṅhav in töm manööyö öi la-al minë kanihngenre?

¹² Vë-eny nang hī ang Yāköp tö yanöölen hī yěi möi öi la-al nup kanihngenre. Ngö ṙô tī anga-aṅ: “Ngaich hökngen ngam manöiyö nö hateungngö ngam la-enre, hòṅ yīö öi teungten, öt hanātuṙen i tökeuheūttöre.” (Yāk. 1:2-4) Ngö ṙô tī ang Yāköp nö kūich inlahen ngam manöyöö, tö e nö hòṅ la-evṙen. Asūp la-en ngam manöyöö? Hayööken hī angū-ö öi asīöp minë tövai tinrīkenre, tö sā në, hayönglenre in Yāvē, ṙūöhlö ngam ṙinātö-ellōnre in ò hēk asīöp ngam manööyö inrē. Töi ngëichkö öp tökiröng yanöölen hī yěi aṅhavin töm manöyöö.

13-14. Asūp yanöölen hī yěi aṅhavin tö manööyö hēk sitih inlahen angū-ö nö nòlta nö im maheuṅkkö hī? (Rōma 5:4)

¹³ Vë-evkūö Rōma 5:4. Ngö ṙô ang Pôl, yěi möi ngaich “hō-en hī ngam Tēv”, tö ngö manah angū-ö tö hī yěi aṅhavin töm manööyö ngaich ṙamölōn ang Yāvē nö in hī. Öt tö ngö manah pöri angū-ö tö Yāvē nö ṙamölōn yěn meūkö hī kihngen. Pön ṙamölōn anga-aṅ tö hī yěi möi öi la-al minë kanihngenre hēk köp inrē öi löklōn ò. Reuslöre alaha in öi hāngö Yāvē nö ṙamlōn nö in hī yē hī aṅhavin tö ngam manööyö!—Sal. 5:12.

¹⁴ Töi fēkö inlahen Aprahām nö holtö manööyöre nö la-al nup kanihngenre hēk ṙamölōn ang Yāvē nö in ò. Holrevö ṙô ang Yāvē tö ò hēk kaheūkö ò inrē anga-aṅ nö tö akaha. (Ran. 15:6; Rōm. 4:13, 22) Mihôiṅ an inrē Yāvē nö ṙamlōn nö in hī. Ötkūö ṙôken nup la-en hī hēk ötkūö nup taneūngen hī la-en ang Yāvē nö ṙamlōn. Ṙamlōn pöri anga-aṅ nö meuk ngam manööyö hī öi la-al nup kanihngenre hēk chiplö inrē öi in ò. Pôrò öp töng yòh ṙēḵti hī, öp töng inlahen hī, heuneu-en hī inrē, mihôiṅ ayī-ö öi aṅhavin töm manööyö. Köp hòng më-eṅ in Yāvē pòrô öm rònghöichṙen la-al minë kanihngenre? Yěm hòṅ, ngaich mihôiṅ öm ṙātö-ellōnre tö Yāvē nö ṙamlōn nö in meh. Yē hī öi kahāiṙen tö Yāvē nö ṙamlōn nö in hī ngaich lökten in e nö ngönlöre ngam maheuṅkkö hī.

HĒK NÖ NGÖNLÖRE NGAM MAHEUṄKKÖ HĪ

15. Kūö yòh yik tarik nö pingangkūö tö minë vahënyö Pôl?

¹⁵ Sā ṙô Pôl nö mikahtö elnang hī tö hī yěi holtö manööyöre öi la-al minë kanihngenre ngaich hō-ov ayī-ö tö ngam Tēv, tö ngö manah tö ò nö ṙamlōn nö in hī. Töi ngëichkö ngam ṙô Pôl hēk nö ngö ṙô tī nö kūich: ‘Kūö ngam manööyö in lamöktö in ngam Tēv öi teūngen tö maheuṅkköre, öthō inrē angū-ö nö miṙivngölōn hī.’ (Rōm. 5:4, 5) Ōt yip hol hī tö pingangkūö nö hang ngih ṙô. Kūö yòh? Pön urěhngöre ṙô ang Pôl nö vë-eny nang yik Kristīön, mī-iyöng Rōm tö cha nö maheuṅkku, “ṙamölōn im mineūkkö kanòlô ngam Tēv.” Ngö ṙô lohten yip tahëng, ‘Yěn ha-eten aṅ in yik Kristīön tö maheuṅkköre, ngaich kūö yòh ang Pôl nö unôichngöre nö vënyen e?’

16. Sitih inlahen sanīöpö öng ngam maheuṅkkö hī irò-òten ngam ṙētak? (Ngëichkö ngam nyat.)

¹⁶ Yē hī öi chumkūöṙen tö inlahenre im inngönkö ngam maheuṅkköre ngaich akah elnang min ayī-ö tö ngam ṙô Pôl. Tö sā ngih: Köpölōn öm tök raneh van re öm vënyu nang tö inlahen ngam maheuṅkköre imat ngam Paipöl, sitih mufē öm hē e? Ngö ṙô lōn sin më-eṅ lohten ik hē e tö inlahen hī iyöngkūö öp Peretāis, nöng mufē hī angū-ö rö-ö nö tö teung. Ik sā meh pöri öm haköp minë kinlēḵngô Yāvē hēk mikahtökūöre inrē tö ò, ngaich lökten in e nö ṙūöhölre ngam ṙinātö-ellōn meh tö minë maheuṅkkö meh min nö öthō nö öt teung.

17. Sitih inlahen öng hēk nö sīöplöre ngam maheuṅkkö hī unôichrit hī öi kē ngam vinôkö?

¹⁷ Rūöhlöre hēk ngam mikahkūö meh hēk ngam hanāngenlōn meh inrē tö Yāvē unôichrit meh öm kētöre hēk kē ngam vinôkö inrē, lohten nö ngönlöre hēk ngam maheuṅkkö meh nö löktö in e. (Hep. 5:13–6:1) Lohten man öm akahaiṙen töre öm asīnkö ṙô ngam Rōma 5:2-4. Tö meh öm la-al minë tö ṙōlkangen kanihngen öm holtö manööyöre hēk akahaiṙen inrē më-eṅ tö Yāvē nö ṙamlōn nö in meh. Akahakūö man tö ò nö tö hangenlōn tö meh hēk ṙamölōn inrē nö in meh, lökten ngaich öm ṙūöhlöre ṙinātö-ellōn tö ò min nö öt löktu nö öt hateungngö minë kinlēḵngôre. Ngam taneūngen meh maheuṅkkö meh ik lā urěh hēk angū-ö nö ngönlöre. Öt ngöṙô lōn më-eṅ tö e nöng sanehkūö nö öt tö teung min, pöm ṙatö-ellōnre tö e nö tökô-en hēk lökngöre ngaich ngam tinrīken meh tökūö e. Lökten nö haṙī-ingre minë tinrīken meh, el ngam mikūönö meh, minë atöllö meh inrē, hěnghöre ngam inlahen meh inrē öm kēnyö ṙētak re.

18. Asūp kerentī kahëtö Yāvē nö in hī?

¹⁸ Hěng ön inrē ngam töt ṙanāngen inlahen ngam maheuṅkkö hī unôichrit ṙô Pôl nö vënyen hī öi tö hō-ov töm Tēv. Tö ngam maheuṅkkö hī nö öthō nö öt teung. Kūö yòh pöri ayī-ö öi hòṅ ṙātö-ellōnre tö e? Löktö in ngam Tēv anga-aṅ nö kētö kerentī (guarantee) yip Kristīön: “Öt sumrōngngökūö an ngam mineūka; pò ngam hanāngenlōn ngam Tēv nö ngaich nö pirāti nö ellōn hī, lökten im Töhet Fanöinylö, ngam tö kētu nö in hī.” (Rōm. 5:5) Lökten man mihôiṅ öm ṙātö-ellōnre töm kahëtö Yāvē maheuṅkkö meh nö öt löktu min nö öt teung.

19. Asūp mihôiṅ ṙinātö-ellōn meh im maheuṅkkö meh?

¹⁹ Töi fēken Aprahām hēk, öi fēkö ngam kilēḵngô Yāvē nö in ò, Kaheūkö ò inrē anga-aṅ nö holre. Ngam maheuṅkkö Aprahām kinë-ekūö ò, hö-ö angū-ö nö töng vīka nö ṙô. Kūichi ön nö imat Paipöl: “Ngatī, pītnyöre nö i manöiyö, teūngen ngaich anga-aṅ tö ngam kinlēḵngô.” (Hep. 6:15; 11:9, 18; Rōm. 4:20-22) Öt haṙivlōn ang Aprahām kūö ngam maheuṅkkö ò nö teung. Öthō min më-eṅ öm haṙivlōn yē meh asīnken Aprahām öm chiplö in Yāvē. Hö-ö ön ngam maheuṅkkö meh nöng sanehkūö pön tö hòṅ teung min, löktö in e më-eṅ öm teūngen töm ṙanamlōnre. (Rōm. 12:12) Ngö ṙô tī ang Pôl nö kūich: “Ngam Tēv mineūka an yēḵ, mahatööḵngen yīö tö ṙanāmölōn, kumchikṙen inrē, im ṙinātö ellōn: hòṅ yīö ṙuhölre im mineūka, lökten i minhôiṅyö ngam Töhet Fanöinylö.”—Rōm. 15:13.