Sitih Mat Ök Misī Yēsū Tö Ngam Minë-eny Yāvē?

1-2. (a) Asuh ök la-en Yēsū urēhěkūö ò nö kapah? (b) Asuh nup min i intöönö tö ngëichka sanapṙô nö in ngih ātiköl?

IK 33 C.E. Nisan 14 ang Yēsū nö holkūö yik tö chiplö tanīnöṙô nö nyā ngam töhet inmūlkūö ik Thursday tö hatööm. Akahakūö hē e ang Yēsū tö ranöhten ngam inlahen ò min nö hachīlö ngaich kē-ěyö, kahôkkaṙen inrē hēk hachöknyu nômö nö kētu sācha. Töp lökten ò nö hangönken yik haköptöre. Urēhěkūö ò nö kiröönngöre nö ṙāngö yik haköptöre ngaich mā-angṙô re anga-aṅ nö vë-ekūötēv nö in cha. Unôichngöre ngaich ang tanīnöṙô Yôhan nö kūichhöt e nö in ngam līpöre tölöök inhānga ngam haköp hī ṙūng līpöre Yôhan 17 mirūlö.

² Asuh ök hē e pinṙūtölōn Yēsū urēhěkūö ò nö kapah? Ngaich ik sa ò nö ing panam ngaich asuh hē e öp tömötlö inlahen ò? In ngih ātiköl in min öi chumkūöṙen tö ngam ṙô Yēsū nö vë-ekūötēv hēk mikahtökūöre min ayī-ö tö sanapṙô në intöönö.

“VË-ENY NANG CHA CHIN TÖ NGAM MINË-ENY MEH”

3. Asuh ök ṙô Yēsū nö vë-ekūötēv, ngaich asuh öp manah e? (Yôhan 17:6, 26)

³ Ngö ṙô ang Yēsū nö vë-ekūötēv, “vë-eny nang cha chin tö ngam minë-eny meh.” Nëtheuh ṙô anga-aṅ nö vë-enyre tö ò nö vë-eny nang më haköptöre tö ngam minë-eny Yāvē. (Vë-evkūö Yôhan 17:6, 26.) Tö sitih manah pöri ngam ṙô ò? Öt akahakūö hòng misī yik haköptö ò tö ngam minë-eny ngam Tēv? Yahūti yik misī haköptö Yēsū, ngaich akahakūö inrē cha-a tö minë-eny ngam Tēv nö Yāvē. Kööṅnyu ṙôken vinënyi inrē ngam minë-eny Yāvē nö imat ngam līpöre Hiprū. Lökten ik sa Yēsū nö ngöṙô, “vë-eny nang cha chin tö ngam minë-eny meh,” tö ngö manah ngam ṙô ò tö ò ngaich nö haköpten cha tö inlahen Yāvē nö tö sitih inlahen nö Tēv hēk asuh inrē nup tinrīken ò, sitih mufē inrē anga-aṅ tö inlahen ngih panam hēk tö hī öi tarīk hēk sitih inlahen tī anga-aṅ töngamuh nö hayööken hī, hēk inup yamih min ṙētak. Höng Yēsū an tö mihôiṅ tökô nö vë-eny inlahen Yāvē, pò ò nöng anga-aṅ tökeuheūtlöre mikahkūö tö inlahen Yāvē. Ngaich asuh inrē öp manah e?

4-5. (a) Kētö öp töhěng inchōḵ elmat, nö sitih inlahen nö haṙī-ingre ngam manah ngam minë-eny ngòh tarik yěi mikahtökūöre tö ò? (b) Sitih inlahen ngaich nö harikngöre ngam manah ngam minë-eny Yāvē nö in yik haköptö Yēsū?

⁴ Asehkūöre man, hěng tak ngam minṙöinylen tö Tēvit minënyi nö el ngam māṅ meh, tòktör inrē anga-aṅ. Tö urěhten mikahkūö më-eṅ tö ò. Hěngheuh ngaich më-eṅ faltöre invah, ngaich hòṅ chuh el ngam āṅspu më-eṅ ngam chūök ngam minṙöinylen nö la-evṙen. Anga-aṅ lame-ënö meh hēk lamaklö ngam nômö meh inrē. Asuh öp min yamih nö elkuilōn meh, yēḵ meh hang ngam minë-eny Tēvit? Öt ngöṙô lōn më-eṅ tö ò nöng minṙönylen nö el ngam māṅ meh, pöm afēkö inlahen ò min inrē nö tòktör hēk lamaklö ngam nômö meh inrē.

⁵ Ngatī inlahen yin më haköptö Yēsū, nö akahakūö cha-a tö minë-eny ngam Tēv. Ik sa Yēsū pöri nö yih nö ing panam nö la-evṙen, ngaich haṙī-ingre ngam manah ngam minë-eny Yāvē nö in yik haköptö ò. Nö sitih inlahen? Kôta mat cha-a nö meūkö Yēsū nöng sā inlahen ngam Yöngre. Nup töng ṙô ò hēk inlahen ò, in e yik mahaköp nö akaha elmat tö inlahen tinrīken ngam Yöng ò Yāvē. Kūö cha nö hang minë inköphötī ṙô Yēsū hēk tinrīken ò inrēken ò inrē yik mahaköpt nö akahakūö takô tö Yāvē.—Yôh. 14:9; 17:3.

“NUP TÖNG KAHËTÖ MEH IN CHU I MINË-ENY RE”

6. Ik sa Yēsū nö ngö ṙô tö Yāvē nö kētö ngam minë-enyre nö in ò, ngaich asuh hē e ngam manah ngam ṙô ò? (Yôhan 17:11, 12)

⁶ Ngöṙô ang Yēsū nö vë-elkui yik haköptöre nö in ngam yöngre, “nup töng kahëtö meh in chu i minë-enyre meukṙen cha man yē hòṅ cha nö hěng.” (Vë-evkūö Yôhan 17:11, 12.) Ik sa Yēsū nö vënyen Yāvē tö ò nö ‘kētö ngam minë-enyre nö in ò,’ ngaich tö ngö manah hòng angu-ö tö ngam minë-eny ò min nö harīkiyö ngaich kaheūkö hòng anga-aṅ nö Yāvē? Hö-ö. Chumkūöṙen tö ngam ṙô Yēsū nö hōten ngam Yöngre nö chö-öiny tö ngam minë-enyre nö ngatī inlahen. Lökten in e mikahkūö ayī-ö tö ngam minë-eny Yēsū nö öt harīkiyö nö Yāvē. Tö sitih manah pöri ngam ṙô Yēsū nö ngöṙô, ‘kētö ngam minë-enyre in chu’? Lumnökngen Yāvē an misī Yēsū hēk ṙamônyö nup ṙô ò inrē. Yih anga-aṅ hē e nö i minë-eny ngam Yöngre ngaich i minë-eny ò inrē anga-aṅ nö la-evṙen tö nuk tökiröng pinngangkūö. (Yôh. 5:43; 10:25) Vënyu manah an inrē ngam minë-eny Yēsū, “Yāvē an mahayööken hī” tö ngö manah nö ōt inrē ngam minë-eny Yāvē nö i minë-eny ò. Lökten anga-aṅ hē e nö ngö ṙô tö ngam Yöng ò nö kētö ngam minë-enyre nö in ò.

7. Kūö yòh öi mihôiṅ ngö ṙô tö Yēsū nö ṙônyö ṙô ngam yöngre? Kētö inchōḵ elmat.

⁷ Sā ngam empesitör (ambassador) nö lumnökngen nö i minë-eny ngam presiten. I minë-eny ò nö yih, lumnökngen ò nö ṙò-òv. Yěn ṙò-òv anga-aṅ tö nup ṙô re, ngaich höng ṙahônyö ngam prēsiten anū-ö. Ngatī ṙēngen ang Yēsū nö lumnökngen Yāvē misī, i minë-eny ò misī anga-aṅ nö yih. Lökten nuk ṙô ò misī nöng ṙahônyö ngam yöng ò Yāvē.—Mët. 21:9; Lūk. 13:35.

8. Sitih inlahen mat misī ang Yēsū tö ngam minë-eny Yāvē urēhěkūö yanīhi ò nö ing panam? (Maneutnyi 23:20, 21)

⁸ Kaheūkö ang Yēsū nö Ṙô, pò ò misī nö vamëyö nuk ṙô Yāvē hēk nuk chööngö ò inrē nö in yik tarik hēk tö yik ma-ahānga. (Yôh. 1:1-3) In e mikahkūö ayī-ö töm ma-ahānga nöng Yēsū anga-aṅ ngam tö tīntu tö Yāvē nö laklen yik Israel ik sā cha nö el tönyalnyi hēk hachōkūö cha inrē. Tölṙô yik Israel misī ang Yāvē nö hang chööngö ngòh ma-ahānga. Kūö yòh? Ngö ṙô ang Yāvē, ‘I minë-eny chu öp min nö chuh in yīö.’a (Vë-evkūö Maneutnyi 23:20, 21.) Löktö in e ayī-ö akahakūö tö Yēsū nö ‘i minë-eny Yāvē,’ tö ngö manah tö ò nö lumnökngen ò nö ṙò-òv, ngaich anga-aṅ inrē töt insā-av inlahen nö maha-etlö minë-eny Yāvē hēk hameuknyen minë sinūichkö fālen ò inrē nö töng minyôny.

“KAYÖÖNGÖ HAKÒLÔ NGAM MINË-ENYRE MAN”

9. Mikahtö elmat hī tö inlahen Yēsū nö sitih inlahen nö mööḵlö mat tö ngam minë-eny Yāvē.

⁹ Yěi ngëichkö inlahen Yēsū urēhěkūö ò nö yih nö ing panam, ngaich mööḵlö mat anga-aṅ tö ngam minënyö Yāvē. Pòrò ik sā ò inrē misī nö ing panam, sön anga-aṅ nö mööḵlö mat tö ngam minë-eny Yāvē. Yěn la-evṙen anga-aṅ tö nup la-enre ngaich höng chö-öinytö ngam minë-eny Yāvē. Ngöṙô anga-aṅ ik manā-aṅ inlahenre nö la-evṙen nö ing panam: “Kayööngö hakòlô ngam minë-enyre man.” Hangö ngaich ök ṙô Yāvē lamöktö el halīöngö nö ngö ṙô: “Ngaich chin hakòlô e, hēk min inrē öich hakòlô e.”—Yôh. 12:28.

10-11. (a) Sitih inlahen ang Yēsū nö harōilö minë-eny Yāvē? (Ngëichkö ngam nyat.) (b) Kūö yòh öng nö töt ṙanāngen ngam inlahen hī öi ha-etlö minë-eny Yāvē?

¹⁰ Harōilö ngam minë-eny ngam Yöngre ök misī Yēsū inrē. Nö sitih inlahen? Vë-eny nang yik tarik anga-aṅ tö Yāvē nö tö akaha nö Tēv hēk vënyö nuk tö pōyen inrē pinngangkūö la-en ò nö chö-önyten hī öi tarik. Töt ṙanāngen pöri inrē misī ngam inhetlö ngam minë-eny Yāvē yěi hòṅ harōilen e. Höng lökten im inruntö hī in öi vë-ekūötēv öi akahakūö tö ngam ṙôken ngam minlēḵṙen Yēsū tö ngam minë-eny ngam yöngre. Ngam haruntö ò misī nö in yik haköptö ò, ngö ṙô anga-aṅ misī, “Kayöngö, Yöng ih aṅ el halīöngö, hetlö an yēḵ ngam minënyö meh.”—Mët. 6:9.

¹¹ Kūö yòh öng nö tötṙanāngen ngam minënyö Yāvē nö hòṅ ha-etlöng? Kūö e misī nö töhachōchi tö ngam Satān nö el ök panò-òṅ Ēten hēk sūöchka fālen inrē. Vënyen Yāvē anga-aṅ misī nö tö minyôny-aṅ hēk ṙūöhngen nā Atöm nā Ēva inrē tö minë tövai chehen. (Ran. 3:1-5) Ngö ṙô inrē anga-aṅ tö Yāvē nöng töng öt heuveū nö hayöng. Ngatī inlahen anga-aṅ nö hachōchngö minë-eny ngam Tēv. Unôichngöre hēk anga-aṅ in nuk sakāmö Yōp nö vënyen më tarik nö töng lōntöre hēk höng kūö nup kuilōnre inrē nö löklōn Yāvē. Ngö ṙô inrē anga-aṅ tö hī tarik, öi töng öt hangenlōn tö Yāvē, yē hī min öi yīhivö tö nup kanihngenre ngaich ṙāngenre min ayī-ö öi löklōn Yāvē. (Yōp 1:9-11; 2:4) Tökiröng ön angū-ö hē e ngih nö sinūöchlö inlahen Yāvē, marò-òten lohten ayī-ö yěi hòṅ vënyen öp tölöngö ṙô nö in cha yěn Yāvē hēk yěn ngam Satān.

“PÒ CHU ÖICH KĒNGÖ NÔMÖRE”

12. Asuh ök misī inlahen Yēsū kūö ò nö hangenlōn takô tö ngam minënyö ngam yöngre?

¹² Kiröngen hanangenlōn ang Yēsū töm Yöngre lökten ò misī nö lōnu töre nö örheūheu nö ha-etlö ngam minënyö ò. Nö sitih inlahen? Ngö ṙô anga-aṅ, “pò chu öich kēngö nômöre.” (Yôh. 10:17, 18) Kūö ngam kūöre anga-aṅ nö hōḵ nö kapah.b Töhet misī nā Ātöm nā Ēva, ṙāngen Yāvē pöri cha-a, ngaich vī-ingre nö hamòlṙen ngam Satān. Hö-ö pöri ang Yēsū nö ngatī pön hangenlōn takô anga-aṅ tö ngam Yöngre, lökten ò nö holtö ṙanamlōnre nö yih nö ing panam, ngaich örheūheu nö hang chööngö Yāvē. (Hep. 4:15; 5:7-10) Chiplö anga-aṅ nö in Yāvē söl im inlahen ò nö tōki nö irōi ök chōn. (Hep. 12:2) Ngatī inlahen anga-aṅ nö mameuktö ngam hanangenlōnre tö Yāvē hēk tö ngam minë-eny ò inrē.

13. Kūö yòh ök misī Yēsū nöng anga-aṅ tö mihôiṅ nö hameuknyen ngam Satān nö tö minyôny-aṅ? (Ngëichkö ngam nyat.)

¹³ Löktö in minë tinrīkenre ang Yēsū nö hameuknyen ngam Satān nö tö minyôny-aṅ, rö-ö nö Yāvē! (Yôh. 8:44) Öthěng tak tö sā Yēsū nö keuheūtlöre mikahkūö tö inlahen Yāvē. Yēḵ minë ṙô ngam Satān öre nö tökô-en ngaich akahakūö öre ang Yēsū tö u. Akahakūö pöri anga-aṅ tö u nö töng minyô-ny, lökten ò nö lāritö Yāvē, ngaich iṙūöhen nö ha-etlö ngam minënyö ò. Ik sā ò hē e nö akahaiṙen tö Yāvē nö ṙāngen ò, ik sā ò nö kilöllöng nö irōi ök chōn, ngaich sön anga-aṅ nö öt heūlngöre nö kē-ěng nômöre. Söl manāngen ngam nômöre anga-aṅ nö köp nö in Yāvē.—Mët. 27:46.c

“NGAM LA-EN KINË-EKŪÖ CHU TÖ MEH HATEUNGNGEN E CHIN NGAICH”

14. Asuh öp taneungen Yēsū raneushö ò nö chiplö nö in Yāvē?

¹⁴ Urēhěkūö kinpahare ang Yēsū ik töhěng hatööm nö ngöṙô nö vë-ekūötēv nö in Yāvē, “Ngam la-en kinë-ekūö chu tö meh, hateungngen e chin ngaich.” (Yôh. 17:4, 5) Ṙatö-ellōnre misī ang Yēsū nö in Yāvē tö ò min nö öthō nö öt kētö raneushö ngam chaniplen ò, ngaich kô-en ang Yāvē nö ngatī inlahen. Öt höng ṙāngen Yēsū anga-aṅ nö el anūlö, pò ò nö hachohlen ò hēk kētö kamngö chūök ò inrē nö el halīöngö. (Inl. 2:23, 24; Filip. 2:8, 9) Unôichngöre ang Yāvē nö vīlen ò nö rācha ngam Pūlngö ò. Asuh min öp la-en ngam Pūlngö? Ngöṙô ang Yēsū nö vë-ekūötēv, “Yih an yēḵ ngam Pūlngö meh. Sā nup lōn meh ngaich nö teung nö el halīöngö, ngatī nup yēḵ nö teung kuilōn meh [kuilōn Yāvē] nö ing panam.”—Mët. 6:10.

15. Asuh öp min la-en Yēsū?

¹⁵ Ip yamih min ṙētak ang Yēsū nö kiyung ngam kinyūngö Armakētòn nö ha-etngen yip tö kunyaha elmat tö Yāvē hēk yip tötlöök inrē tarik. (Inm. 16:14, 16; 19:11-16) Unôichrit e min ang Yēsū nö sukten ngam Satān nö el ngam “ṙeūvö töt lātaṙeū-evö” öp chūök ò min nö haköövö. (Inm. 20:1-3) Ngaich kētö ngam lanāmö min ang Yēsū nö keuheūtngöre chūök nö ing panam im töhěng köiny samyeūyeu inyööngö tö ò hēk ṙòkhöre min më tarik nö het ip hē e. Hachohlen yip tökapah min anga-aṅ ngaich vī ngam panam min nö peretāis. Ngaich möl min nö teungtakūö ngam kuilōn Yāvē, ngam kuilōn ò misī nö ing panam hēk in më tarik inrē.—Inm. 21:1-4.

16. Asuh öp min inlahen im manāngen ngam töhěng köiny samyeūheu inyööngö tö Yēsū?

¹⁶ Hö-öv min ngaich ngam tökööl im manāngen ngam inyööngö tö Yēsū im töhěng köiny samyeūheu. Öt lōnu inrē min ngaich ayī-ö tö inṙē-ěl minë tököölre. Ötrēhěn inrē min öi lōnu tö mahayööken re öi haköp ngam innôlöre in ngam Tēv hēk ötrēhěn inrē öi lōnu tö kūönṙô. Ngaich min nö ha-ëti ngam ‘kinpaha ngam kunyaha elmat hī’ lömöktö in Ātöm. Rö-ö nöng angū-ö, pön ṙòkhöre min nup anūlö nö öt aṅhav. Pò yip tökapah min nö hachohlöng. Ngaich ṙòkhöre min yip tarik ikūö ngih panam nö hetlöre.—1 Kòr. 15:25, 26.

17-18. (a) Asuh öp min unôichrit ngam töhěng köiny samyeūheu inyööngö tö Kristū? (b) Asuh öp min inlahen Yēsū unôichrit ngam töhěng köiny samyeūheu inyööngö töre? (1 Kòrin 15:24, 28) (Ngëichkö ngam nyat.)

¹⁷ Asuh öp min inlahen unôichrit ngam töhěng köiny samyeūheu inyööngö tö Yēsū? Töt insā-av öp min ṙētak ip hē e. Hē e min nö ha-etlö ngam minë-eny Yāvē. Ngam tö söklöre hē e intöönö im inlahen ngam minë-eny Yāvē, hetlö min angū-ö. Kūö yòh ayī-ö mihôiṅ öi ngatī ṙô? Köplōn man tö ṙô ngam Satān hē e nö el ök panò-òṅ Ēten nö sūöchken Yāvē nö tö minyòny-aṅ, töt akaha nö rācha hēk töt hangenlōn inrē tö më tarik. Löktökūö ik hē e pöri söl ing töngamuh nö pōyen më tarik tö hangenlōn tö Yāvē nö ha-etlö ngam minë-eny ò. Im manāngen ngam töhěng köiny samyeūheu Kristū min ang Yāvē nö nö ha-etlö ngam minë-eny re, ngaich örheūheu min anga-aṅ nö hameuktöre nö tö hangenlōn nö inyööngö.

¹⁸ Unôichngöre min angū-ö nö hameuknyö minë minyòny-aṅ ngam Satān nö sūöchlö fālen Yāvē. Yěn keuheūt min ngam töhěng köiny samyeūheu inyööngö tö Yēsū, ngaich asuh min öp inlahen ò? Sā inlahen ngam Satān hòng min anga-aṅ nö halôngö chööngö Yāvē? Hö-ö öt ngatī. (Vë-evkūö 1 Kòrin 15:24, 28.) Pön havanten ngam inyööngö min anga-aṅ nö eltī ngam Yöngre ang Yāvē ngaich elkatòh chööngö ò. Höltö ṙanamlōnre min anga-aṅ nö kētö minë taṙòkhöre nö in Yāvē pò ò nö hangenlōn takô tö ò.

19. Sitih mat ök misī Yēsū tö ngam minë-eny Yāvē?

¹⁹ Ngaich in taheui akahakūö töp lāinyngen Yāvē nö kūö yòh nö kētö ngam minë-enyre nö in Yēsū. Lamöktö in Yāvē misī ang Yēsū nö yih hēk kô-en inrē nuk la-en ò nö sā ngam minë-eny Yāvē. Sitih mat pöri anga-aṅ tö ngam minë-eny Yāvē? Mötlö hanangenlōn anga-aṅ tö ngam minë-eny ngam Yöngre tö nup tö sitih chehen. Lökten anga-aṅ nö uroh nö kēngö nômöre nö pòkūö e hēk unôichrit kinheūten ngam töhěng köiny samyeūheu inrē min anga-aṅ nö havanten minë taṙòkhöre nö in Yāvē. Ngih pöri intöönö sitih inlahen öi mihôiṅ ayī-ö asīnken Yēsū? Ip yamih ātiköl min öi kakken e.