Sitih Inlahen Öi Kò-òren Mihôiṅ Tö Minë Tötlöng Kuilōnre?

1. Asūp ihih tö hòṅ la-al hī öi ṙòkhöre?

HĒṘU öm ṙung më-eṅ hòṅ kalē-ě lōn öm kētöre inup la-en töt ööilōn Yāvē? Yěm heūṅ, ngaich um haṙivlōn. Tön ngö ṙô an ngam Paipöl, “Öt ōtngöre kinlaha chamuh ikui yīö nö töt teung nö ikui yip tahëng tarik.” (1 Kòr. 10:13) Tö ngö manah, tö meh öm rö-ö höng hěngtak öm lama-al minë tötlöng kuilōnre, ōt inrē yip tahëng tö sā meh nö la-al u. Ṙamlōn pöri ayī-ö tö Yāvē nö hayööken meh öm mihôiṅ la-al u.

2. Asuh nup ihih mihôiṅ tötlöng kuilōn la-al më rīkre Kristīön hēk më rīkre Paipöl istuten? (Ngëichkö minë nyat.)

² Ngö kinūichngö angū-ö inrē nö imat ngam Paipöl, “Kalaha pöri ngòh tarik, yĕn tūöki anga-aṅ töp lōnre, ngaich hachōḵoyö.” (Yāk. 1:14 ) Mihôiṅ in halō-oikūö tö minë töṙōlkangen tötlöng kuilōnre. Tö sā ngòh töhěng tak prötör nö mihôiṅ nö yīhi kuilōn töre nö hòṅ asěhken öp töhěng tak kikānö. Ngatī ngam tahëng prötör nö mihôiṅ nö yīhi kuilōn nö hòṅ asěha nö i kikōnyö nöng kikōnyö. Ngòh mameuk minë tötlöng tö meūkö sin ik urěh, ngaich mihôiṅ hēk min anga-aṅ nö lōnu töre nö hòṅ havantenre nö meukö u. Hēk yip kamë ngam tröks sin hēk tö pōivat nö òk ka-eūt mihôiṅ min cha-a hēk nö kuyulōn töre nö kēken u. Höng rīkre nun taheui minë tötlöng kuilōn tö kakka tö hī, minë yamih mihôiṅ nö elkuilōn ngòh töhěng tak Kristīön hēk töm Paipöl istuten, nö mihôiṅ nö halō-ongkūö ò. Ōt pöri inrē nup ihih tötlöng kuilōn tö hòṅ la-al ngòh töhěng tak tarik. Kô-en in ṙung hēṙu öi sā mufē tanīnöṙô Pôl, “Yēḵ Chu öich hòṅ löökö la-en ngaich kôtökūö Chū-ö tö ngam tökööl nö el alaha chu.”—Rōm. 7:21.

3. Yěn ṙōlheuh minë tötlöng nö yih nö elkuilōn ngòh töhěng tak tarik, ngaich sitih lōn mihôiṅ min anga-aṅ?

³ Yěn ṙōlheuh nö yih minë tötlöng nö elkuilōn meh, ngaich lohten min më-eṅ öm ngö lōn töre öm ötkumlē-ěvö öm la-al u. Lohten inrē min më-eṅ öm ngö lōn tö Yāvē nö öt hō-en meh hēk öt kē-ěkūö meh töm nômö tö örheūheu aṅ. Tövaich pöri në tö ngatī mufē meh. Ṙūöhtö mikahkūöre in min tö inlahen e öi löktö in në tönët intöönö in ngih ātiköl: (1) Asūp mihôiṅ lāinyngen meh öm ngö lōn töre öm töng öt kalē-en hēk töt hō-ovö tö Yāvē? (2) Sitih inlahen öm min mihôiṅ öm la-al minë tötlöng kuilōnre?

ASUH ÖP IHIH KINËHÖT ṘINATÖ-ELLŌN HĪ TÖM SATĀN

4. (a) Kūö yòh öng ngam Satān nö lōnu tö hī öi ngö mufē töre öi ötkô öi la-al minë tötlöng kuilōnre? (b) Kūö yòh öi mihôiṅ ngöṙô töre öi heuveū min öi la-al minë tötlöng kuilōnre?

⁴ Yěn ōt nup tötlöng kuilōn mahalō-ongkūö meh, ngaich lōnu ngam Satān tö meh öm ngö mufē töre öm öt kumlē-ěv la-al u. Akahakūö misī ang Yēsū tö e, lökten ò nö haruntö ṙô yik haköptöre nö ngö ṙô nö vë-ekūötēv, “Yěn yih nup kinlaha nö ikui ih, ui halöngtuṙen öi fukngö, laklen ih pöri tö ngam Satān.” (Mët. 6:13) Vënyen ngòh töhěng tak tarik an ngam Satān nö ṙāngenre min nö löklōn Yāvē yē ò nö halō-oikūö. (Yōp 2:4, 5) Hö-ö pöri angū-ö nö kô-en nö ngatī, pön höng ngam Satān hē e tö lō-ongkūö tö kūö minë tötlöng kuilōnre, öt laklöre anga-aṅ tö u lökten nöng vönhöt nö in u, ngaich ötköp nö löklōn Yāvē. Lökten anga-aṅ nö ngö mufē tö hī öi ṙāngen Yāvē min yěi halō-oikūö. Ngatī mufē inrē anga-aṅ nö in Yēsū tö ò min yěn halō-oikūö, ngaich filal minë chööngö Yāvē min anga-aṅ, pòrô anga-aṅ nö töhet. (Mët. 4:8, 9) Afě-a man: Kô-en öi pökeh ayī-ö öi töt kalē-ěn öi öt heuveū öi la-al minë tötlöng kuilōnre? Hö-ö ön nö ngatī! Ngö ṙô ang Pôl, ‘Lökten ngam kamëtö kumlēḵ chu löktö in e chū-ö öich teūngen tö kumlēḵre öich inup tökeuheūttöre.’ (Filip. 4:13) Kô-en in öi höng löktö i inyöökenre tö Yāvē öi mihôiṅ la-al minë tötlöng kuilōnre.

5. Kūö yòh öi mihôiṅ ngö ṙô tö Yāvē nö ṙatö-ellōnre tö hī öi mihôiṅ la-al minë tövaich kuilōnre?

⁵ Harīkngöre takô an Yāvē tö ngam Satān. Kirööngen ṙinatö-ellōn anga-aṅ tö hī mihôiṅ öi la-al minë tötlöng kuilōnre ngaich köp öi in ò. Kūö yòh mihôiṅ öi ngatī ṙô? Pön urěhangen tī anga-aṅ nö kūichngö inlahen e nö imat ngam Paipöl tö yip tö chiplö tarik ò min nö laklöre töp tökiröng ötkanòlô, më tökiröng kiteūm tö ṙô hī. Akahakūö in tö Yāvē nö öthō nö minyôny-aṅ. Lökten yěn ngaich anga-aṅ nö ṙò-òv tö inlahen yip tökiröng kiteūm min nö chuh el öp tufömngöre panam, ngaich tö ngö manah angū-ö tö ò nö ṙinatu-ellōn tö më töpōyen min tarik nö ‘söichlö minë tö isoh inyutre nö i mahām ngam kun sīṅp’ hēk kaheūkö inrē min cha-a tö Yāvē nö tölöök. (Inm. 7:9, 13, 14) Akaha elmat in ngaich tö Yāvē nö rö-ö nö ngölōn tö hī öi töt kalē-en. Ṙatö-ellōnre anga-aṅ tö hī öi mihôiṅ öi la-al minë tövaich kuilōnre.

6-7. Asuh öp ihih hēk kinëhöt ṙinatö-ellōn hī töm Satān?

⁶ Hōten hī hēk ngam Satān öi ngö mufē tö hī öi töng öt hō-ov tö ngam Tēv hēk öt teūngen min töm nômö tö örheūheu-aṅ kūö minë tötlöng kuilōnre, kūö hī töthet. Öt kô-en pöri angū-ö nö ngatī, pön höng ngam Satān tö fāluṙen nö imat Yāvē, ngaich anga-aṅ min töt kē-ěvkūö töm nômö tö örheūheu aṅ tö ngam Tēv, ngaich inrē anga-aṅ nö vënyu sācha tö ò. (Ran. 3:15; Inm. 20:10) Öt maheūkkuvö an ngam Satān, lökten anga-aṅ nö ṙānyngö tö hī öi tarik, kūö hī öi maheūkku min töre öi örheūheu öi aṅ. Angū-ö lāinyngen ò nöng minyôny-aṅ nö vīhöt ṙinatö-ellōn hī tö hī öi öt maheūkku kūö hī öi töthet öi tarik. Ngö ṙô an ngam Paipöl tö Yāvē nö hòṅ hayööken hī, hòṅ hī min örheūheu öi aṅ. Ngö kinūichngö an, ‘Öt lōnu anga-aṅ tö töhěng hang tak nö kapah hōtö taṙòkhöre pöri nö teūngen tö ṙētakre nö im invöötö ellōn.’—2 Pīt. 3:9.

⁷ Yē hī min ngölōn töre öi öt kumlē-ěvö öi la-al minë tötlöng kuilōnre hēk ngölōn töre öi töng öt hō-ov tö Yāvē, ngaich minhôiṅyö ngam Satān min angū-ö. Kūö yòh nö ngatī? Pön angū-ö lōn ngam Satān tö hī öi ngatī mufē. Ngaich in öi akahakūö tö e lökten ta-a töi holtö kumlēḵ alahare öi la-al ò.—1 Pīt. 5:8, 9.

ASUH NUP MIHÔIṄ MUFĒ HĪ KŪÖ HĪ TÖTHET?

8. Tö sitih manah öng ngam tökööl? (Salmai 51:5) (Ngëichken ngam “Asuh öp manah e”.)

⁸ Ngaich in taheūi öi meuk inlahen ngam Satān nö lōnu tö hī öi ngö mufē tö hī öi ötkô öi la-al minë tövaich kuilōnre hēk töng öt hō-ov tö Yāvē. Hěng pöri hēk ngam lāinyngen hī mihôiṅ öi ngatī mufē. Asuh angū-ö? Teūngen ayī-ö töm tökööl öi lökten in nā Ātöm nā Ēva.a Ngaich mihôiṅ min ayī-ö öi kūö ngam tökööl öi ngatī mufē.—Yōp 14:4; vë-evkūö Salmai 51:5.

9-10. (a) Asūp lanökngöre nā Ātöm nā Ēva töm tökööl? (Ngëichkö ngam nyat.) (b) Asuh nup mihôiṅ mufē hī kūö hī īnu töm tökööl?

⁹ Asūp lanökngöre nā Ātöm nā Ēva tö kūö ngam tökööl? Unôichrit inlahen cha nö filal chööngö Yāvē, ngaich hayunngöre cha-a tö ò, ngaich hayunngö ngam alahare inrē. Ngö ṙô ön ngam līpöre Insaet Òn Tī Iskripchörs, “Kūö ngam tökööl cha-a nö ngölōn töre nö [1] öt hō-ov tö Yāvē, [2] paṙūtalōn [3] kihngen ellōn hēk [4] sirōngkūö.” Sā töng haköövö nā Ātöm nā Ēva nö el ngam töfënö uròhò patī. Höng mihôiṅ cha-a nö havötköre nö el minë uròhò, ötkô pöri nö meutnyi töm patī. Tö ngö manah, kūö ngam tökööl cha-a nö hēṙu nö haṙivlōn nö fēken ngam fālenre, kalē-ě pinṙūtölōn, kihngen hēk hēṙu nö sirōngkūö. Ötheūveu inlahen pöri cha-a hē e nö ṙā-anyre töm tökööl.

¹⁰ Hěng ön ngam tö harīkngöre in hī tö nā Ātöm nā Ēva. Öt teūngen min cha-a tö yanöölenre nö lökten im ṙāi ṙinānyi. Mihôiṅ pöri ayī-ö öi teūngen tö yanöölenre öi lökten in e. Mihôiṅ ayī-ö öi teūngen tö inrē-ěl minë tököölre, ngaich holtö hanetö elkuilōnre öi löklōn Yāvē. (1 Kòr. 6:11) Teūngen ayī-ö töm tökööl öi lökten in nā Ātöm nā Ēva, lökten yěi vaichköreṙen, ngaich ngölōn ayī-ö töre öi töng öt hō-ov tö Yāvē hēk kalē-ě pinṙūtölōn, kihngen ellōn hēk sirōngkūö. Ngö ṙô an ngam Paipöl tö hī ‘öi öt sā inlahen Ātöm öi filal ngam chööngö ngaich kēken tökööl,’ sön pöri ngam tökööl nö hayöng nö ikui hī ngaich haköövö ayī-ö tö e. (Rōm. 5:14) Öt tö ngö manah pöri angū-ö tö hī öi ötkô öi la-al minë tötlöng kuilōnre hēk öt hō-ov inrē tö Yāvē. Mihôiṅ pöri nö hēṙu nö yih në tö ngatī mufē nö elkuilōn hī, ngaich mihôiṅ öi haṙivlōn. Asuh pöri mihôiṅ öp inlahen hī?

11. Yěn ngö ṙô ngam ellōn hī nö in hī tö hī ötkô öi la-al minë tötlöng kuilōnre, ngaich asuh mihôiṅ öp inlahen hī hēk kūö yòh? (Rōma 6:12)

¹¹ Kūö ngam tökööl lohten ngam ellōn hī nö ngö ṙô nö in hī öi öt mihôiṅ öi la-al minë tötlöng kuilōnre. Ötkô pöri ayī-ö öi hangṙô e. Kūö yòh? Ngö ṙô an ngam Paipöl tö hī ötkô öi halöngten ngam tökööl nö hayöng nö ikui re. (Vë-evkūö Rōma 6:12.) Tö ngö manah, yěn yih minë tötlöng kuilōn hī, ngaich ötkô ayī-ö öi lök in u öi la-evṙen. Eltī hī angū-ö yěi hòṅ kēken u hēk yěi hö-ö. (Kal. 5:16) Kirööngen ṙinatö-ellōn an Yāvē tö hī mihôiṅ öi la-al minë tötlöng kuilōnre yē u nö halō-ongkūö hī. Yē ò öre nö öt ṙinatu-ellōn ngaich öthō anga-aṅ nö tölṙô hī öi ngatī inlahen öi la-al u. (Chöö. 30:11-14; Rōm. 6:6; 1 Tös. 4:3) In e mikahkūö ayī-ö tö hī öi mihôiṅ öi la-al minë tötlöng kuilōnre.

12. Yěn ngö ṙô ngam ellōn hī tö hī öi öt hō-ov tö Yāvē tö kūö minë tötlöng kuilōnre, ngaich hòṅ asūp inlahen hī hēk kūö yòh?

¹² Ngatī ṙēngen, yěn ngö ṙô ngam ellōn hī nö in hī tö hī kūö minë tötlöng kuilōnre öi öt hō-ov tö Yāvē, ngaich ötkô ayī-ö öi hangṙô e. Kūö yòh? Pön vënyö nang hī ngam Paipöl tö Yāvē nö akahakūö tö hī öi īnu töm tökööl. (Sal. 103:13, 14) ‘Keuheūttlöre mikahkūö’ inrē anga-aṅ tö inlahen hī. (1 Yôh. 3:19, 20) Akahakūö anga-aṅ tö hī öi kūö ngam tökööl öi höng hòṅ kēken minë tötlöng la-en. Yē hī pöri min öi öt halöngngenre öi kēken minë tötlöng kuilōnre hēk ṙūöhngöre töm tökööl, ngaich örheūheu min öi tölöök öi imat Yāvē. Kūö yòh mihôiṅ ayī-ö öi ṙatö-ellōnre tö e?

13-14. Yěn yīhi elkuilōn ngòh töhěng tak tarik tö minë tötlöng ngaich tö ngö manah hòng angū-ö tö Yāvē nö öt ṙamlōn nö in ò? Mikahtö elmat hī.

¹³ Vënyö nang hī an ngam Paipöl nö harīkngöre ngam inlahen hī yěi kuyulōn töre öi kēken nup tövaich la-en tö ngam inlahen hī öi asīnken u la-evṙen. Mihôiṅ në tötlöng kuilōn nö yih nö elkuilōn hī pòrô ayī-ö öi öt lōnu öi kēken u, mihôiṅ pöri ayī-ö öi öt kētöre öi sā minë tötlöng kuilōnre. Yěi ngëichken ngih inchōḵelmat inlahen yik rīkre tarik el ngam māṅ i Kòrin ik raneh senchūri, asěha sin cha-a nö i kikōnyö nöng kikōnyö hēk i kikānö nöng kikānö urēhěkūö cha nö vītöre nö Kristīön. Ngö ṙô ang Pôl nö kakkö inlahen cha, “Ōtre yip in yīö tö ngatī la-en sin.” Tö ngö manah hòng ngaich angū-ö tö cha nö öt hēk nö yīhi elkuilōn tö minë tövaich kuilōn unôichrit cha nö vītöre nö Kristīön? Öt ngatī, pön höng ōt anū-ö nö hayunngöre nö el ngam elkuilōn hī, öt lööṙen ayī-ö öi ṙā-anyre tö u. Mihôiṅ anū-ö nö ṙōlheuh nö yih nö elkuilōn hī. Ṙamlōn pöri hē e ang Yāvē nö in yik Kristīön aṅ Kòrin pò cha nö ṙāpöre nö öt asīnkö minë tötlöng kuilōnre. Hēk ‘het’ cha-a nö imat ò. (1 Kòr. 6:9-11) Mihôiṅ in inrē ayī-ö töngamuh öi het öi imat ò.

¹⁴ Pòrô öp tö sitih tötlöng kuilōn la-al meh, öt löktu man min öm öt mihôiṅ tö e. Lohten man öm öt uroh öm keuheūtnyöre tī öm kēnyen e nö ṙā-ang elkuilōnre, mihôiṅ pöri më-eṅ öm ṙāpöre öm um kētöre öm asīnkö minë “lōn ngam alaha hēk mufē e inrē.” (Efi. 2:3) Sitih inlahen öm mihôiṅ? Ta a töi mikahtökūöre.

SITIH INLAHEN ÖI LA-AL MINË TÖTLÖNG KUILŌN?

15. Asūp mihôiṅ inlahen hī la-al nup tötlöng kuilōnre, ngaich kūö yòh?

¹⁵ Töt ṙanāngen ngam inlahen meh yěm hòṅ la-al nup tötlöng kuilōnre ngaich hòṅ akahakūö më-eṅ töp tötkumlē-ěnre, ngaich um höng hachīlöre tö ‘nup ṙô re.’ (Yāk. 1:22) Tö sā meh yěm töpōivat öm òk ka-eūt, ngaich kakkö inlahen yip tahëng pöri më-eṅ tö cha nö ‘cha-a töpōivat töm nö òk ka-eūt.’ Hēk lohten öm tö ngaich öm pīhövö, ngaich öt ṙāngenre pöri öm meuk minë pòrnokrāfī. Ngaich lohten min më-eṅ öm ngö ṙô hatönöre, ‘Yěn hangenlōn öre ngam pīhö chu kikānö tö chu hēk chumkūöṙen nö ngëichken chu, ngaich kūö yòh min chū-ö öich lōnu töre meuk tötlöng tö meūkö?’ Yěm höng ngatī ṙô min öm in re, ngaich lööṙen min më-eṅ öm kētöre in nup tötlöng la-en. Lökten öm uh rēhěn öm i mufē elkuilōnre öm kē la-a minë tötlöng la-en nö tölöng min anū-ö tö ṙô meh. Hō-en ngam vanaichöre pöri, ngaich halööktitre.—Kal. 6:7.

16. Sitih inlahen öm mihôiṅ hangön ngam kuilōnre öm löngö kahëken tö la-en?

¹⁶ Yē meh öm akahakūö tö nup ötkumlē-ěnre, ngaich tötṙanāngen ngam inlahen meh öm hòṅ hangön ngam kuilōnre öm um kētöre öm in nup tötlöng kuilōn. (1 Kòr. 9:26, 27; 1 Tös. 4:4; 1 Pīt. 1:15, 16) Asuh pöri mihôiṅ öp inlahen meh? Urěh öm mikahtökūöre töp ötkumlē-ěnre. Ngaich ihē angū-ö mihôiṅ nö halō-ongkūö meh. Tö sā meh yěm larāḵ, ngaich hē e hòng min më-eṅ öm halō-oikūö tö nup tötlöng kuilōnre? Hēk el chūölhatööm ṙöng öm hòṅ kuyulōn töre öm la-evṙen tö nup tötlöng? Mihôiṅ më-eṅ öm fēkö öp inlahenre yěn yih minë tö ngatī halat meh. Yěm ngatī inlahen min öm urěhngöre inlahen öm fē-a, ngaich öthō min më-eṅ öm fukta inup kanihngen.—Inch. 22:3.

17. Asūp mihôiṅ haköplö hī in Yôsěf? (Ranehlö 39:7-9) (Ngëichkö minë nyat.)

¹⁷ Ngëichkö inlahen ök pīhö Pòtiför nö ma-ainyre nö halō-ongkūö Yôsěf, ngaich sitih inlahen ang Yôsěf? Ilööṙen anga-aṅ nö sōngen ò ngaich falngöre tö ò. (Vë-evkūö Ranehlö 39:7-9.) Asūp mikahkūö hī öi in e? Tö Yôsěf nö urěhngöre inlahen nö vë-engkūö ellōnre tö ò min nö öt kēken ngam la-en insěha. Ngatī ayī-ö öi hòṅ urěhngöre inlahen öi hangön ngam kuilōnre tö hī min öi sitih inlahen yěi halō-oikūö. Yěi ngatī inlahen min ngaich kēken nup tölöök la-en min ayī-ö yē hī öi kalaha, pöi ngaich öi urěhangen inlahen halēnkö inlahenre öi la-al u.

ÖRHEŪHEU “NGËICHKÖRE”

18. Asūp mihôiṅ inlahen meh yěm hòṅ mihôiṅ tö nup tötlöng kuilōnre? (2 Kòrin 13:5)

¹⁸ Yē hī hòṅ mihôiṅ tö nup tötlöng kuilōnre, ngaich hòṅ örheūheu ayī-ö “ngëichköre.” Tö ngö manah tö hī öi hòṅ kaheuk ṙētak öi ngëichkö nup ötkumlē-ěnre. (Vë-evkūö 2 Kòrin 13:5.) Öi sitih inlahen? Chumkūöṙen tö nup la-enre hēk tö nup mufēre, ngaich yěn ōt tö hòṅ halööktitvö nö in u ngaich halööktit u. Tö sā meh, yěn yih nö elkuilōn meh minë tötlöng la-en, sōḵ pöri më-eṅ öm la-evṙen tö u. Ngaich sön më-eṅ öm hòṅ hatönöre öm ngö ṙô, ‘Iṙôken kahë öich taheūi tö ṙētakre öich sōḵ öich kēken e?’ Yěm pōyen kahë tö ṙētakre ngaich um haṙivlōn. Afēkö öp inlahenre pöri më-eṅ ip tahëng ṙētak hòṅ meh min lööṙen öm ilööṙen öm sōngen nup tö ngatī inlō-ongkūöre. Mihôiṅ më-eṅ öm ngö ṙô hatönö re, ‘Sitih inlahen öich mihôiṅ hēk ilööṙen sōngen minë tötlöng kuilōn yěn halō-ongkūö chu? Hö-ö öich höng kūö minë inṙamlōn kahëkenre öich kihngen sō-en u? Ilööṙen öich ṙung öich havööngökūöre yěn yih nup tötlöng tö meūkö nö ikūö chu? Lōnu an Yāvē tö chu öich ṙāpöre, ngaich ötlööṙen angū-ö, ṙatö-ellōnre hòng pöri chū-ö tö chu min yěich hang chööngö Yāvē ngaich yöölen min chū-ö?’—Sal. 101:3.

19. Asūp mihôiṅ kanihngen hī min yěi kē minë tö kūöṅnö tövaich fëslare?

¹⁹ Chumkūöṙen ngëichköre yē meh öm um höng kē la-a minë tötlöng la-enre öm im elkuilōnre, tö u nö öt uroh nö vaich. Ngöṙô an ngam Paipöl, “Tulöng michīl an ngam ellōn tö taṙòkhöre öt kôlò takô inrē.” (Yar. 17:9) Vënyö nang hī inrē ang Yēsū tö nup “tötlöng mufē” nö löknyö im ellōn. (Mët. 15:19) Töi ngëichkö ngih inchōḵelmat, ngam tarik ṙamāngenre nö meuk ngam pòrnokrāfī, ngaich lohten min anga-aṅ nö unôichngöre nö meuk minë nyat minë töt uroh nö chōich tö lōn ò, ngaich ngö ṙô anga-aṅ nö in re, ‘öt yah ön ngih nyat nö chōichngen, öt uroh inrē cha-a nö hameuknyu nö lichôi.’ Lohten inrē min anga-aṅ nö ngölōn nö fēkö inlahen minë tötlöng la-en, ‘Asuh öp kan vanaichö u? Höng fēken u chin öt rēhěn öich kētöre in u.’ Sā ṙēngen chamöh inlahenre ngam tö michīl ellōn ò nö “hateungngö kuilōn ngam alaha.” (Rōm. 13:14) Sitih inlahen öm mihôiṅ ṙūöhngöre tö e? Köplōn yěm kē nup tö kūöṅnö tövaich fëslare, ngaich mihôiṅ min më-eṅ öm kēkö tökiröng fālen, lökten öm holtö mikah elmatre yěm kē nup töng sitih fëslare.b Um vīkö inlahenre öm hòṅ kēken nup tötlöng la-en, ilööṙen pöri öm sō-en minë ‘tötlöng mufē.’

20. Asūp maheūkkö hī inlahen hī min ip tufömngöre panam, ngaich sitih inlahen ayī-ö töngamuh öi la-al minë tötlöng kuilōnre?

²⁰ Sā haköp hī ngaich tö Yāvē nö kētö kumlēḵ hī öi la-al nup tötlöng kuilōnre. Kiröngen ṙô in öi ha-öiny tī ò pò ò nö halēnlö ngam ṙāi ṙinānyi nö chö-öinyten tö hī, hòṅ hī min öi teūngen töm nômö tö örheūheu aṅ öi el öp tufömngöre panam. Fēkö inlahen hī man yěi el öp tufömngöre min panam, ngaich hö-ö min ayī-ö öi la-al minë tötlöng kuilōnre, pöi holtö ṙanamlōnre min öi löklōn Yāvē. Hanöng saha e pöri nö öl nö yih, ngaich ṙatö-ellōnre ayī-ö tö hī mihôiṅ töngamuh öi la-al minë tötlöng kuilōnre. Ui ngölōn töre öi öt kumlē-ěvö öi la-al u hēk höng öt hō-ov inrē tö Yāvē. Meuk ngam kumlēḵ alaha hī an Yāvē öi la-al u, lökten ò min nö kētö inkòlô e. Ṙatö-ellōnre tö hī öi ötlöktu min öi öt mihôiṅ öi la-al u.