Iṙūöhen Asīöp Ngam Ṙinātö-ellōnre In Ngam Söngkötön Yāvē

1. Sitih inlahen yik misī tarik ngam Tēv ik raneh senchurī nö vaiyö inlahen nö kēken minë la-en?

YĔN KĒ-ĔKŪÖ më tarikre ang Yāvē tö minë la-en, ngaich lōnu anga-aṅ tö cha nö vaiyö inlahen nö kēken minë re hēk chumkūöṙen inrē. (1 Kòr. 14:33) Tö sā ngam kuilōn ngam Tēv tö ngam tölöök inhānga nö keūheutngöre chūök nö ing panam. (Mët. 24:14) Kē-ěkūö Yēsū ang Yāvē tö ngih la-en. Ngaich chumkūöṙen ang Yēsū tö ngih la-en nö vaiyö inlahen kinë-ken. Ik raneh senchurī, ök tö hěng manūlö yik tanīnöṙô aṅ Yerūsalem hēk tö yik minṙöinylen nö kamë minë töt ṙanāngen fësla. Ngaich asölten minë tö ngatī fësla cha-a nö el minë māṅ. (Inl. 15:2; 16:4) Vënyen minë fësla më minṙöinylen, më tö halēnlöng nö el minë māṅ nö in më holmaneukre hēk löktö in u inrē nö halēnö cha. (Inl. 14:23) Hō-en minë ṙô cha më prötör sistör lökten nö, ‘ngönlöre ngam ṙinātö-ellōn minë māṅ hēk kaheuk sakāmö cha-a nö ṙūöhölre ṙôken.’—Inl. 16:5.

2. Sitih inlahen ang Yāvē nö hachōkūö më tarikre nö löktökūö ik 1919 hēk halēnlö minë nyā-aṅkūö cha inrē?

² Chumkūöṙen ang Yāvē töngamuh tö inlahen më tarikre nö hòṅ lēnö inlahen nö kēken minë la-enre. Halēnlö më tö kun kiteūm ang Yēsū ik 1919 më tö hachāmö elkui Kristīön, më tölöngö tī töngamuh nö hachōkūö ngam la-en inhānga hēk löngö ṙētak tī inrē nö halēnlö minë nyā-aṅkūö minë ṙô ngam Tēv.a (Lūk. 12:42) Kô-en ang Yāvē nö kētö inkòlô minë la-en cha.—Isa. 60:22; 65:13, 14.

3-4. (a) Asuh nup mihôiṅ yanöölen hī yēḵ hī lēnlen tī kēken minë la-enre. Hachōḵelmat hī. (b) Asuh nup min kahakkö hī in ngih ātiköl?

³ Heuveū-en min ayī-ö la-evṙen töm la-en kinë-ekūöre tö Yēsū ngam inhangkö ngam tölöök inhānga yēḵ e nö lēnlen. (Mët. 28:19, 20) Yēḵ hī öreh öi öt kētu kamngö chūök öi ahangköm tölöök inhānga, ngaich mihôiṅ ayī-ö höng in öp töng lōnre chūökre ahānga. Sitih inlahen min angū-ö? Lohten min nö rīkre nup kamngö chūök töng ṙā-ai tö hī kūö hī höng ṙōlvan öi ahānga ip töng hěng kamngö. Kô-en ayī-ö yöölen yěn lēnlen kinëken minë la-en. Mihôiṅ öm fēkö nup tahëng inrē tö mihôiṅ nö yöölen tī tö meh?

⁴ Haruntö më haköptöre misī ang Yēsū nö lēnlen tī nö kēken minë la-enre hēk ngatī töngamuh ngam söngkötön Yāvē nö lēnngentī nö kēken minë la-en. In ngih ātiköl in min mikahtökūöre, tö ngam söngkötön Yāvē nö sā nuk la-en Yēsū misī, ngaich ngatī inlahen töngamuh angū-ö nö la-evṙen. Ngamuh inrē min kahakkö hī, tö hī sitih inlahen hameuktöre ṙātö-ellōnre in ngam söngkötön Yāvē.

SĀ INLAHEN NUK LA-EN YĒSŪ AN NGAM SÖNGKÖTÖN HI INRĒ NÖ LA-EVṘEN

5. Asuh öp la-en ngam söngkötön Yāvē töngamuh nö asīnken Yēsū? (Yôhan 8:28)

⁵ Pōyen haköplö ang Yēsū nö in ngam yöngre Yāvē in nup inlahen ò hēk nup ṙô ò inrē. Ngatī inlahen töngamuh ngam söngkötön Yāvē nö haköpten hī hēk hachōḵkūö hī nö löktö in ngam ṙô ngam Tēv ngam Paipöl. (Vë-evkūö Yôhan 8:28; 2 Tim. 3:16, 17) Ṙūöhlöng alaha inrē ayī-ö haköp ngam ṙô ngam Tēv hēk asīnken u inrē. Asuh min öp yanöölen hī yěi ngatī inlahen?

6. Asuh nup min yanöölen hī yěi chumkūöṙen haköp mat ngam Paipöl?

⁶ Kirööngen taneūngen ayī-ö tö yanöölenre yěi haköp mat ngam Paipöl hēk tö minë tahëng līpöre inrē lamökngörit in e. Tö sā hī teūngen tö inchōḵ-okūöre löktö in ngam söngkötön Yāvē hēk teūngen tö inlēnöre. Ngaich lökten in e mikahkūö min ayī-ö tö minë inchōḵ-okūöre nöng lamöktö in ngam Paipöl. Hēk ṙūöhölre inrē min ngam ṙinātö-ellōn hī in ngam söngkötön Yāvē.—Rōm. 12:2.

7. Asuh ök misī ahangkö Yēsū hēk asuh töngamuh nup la-en më tarik Yāvē el ngam söngkötön ò?

⁷ Ahangkö ngam “Pūlngö ngam Tēv” ök inrē Yēsū misī.” (Lūk. 4:43, 44) Kē-ěkūö yik haköptöre inrē anga-aṅ tö cha nö ahangkö ngam Pūlngö. (Lūk. 9:1, 2; 10:8, 9) Ngatī inlahen töngamuh më tarik el ngam söngkötön Yāvē nö ahangkö ngam Pūlngö pòrô öp töng yòh kamngö cha hēk öp töng yòh inrē kinë-ekūö chal la-en.

8. Asuh öp minlēḵen kinë-ekūö hī?

⁸ Tökiröng angū-ö nö minlēḵken hī, kūö hī vë-eny nang yip tarik tö inlahen ngam Pūlngö ngam Tēv! Öt ṙòkhöre in öi kē-ěvkūö tö e angū-ö la-en. Ik sā Yēsū misī nö ing panam, ngaich öt halöngten yik tötlöök ma-ahānga anga-aṅ nö ahangkö inlahen ò. (Lūk. 4:41) Ngatī inlahen töngamuh yip tö hòṅ lōnu nö in yip tarik Yāvē nö ahangkö tölöök inhānga, ngaich urěh cha-a nö hòṅ asīnkö ngam kuilōn ngam Tēv. Sitih inlahen öi mihôiṅ hameuktö minlēḵṙenre tö ngam la-enre tö kētu? Öp töng yòh kamngö chūök hī hēk ṙētak hī öi vë-eny nang yip tarik tö ngam tölöök inhānga. Lōnu in ayī-ö töre öi sā inlahen Yēsū öi teūichtö ngam kulöl ellōn më tarik hēk hòṅ rös röön e inrē.—Mët. 13:3, 23; 1 Kòr. 3:6.

9. Sitih inlahen ngam söngkötön Yāvē nö vënyö ngam minë-eny ò nö i taṙòkhöre tarik?

⁹ Mikahtökūö yik tarik ang Yēsū tö minë-eny ngam Tēv. Ngö ṙô anga-aṅ ik sā ò nö vë-ekūö ngam yöngre: “Mikahtölōn cha Chin ngaich, tö ngam Minënyö Meh.” (Yôh. 17:26) Ma-āinyre ön töngamuh inrē ngam söngkötön Yāvē nö asīnken Yēsū nö mikahtökūö taṙòkhöre tarik tö ngam minë-eny ngam Tēv. Tö sā inlahen ngam minë-eny Yāvē nö havantu nö i mat ngam Tufömngöre Panam Translēsön Paipöl. Pōyen tö tö 270 ëlô ön in ngam Tufömngöre Panam Translēsön Paipöl hēk inup tahëng inrē hol e līpöre. Vënyu inlahen ngam minë-eny Yāvē nö kūö yòh nö havantu chūök nö in nuk chūökre urěh nö in ngam Tahëng Ātiköl A4 hēk A5. Vënyu inlahen inrē angū-ö nö in ngam Tahëng Ātiköl C nö in ngam Paipöl Ingki, nö kūö yòh nö chaphötvö ngam minë-eny ngam Tēv ngam tö 237 ṙôken nö imat ngam Krīk Paipöl.

10. Asuh öp haköplö meh öm in ngò yöngnyīö aṅ Miānmār?

¹⁰ Lōnu in inrē ayī-ö töre ṙūöhlö inlahenre öi vë-eny nang më tarik tö ngam minë-eny ngam Tēv. Sā inlahen ök i yöngnyīö aṅ Miānmār tö 67 samyeūheu ik sā ò nö hang mine-eny ngam Yāvē, meutnyī mak mat anga-aṅ lökten ngaich anga-aṅ nö ngö ṙô, “Tö möl takô chū-ö öich hang mine-eny ngam Tēv Yāvē. . . . Kô-en më-eṅ öm haköpten chu tö ngam tötṙanāngen nö hakööpö tö chu.” Löktö in ngih ekspirīön in akahkūö tö inlahen vë hamòltö ellōnre tarik nö hang mine-eny ngam Tēv, ngaich kô-en cha-a nö lökngöre.

HÒṄ ÖRHEŪHEU IN HAYÖNGLENRE IN NGAM SÖNGKÖTÖN

11. Sitih inlahen aich mihôiṅ më minṙöinylen nö hameuktöre nö ṙātö-ellōnre nö in ngam söngkötön Yāvē? (Ngëichkö ngam nyat.)

¹¹ Sitih inlahen öich mihôiṅ më minṙöinylen nö hameuktö ngam ṙinātö-ellōnre nö in ngam söngkötön Yāvē? Hěng ön ngam inlahen cha, yěn teūngen cha-a tö minë inlēnöre. Ngaich hòṅ chumkūöṙen cha-a nö vë-ekūö u hēk ma-āinyre inrē nö asīnken u nö la-evṙen. Tö sā ngam inchōḵ elmat, yěn vënyu nang më minṙöinylen tö inlahenre nö kēken minë mīting nö sitih inlahen nö kētö minë part re hēk sitih inlahen inrē nö kēken ngam vinë-ekūötēv, hěnghöre vënyu nang inrē cha-a tö inlahenre nö sitih inlahen nö hakūöken minë sīṅp Kristū. Yēḵ ngòh minṙöinylen nö hō-en minë inlēnö lamöktö el ngam söngkötön, ngaich löktö in e min më holmaneuk hī nö akahaiṙen töm hanangenlōn Yāvē tö cha hēk akahaiṙen inrē töre nö öt fehnguṙen.

12. (a) Kūö yòh öi hòṅ holṙen më mahayōmken re? (Heprāi 13:7, 17) (b) Kūö yòh öi hòṅ chumkūöṙen ngëichkö nup tövai tinrīken më mahayōmken hī?

¹² Yēḵ hī öi kētu inlēnö tö më minṙöinylen, ngaich hòṅ holtö ṙanamlōnre ayī-ö öi hō-en u. Yēḵ hī min ngatī inlahen, ngaich heuveū-en min ayī-ö in nup kinë-ekūöre la-en hēk teungten inrē öi kēken u. Ngö ṙô an ngam Paipöl nö vë-eny nang hī yěn ōt më mahayōmken hī ngaich hòṅ hang chööngö cha hēk tumṙeūtöre inrē tö cha. (Vë-evkūö Heprāi 13:7, 17.) Hēṙu pöri ayī-ö öi kihngen hō-en minë ṙô cha. Kūö yòh? Kūö cha nö tö sā hī nö tö vanaichköreṙen. Yēḵ hī min öi höng ngëichkö minë vanāichö cha, ngaich kihngen min ayī-ö hang minë ṙô cha. Sā ṙēngen mahayööken öp tökunyaha elmat min ayī-ö. Öi sitih inlahen? Yēḵ hī min höng tanta mat öi höng ngëichkö vanaichö më minṙöinylen, ngaich mihôiṅ min ayī-ö ötlöngö mufē öi in ngam söngkötön Yāvē hēk hireūtngöre inrē min ngam ṙinātö-ellōn hī im söngktön ngam Tēv nö kūönngöre. Angū-ö an lōn ngam tökunyaha elmat nö in hī. Sitih inlahen pöri ayī-ö öi akahakūö tö minë tinngöp tī ngam tökunyaha elmat hēk sitih inlahen inrē öi sō-en minë tökô-en ṙô?

UM HALÖNGNGEN NGAM ṘINĀTÖ-ELLŌNRE NÖ KŪÖNNGÖRE

13. Sitih inlahen öich më tökunyaha elmat tö hī nö hachōichngö minë-eny ngam söngkötön hī?

¹³ Minë tölöng ṙô ngam söngkötön hī, vī ngen u më tö kunyaha elmat tö hī nö tövaich. Vënyu nang in tö ngam Paipöl tö Yāvē nö maheūkku nö in më tarikre tö cha nö hòṅ hëten, ha-et ngam tinrīkenre hēk sā nup tö hō-ov tö Yāvē ngaich ngatī inlahen öi ha-öinyö ò. Vënyu nang inrē ayī-ö tö ngam Paipöl tö ngò tarik tötlöökö la-en hēk öt mahalööktitre inrē, ha-uknyu min anga-aṅ nö ṙā-ang el ngam māṅ. (1 Kòr. 5:11-13; 6:9, 10) Ṙātö-ellōnre in öi in minë ṙô ngam Paipöl. Lökten mihôiṅ më tö kunyaha elmat nö vīlö fālen hī öi töng vaichö mufē tö inlahen yip holre hēk töt hangenlōn inrē tö holre.

14. Achīö takô öp samūöichkö inlahen ngam söngkötön hī?

¹⁴ Hòṅ Akahakūö man tö ngam tökô-en lā-alre. Ṙōlkangen nun minë tö minyôiny ṙô ngam Satān. Vënyu anga-aṅ nö imat ngam Paipöl nö ‘yöng tö minyôiny-aṅ.’ (Yôh. 8:44; Ran. 3:1-5) Lökten ayī-ö öt pingangkūö tö ngam Satān yěn löktö in më tarikre tī nö sūöchkö inlahen ngam söngkötön Yāvē hēk vīlö fālen e inrē. Pön ngatī inlahen misī anga-aṅ nö in nuk raneh senchurī.

15. Sitih inlahen öich më yōm tinlööken nö sūöchkö inlahen Yēsū hēk tö më mahaköp inrē?

¹⁵ Ik raneh senchurī ngam Satān nö löktö in yik tarikre tī nö sūöichkö inlahen ngam kūön ngam Tēv. Töhet ök misī Yēsū ngaich löktö in ngam kumlēḵ ngam Tēv anga-aṅ nö hameuktö minë tökiröng pinngangkūö. Vīlö fālen ò pöri më yōm tinlööken tö ò nö maha-ōngö më sī-ö nö löktö in ngam ‘mākūö më tötlöök ma-ahānga.’ (Māk. 3:22) Ik sā Yēsū nö kahòkkaṙen, ngaich më yōm tinlööken nö sūöchkö inlahen ò nö ötlēkö minë-eny ngam Tēv hēk vīhöt ellōn më tömaṙôngö inrē cha-a nö hòṅ fëlngen Yēsū. (Mët. 27:20) Unôichrit e hēk më mahaköp nö in Yēsū nö ahangkö ngam tölöök inhānga, ngaich yik tökunyaha elmat nö ‘vīlö ellōn yik tahëng mihëṅṙö tarik nö kunyaha elmat tö yik Kristīön’ hòṅ cha nö ötlēken cha. (Inl. 14:2, 19) Vënyu inlahen inrē angū-ö nö in ngam Chūökamahati 1 Tisempör 1998, ‘tö më Yahūti tökunyaha elmat nö sō-en ngam inhānga rö-ö nöng angū-ö pön vīlö ellōn më tahëng mihëṅṙö inrē cha-a nö ötlēken më Kristīön.’

16. Hòṅ asuh öp kanöpölōn hī yěi hang sinūöchkö inlahen yip prötör re hēk ngam tö söngkötön inrē?

¹⁶ Keuheūtngöre chūök an ngam minyôiny-aṅ ngam Satān töngamuh. Ngö kinūichngö angū-ö nö imat ngam Paipöl tö ò nö ‘mahachīl në taṙòkhöre panam.’ (Inm. 12:9) Lökten yē meh hang nup ötlinëkö elnang më prötör mahayōmken minë māṅ hēk ngam söngkötön inrē, ngaich hòṅ köpölōn më-eṅ tö inlahen ök raneh senchurī, ik sā yik tökunyaha elmat tö Yēsū hēk tö yik haköptö ò nö sūöchkö inlahen cha. Ha-ehangen vinënyi angū-ö nö imat ngam Paipöl, tö më tarik Yāvē min nö hakihtuṙen hēk ṙōlkangen inrē min minë sinūöchkö inlahen cha. (Mët. 5:11, 12) Yēḵ hī öt lōnu töre lō-ongkūö in minë tö minyôiny istori hēk minë ṙô ngaich hòṅ köpölōn ayī-ö tö ngam tökô-en lā-alre. Öi hòṅ sitih inlahen?

17. Yěi öt lōnu töre öi halō-oikūö tö minë töminyôiny istori, ngaich hòṅ sitih inlahen ayī-ö? (2 Timôtī 1:13) (Ngëichkö ngam pòks ngam tö ngö kui “Sitih Inlahen Öi Min Yěi Hang Minë Töminyôiny Istori.”)

¹⁷ Ui hang minë töminyôiny istori. Ngö ṙô ang Pôl yēḵ hī hang minë töminyôiny istori, ngaich hòṅ asuh öp inlahen hī. Tölṙô Timòtī anga-aṅ nö ‘kētö chööngö nö in yik tarik nö un . . . chumkūöṙen nö hangihtöre tö minë töminyôiny istori’ hēk ‘sō-en nup tötlöng inchōḵoṙô sinūöchkö inlahen ngam Tēv.’ (1 Tim. 1:3, 4; 4:7) Töi ngëichkö ngih inchōḵelmat. Yěi ngëichken vē kun nyīö ṙung nö öt aṅhavin tö ngam mikah, lökten cha-a yěn meuk nup el tumlat tö suktöre ngaich kē-ě u, ngaich chaphöt u nö elvang re. Öt ngatī inlahen pöri ngòh tö akaha elmat tarik, pön akahakūö min tö e nö mihôiṅ nö palaiṙen tī tö ò. Akahakūö in ayī-ö inrē tö ngam töminyôiny inköphötī nö palaiṙen tī tö hī, akahakūö inrē ayī-ö töp tö tī-ivö tö u lökten öi sō-en u, haköpkö ngam tölöök inköphötī pöri ayī-ö.—Vë-evkūö 2 Timôtī 1:13.

18. Sitih inlahen öi ayī-ö hameuktöre ṙātö-ellōnre in ngam söngkötön Yāvē?

¹⁸ Lūöi nun taheui minë haköp hī in ngih ātiköl nö sitih inlahen ngam söngkötön hī nö asīnken Yēsū nö la-evṙen. Hòṅ chumkūöṙen ayī-ö yěi vë-ekūö minë aṅ mat ngam Paipöl. Rö-ö nöng angū-ö pöi hòṅ kē inyöökenre inrē in më prötör sistör hēk hòṅ ṙūöhlö ngam ṙinātö-ellōnre cha inrē nö in ngam söngkötön Yāvē. Haköpngöre öm in Yāvē hēk holṙen ngam söngkötön ò inrē. Yēḵ meh min ngatī inlahen, ngaich hameuktöre min më-eṅ kirööngen ṙinātö-ellōn in ngam söngkötön Yāvē, ngam löktö tī ò töngamuh nö hateungngö ngam kuilōnre. (Sal. 37:28) Ta-a chěi töi örheūheu ha-öiny tī Yāvē pò ò nö kētö ṙētak hī in më tarik ò öi holṙen cha nö ha-öinyö ò më tö hangenlōn tö ò hēk tö chiplö inrē nö i linökö lōn ò.