LESÖN 57
Sitih Inlahen Öm Min Yěm Kēken Tökiröng Tökööl?
Kô-en in hangenlōn tö Yāvē lökten öi sō lang miṙivngölōn ò, sön pöri ṙung öi vaichköre inlahen ngaich haṙivlōn anga-aṅ tö tī hī, yěi kēken nup tökiröng tökööl. (1 Kòrin 6:9, 10) Yēḵ hī pöri öi fukngö in ngam tökööl, ngaich hòṅ köplōn ayī-ö tö Yāvē nö ōttit hanangenlōn tö hī, lōnu anga-aṅ tö hī öi havantöre öi in ò. Pön höng hööngöre anga-aṅ nö hòṅ hayööken hī.
1. Hòṅ sitih inlahen ang ngòh tarik yěn hòṅ aṙēḵlöng tökööl tö Yāvē?
Yěn kēken tökiröng tökööl yip tarik, tö hangenlōn tö Yāvē, haṙivlōn hēk sirōngkūö min cha-a nö kò-òren tö nup kahëken re. Höhlö pöri min cha-a tö ngih kinlēḵngô Yāvē, nö ngö ṙô: “Pòrô nup tökööl yīö nö sā töngāṅvö elmat, ngaich anū-ö min nö isoh, sā tökënngöre tacham.” (Isayā 1:18) Yěn kô-en ngòh tarik nö haṙivlōn tö nup tökööl kahëkenre, ngaich aṙēlen ò min ang Yāvē. Sitih inlahen ang ngòh tarik yěn hòṅ aṙēḵlöng tökööl tö Yāvē? Hòṅ haṙivlōn anga-aṅ tö nup fālen kahëken re, ngaich hòṅ ṙāngenre tö u, ötkô hēk anga-aṅ nö kēken u, hòṅ hayāichngöre anga-aṅ nö ikūö Yāvē nö havëkö inṙē-ěl re, ngaich halööktit re tö u. Un haröhtöre inrē nö hēk nö in nup lökngen ò sin nö fukngö. Hang minë töhet inlēnö min anga-aṅ aṅ in Yāvē, kēkö kaha u inrē.—Vë-evkūö Isayā 55:6, 7.
2. Yěi kēken nup tökiröng tökööl, ngaich sitih inlahen ang Yāvē nö löktö in yip minṙöinylen tī nö hayööken hī?
Yěn kiröng nup tökööl kahëken hī, ngaich lēnngen ngam inyööken hī ṙahātö Yāvē. Ngö ṙô anga-aṅ nö in hī “havëkö yip mahaköhöti [minṙöinylen yin] aṅ ngam māṅ” nö hayööken yīö. (Vë-evkūö Yāköp 5:14, 15.) Töhangenlōn yin më minṙöinylen tö Yāvē tö minë sīṅp ò inrē. Akahalōn inrē cha-a tö inlahen re nö hayööken cha, hòṅ cha hēk nö havantö ngam töpasū innôlö re nö in Yāvē.—Kalatī 6:1.
Sitih inlahen aich min më minṙöinylen nö hayööken hī? Lohten nö nët hēk lūöi tak min më minṙöinylen nö yihken hī. Ngaich löknyö mat ngam Paipöl nö mikahtö elnang hī tö ngam la-en kahëken hī nö kūö yòh nö tövaich. Kētö inlēnö hī min cha-a inrē hòṅ hī öi öt hēk öi kēken ngam tökööl. Yēḵ öp tarik pöri kamëken tökiröng fālen nö öt halööktitre, ngaich ha-uknyu min anga-aṅ tö më minṙöinylen nö ṙā-ang el ngam māṅ hòṅ më prötör sistör nö öt lökngöre töm tötlöng inlahen ò.
MIKAHTÖKŪÖRE HĒK
Yěi kēken nup tökiröng tökööl, ngaich sitih inlahen tī ang Yāvē nö hayööken hī? Töi mikahtökūöre tö minë ṙahātö ò inyööken hī hòṅ hī min hameuktö minlēḵṙen re tö u.
3. Yēḵ hī min halööknyôre tö tökööl re lööken min ayī-ö
Yēḵ hī öi kēken nup tökööl, ngaich miṙivngölōn Yāvē ayī-ö tö u, lökten öi hòṅ halööknyö ṙô re tö nup tökööl re öi i kūö ò. Vë-evkūö Inchōḵ-oṙô 28:13, ngaich kakkö ngih intöönö yamih:
Kūö yòh öi hòṅ halööknyö ṙô re tö nup tökööl re öi ikūö Yāvē, ötkô öi hayuntö mat ò?
Yěi halööknyôre min tö nup tökööl re öi ikūö Yāvē, havëkö inyööken re inrē öi in më minṙöinylen ngaich mihôiṅ min öi teūngen tö hanöhlö re. Röngnyöm VITIŌ, ngaich kakkö ngih intöönö yamih.
Sitih inlahen tī aich më minṙöinylen nö hayööken prötör Kēnen nö havantöre nö in Yāvē?
Hòṅ halööknyö ṙô re in tö nup fālen re öi ikūö më minṙöinylen ötkô öi hayunku öi in cha kūö më minṙöinylen nö töṙātu nö mahayööken hī. Vë-evkūö Yāköp 5:16, ngaich kakkö ngih intöönö yamih:
Yēḵ hī öi halööknyö ṙô re tö nup fālen re öi ikūö më minṙöinylen. Ngaich sitih inlahen min cha-a nö heuveū-en nö hayööken hī?
Vënyö minë tökööl re man, halööknyö ṙô re ikūö më minṙöinylen ngaich hō-o minë inyööken re tö tī Yāvē tön hangenlōn an tö meh
4. Hameuktö miṙēlōnre ang Yāvē nö in më tö fāluṙen
Yěn tökiröng ngam fālen kahëken ngam tarik, sōḵ inrē anga-aṅ nö kēkö kaha minë inlēnö kahëtö Yāvē, ngaich ha-uknyu min anga-aṅ tö ngam māṅ, ṙāngenre inrē ayī-ö öi öt hanôlö ò. Vë-evkūö 1 Kòrin 5:6, 11, ngaich kakkö minë intöönö yamih:
Lökngöre tī an ngam töng rahëichyen inföh tö ngam tö kirāchö atra, nö föhlö tī tö e. Ngaich sitih inlahen min ayī-ö yěi höng iṙūöhen öi hanôl öp tarik töt haṙivlōn tö nup tökiröng kahëken re tökööl. Asuh öp min ṙòng e nö el ngam māṅ?
Hameuktö miṙēlōn ang Yāvē tö më tö fāluṙen, kalahtenre inrē më minṙöinylen nö asīnken ò. Chuh in yip tarik cha-a yip tö ha-uknyu tö ngam māṅ nö hayööken cha. Lökten nö ōtre yip mahavan nö el ngam māṅ. Rö-ö cha-a pön haṙivlōn tö inlahenre nö ha-uknyu, fē-ělre pöri cha-a tö minë vanāichöre ngaich havan. —Salmai 141:5.
Ngam inlahen Yāvē nö in më tö fāluṙen, sitih inlahen öi akahakūö tö ò nö tö hangenlōn hēk tö aṙē-ěvlōn hēk töng örheūheu inrē nö löngö la-en?
5. Haṙivlōn ayī-ö tö nup tökööl re, aṙēlen hī min ang Yāvē
Yěn haṙivlōn ngòh tarik tö nup tökööl kahëken re ngaich sitih mufē ang Yāvē? Yěm hòṅ akahakūö ngaich vë-ekūö ngih töhěng inchō-oṙô kahëtö Yēsū. Vë-evkūö Lūkös 15:1-7, hēk ngaich kakkö ngih intöönö yamih:
Asuh öp haköplö meh inlahen Yāvē öm in ngih inchōḵ-oṙô?
Vë-evkūö Isikīěl 33:11, ngaich kakkö ngih intöönö yamih:
Hòṅ sitih inlahen ang ngòh tarik yěn hòṅ hameuktö miṙivlōnre tö nup tökööl kahëken re?
Chumkūöṙen ang Yāvē tö më tarik re nö sā öp tö akaha yōm sīṅp
ṘÔ YIP TAHËNG: “Yēḵ chu min öich vë-eny nang më minṙöinylen tö minë tökööl re ngaich vöö min chū-ö yēḵ chu öich ha-uknyu.”
Yěn ngatī mufē öp tarik sitih ṙô öm min öm in ò?
MINË HAKÖP HĪ NGAICH
Yěn kiröng nup tökööl kahëken hī, haṙivlōn inrē ayī-ö tö minë kahëken re, ngaich pītnyöre öi ui hēk öi kēken u, ngaich aṙēlen hī min ang Yāvē.
Sitih ṙô öm më-eṅ?
Kūö yòh öi hòṅ halööknyôre tö nup tökööl re öi ikūö Yāvē?
Hòṅ sitih inlahen öi yěi hòṅ teūngen tö inṙē-ěl nup tökööl re öi ikūö Yāvē?
Yěn kiröng nup tökööl kahëken hī, ngaich kūö yòh öi hòṅ havëkö inyööken re öi in më minṙöinylen?
NGËICHKÖ NË INRĒ
Ngëichkö inlahen ngam tarik tö akahaiṙen töm miṙēḵlōn Yāvē ngam tö vënyu im Isayā 1:18.
Yěn hěngtak öp kristīön kamëken minë tökiröng fālen, ngaich sitih inlahen më miṙöinylen nö hayööken ò?
Sitih inlahen aich më miṙöinylen hēk tö më prötör sistör nö hameuktö hanangenlōnre hēk miṙēlōnre nö in më töt mahalööktitre?
“Hayööken Yip Tö Ha-uknyu Tö Ngam Māṅ.” (Chūökamahati Òköst 2024)
In ngih Istōri “Hòṅ havantöre chū-ö öich in Yāvē,” Sitih inlahen ngam tarik ṙamāngen Yāvē sin, hēk pöri nö havantöre. Kūö yòh anga-aṅ nö tūöktu tölōn re tö Yāvē nö hēk? Vë-ekūö ngam inlahen ò.
“Vailöre Tinrīken Tīm Paipöl” (Chūökamahati-HI, Chulāi-Septempör, 2012)