Sitih Inlahen Tī Öi Mihôiṅ Kētö Tövai Inlēnö?

1. La-en chīö öng ngam kinëtö inlēnö hēk kūö yòh.

TÖ ÖÖIRE öm më-eṅ öm kētö inlēnö yip tahëng? Pōyen yip tarik tö ööire nö ngatī inlahen, rīkre pöri yip tö piyū-en nö ngatī inlahēn. Pön öt akaha elmat cha-a töp inlahen ṙôre min nö halēnö cha. Pòrô pöri nö öp tö yòh, hòṅ töt ṙanāngen ngam inlahen hī öi kētö inlēnö yip tahëng, pön la-en hī angū-ö öi ṙòkhöre. Kūö yòh nö ngatī? Pön ngatī ṙô misī ang Yēsū nö vënyö inlahen hī min yěi hangenlōn tö höö, ngaich minkahngö hī min angū-ö öi tökô-en Kristīön. (Yôh. 13:35) Mahameuktö hanangenlōnre min ayī-ö tö më prötör sistör re yē hī öi kētö minë tötṙanāngen inlēnö cha. Rö-ö nöng angū-ö pön ngö kinūichngö angū-ö nö im ṙô ngam Tēv tö inlahen hī yěi kētö nup ‘tölöng hēk tökô-en inlēnö’ öi in yip holre, ngaich angū-ö min mahangön ngam innôlö hī öi in cha.—Inch. 27:9.

2. Asuh öp tö hòṅ heuneū-en më minṙöinylen ngaich kūö yòh? (Ngëichkö ngam pòks “Kētö Inlēnö Löktö El Minë Tö Kēkaṙen Mīting Elhôi Ngam Afta.”)

² Möthë nö in më minṙöinylen nö tötṙanāngen ngam inlahen cha nö tö hòṅ heuveū-en nö im kinëtö inlēnö yip tahëng. Ṙën angū-ö nö ngatī, pön lökten in Yēsū tī misī ang Yāvē nö kē-ěkūö cha tö ngam la-en cha nö sā inlahen yōm sīṅp nö meukṙen ngam māṅ. (1 Pīt. 5:2, 3) Ṙōlkangen nun minë inlahen cha nö ngatī inlahen, sā ngih töhěng, tö cha ṙung nö kētö inlēnö ngam māṅ nö kētö minë minkahten lamöknyö mat ngam Paipöl. Halēn yip prötör sistör ṙung cha-a yip tö hòṅ lōnu tö inlēnöre hēk hayööken yip tarik inrē cha-a nö havantöre nö in Yāvē yip ṙamūöhngöre sin tö ò. Ngamuh pöri intöönö sitih inlahen öi mihôiṅ ayī-ö hēk tö më minṙöinylen öi kētö tövai inlēnö yip tahëng?

3. (a) Sitih inlahen öi mihôiṅ harūnöre vayö tī kētö inlēnö? (Ngëichkö ngam pòks “Asīnken Yēsū Im Kinëtö Inlēnö” Isayā 9:6.) (b) Asuh öp min kahakkö hī ing ātiköl?

³ Yöölen in min yěi haköp inlahen më tarik aṅ mat ngam Paipöl më tö vayö tī misī nö kētö inlēnö yik tahëng, tö sā ṙēngen Yēsū. Nuk invëka Yēsū misī, ngaich hěng ngam in u invëkö ò ngam tö ngö ‘töt insā-av nö mahalēn.’ (Vë-evkūö Isayā 9:6.) Mikahtökūöre min ayī-ö in ngih ātiköl töp tö hòṅ inlahen hī yěn havëkö inlēnöre yip tahëng nö in hī hēk yěn öt lōnu inrē cha-a tö inlēnöre, ngaich sitih inlahen mihôiṅ ayī-ö öi rēhěre öi kētö inlēnö cha. Mikahtökūöre inrē min ayī-ö nö tötṙanāngen ngam inlahen hī öi löngö ṙētak hēk löngö inlahen tī inrē öi kētö inlēnö.

YĔN LŌNU YIP TAHËNG TÖ INLĒNÖRE NÖ IN HĪ

4-5. Asuh öp tö hòṅ afēkö hī urēhěkūö hī öi kētö inlēnö öp holre? Kētö ngam töhěng inchōḵ elmat.

⁴ Yěn havëkö inlēnöre yip tahëng nö in hī, ngaich hòṅ sitih inlahen ayī-ö? Pi-a min ayī-ö öi pōyen mufē hēk hòṅ ilööṙen inrē öi hayööken ò. Hòṅ rahëichtakūö pöri ayī-ö öi fēkö inlahen e öi ngöṙô, ‘Heuveū-en öich chū-ö min öich kētö tövai inlēnö ò öich i alaha ngam inlahen chūök ò nö hòṅ halēnö? Hēṙu ön ngam inlahen hī nö tövai yěi ui kētö inlēnö ò, hayööken ò pöri nö chöh öp tahëng tak tarik öp tö heuveū-en min nö mihôiṅ nö halēnö ò.

⁵ Töi chumkūöṙen tö ngih töhěng inchōḵ elmat. Yēḵ öp töhěng tak hol meh öre nö vahavö töp tökiröng invah. Ngaich mikahtökūö anga-aṅ tö nup tö ṙōlkangen inlahen ò nö le-ënö, ngaich hatöönö meh anga-aṅ nö asuh öp min tölöng inlahen lin-ënö ò. Lohten nö hěng öp ööilōn meh min inlahen line-ënö ò. Hö-ö pöri më-eṅ öm tòktör ötrēhěn inrē öm tö kētu trēning öm i alaha e. Asuh pöri öp tövai min inlahen meh? Tövai ngam inlahen meh yēḵ meh min hayööken ò, öm chöh öp tarik tö heuveū-en min nö le-ënö ò.

6. Kūö yòh nö tövai ngam inlahen hī urěh afītöre yěi hòṅ kētö inlēnö öp holre?

⁶ Yěi pòrô öi ngölōn töre öi heuveū-en kētö inlēnö öp holre i alaha öp töhěng inlahngen. Sön pöri nö tövai min ngam inlahen hī yěi afītöre urēhěkūö re öi kētö inlēnö ò. Kūö yòh? Ngöṙô ngam futnōt im Inchōḵ-oṙô 15:28, ‘Chumkūöṙen ngòh tölöök tarik nö afītöre tö inlahen ṙôre min nö kētö sanapṙô.’ Yēḵ hī pöri öi ngöṙô lōn tö hī öi akahakūö tö öp ṙôre min öi sapṙô ò, ngaich asuh mihôiṅ öp inlahen hī? Mihôiṅ ayī-ö öi kēnyö ṙētakre öi rīsörch, vë-ekūötēv hēk afītöre inrē töp tö hòṅ ṙôre min öi in ò. Ngaich hē e min ayī-ö öi ṙūöhlöre ṙinatö-ellōn tö nup ṙô hī min öi kētö inlēnö ò, nö tö sā kuilōn Yāvē anū-ö. Mihôiṅ in haköplu öi lökten im inlahen ök pròfět Natān.

7. Asūp haköplö meh im inlahen pròfět Natān?

⁷ Hěngheuh ök Rācha Tāvit nö vë-enyre nö in pròfět Natān töre nö hòṅ vīlö ngam chūök vinë-ekūö Yāvē. Höng ilööṙen ang Natān nö kētö inlēnö ò nö tölṙô ò nö ngatī inlahen. Hòṅ urěh öre ang Natān nö hatöntöre nö in Yāvē. Kūö yòh? Pön öt lōnu hē e ang Yāvē tö Tāvit nö anga-aṅ vamī ngam chūök vinë-ekūö ò. (1 Kin. 17:1-4) Asuh öp pökeh haköplö hī öi lökten in ngih inlahen? Yěn hěngtak öp hol hī mahavëkö inlēnöre, ngaich tövai ngam inlahen hī yěi ‘ui kuraten im ṙinò-ò.’—Yāk. 1:19.

8. Vënyö öp ihih hēk töhěng lāinyngen hī öi hòṅ chumkūöṙen tö öp ṙôre urēhěkūö hī öi kētö inlēnö öp holre?

⁸ Chumkūöṙen hēk tö ngih töhěng lāinyngen hī mihôiṅ öi kūö yòh hòṅ chumkūöṙen takô öi afēkö öp ṙôre urēhěkūö hī öi halēn öp holre. Afītöre man yēḵ meh öre öm kētö inlēnö öp holre öm höng öt urěh afītöre tö öp ṙôre, ngaich mihôiṅ min anga-aṅ nö vaichö kahë tö fësla hēk kihngenre inrē min anga-aṅ. Ngaich rö-ö nöng anga-aṅ min tö tī-iv tö e nö ngatī pöm më-eṅ inrē.

YĔI RĒHĔRE KĒTÖ INLĒNÖ YIP TAHËNG

9. Asuh öp tö hòṅ mikahkūö më minṙöinylen urēhěkūö cha nö kētö inlēnö öp tarik? (Kalatī 6:1)

⁹ Hēṙu yin ṙung më minṙöinylen nö hòṅ rēhěre nö kētö inlēnö öp prötör hēk töp sistör öp ‘tövāichö kahëken tö la-en.’ (Vë-evkūö Kalatī 6:1.) Ngö kinūichngö ön nö im istötī nōt ngam Ingki Paipöl, ‘Lohten öp tarik nö öl nö teungten nö kēken ngam tökiröng falēn, ngaich pöri anga-aṅ nö kū-ö tö in e.’ Ma-ainyre yin ṙung më minṙöinylen nö hayööken ngam tarik nö köp nö lök im talöökö ngam nômö tö örheūheu aṅ. (Yāk. 5:19, 20) Hòṅ mikahtökūöre pöri cha-a tö ò yěn kô-en nö vaichö kahëken tö la-en urēhěkūö ò nö kētö inlēnö ò. Yēḵ cha min nö öt ngatī inlahen, ngaich höng töng yanëḵngen min ngam inlahen cha nö halēnö ò. Hòṅ köpölōn cha-a tö Yāvē nö kē-ěkūö ngòh töhěng tak tarik tö kanahngen ò nö mihôiṅ nö asā ṙô ngam elkuilōnre nö kē fëslare. Töp lökten e min nö öt tö ngö manah tö nup töng kahë ngam tarik min fësla, ngaich tövaich min anū-ö nö ikūö Yāvē. (Rōm. 14:1-4) Afītöre pöri më-eṅ tö inlahen ngam prötör yěn kô-en nö vāichö kahëken tö la-en, ngaich kē fëslare më minṙöinylen nö rēhěre nö hòṅ kētö inlēnö ò. Asuh pöri öp tö hòṅ chumkūöṙen cha?

10-12. Hòṅ asuh nup tö hòṅ chumkūöṙen më minṙöinylen yē cha nö rēhěre nö kētö inlēnö öp töhěng tak tarik? Hachō elmat hī. (Ngëichkö minë nyat.)

¹⁰ Öt tö lööṙen ön ngam inlahen meh minṙöinylen yē cha nö rēhěre nö kētö inlēnö yip tahëng. Kūö yòh? Sā ngam ṙô Pôl nö ngö ṙô, lohten öp tarik nöng öt akahaiṙen töre nö kēken tövaich la-en. Urēhěkūö më minṙöinylen pöri nö kētö inlēnö öp tarik, ngaich mihôiṅ cha-a nö halēn ngam ellōn ò.

¹¹ Yē hī rēhěre kētö inlēnö yip tahëng, ngaich sā ṙēngen öp tameūich ayī-ö öi el öp töngëḵ tumlat. Kò-òren öi chumkūöṙen tö inlahen ngòh tameūich ṙung urēhěkūö ò nö teūich. Urěh ṙung anga-aṅ nö ul ngam tumlat ngaich halēnö e hòṅ e nö ayëṙa, ngaich lööṙen tī min anga-aṅ nö teūchtö ngam kulöl. Unôichrit inlahen ò nö teūchtö ngam kulöl, ngaich ṙösö e anga-aṅ tö mak, hòṅ e nö meunylö. Ngatī inlahen ngòh minṙöinylen yěn hòṅ rēhěre nö halēn öp tarik, ngaich hòṅ urěh anga-aṅ nö halēn ngam ellōn ngam tarik. Tö sā inlahen ò nö mihôiṅ nö hökkö öp tövai ṙētakre. Unôichrit e anga-aṅ mihôiṅ nö löktö in nup ṙô re nö kētö ṙinatö-ellōn ngam tarik töre nö chumkūöṙen tö ò hēk hòṅ vë-ekūö ò. Yěn tövaiyö minënyi ngam mahalēn nö ikūö yip tahëng hēk akahakūö më prötör sistör tö ò nö hangenlōn takô tö cha, chumkūöṙen inrē tö cha, ngaich lööṙen min cha-a nö hang nup inlēnöre kahëtö ò.

¹² Yěn ṙònghöichṙen më minṙöinylen nö vë-ekūö ngam tarik ngaich hē e cha-a mihôiṅ nö kalahkenre nö vī ngam ellōn ò ngam tö sā tumlat nö ayëṙa. Mihôiṅ cha-a nö vë-eny nang ò tö hī öi ṙòkhöre hēṙu vaichköre inlahen, ngaich hòṅ lōnu tö inlēnöre. (Rōm. 3:23) Ngaich unôichrit e më miṙöinylen nö holtö ṙanëmenre hēk minlēṙenre nö vë-eny nang ò nö löktö in minë lökngörit chööngö aṅmat ngam Paipöl tö ò nö vaichö kahëken tö la-en. Yěn hō-en ngam vanaichöre min ngam prötör, ngaich sā ṙēngen tö mihôiṅ min më minṙöinylen nö “teūichtö ngam kulöl,” tö ngö manah mihôiṅ cha-a nö vë-eny nang ò töp tö hòṅ inlahen ò yěn hòṅ halööktitre. Unôichrit e min më minṙöinylen nö “mihôiṅ nö ṙöstö mak” tö ngö manah mihôiṅ cha-a nö eū nup tövai la-en kahëken ngam prötör, ngaich holṙô ò nö vë-ekūötēv.—Yāk. 5:15.

13. Sitih inlahen aich mihôiṅ më minṙöinylen nö mikahtökūöre töp tarik yěn ngaich nö akaha elnang tö nup ṙô cha nö halēnö ò hēk yěn hö-ö?

¹³ Hēṙu yin mihôiṅ më minṙöinylen nö öt akaha elnang tī tö yip tarik töhalēnö tö cha hēk vaichö mikah elnang inrē tö nup ṙô cha. Asuh pöri mihôiṅ öp inlahen më minṙöinylen? Mihôiṅ cha-a nö holtö mikah elmatre nö hatönö ò unôichrit inlahenre nö halēnö ò. (Mum. 12:11) Ngaich löktö in nup sanapṙô ngam tarik min cha-a nö akahakūö tö ò yěn ngaich nö akaha elnang tö minë ṙô cha nö halēnö ò hēk yěn hö-ö.

LÖNGÖ ṘĒTAK HĒK LÖNGÖ INLAHEN TĪ ÖM KĒTÖ INLĒNÖ

14. Tövai öng min ngam inlahen hī öi halēn yip tahëng yěi höng īnu töm tanāinyö? Mikahtö elmat hī.

¹⁴ Ṙòkhöre in ayī-ö tarik öi töt het, lökten ṙung öi ṙōlheuh haṙivlōn tī tö yip holre, tö kūö nup ṙôre hēk inlahenre. (Kòl. 3:13) Ngö ṙô an ngam ṙô ngam Tēv tö hī ṙung hēṙu vīlö tanāinyö höö. (Efi. 4:26) Hòṅ chumkūöṙen pöri ayī-ö tö inlahenre öi ötkô halēn yip tahëng yěi īnu töm tanāinyö. Kūö yòh? Ngö ṙô an ngam Paipöl, “Pò ngam lanīnö ngòh tarik nö öt ṙūönyö ngam lanöökö ngam Tēv.” (Yāk. 1:20) Yěi īnu min töm tanāinyö öi halēn yip tahëng, ngaich höng ṙūöhlöre kanihngen hēk min ayī-ö. Öt tö ngö manah pöri angū-ö tö hī ötkô hēk öi vë-ekūö öp tarik öp tö līnö tī tö hī. Tövai pöri min ngam inlahen hī yěi hökkö lanāmta ngam tanāinyö re, ngaich möl öi vë-ekūö öp holre. Pōyen haköplö in mihôiṅ öi lökten in Elihū ngam kamëtö tövai misī inlēnö Yōp.

15. Asūp haköplö hī löktö im inlahen Elihū? (Ngëichkö ngam nyat.)

¹⁵ Ṙōl sumkam ang Elihū nöng hangihtöre tö ṙô Yōp nö sapṙô yik holre samūöchkö falēnre. Aṙē-ělōn ang Elihū nö meuk inlahen ò. Hěnghöre tainy pöri inrē anga-aṅ nö in ò, pò ò nöng ilök ṙôre nö kakkö inlahen Yāvē, ngaich höng yahlö mat inrē nö ngëichköre. Sön pöri ang Elihū nö hökkö ngam tövai ṙētakre nö ṙò-òv, ngaich hē e anga-aṅ nö holtö hanangenlōnre hēk minlēṙenre nö halēnö Yōp. (Yōp 32:2; 33:1-7) Hěng ön ngam töt ṙanāngen haköplö hī öi lökten im inlahen Elihū. Tö hī öi hòṅ löngö ṙētak hēk löngö inlahen tī öi halēn yip holre, tö ngö manah hòṅ holtö hanangenlōnre hēk minlēṙenre öi halēnö cha, ngaich möl min cha-a nö yöölen.—Mum. 3:1, 7.

ÖRHEŪHEU HALĒN HĒK HŌ-EN NUP INLĒNÖRE

16. Asūp haköp hī löktö im Salmai 32:8?

¹⁶ Ngö ṙô ön ngam miröökö lökngörit ngih ātiköl tö, ‘Yāvē nö tēlta mat nö ngëichken hī ngaich ngatī inlahen nö halēnö hī.’ (Vë-evkūö Salmai 32:8.) Löktö in e mikahkūö ayī-ö tö Yāvē nö örheūheu nö hayööken hī. Rö-ö anga-aṅ nöng halēnö hī pön mikahtö elmat hī inrē töp tö hòṅ inlahen hī öi hang minë inlēnö. Töt insā-av takô anga-aṅ nö inchōkūö hī! Ta-a chěi töi asīnkö inlahen Yāvē inrē ayī-ö yěi halēn yip tahëng ngaich chumkūöṙen ayī-ö tö cha, iṙūöhen öi hayööken cha öi asā öp kanò-òre, hòṅ cha nö löngö kahë min tö fëslare.

17. Sā inlahen yòh aich më minṙöinylen yē cha nö löknyö mat ngam Paipöl ṙô nö kētö minë töt ṙanāngen inlēnö? Mikahtö elmat hī. (Isayā 32:1, 2)

¹⁷ Töt ṙanāngen ön töngamuh ngam inlahen hī öi hòṅ kē nup tövai inlēnöre in yip tahëng hēk kētö nup tövai inrē inlēnö cha. (2 Tim. 3:1) Yip minṙöinylen kamëtö minë töt ṙanāngen inlēnö hī nö löknyö mat ngam Paipöl, ngaich sā ṙēngen öp ‘tahël cha-a öp mi-ikūö öp tö nyôṙökūö panam.’ (Vë-evkūö Isayā 32:1, 2.) Rö-ö yin nöng hol hī nöng hamang ṙô hī, pön kētö inlēnö hī cha-a tö minë töt ṙanāngen inlēnö tö hòṅ taneūngen hī. Töpōiṙāi nö inlōnti hī minë ṙô cha nö sā ṙēngen nup ‘humlum ṙòng chōn nup më-el öp chantī kuvòkö.’ (Inch. 25:11) Ta-a chěi töi haköp ngam inlahenre öi kētö tövai inlēnö yip tahëng hēk chumkūöṙen inrē öi hang nup tövai inlēnö kahëtö cha.